-
So i Biblija vaćeri odolestar te sove nekasa?Ov bahtalo zauvek! – sikljov andi Biblija
-
-
41. LEKCIJA
So i Biblija vaćeri odolestar te sove nekasa?
But manuša lađana te vaćeren odolestar. Ama, i Biblija phravdo hem ko jekh pristojno način vaćeri kotar akija tema. Odova so i Biblija phenela šaj te pomožini amen. Odova tano ađahar sose o Jehova tano amaro Stvoritelj hem đanela soj tano najšukar amenđe. Ov phenela amenđe so valjani te ćera te ugodina lese hem so ka pomožini amen te živina večno.
1. Sar o Jehova dikhela ko seksualna odnosija?
O seksualna odnosija tane jekh poklon ando Jehova. Ov mangela o rom hem i romni soj tane ko brak te uživinen ko seksualna odnosija. Sebepi odova, on na samo so šaj te ovel len ćhave, već šaj te mothoven so mangena jekh jekhe. Odolese, ko Devleso Lafi pisini: „Ov bahtalo te romnjaja kolaja hijan kotar to ternipe“ (Poslovice 5:18, 19). O Jehova rodela o rom hem i romni kola tane ko brak te oven verna jekh jekhese hem niked te na prevarinen jekh jekhe. (Čitinen Jevrejima 13:4.)
2. Soj tano o blud?
I Biblija phenela so „o bludnikija. . . na ka nasledinen e Devleso Kraljevstvo“ (1. Korinćanima 6:9, 10). Ko grčko deo andi Biblija aso blud koristini pe o grčko lafi pornia. Odova lafi odnosini pe ko seksualna odnosijaa (1) maškaro rom hem i romni kola nane ko brak, (2) ki homoseksualnost hem (3) ko seksualna odnosija maškaro manuša hem o životinje. O Jehova mangela „te cida amen ando blud“, a odova tano hem amare šukaripase (1. Solunjanima 4:3).
SIKLJOV POBUTER
Sikljov sar šaj te cide tut ando blud hem sose tano šukar niked te na pere ki zamka te ćere blud.
3. Naš ando blud
Jekh romni manglja te sovel e Josifeja. Ama, ov na manglja odova te ćerel hem aćhilo verno e Devlese. Čitinen Postanak 39:1-12, hem palo odova vaćeren ando akala pućiba:
Sose o Josif na manglja te ćerel blud? (Dikhen o 9. stih)
So mislineja, da li o Josif šukar ćerđa? Sose mislineja ađahar?
Sar šaj avdije o terne te oven sar o Josif hem te našen ando blud? Dikhen o VIDEO.
O Jehova mangela sare amen te cida amen ando blud. Čitinen 1. Korinćanima 6:18, hem palo odova vaćeren ando akala pućiba:
Kola situacije šaj te anen đi odova neko te ćerel blud?
Sar šaj te naše ando blud?
4. Tu šaj te cide tut ando blud
Sose šaj te ovel amenđe pharo te cida amen ando blud? Dikhen o VIDEO, hem palo odova vaćeren ando akava pućibe.
So ćerđa amaro phral ked haljilo so sebepi odova sostar razmislini hem so ćerela šaj te ovel neverno pe romnjaće?
Čak hem okola so verno služinena e Devlese podijekh puti valjani te trudinen pe te ovel len čista mislija. So šaj te ćere te ikale andi godi o nemoralna mislija? Čitinen Filipljanima 4:8, hem palo odova vaćeren ando akala pućiba:
Sostar valjani te razmislina?
Sose tano važno svako dive te čitina i Biblija hem te đa ki služba ako mangaja te cida amen ando odova te ćera blud?
5. E Jehovase savetija tane uvek amare šukaripase
O Jehova đanela soj tano najšukar amenđe. Ov na samo so vaćeri amenđe sar te na pera ki zamka ando blud već hem mothovi sose tano odova šukar amenđe. Čitinen Poslovice 7:7-27 ja dikhen o VIDEO, hem palo odova vaćeren ando akala pućiba.
Sar o terno ćhavo alo đi odova te ćerel blud? (Dikhen Poslovice 7:8, 9.)
Premalo odova so pisini ko Poslovice 7:23, 26, ked neko ćerela blud ov šaj te ovel le bare problemija. Kola problemija na ka ovel amen ako na ćeraja blud?
Sose tano važno te cida amen ando blud?
Ked disave manuša šunena so i Biblija vaćeri kotar homoseksualnost, on phenena so o Devel tano but strogo. Ama, o Jehova tano pherdo mangipe hem mangela sa o manuša večno te živinen. Ako mangaja te živina večno, valjani te šuna le. Čitinen 1. Korinćanima 6:9-11, hem palo odova vaćeren ando akava pućibe:
Premalo odova so čitinđam, da li tane samo o homoseksualna želje neispravna?
