TRITO ŠERO
So o Devel mangela te čerel e manušendže?
1. So o Devel mangela te čerel e manušendže?
O DEVEL mangela te čerel šukaripe e manušendže. Ov čerdža e prvonen manušen e Adame hem e Eva te živinen ko jekh but šužo than. O Jehova manglja te oveljen čhave, te čeren i Phuv te ovel raj hem te akharen gajlja ando životinje (1. Mojsieso 1:28; 2:8, 9, 15). Moljinatu dikh o 6. dodatko.
2. (a) Sar amen džana so o Devel ka čerel odova so isilje ki godi? (b) So i Biblija vačeri ando večno dživdipe?
2 So mislineja, da lji amen ka živina ko raj? O Jehova vačeri amendže: „So isima ki godi te čerav, odova ka čerav“ (Isaija 46:9-11; 55:11). Po, ov ka čerel odova so isilje ki godi hem nijekh našti te čhinavilje. Sose o Jehova čerdža i Phuv? Ov „na čerdžala samo adžahar“ te ovel (Isaija 45:18). Ov mangela o manuša te živinen ki celo Phuv. Save tane odola manuša so o Devel mangela te oven ki Phuv hem kobor vakti ka živinen? I Biblija vačeri: „I Phuv ka ovel dindi okoljendže soj tane pravedna hem večno ka živinen upro late“ (Psalam 37:29; Pučaribe 21:3, 4).
3. So pučejatu ked dikheja so o manuša ovena naborme hem merena?
3 Avdije o manuša ovena naborme hem merena. Ko but thana o manuša marenape hem mudarenape maškaro peste. O Devel na manglja te ovel adžahar. Ama, sar alo dži odova hem sose? Samo i Biblija šaj te phenel amendže.
E DEVLJESO DUŠMANI
4, 5. (a) Ko prekalo sap vačerdža e Eva ko edensko vrt? (b) Sar šaj jekh šukar manuš te počmini te čorel?
4 I Biblija vačeri amendže so o Devel isilje dušmani, ov „vičinipe Beng hem Satana“. O Beng prekalo sap vačerdža e Eva ko edensko vrt (Pučaribe 12:9; 1. Mojsieso 3:1). Ov čerdža te dičhol samči ked o sap vačerdža. Moljinatu dikh o 7. dodatko.
5 Da lji o Devel čerdža e Benge? Na. Jekh anđeo kova hine ko nebo ked o Devel čerdža i Phuv e Adamese hem e Evače, promijape hem ulo Beng (Jov 38:4, 7). Sar šaj hine te ovel odova? Na primer, sar šaj jekh šukar manuš te prominipe hem te počmini te čorel? Ov na hine bijando te čorel. Ama, manglja diso so nane oljeso. Ov hem ponodri mislija odoljestar hem oljese lošna želje ulje pana pozoralje. Jekh puti ked alo dži odova te čorel ov čordža. Adžahar, ov kokri pes čhidža te čorel (Čitinen Jakoveso 1:13-15). Moljinatu dikh o 8. dodatko.
6. Sar jekh anđeo ulo e Devljeso dušmani?
6 Odova isto ulo akalje anđelese. Ked o Jehova čerdža e Adame hem e Eva, ov pheja oljendže te oveljen čhave hem te „pheren i Phuv“ (1. Mojsieso 1:27, 28). Odova anđeo šaj hinelje ki godi: „Sa o manuša šaj te služinen maje, a na e Jehovase“. So pobuter mislija odoljestar, sa pobuter manglja odova soj tano e Jehovaso. Odova anđeo manglja o manuša te služinen oljese. Ov hovadža hem prevarija e Eva (Čitinen 1. Mojsieso 3:1-5). Odoljeja so čerdža, ov ulo Beng hem adžahar ulo e Devljeso dušmani.
7. (a) Sose o Adam hem i Eva mulje? (b) Sose amen phurjova hem mera?
7 O Adam hem i Eva na šuje e Devlje hem halje o plod (1. Mojsieso 2:17; 3:6). On grešije e Jehovase hem palo disavo vakti mulje sar so vačerdža o Jehova (1. Mojsieso 3:17-19). Oljenge čhave hine grešna hem odoljese mulje (Čitinen Rimskonendže 5:12). Te šaj te haljova sose oljenge čhave isto hine grešna, te dikha jekh primer. Ako pekeja maro ki bangi tepsija hem o maro ka ikljol asavko. E Adamese šaj te phena soj tano sar i tepsija, a amen hijam sar odova maro. Ked o Adam na šuja e Devlje ov ulo grešno. Sebepi so amen hijam e Adamese čhave, sare amen uljam grešna sar ov. Odoljese, amen phurjova hem mera (Rimskonendže 3:23). Moljinatu dikh o 9. dodatko.
8, 9. (a) So o Beng manglja o Adam hem i Eva te verujinen? (b) Sose o Jehova na mudardža odma okoljen so bunijepe?
