7. E Devleso Kraljevstvo isi le pošukar zakonija

O vlastija anena zakonija te šaj e manušenđe te ovel šukar hem te zaštitinen len. Isto ađahar, hem okola so mangena te živinen ko Devleso Kraljevstvo valjani te šunen e Devlese zakonija. Čitinen 1. Korinćanima 6:9-11, hem palo odova vaćeren ando akala pućiba:

• So mislineja, savo ka ovel o sveto ked sa o manuša ka ićeren pe ko Devlese zakonija?a

• So mislineja, da li o Devel isi le pravo te rodel ando pe sluge te ićeren pe ko olese zakonija? Sose mislineja ađahar?

• So mothovi so o manuša kola na ićerena pe ko olese zakonija ipak šaj te menjinen pe? (Dikhen o 11. stih)

But manuša lađana te vaćeren odolestar. Ama, i Biblija phravdo hem ko jekh pristojno način vaćeri kotar akija tema. Odova so i Biblija phenela šaj te pomožini amen. Odova tano ađahar sose o Jehova tano amaro Stvoritelj hem đanela soj tano najšukar amenđe. Ov phenela amenđe so valjani te ćera te ugodina lese hem so ka pomožini amen te živina večno.

1. Sar o Jehova dikhela ko seksualna odnosija?

O seksualna odnosija tane jekh poklon ando Jehova. Ov mangela o rom hem i romni soj tane ko brak te uživinen ko seksualna odnosija. Sebepi odova, on na samo so šaj te ovel len ćhave, već šaj te mothoven so mangena jekh jekhe. Odolese, ko Devleso Lafi pisini: „Ov bahtalo te romnjaja kolaja hijan kotar to ternipe“ (Poslovice 5:18, 19). O Jehova rodela o rom hem i romni kola tane ko brak te oven verna jekh jekhese hem niked te na prevarinen jekh jekhe. (Čitinen Jevrejima 13:4.)

2. Soj tano o blud?

I Biblija phenela so „o bludnikija. . . na ka nasledinen e Devleso Kraljevstvo“ (1. Korinćanima 6:9, 10). Ko grčko deo andi Biblija aso blud koristini pe o grčko lafi pornia. Odova lafi odnosini pe ko seksualna odnosijaa (1) maškaro rom hem i romni kola nane ko brak, (2) ki homoseksualnost hem (3) ko seksualna odnosija maškaro manuša hem o životinje. O Jehova mangela „te cida amen ando blud“, a odova tano hem amare šukaripase (1. Solunjanima 4:3).

SIKLJOV POBUTER

3. Naš ando blud

Jekh romni manglja te sovel e Josifeja. Ama, ov na manglja odova te ćerel hem aćhilo verno e Devlese. Čitinen Postanak 39:1-12, hem palo odova vaćeren ando akala pućiba:

• Sose o Josif na manglja te ćerel blud? (Dikhen o 9. stih)

• So mislineja, da li o Josif šukar ćerđa? Sose mislineja ađahar?

VIDEO: Naš ando blud (5:06)

O Jehova mangela sare amen te cida amen ando blud. Čitinen 1. Korinćanima 6:18, hem palo odova vaćeren ando akala pućiba:

• Kola situacije šaj te anen đi odova neko te ćerel blud?

• Sar šaj te naše ando blud?

4. Tu šaj te cide tut ando blud

VIDEO: Ked čitinaja i Biblija šaj te pobedina o kušnje (3:02)

• So ćerđa amaro phral ked haljilo so sebepi odova sostar razmislini hem so ćerela šaj te ovel neverno pe romnjaće?

Čak hem okola so verno služinena e Devlese podijekh puti valjani te trudinen pe te ovel len čista mislija. So šaj te ćere te ikale andi godi o nemoralna mislija? Čitinen Filipljanima 4:8, hem palo odova vaćeren ando akala pućiba:

• Sostar valjani te razmislina?

• Sose tano važno svako dive te čitina i Biblija hem te đa ki služba ako mangaja te cida amen ando odova te ćera blud?

