„Amin“ – lafi kova tano važno e Jehovase

„CELO NARODO NEK PHENEL: ’AMIN!‘“

O lafi „amin“ avela kotar hebrejsko čhib hem značini „adžahar tano“ ja „nek ovel adžahar“. Ikaldo tano kotar hebrejsko lafi so značini „te ove verno“, „te verujini pe tuče“. Dijekh puti koristindža pe ko pravna slučaja (ko sudo). Ked okova so hala sovel phenela „amin“, odoljeja bi potvrdini so odova so vačerdža tano čače hem so prihvatini o posledice kotar odova so hine vačerdo (4. Moj. 5:22). Ked neko anglo avera vačerdža „amin“, tegani ov hine lje pana pobaro razlog te ičeri po lafi (Neh. 5:13).

O lafi „amin“ ko jekh upečatljivo način koristini pe ko 27. šero ko 5. Mojsieso ljil. Palo odova so o Izraelcija khudže ki Obećano phuv, čedindže pe maškaro gore Eval hem Garizim te šaj te šunen o odredbe ando Zakon. Valjandže na samo te šunen o Zakon, već hem te phenen da li prihvatinena odova Zakon. Odova hem čerdže ked phendže „amin“ palo odova so hine ljendže čitimo kola tane o posledice andi neposlušnost (5. Moj. 27:15-26). Zamislin sar odova šundilo ked hiljada murša, romnja hem čhave ko glaso phendže „amin“ (Ješ. 8:30-35). Sigurno niked na bisterdže o lafija kola phendže ljen odova dive. Odola Izraelcija ičerdže pe ko po lafi sose ki Biblija pisini: „O Izrael služindža e Jehovase sa dži hine o Isus dživdo hem sa dži o starešine kola hine dživde palo e Isuseso meribe hem kola džandže sa so o Jehova čerdža e Izraelese“ (Ješ. 24:31).

Hem o Isus e lafeja „amin“ potvrdindža so okova so vačeri tano čačipe, ama ov odova čerdža ko posebno način. Ov o lafi amin (kova but puča prevodini pe e lafeja „čače“) koristindža sar uvod ko odova so ka phenel, a na sar odgovor ki disavi izjava. Dijekh puti odova lafi vačerdža duj puča „amin amin“ (Mat. 5:18; Jov. 1:51). Ko odova način uverindža e manušen kola šundže lje so vačeri o čačipe. Ov hine sigurno ko odova so vačeri, sebepi so o Devel dindža lje pravo te ispunini sa oljese obećanja (2. Kor. 1:20; Puč. 3:14).

„CELO NARODO VAČERDŽA: ’AMIN!‘, HEM HVALINDŽE E JEHOVA“

O Izraelcija o lafi „amin“ koristindže ked hvalindže e Jehova hem molindže pe oljese (Neh. 8:6; Ps. 41:13). Ked ko krajo ando nekasi molitva phendže „amin“, on odoljeja mothodže so složinena pe so hine phendo. Sa o manuša kola hine othe ko odova način učestvujindže ki molitva hem odoljeja slavindže e Jehova. Adžahar hine hem ked o kralj David andža o kovčeg ando savez ko Jerusalim. Dži slavindže, o kralj David vačerdža i molitva sar jekh džili koja tani pisimi ki 1. Letopisa 16:8-36. Sa o manuša kola hine othe, hine odobor bahtalje oljese lafencar so phendže „’Amin!‘, hem hvalindže e Jehova“. On hine bahtalje te služinen e Jehovase zajedno.

O hrišćanja kotar prvo veko isto adžahar phendže o lafi „amin“ ked slavindže e Jehova. O manuša kola pisindže i Biblija but puča koristindže odova lafi ko pe knjige (Rim. 1:25; 16:27; 1. Petr. 4:11). Ki biblijaki knjiga Pučaribe (Otkrivenje) mothovi pe hem sar o duhovna bića ko nebo slavinena e Jehova vačerindoj: „Amin! Hvalinen e Jehova“ (Puč. 19:1, 4). O prva hrišćanja hine ljen običaj ko sastankija palji molitva te phenen „amin“ (1. Kor. 14:16). Ama, odova na hine lafi kova bi ponovinena bizo te razmislinen.

SOSE TANO TOKLO „AMIN“ VAŽNO

Akana ked dikhljam so značini akava lafi hem sar angljeder koristindža pe, šaj te phena hem so avdije tano šukar odolje lafeja te završini pe i molitva. Ked phenaja „amin“ ko krajo andi molitva, odova značini so amen čače mislinaja odova so phendžam. A ked, čak samo ano amende, phenaja „amin“ palji javno molitva, amen mothovaja so složinaja amen odoljeja so hine phendo. Te dikha sose tano amaro „amin“ pana važno.

Pažljivo šunen i molitva. I molitva tani deo andi amari služba e Jehovase. Odoljese nane važno samo so phenaja, nego hem sar ponašinaja amen dži trajini i molitva. Te šaj amaro „amin“ te ovel vačerdo ando vilo, valjani pažljivo te šuna i molitva.

Ko jekhipe hijam sar e Devljese sluge. Ked tani i javno molitva, amari pažnja tani usmerimi ko odova hem so avera šunena (Čer. 1:14; 12:5). Ked odgovorinaja ki odija molitva isto lafeja sar amare phralja hem phenja, odova pana pobuter čerela amen te ova ko jekhipe. Bilo te vačera „amin“ ko glaso ja ano amende, amaro „amin“ e Jehovase dela pana jekh razlog te šunel amare zajednička molitve.

Te hvalina e Jehova. O Jehova dikhela hem o najtikne buča kola čeraja dži trudinaja amen te služina oljese (Luka 21:2, 3). Ov dikhela save tane amare motivija hem soj tano amendže ko vilo. Čak hem ked prekalo telefoni pratinaja o sastanko, šaj te ova sigurna so o Jehova šunela amaro „amin“. Ked amen phenaja „amin“ amen hijam okoljencar kola ko sastanko slavinena e Jehova.

Amaro „amin“ šaj amendže dičhola sar tikni buti, ama e Jehovase tano odova but važno. Ki jekh biblijaki enciklopedija pisini: „Akalje lafeja e Devljese sluge mothovena piklji vera, so složinena pe odoljeja soj tano phendo hem piklji zoralji nada koja isi ljen ko po vilo.“ Nek svako amaro „amin“ radujini e Jehova (Ps. 19:14).