8 Ked o Beng čhidža e Adamese hem e Evače ki godi te na šunen e Devlje, tegani ov počmija te buninipe protiv o Jehova. Ov manglja o Adam hem i Eva te verujinen so o Jehova hovaviljen hem soj tano lošno vladari kova na mangela šukaripe oljendže. O Beng pheja so o manuša na valjani te čeren odova so o Devel phenela. Ov vačerdža so o Adam hem i Eva valjani kokri te birinen soj tano šukar hem soj tano lošno. So šaj hine te čerel o Jehova? Ov šaj hine te mudari okoljen so bunijepe hem te čhinavi i buna. Ama, da lji adžahar šaj hine te mothovipe so o Beng tano hovavno? Na.
9 Odoljese o Jehova na mudardža odma okoljen so bunijepe. Ov muklja vakti e manušendže kokri te vladinen. Adžahar ka mothovipe so čače o Beng tano hovavno hem so samo o Jehova džanela soj tano najšukar e manušendže. Pobuter odoljestar ka sikljova ko 11. šero ki akija knjiga. So tu mislineja ando odova so o Adam hem i Eva birije? Da lji hine šukar te verujinen e Bengese, a te na šunen e Devlje? Sa so hineljen o Adam hem i Eva o Jehova dijaljen. Hineljen savršeno dživdipe, šužo than kuri te živinen hem buti koja anela bahtaljipe. Ama, o Beng niked na čerdža diso šukar oljendže. Ked bi tu oveja ko oljengo than, so bi tu čereja?
10. So svako amendar valjani te birini?
10 Avdije svako amendar valjani te birini so ka čerel, sose amaro dživdipe zavisini odoljestar so ka birina. Amen šaj te birina te šuna e Jehova sar amaro vladari hem adžahar te mothova so o Beng tano hovavno, ja šaj te birina o Beng te ovel amaro vladari (Psalam 73:28; čitinen Godžalje lafija 27:11). Ko akava sveto nane but manuša so šunena e Devlje. Ov nane vladari akalje svetoso, ama ako o Devel nane, ko tegani vladini?
KO VLADINI E SVETOA?
Da lji o Beng šaj hine te del e Isusese sa akala kraljevstvija ako na hine oljese?
11, 12. (a) So haljova odoljestar ked o Beng manglja te del e Isusese sa o kraljevstvija? (b) Kola stihija mothovena so o Beng vladini e svetoa?
11 O Isus džandža ko čače vladini e svetoa. Jekh puti o Beng „mothodža oljese sa o kraljevstvija ko sveto hem oljengi slava.“ Tegani o Beng vačerdža e Isusese: „Sa akala buča ka davtu, ako pereja ko kročija te služine maje“ (Matej 4:8, 9; Luka 4:5, 6). Šaj pučejatu: „Sar šaj o Beng te del e Isusese sa akala kraljevstvija ako na hine oljese?“ Sose sa odola kraljevstvija tane ko Bengese vasta.
12 Ama šaj pučejatu: „Sar o Beng šaj te vladini akalje svetoa ako o Jehova tano Svemoćno Devel kova čerdža sa?“ (Pučaribe 4:11). Po, ov tano Svemoćno Devel, ama o Isus vačerdža so o Beng tano „vladari akalje svetoso“ (Jovan 12:31; 14:30; 16:11). O apostol Pavle pisija so o Beng tano „devel akalje svetoso“ (2. Korintskonendže 4:3, 4). O apostol Jovan isto pisija: „Celo sveto tano ko Lošnonese vasta“ (1. Jovaneso 5:19).
SAR E BENGESO SVETO KA OVEL UNIŠTIMO?
13. Sose valjani amendže nevo sveto?
13 Akava sveto ovela sa pološno hem pološno. Avdije dikha mariba, e manušen kola dena pare talo vas, kola tane duje mujengo hem kola tane nasilna premalo avera. So god te čeren o manuša, našti te ciden sa akala problemija. Ama, o Devel pana hari ka uništini akava lošno sveto ko maribe kova vičinipe Armagedon hem ka čerel jekh pravedno nevo sveto (Pučaribe 16:14-16). Moljinatu dikh o 10. dodatko.
14. (a) Kas o Devel čhidža te ovel Kralj ko oljeso Kraljevstvo? (b) So ki Biblija hine vačerdo ando Isus?
14 O Jehova čhidža e Isuse te ovel Kralj ko oljeso nebesko Kraljevstvo. But berša angljeder, ki Biblija hine vačerdo so o Isus ka vladini sar „Knez ando Rahati“ hem oljeso Kraljevstvo na ka ovelje krajo (Isaija 9:6, 7). O Isus sikadža pe učenikon te moljinenpe: „Te avel to Kraljevstvo. Te ovel ti volja sar ko nebo, adžahar hem ki Phuv“ (Matej 6:10). Ko 8. šero ki akija knjiga ka sikljova ando odova sar e Devljeso Kraljevstvo ka cidel sa akalje svetose vlastija (Čitinen Danijel 2:44). Palo odova, e Devljeso Kraljevstvo ka čerel i Phuv te ovel but šuzo raj. Moljinatu dikh o 11. dodatko.
