• Sar šaj e Devleso Lafi te pomožini tut?
    Ov bahtalo zauvek! – sikljov andi Biblija
    • 1. lekcija. Phravdi Biblija.

      1. LEKCIJA

      Sar šaj e Devleso Lafi te pomožini tut?

      Sare amen mangaja te đana sose živinaja, sose patinaja, sose meraja hem so ađićeri amen ki budućnost. Isto ađahar, sarinenđe amenđe valjani pomoć te rešina amare problemija. Na primer, mangaja te đana sar te zaradina aso amaro životi hem sar šaj amari porodica te ovel bahtali. E Devleso Lafi na samo so vaćeri odolestar, već hem dela amen savetija te šaj te ovel amen pana pošukar životi. E Devleso Lafi šaj sarinenđe te pomožini.

      1. Ko kola pućiba e Devleso Lafi dela amen odgovorija?

      E Devleso Lafi dela amen odgovorija ko akala važna pućiba: Sar ulo o životi? Sose živinaja? Sose o šukar manuša patinena? So ovela e manušencar ked merena? Ako o manuša odobor mangena te ovel mir, tegani sose isi mariba? So ka ovel e phuvjaja? E Devleso Lafi podstaknini amen te roda o odgovorija ko akala pućiba, a odola odgovorija arakhlje but manuša.

      2. Sar šaj e Devleso Lafi te pomožini amen te ovel amen bahtalo životi?

      Ko e Devleso Lafi šaj te arakha šukar savetija. Na primer, sar te ovel amen bahtali porodica, sar šaj te ikljova ko krajo amare problemencar hem sar šaj te uživina ki amari buti. Đi zajedno ka razmotrina akava materijali, ka dikha so e Devleso Lafi vaćeri akalestar hem ando avera buća. Kokri ka uverine tut so „celo Lil [sa so pisini ko e Devleso Lafi]. . . tano korisno“ (2. Timoteju 3:16).

      Akija publikacija na zamenini e Devleso Lafi. Umesto odova, oj pomožini tut pošukar te haljove e Devleso Lafi. Odolese, molinaja tut te čitine o stihija kola tane dinde ko akala lekcije hem te uporedine len odoleja so sikljoveja.

      SIKLJOV POBUTER

      Dikh sar e Devleso Lafi pomožinđa e manušenđe, sar šaj te uživine đi čitineja e Devleso Lafi hem sose tano šukar neko te pomožini tuće te haljove odova so čitineja.

      3. E Devleso Lafi mothovi amenđe kole drumoja valjani te đa

      E Devleso Lafi tano sar jekh lampa koja osvetlini amaro drumo. Sebepi odova, šaj te ana šukar odluke hem te đana so ađićeri amen ki budućnost.

      Čitinen Psalam 119:105, hem palo odova vaćeren ando akala pućiba:

      • So o manuš kova pisinđa akava psalam mislinđa ando e Devleso Lafi?

      • So tu mislineja ando e Devleso Lafi?

      Jekh manuš raćate phirela uzi obala ki koja isi bara hem e baterijsko lampaja osvetlini o drumo.

      4. E Devleso Lafi šaj te del amen odgovorija ko amare pućiba

      Jekh romni ko e Devleso Lafi arakhlja o odgovorija ko pućiba kola beršencar mučinđe la. Dikhen o VIDEO, hem palo odova vaćeren ando akala pućiba:

      VIDEO: Ma našal ti nada! (1:48)

      • Kola pućiba hine la i romni ando akava video?

      • Sar pomožinđa la odova so proučinđa e Devleso Lafi?

      E Devleso Lafi phenela soj tano šukar te ovel amen pućiba. Čitinen Matej 7:7, hem palo odova vaćeren ando akava pućibe:

      • Ko kola pućiba mangeja e Devleso Lafi te del tut odgovor?

      5. Tu šaj te uživine đi čitineja e Devleso Lafi

      But manuša uživinena đi čitinena e Devleso Lafi hem odova so čitinena but pomožini len. Dikhen o VIDEO, hem palo odova vaćeren ando akala pućiba:

      VIDEO: Čitibe andi Biblija (2:05)

      • So o terne ando akava video mislinena ando čitibe?

      • Sose o terne ipak mangena te čitinen e Devleso Lafi?

      E Devleso Lafi dela amen uteha hem nada. Čitinen Rimljanima 15:4, hem palo odova vaćeren ando akava pućibe:

      • Da li mangeja te sikljove pobuter ando odova savi uteha hem nada dela amen e Devleso Lafi?

      6. Avera šaj te pomožinen amen te haljova e Devleso Lafi

      But manuša haljilje soj tano šukar na samo kokri te čitinen e Devleso Lafi, nego hem neko te pomožini len te haljon odova so čitinena. Čitinen Dela apostolska 8:26-31, hem palo odova vaćeren ando akava pućibe:

      Kolaž: 1. O Filip kova propovedinđa i šukar vest objasnini o sveta spisija jekhe manušese andi Etiopija. 2. Jekh phen proučini i Biblija jekha dajaja hem olake duje ćhavencar.

      Jekhe manušese andi Etiopija valjanđa pomoć te šaj te haljol odova so čitinđa. But manuša avdije haljilje so valjani lenđe pomoć te haljon e Devleso Lafi

      AKO NEKO PHENELA: „Ako proučineja i Biblija samo našaleja to vreme.“

      • So bi tu pheneja? Sose mislineja ađahar?

      SO SIKLJILJAM

      E Devleso Lafi dela amen savetija aso amaro životi, odgovorija ko važna pućiba, uteha hem nada.

      Te ponovina

      • Kola savetija šaj te arakhe ko e Devleso Lafi?

      • Ko kola pućiba e Devleso Lafi dela odgovorija?

      • So bi mangeja te sikljove ando e Devleso Lafi?

      Ćhiv tuće cilj

      RODE POBUTER

      Dikh sar o savetija ando e Devleso Lafi šaj te pomožinen amen avdije.

      „I Biblija – knjiga koja na našali pi vrednost“ (Stražarska kula, br. 1/2018)

      Dikh sar e Devleso Lafi pomožinđa jekhe manušese kova kotar tiknipe mislinđa lošno kokri pestar.

      Mo životi menjinđa pe ko pošukar (2:53)

      Dikh kola savetija e Devleso Lafi dela e porodicaće.

      „12 buća te šaj te ovel tut bahtali porodica“ (Probudite se!, br. 2/2018)

      But manuša na đanena ko ćaće vladini akale svetoja, ama e Devleso Lafi mothovi amenđe koj tano oleso vladari.

      Sose te sikljove andi Biblija? (pobaro video) (3:14)

  • O Devel vaćeri amenđe prekali Biblija
    Ov bahtalo zauvek! – sikljov andi Biblija

    • 1. Ako o manuša pisinđe i Biblija, tegani sose phenaja so oj avela ando Devel?

      I Biblija pisinđe oko 40 manuša, ko period ando 1 600 berš, kotar 1513. angl. n. e. đi oko 98. berš n. e. Iako o manuša kola pisinđe i Biblija but razlikujinđe pe, odova sostar pisinđe složini pe jekh jekheja. Sar šaj te ovel odova? Odolese so i Biblija tani knjiga ando Devel. (Čitinen 1. Solunjanima 2:13.) O manuša kola pisinđe i Biblija na pisinđe pe mislija, nego „o lafija kola alje ando Devel sar o sveti duh legarđa len“a (2. Petrova 1:21). Odolese, šaj te phena so o Devel koristinđa po sveti duh te šaj te ćhivel e manušenđe ki godi te pisinen olese mislija (2. Timoteju 3:16).