Ako mangaja te šuna e Devle, sare amen valjani te menjina amen. Sose tano šukar te šuna e Devle? Čitinen Psalam 19:8, 11, hem palo odova vaćeren ando akala pućiba:
So mislineja, da li tano razumno odova so o Jehova rodela amendar? Sose mislineja ađahar?
O Jehova pomožinđa bute manušenđe te menjinen pe. Ov šaj te pomožini hem tuće
AKO NEKO PHENELA: „Šaj te sove bilo kasa. Važno tano samo te mangen tumen.“
So bi tu pheneja ko odova?
SO SIKLJILJAM
O seksualna odnosija tane jekh poklon ando Jehova. Ov mangela o rom hem i romni kola tane ko brak te uživinen ko seksualna odnosija.
Te ponovina
Soj tano o blud?
So ka pomožini amen te cida amen ando blud?
Sose tano šukar te šuna e Jehova?
RODE POBUTER
Sikljov sose o Devel mangela jekh murš hem jekh đuvli kola mangena te živinen zajedno te oven venčime.
„Šaj li te ova ko brak, a te na ova venčime?“ (članko ko amaro sajt)
Da li odova so i Biblija vaćeri andi homoseksualnost značini so amen mrzinaja e manušen kola tane homoseksualcija?
„Isi li diso lošno ko odova ako tano neko homoseksualac?“ (članko ko amaro sajt)
Dikh sar odova so o Devel vaćerđa ando seksualna odnosija arakhi amen.
„Šaj li te phena so o oralno seks tano ćaće seks?“ (članko ko amaro sajt)
Čitin o iskustvo „On mothovđe maje so poštujinena man“ hem dikh sose jekh manuš kova hine homoseksualac menjinđa po životi.
„I Biblija pomožini e manušenđe te menjinen po životi“ (Stražarska kula, 1. april 2011)
a Disave seksualna odnosija kola nane dozvolime tane o oralni hem o analni seks hem te pipinen pe nekase polna organija sebepi o seksualno zadovoljstvo.
-
-
Sar o Devel dikhela ko okola soj tane kokri hem ko okola soj tane ko brak?Ov bahtalo zauvek! – sikljov andi Biblija
-
-
42. LEKCIJA
Sar o Devel dikhela ko okola soj tane kokri hem ko okola soj tane ko brak?
Ko disave kulture, o manuša phenena so našti te ove bahtalo ako na hijan ko brak. Ama, nane bahtale sare kola tane ko brak. Isi but đene kola nane ko brak, ama bahtale tane. I Biblija phenela soj tano šukar hem ked tano neko ko brak hem ked tano neko kokri.
1. Sose tano šukar ked tano neko kokri?
Ki Biblija pisini: „Okova kova khuvela ko brak, šukar ćerela, ama okova kova na khuvela ko brak, pana pošukar ćerela.“ (Čitinen 1. Korinćanima 7:32, 33, 38.) So značinena o lafija „okova kova na khuvela ko brak, pana pošukar ćerela?“ Sebepi so nane ko brak, on na valjani te brininen pe ando po rom ja andi pi romni. Odolese, šaj te ćeren pana pobuter buća e Jehovase. Na primer, šaj te đan ki aver phuv te propovedinen. Soj tano pana považno, on isi len pana pobuter vreme te zorjaćeren po amalipe e Jehovaja.
2. Sose tano šukar ked tane o rom hem i romni venčime?
Sar soj tano šukar te ove kokri ađahar tano šukar hem te ove ko brak. Ki Biblija pisini: „Pošukar tano dujenđe nego jekhese“ (Propovednik 4:9). Akava tano ćaće posebno okolenđe so ićerena pe ko odova so i Biblija vaćeri ando brak. Okola soj tane venčime dena lafi so ka mangen hem so ka poštujinen jekh jekhe hem so ka brininen pe jekh jekhestar. On osetinena pe posigurno okolendar so samo živinena zajedno. Isto ađahar, hem olenge ćhave osetinena pe sigurno.
3. Sar o Jehova dikhela ko brak?
Ked stvorinđa e Adame hem e Eva, o Jehova phenđa: „O manuš ka mukhel pe dade hem pe daja hem ka spojini pe pekle romnjaja“ (Postanak 2:24). Ov mangela o rom hem i romni te mangen jekh jekhe hem te aćhon zajedno sa đi tane đivde. Ov dozvolini o rom hem i romni te razvodinen pe jedino ako jekh olendar prevarinđa avere. Tegani, okova kova nane krivo, isi le pravo te odlučini da li ka razvodini pea (Matej 19:9). O Jehova dozvolini e romese te ovel le samo jekh romni (1. Timoteju 3:2).
SIKLJOV POBUTER
Bilo te ove ko brak ja na, dikh sar šaj te ove bahtalo hem te ćere e Jehova te ovel bahtalo.
4. Mudro koristin odova so hijan kokri
O Isus phenđa so ked neko tano kokri odova šaj but te koristini lese (Matej 19:11, 12). Čitinen Matej 4:23, hem palo odova vaćeren ando akava pućibe:
O Isus na hine ženimo. Sar odova koristinđa te služini e Jehovase hem te pomožini averenđe?