5. E Jehovase savetija tane uvek amare šukaripase

VIDEO: Ma ov nerazumno (9:31)

• Sar o terno ćhavo alo đi odova te ćerel blud? (Dikhen Poslovice 7:8, 9.)

• Premalo odova so pisini ko Poslovice 7:23, 26, ked neko ćerela blud ov šaj te ovel le bare problemija. Kola problemija na ka ovel amen ako na ćeraja blud?

• Sose tano važno te cida amen ando blud?

Ked disave manuša šunena so i Biblija vaćeri kotar homoseksualnost, on phenena so o Devel tano but strogo. Ama, o Jehova tano pherdo mangipe hem mangela sa o manuša večno te živinen. Ako mangaja te živina večno, valjani te šuna le. Čitinen 1. Korinćanima 6:9-11, hem palo odova vaćeren ando akava pućibe:

• Premalo odova so čitinđam, da li tane samo o homoseksualna želje neispravna?

Ako mangaja te šuna e Devle, sare amen valjani te menjina amen. Sose tano šukar te šuna e Devle? Čitinen Psalam 19:8, 11, hem palo odova vaćeren ando akala pućiba:

• So mislineja, da li tano razumno odova so o Jehova rodela amendar? Sose mislineja ađahar?

SO SIKLJILJAM

O seksualna odnosija tane jekh poklon ando Jehova. Ov mangela o rom hem i romni kola tane ko brak te uživinen ko seksualna odnosija.

Te ponovina

• Soj tano o blud?

• So ka pomožini amen te cida amen ando blud?

• Sose tano šukar te šuna e Jehova?

RODE POBUTER

Sikljov sose o Devel mangela jekh murš hem jekh đuvli kola mangena te živinen zajedno te oven venčime.

„Šaj li te ova ko brak, a te na ova venčime?“ (članko ko amaro sajt)

Da li odova so i Biblija vaćeri andi homoseksualnost značini so amen mrzinaja e manušen kola tane homoseksualcija?

„Isi li diso lošno ko odova ako tano neko homoseksualac?“ (članko ko amaro sajt)

Dikh sar odova so o Devel vaćerđa ando seksualna odnosija arakhi amen.

„Šaj li te phena so o oralno seks tano ćaće seks?“ (članko ko amaro sajt)

Čitin o iskustvo „On mothovđe maje so poštujinena man“ hem dikh sose jekh manuš kova hine homoseksualac menjinđa po životi.

„I Biblija pomožini e manušenđe te menjinen po životi“ (Stražarska kula, 1. april 2011)

Sare amen but mangaja e Jehova hem daja sa amendar te na ćera diso so ka povredini le. Ama, podijekh puti šaj ka grešina diso. Disave grehija tane but ozbiljna (1. Korinćanima 6:9, 10). Ako jekh dive ka ćere disavo ozbiljno greh, ma bistri so ništa našti te ćhinavi e Jehova te mangel tut. Ov tano spremno te oprostini tuće hem te pomožini tut.

1. So valjani te ćera te šaj o Jehova te oprostini amenđe?

Ked okova kova mangela e Jehova haljola so ćerđa disavo ozbiljno greh, olese tano but pharo. Ama, but bari uteha šaj te del le odova so o Jehova phenđa pe narodose: „Ako tane tumare grehija sar i loli boja, ka oven parne sar o iv“ (Isaija 1:18). Ako kajinaja amen celone vileja, o Jehova ka oprostini amenđe. Amen mothovaja so kajinaja amen ked ćhinavaja te ćera odova soj tano lošno hem ked molinaja e Jehova te oprostini amenđe. Isto ađahar, daja sa amendar te menjina amaro način sar razmislinaja hem o buća kola legarđe amen te ćera odova greh hem trudinaja amen te živina premalo Jehovase načelija. (Čitinen Isaija 55:6, 7.)

2. Sar o Jehova pomožini amen prekalo starešine?

Ako neko ćerđa ozbiljno greh, o Jehova phenela „nek vićini e starešinen andi skupština.“ (Čitinen Jakovljeva 5:14, 15.) On but mangena e Jehova hem okolen so služinena olese. O Jehova sikavđa e starešinen sar te pomožinen amen palem te ova paše oleja (Galatima 6:1).