O NEVO SVETO TANO PAŠE
15. Soj tani i „nevi Phuv“?
15 I Biblija vačeri: „Amen adžičera nevo nebo hem nevi Phuv kuri ka ovel pravednost“ (2. Petareso 3:13; Isaija 65:17). Disavo puti, ked ki Biblija vačeripe andi Phuv, mislinipe ko manuša kola živinena ki Phuv (1. Mojsieso 11:1). Odoljese, i pravedno „nevi Phuv“ tane sa o manuša kola šunena e Devlje hem kola tane berečetime oljestar.
16. Savo šukar daro o Devel ka del e manušendže ko nevo sveto hem so valjani te čera te ovelmen asavko daro?
16 O Isus dija po lafi so o manuša kola ka živinen ko Devljeso nevo sveto, ka oveljen večno dživdipe (Marko 10:30). So valjani te čera te ovelmen asavko daro? Te šaj te arakhen o odgovor čitinen Jovan 3:16 hem 17:3. Akana ka dikha so phenela i Biblija ando odova sar ka ovel o dživdipe ko raj ki Phuv.
17, 18. Sar džana so ki celo Phuv ka ovel rahati hem so na te dara?
17 Na te ovel lošnipe, maribe, kriminal hem nasilje. Na te ovel nijekh lošno manuš ki Phuv (Psalam 37:10, 11). O Devel ka „čhinavi o maribe ki celo Phuv“ (Psalam 46:9; Isaija 2:4). I Phuv ka ovel pherdi manušenca kola mangena e Devlje hem šunenalje. Uvek ka ovelmen rahati (Psalam 72:7).
18 E Jehovaso narodo na te daral. Ko purano vakti ked o Izraelcija šuje e Devlje on na darandilje, sose ov arakhlja oljen (3. Mojsieso 25:18, 19). Ko raj na ka dara nisostar hem nikastar. O Jehova uvek ka arakhi amen (Čitinen Isaija 32:18; Mihej 4:4).
19. Sar džana so ka ovel but habe ko nevo sveto?
19 Ka ovel but habe. „Ki Phuv ka ovel pherdo dživ hem o najuče bregija ka oven pherde dživeja“ (Psalam 72:16). O Jehova „amaro Devel ka berečetini amen“ hem „i Phuv ka bijani“ (Psalam 67:6).
20. Sar džana so i Phuv ka ovel raj?
20 Celo Phuv ka ovel raj. O manuša ka oveljen šuže čhera hem bače (Čitinen Isaija 65:21-24; Pučaribe 11:18). Celo Phuv ka ovel šuži sar so hine o edensko vrt. Sa so valjani amendže o Jehova uvek ka del. I Biblija vačeri: „Tu phraveja to vas hem svakonese želje kova tano dživdo ispunineja“ (Psalam 145:16).
21. Sar džana so ka ovel rahati maškaro manuša hem o životinje?
21 Ka ovel rahati maškaro manuša hem o životinje. O životinje na ka čeren lošnipe e manušendže. O tikne čhave na ka daran te oven maškaro životinje kola avdije tane opasna (Čitinen Isaija 11:6-9; 65:25).
22. So ka čerel o Isus okoljendže soj tane naborme?
22 Nijekh na te ovel nabormo. Ked o Isus hine ki Phuv, ov sačardža buten manušen (Matej 9:35; Marko 1:40-42; Jovan 5:5-9). O Isus sar Kralj ko Devljeso Kraljevstvo ka sačari sarinen. Nijekh na ka phenel: „Nabormo hijum“ (Isaija 33:24; 35:5, 6).
23. So ka čerel o Devel okoljendže kola mulje?
23 O mulje palje ka živinen. O Devel dija po lafi so ka vazdel buten manušen kola mulje. „O pravedna hem o nepravedna ka oven irime ko dživdipe“ (Čitinen Jovan 5:28, 29; Čeriba e apostolengo 24:15).
24. So mislineja ando dživdipe ko raj?
24 Sare amen šaj te birina te sikljova ando Jehova hem te služina oljese ja te čera odova so amen manga. Ako birina te služina e Jehovase, amen šaj te ovelmen šukar dživdipe ko vakti so avela. Ked jekh manuš pheja e Isusese te setinipe koro oljeste palo oljeso meribe, tegani o Isus dija po lafi oljese: „Tu ka ove manca ko raj“ (Luka 23:43). Ko štarto šero ka sikljova pobuter ando Isus Hrist hem sar ov ka čerel sa so pheja o Devel.