O hrišćanija kola nane ko brak šaj te oven bahtale ako ćerena odova so o Isus ćerđa. Dikhen o VIDEO, hem palo odova vaćeren ando akava pućibe.
Kola šukar buća šaj te ćeren okola soj tane kokri?
Da li đanđan?
Ki Biblija na pisini kobor berš jekh osoba valjani te ovel la te šaj te khuvel ko brak. Ama, oj vaćeri so ako tano neko but terno valjani te ađićeri te nakhel o vreme ked tane o seksualna želje but zorale, sose on šaj te utičinen ko olese odluke (1. Korinćanima 7:36).
5. Mudro birin kas ka le
Jekh andi najvažno odluka koja valjani te ane tani kas ka le. Čitinen Matej 19:4-6, 9, hem palo odova vaćeren ando akava pućibe:
Sose jekh hrišćanin na valjani te siđari te khuvel ko brak?
I Biblija šaj te pomožini tuće te haljove kola osobine valjani te ovel le to rom ja ti romni. Odova soj tano najvažno, odija osoba valjani te mangel e Jehova.b Čitinen 1. Korinćanima 7:39 hem 2. Korinćanima 6:14. Palo odova vaćeren ando akala pućiba:
Sose valjani te khuve ko brak samo nekasa ko služini e Jehovase?
So mislineja, sar bi ovela e Jehovase ked bi khuveja ko brak nekasa ko na služini olese?
Ako duj životinje, kola tane but različita, ćhivaja ko isto jaram, o solduj but ka patinen. Isto ađahar, okova kova khuvela ko brak nekasa ko na služini e Jehovase, ka ovel le bare problemija
6. Dikh ko brak sar o Jehova
Ko purano vreme, disave Izraelcija razvodinđe pe, iako na hine len opravdano razlog aso odova. Čitinen Malahija 2:13, 14, 16, hem palo odova vaćeren ando akava pućibe:
Sose o Jehova mrzini ked neko razvodini pe, a nane le opravdano razlog aso odova?
Sebepi i preljuba hem o razvod, avera ki porodica but patinena
Dikhen o VIDEO, hem palo odova vaćeren ando akava pućibe.
Ako hijan ko brak nekasa ko na služini e Jehovase, so šaj te ćere te šaj to brak te ovel bahtalo?
7. Ićer tut ko Jehovase načelija ando brak
Šaj ka valjani te de sa tutar te ićere tut ko Jehovase načelija ando brak.c Ama, ov sigurno so o Jehova ka blagoslovini tut. Dikhen o VIDEO.
Čitinen Jevrejima 13:4, hem palo odova vaćeren ando akala pućiba:
So mislineja, da li tano razumno odova so o Jehova rodela amendar? Sose mislineja ađahar?
O Jehova ando pe sluge rodela te ićeren pe ko zakonija andi phuv ki koja živinena. Odolese, ked valjani te venčinen pe ja te razvodinen pe, on valjani te ćeren odova premalo zakon. Čitinen Titu 3:1, hem palo odova vaćeren ando akava pućibe:
Da li tano to brak zakonski priznajimo?
AKO NEKO PUĆELA: „Sose te venčinav man ked već živinaja zajedno?“
So bi tu pheneja ko odova?
SO SIKLJILJAM
Sar soj tano šukar te ove ko brak, ađahar tano šukar hem te ove kokri. O solduj buća tane poklon ando Jehova. Okola soj tane ko brak hem okola soj tane kokri šaj te oven bahtale ako ćerena odova so o Jehova rodela olendar.
Te ponovina
Sar šaj neko mudro te koristini odova soj tano kokri?
Sose i Biblija phenela so valjani te khuva ko brak samo nekasa ko služini e Jehovase?
Premalo odova so pisini ki Biblija, kova tano jedino razlog aso razvod?
RODE POBUTER
So značini te khuve ko brak „samo ko Gospod“?
Ako razmislineja ando odova te khuve ki veza ja ko brak, dikh akala duj videa kola ka pomožinen tut te ane šukar odluke.
Dikh sose jekh phral phenđa soj tano pošukar odova so o Jehova dinđa le ando odova so aćhavđa.
Sostar valjani te razmislini jekh osoba angleder te razvodini pe ja te odvojini pe?
a Da li o rom hem i romni šaj te odvojinen pe ako niko olendar na ćerđa preljuba? Dikh o 4. dodatko ko krajo andi akija knjiga.
b Ko disave kulture, o roditeljija birinena kas ka lel olengo ćhavo ja olengi ćhaj. Tegani, o roditeljija kola mangena pe ćhaven, na valjani te dikhen kobor tani barvali odija familija ja kaj živinena, već da li odova ćhavo ja odija ćhaj mangela e Jehova.
c Ako živineja nekasa kasa na hijan venčimo, tu valjani te odlučine da li ka mukhe odola osoba ja ka venčine tut olaja.
-