Sar ka pomožinen amen o starešine? Duj ja trin starešine ka koristinen e Devleso Lafi te pomožinen amen te haljova sose tano pogrešno odova so ćerđam. On ka den amen savetija kola ka pomožinen amen te na ćera palem odova isto greh. Ama, ako neko ćerđa ozbiljno greh hem na kajini pe aso odova, o starešine ka ciden odola osoba andi skupština te bi zaštitinena averen.

SIKLJOV POBUTER

3. Ked phenaja so ćerđam, palem šaj te ova paše e Jehovaja

Ked ćeraja disavo ozbiljno greh, amen povredinaja e Jehova. Odolese valjani sa te phena olese. Čitinen Psalam 32:1-5, hem palo odova vaćeren ando akava pućibe:

• Sose na valjani te garava ando Jehova odova so ćerđam?

VIDEO: „Kas o Jehova mangela ole hem ukorini“ (3:01)

• Sar o starešine pomožinđe e Kanonese te irini pe e Jehovase?

Valjani te ova phravde e starešinencar sose on tane odothe te pomožinen amen. Čitinen Jakovljeva 5:16, hem palo odova vaćeren ando akava pućibe:

• Sose e starešinenđe ka ovel polokho te pomožinen amen ked hijam phravde olencar?

4. O Jehova mothovi milosrđe okolenđe so grešinđe

Ako neko ćerđa ozbiljno greh hem na mangela te ćhinavi odoleja hem te ićeri pe ko Jehovase načelija, ov više našti te ovel deo andi skupština. Amen više na družinaja amen oleja hem na vaćeraja oleja. Čitinen 1. Korinćanima 5:6, 11, hem palo odova vaćeren ando akava pućibe:

• O humer ušljola ked ćhivela pe kvasco. Tegani, sar upri skupština šaj te utičini i osoba koja na kajini pe?

Sar o način ko kova o Jehova postupini okolencar so grešinena mothovi soj tano razumno, milosrdno hem pherdo mangipe?

5. O Jehova oprostini amenđe ked kajinaja amen

O Isus vaćerđa jekh priča koja pomožini amen te haljova sar o Jehova osetini pe ked neko kajini pe. Čitinen Luka 15:1-7, hem palo odova vaćeren ando akava pućibe:

• So sikljovaja ando Jehova kotar akija priča?

Čitinen Jezekilj 33:11, hem palo odova vaćeren ando akava pućibe:

• Sar šaj te mothova so ćaće kajinaja amen?

SO SIKLJILJAM

O Jehova ka oprostini amenđe čak hem disavo ozbiljno greh ako kajinaja amen ando vilo hem daja sa amendar te ćhinava te ćera odova soj tano lošno.

Te ponovina

• Sose na valjani te garava amare grehija ando Jehova?

• So valjani te ćera te šaj te oven oprostime amare grehija?

• Ako jekh dive ka ćera disavo ozbiljno greh, sose valjani te roda pomoć ando starešine?

RODE POBUTER

Dikh sar o Jehova jekhe manušese mothovđa milosrđe ando kova vaćeri pe ko Isaija 1:18.

Niked ma bistri so o Jehova tano milosrdno (5:02)

Sar o starešine pomožinena okolenđe kola ćerđe ozbiljno greh?

„Sar o starešine mothovena mangipe hem milosrđe premalo okola so grešinena?“ (Stražarsko kula, avgust 2024)

Dikh sar mothovi pe mangipe hem milosrđe premalo okola so na kajinena pe.

„Sar o starešine pomožinena okolenđe kola tane cidime andi skupština?“ (Stražarsko kula, avgust 2024)

Ko iskustvo „Morandiljum te irinav man e Jehovase“ čitin sar jekh manuš osetinđa so o Jehova mangela te irini pe olese.

„I Biblija pomožini e manušenđe te menjinen po životi“ (Stražarska kula, 1. april 2012)