O Jakov dobinđa e Josife ked već phurilo hem odolese manglja le najviše ando sa o ćhave. Sar e Josifese phureder phralja osetinđe pe ked dikhlje odova? On hine ljubomorna upro leste hem mrzinđe le. Jekh puti, o Josif vaćerđa pe phralenđe save čudna sune dikhlja. On mislinđe so akala sune značinena so jekh dive on ka pokloninen pe olese. Odolese, on mrzinđe le pana pobuter!

Jekh dive, e Josifese phralja arakhlje e bakren paše uzi diz Sihem. O Jakov bićhalđa e Josife te dikhel da li tane šukar. Ked dikhlje le dural sar avela, phenđe: „Aće, avela akava so dikhela sune. Hajde te mudara le!“ Ked alo, dolinđe le hem fordinđe le ki jekh hor rupa. Ama, o Juda, jekh ando olese phralja, phenđa: „Ma mudaren le. Pošukar tano te bikna le sar robo.“ Ađahar bikinđe le aso 20 srebrnikija disave trgovcenđe ando Madijan kola pođinđe ko Egipat.

Palo odova, e Josifese phralja ćhivđe olese šeja ko buznjako rat, bićhalđe len olenge dadese hem phenđe: „Nane li akala te ćhavese šeja?“ O Jakov mislinđa so disavi divljo životinja mudarđa e Josife. Odolese hine but tužno. Niko naštine te utešini le.

Ko Egipat, o Josif hine bikimo sar robo jekhe važno manušese kova vićinđa pe Petefrije. Ama, o Jehova hem ponodri hine e Josifeja. O Petefrije dikhlja so o Josif šukar ćerela pi buti hem so šaj te verujini lese. Hari palo odova, ov ćhivđa le te ovel glavno manuš upro sa so hine le.

E Petefrijesi romni dikhlja so o Josif hine šužo hem zoralo. Svako dive pućlja le te sovel olaja. So o Josif ćerđa? Ov odbinđa la hem phenđa: „Na! Odova nane šukar. Mo gospodari isi le poverenje koro mande, a tu hijan olesi romni. Ako sovava tuvaja, ka grešinav e Devlese!“

Jekh dive, e Petefrijesi romni silaja manglja te ćhivel e Josife te sovel olaja. Dolinđa le ando šeja, ama ov našlja. Ked o Petefrije alo ćhere, oj vaćerđa lese so o Josif napadinđa la. Ama, odova na hine ćaće. O Petefrije hine but holjamo hem naredinđa te phanen e Josife. Ama, o Jehova na bisterđa e Josife.

Đi o Josif hine ko phanlipe, o faraon, o vladari ando Egipat, dikhlja disave sune. Ama, niko naštine te vaćeri lese so on značinena. Jekh ando olese sluge phenđa so o Josif šaj te objasnini lese so značinena o sune kola dikhlja. O faraon phenđa odmah te vićinen e Josife.

O faraon pućlja le: „Šaj li te objasnine maje so značinena o sune kola dikhljum?“ O Josif phenđa e faraonese: „Ko Egipat efta berš ka ovel but hrana, a palo odova efta berš ka ovel baro bokhalipe. Birin jekhe mudro manuše kova ka ćedel but hrana, te na meren o manuša bokhatar.“ O faraon phenđa: „Tut birinava! Tu ka ove o dujto najmoćno manuš ko Egipat.“ Kotar o Josif đanđa so značinđe e faraonese sune? O Jehova pomožinđa le ko odova.

Ađahar, o Josif efta berš ćedinđa hrana. Ked nakhlje odola efta berš, ki celo phuv hine bokhalipe, sar so phenđa o Josif. O manuša ando razna thana alje te ćinen hrana e Josifestar. Ked oleso dad, o Jakov, šunđa so ko Egipat isi hrana, bićhalđa pe deše ćhaven te đan hem te ćinen odova so valjani lenđe.

Ked e Jakovese ćhave đelje ko Josif, ov odmah penđarđa len. Ama, olese phralja na penđarđe le. On pokloninđe pe olese baš ađahar sar so o Josif dikhlja ko suno ked hine poterno. O Josif manglja te đanel da li tane olese phralja pana lošna. Odolese phenđa lenđe: „Tumen hijen špijunija. Mangena te dikhen kuri amari phuv nane zaštitimi.“ On phenđe: „Na, nane ađahar! Amen hijam 12 phralja ando Hanan. Jekh amaro phral mulo, a o najtikneder aćhilo ćhere amare dadeja.“ Tegani o Josif phenđa lenđe: „Anen tumare najtikne phrale akate hem ka verujinav tumenđe.“ Tegani on irinđe pe ćhere ko po dad.

Ked e Jakovesi porodica aćhilji bizi hrana, ov palem bićhalđa pe ćhaven te đan ko Egipat. Ama, akava puti, lelje peja pe najtikne phrale, e Venijamine. O Josif manglja te dikhel da li olese phralja meninđe pe. Odolese phenđa te ćhiven olesi srebrno čaša ki Venijaminesi torba kaj hine điv. Palo odova, ov phenđa so on ćorđe la. Ked e Josifese sluge arakhlje i čaša ki Venijaminesi torba, olese phralja naštine te verujinen. Tegani počminđe te molinen e Josife te kaznini olen, a na e Venijamine.

O Josif dikhlja so olese phralja meninđe pe. Ov naštine više te izdržini. Počminđa te rovel hem phenđa lenđe: „Me hijum o Josif, tumaro phral. Da li tano mo dad pana đivdo?“ Olese phralja hine but iznenadime. Odolese phenđa lenđe: „Ma oven tužna sose ćerđen maje odova. O Devel anđa man akate te šaj te spasini tumen. Akana, sigate đan hem anen me dade akate.“

On irinđe pe ćhere hem vaćerđe pe dadese sa so ulo hem sarine zajedno đelje ko Egipat. Palo but berša, o Josif hem oleso dad palem hine zajedno.