2. So ovela ko sveto hem save tane o manuša kotar 1914. berš?

E Isusese učenikija pućlje le: „So ka ovel znak andi ti prisutnost hem ando kraj kotar akava sveto?“ (Matej 24:3). O Isus phenđa lenđe kola buća ka oven ko sveto palo odova so ka počmini te vladini sar Kralj ko nebo. Disave olendar tane o mariba, o bokhalipa hem o zemljotresija. (Čitinen Matej 24:7.) Isto ađahar, ki Biblija pisini save ka oven o manuša „ko poslednja dive“ hem so tegani ka ovel „but pharo vreme“ (2. Timoteju 3:1-5). Kotar 1914. berš sa akala buća ovena.

3. Sose ki phuv isi odobor lošnipa sar počminđa te vladini e Devleso Kraljevstvo?

Sigate palo odova so o Isus ulo Kralj, ko nebo hine jekh maribe maškaro Isus hem o Beng hem olese demonija. O Isus pobedinđa len. I Biblija phenela so o Beng „hine fordimo tele ki phuv, hem olese anđelija hine fordime tele oleja“ (Otkrivenje 12:9, 10, 12). O Beng tano but holjamo sose đanela so pana hari ka ovel uništimo. Ov tano odgovorno aso sa o lošnipa kola isi ki phuv. Odolese, na hijam iznenadime so ki phuv isi odobor problemija. Ama, pana hari e Devleso Kraljevstvo ka cidel sa odola problemija.