Sose tane korisna e biblijake načelija?

1. Sose valjani amenđe e Devleso vođstvo?

Amaro Stvoritelj tano pomudro amendar. Ov tano sar jekh Dad kova mangela amen hem brinini pe amendar. Isto ađahar, ov na stvorinđa amen te ova nezavisna olestar (Jeremija 10:23). Sar so jekhe ćhavorese tano potrebno e roditeljengo vođstvo, isto ađahar amenđe valjani e Devleso vođstvo (Isaija 48:17, 18). E biblijake načelija dena amen vođstvo kova tano sar jekh dar ando Devel. Čitin 2. Timoteju 3:16.

E Jehovase zakonija hem načelija, sikavena amen sar šaj te ovel amen najšukar đivdipe akana hem sar šaj te dobina o večna blagoslovija ki budućnost. Sebepi so o Devel stvorinđa amen, logično tano so ov isi le pravo te phenel amenđe sar te živina. Odolese, valjani te šuna le hem te ova zahvalna aso oleso vođstvo. Čitin Psalam 19:7, 11 hem Otkrivenje 4:11.

2. Soj tane e biblijake načelija?

E biblijake načelija tane o osnovna ćaćipa, a o zakonija šaj te koristinen pe ko disave konkretna situacije (Ponovljeni zakoni 22:8). Amen valjani te razmislina te šaj te haljova sar e biblijake načelija šaj te primenina ki disavi situacija (Poslovice 2:10-12). Na primer, i Biblija sikavi so o đivdipe tano dar ando Devel. Akava načelo ka podstaknini amen te da sa amendar te na ana ki opasnost ni amaro, a ni averengo đivdipe. Čitin Dela apostolska 17:28.

3. Kola duj načelija tane najvažna?

O Isus phenđa kola duj načelija tane najvažna. O prvo načelo mothovi sose postojinaja — te penđara e Devle, te manga le hem te služina lese verno. Akava prvo načelo valjani uvek te vodini amen ko sa amare odluke (Poslovice 3:6). Okola kola živinena premalo akava načelo šaj te oven paše amala e Devleja, šaj te oven ćaće bahtale hem te ovel len večno đivdipe. Čitin Matej 22:36-38.

O dujto načelo pomožini amen te ova šukar averencar (1. Korinćanima 13:4-7). Te ićera amen ko akava načelo uključini te ponašina amen premalo manuša sar so o Devel ponašini pe olencar. Čitin Matej 7:12; 22:39, 40.

4. Sar e biblijake načelija pomožinena amenđe?

E biblijake načelija sikavena e porodicen sar te mangen jekh jekhe (Kološanima 3:12-14). Ko e Devleso Lafi isi pana jekh načelo kova zaštitini e porodicen, a odova tano so o brak valjani te ovel trajno. Čitin Postanak 2:24.

Ked ićera amen ko e biblijake načelija, odova ka pomožini amenđe te arakha amari buti hem mir ko vilo. Na primer, o poslodavcija često rodena nekas ko ićeri pe ko e biblijake načelija, koj tano pošteno hem bućarno (Poslovice 10:4, 26; Jevrejima 13:18). E Devleso Lafi sikavi amen te ova zadovoljna odoleja so isi amen hem te ćhiva o amalipe e Devleja ko prvo than, a na o materijalna buća. Čitin Matej 6:24, 25, 33 hem 1. Timoteju 6:8-10.

Ked primeninaja e biblijake načelija odova šaj te arakhi amaro sastipe (Poslovice 14:30; 22:24, 25). Na primer, ako ićeraja amen ko e Devleso zakon te na maćova, odova ka štitini amen ando nabormipa sebepi kola šaj te mera hem ando nesreće ko kola šaj te našala amaro đivdipe (Poslovice 23:20). O Jehova dozvolini e manušenđe te pijen alkohol, ama na te maćoven (Psalam 104:15; 1. Korinćanima 6:10). E Devlese načelija nane korisna amenđe samo odolese so sikavena amen te pazina ko amare postupkija, već hem ko amare mislija (Psalam 119:97-100). Ama, o ćaćutne hrišćanija na ićerena pe ko e Devlese merilija samo te bi ovela lenđe šukar. On ćerena odova sose mangena te slavinen e Jehova. Čitin Matej 5:14-16.