Sar šaj te ova popaše e Devleja?

1. Da li o Devel šunela sa o molitve?

O Devel vićini e manušen kotar sa o narodija te molinen pe te šaj te oven paše oleja (Psalam 65:2). Ama, Ov na šunela niti prihvatini svako molitva. Na primer, o molitve ando rom kova maltretirini pe romnja šaj te naiđinen ki prepreka (1. Petrova 3:7). Isto ađahar, o Devel na šunđa ni o molitve ando Izraelcija kola uporno ćerđe lošnipe. Jasno tano so i molitva tani ćaće bari čast. Ipak, o Devel ka prihvatini o molitve čak hem ando okova kova ćerđa ozbiljno greh, ako kajini pe. Čitin Isaija 1:15; 55:7.

Dikh o kratko film Da li Bog sluša sve molitve?

2. Sar valjani te molina amen?

I molitva tani deo ando amaro obožavanje, odolese amen valjani te molina amen samo amare Stvoriteljese, e Jehovase (Matej 4:10; 6:9). Isto ađahar, sebepi so hijam nesavršena, amen valjani te molina amen ko e Isuseso anav, odolese so ov mulo aso amare grehija (Jovan 14:6). O Jehova na mangela te ponovina o molitve kola napamet sikljiljam ja kola tane pisime. Ov mangela te molina amen ando vilo. Čitin Matej 6:7 hem Filipljanima 4:6, 7.

Amaro Stvoritelj šaj te šunel amen čak ked molinaja amen ano amende (1. Samuilova 1:12, 13). Ov podstakini amen te molina amen olese ki svako prilika. Na primer, sabalje ked uštaja, raćate angleder te sova, ked haja maro hem ked isi amen problemija. Čitin Psalam 55:22 hem Matej 15:36.

3. Sose o hrišćanija đana ko sastankija?

Nane lokho te ova paše e Devleja, sose živinaja maškaro manuša kola na verujinena ko Devel hem marena muj ked šunena so ov obećinđa so ka anel mir ki phuv (2. Timoteju 3:1, 4 hem 2. Petrova 3:3, 13). Odolese, amenđe valjanena amare phralja hem phenja sose on ohrabrinen amen, ama hem amen hijam potrebna olenđe. Čitin Jevrejima 10:24, 25.

Odova so ka ova e manušencar kola mangena e Devle, ka pomožini amen te ova popaše e Devleja. O sastankija ando e Jehovase svedokija tane šukar prilika aso odova, sebepi so averengi vera šaj but te ohrabrini amen. Čitin Rimljanima 1:11, 12.

4. Sar šaj te ova popaše e Devleja?

Amen ka ova popaše e Jehovaja, ako hor razmislinaja ando sa so sikljiljam kotar oleso Lafi, olese postupkija, savetija hem obećanja. Isto ađahar, ako molinaja amen hem hor razmislinaja ando oleso Lafi, pobuter ka cenina e Devleso mangipe hem olesi mudrost. Čitin Isus Navin 1:8 hem Psalam 1:1-3.

E Devleja šaj te ova popaše jedino ako isi amen vera hem pouzdanje upro leste. I luludi šaj te barjol jedino ako ćhivaja laće pani. Isto ađahar, amari vera ka barjol samo ako razmislinaja sose ko diso verujinaja. Čitin Matej 4:4 hem Jevrejima 11:1, 6.

5. Sose tano amare šukaripase te ova paše e Devleja?

O Jehova brinini pe okolendar kola mangena le. Ov šaj te zaštitini len kotar sa so šaj te ugrozini olengi vera hem i nada ko večno đivdipe (Psalam 91:1, 2, 7-10). Ov upozorini amen te cida amen ando buća kola šaj te len amaro sastipe hem bahtalipe. Isto ađahar, o Jehova sikavi amen sar šaj te ovel amen najšukar đivdipe. Čitin Psalam 73:27, 28 hem Jakovljeva 4:4, 8.