28. LEKCIJA
Mothov so hijan zahvalno aso odova so o Jehova hem o Isus ćerđe tuće
Sar osetineja tut ked to amal dela tut jekh šužo poklon? Verovatno hijan but bahtalo hem mangeja te mothove so hijan zahvalno olese. O Jehova hem o Isus dinđe amen najbaro poklon. Kova tano odova poklon? Sar šaj te mothova so hijam zahvalna aso odova?
1. Sar šaj te mothova so hijam zahvalna e Jehovase hem e Isusese?
Ki Biblija pisini so svako ko mothovi vera ko Isus šaj večno te živini (Jovan 3:16). So značini te mothova vera? Odova na značini samo te verujina upro leste. Amen valjani te mothova vera odoleja so ćeraja, so vaćeraja hem save odluke anaja (Jakovljeva 2:17). Ađahar zorjaćeraja amaro amalipe e Isuseja hem olese Dadeja, e Jehovaja. (Čitinen Jovan 14:21.)
2. Ko kova važno događaj šaj te mothova so hijam zahvalna aso odova so ćerđe o Jehova hem o Isus?
I rat angleder te merel, o Isus vaćerđa pe učenikonenđe sar šaj te mothoven soj tane zahvalna asi olesi žrtva. Ov phenđa lenđe te ćeden pe hem te ićeren „e Gospodesi večera“, koja tani penđarutni hem sar Spomen-svečanost (1. Korinćanima 11:20). O Isus manglja olese apostolija hem sa o prava hrišćanija palo lende, te setinen pe so ov dinđa po životi amenđe. Odolese, ov phenđa: „Ćeren akava te setinen tumen upro mande“ (Luka 22:19). Ked aveja ki Spomen-svečanost, tegani mothoveja so hijan zahvalno aso baro mangipe kova o Jehova hem o Isus mothovđe.
SIKLJOV POBUTER
Sikljov sar šaj pana te mothove so hijan zahvalno aso baro mangipe kova o Jehova hem o Isus mothovđe hem sose tano važno o dive ked o Isus mulo.
3. So šaj te ćere te mothove so hijan zahvalno?
Zamislin so neko spasinđa to životi. So ka ćere palo odova? Da li ka bistre so ćerđa tuće odova manuš ili ka de sa tutar te mothove so hijan lese zahvalno?
Amen šaj večno te živina sebepi e Jehovaso šukaripe. Čitinen 1. Jovanova 4:8-10, hem palo odova vaćeren ando akala pućiba:
Sose tani e Isusesi otkupno žrtva jekh posebno poklon?
Sar osetineja tut ked đaneja so o Jehova hem o Isus ćerđe tuće?
Sar šaj te mothova so hijam zahvalna aso odova so o Jehova hem o Isus ćerđe amenđe? Čitinen 2. Korinćanima 5:15 hem 1. Jovanova 4:11; 5:3. Palo odova so ka čitinen akala stihija, vaćeren ando akava pućibe:
Premalo akala stihija, so šaj te ćera te mothova so hijam zahvalna?
4. Ov sar o Isus
Pana jekh način sar šaj te mothova so hijam zahvalna tano te trudina amen te ova sar o Isus. Čitinen 1. Petrova 2:21, hem palo odova vaćeren ando akava pućibe:
Sar šaj te da sa amendar te ova sar o Isus?
O Isus manglja e Devleso Lafi, propovedinđa i šukar vest hem pomožinđa averenđe
5. Ava ki Spomen-svečanost
Čitinen Luka 22:14, 19, 20 hem dikhen sar prvo puti ićerđa pe e Gospodesi večera. Palo odova vaćeren ando akala pućiba:
So ulo ki Gospodesi večera?
So predstavinena o maro hem o vino? (Dikhen o 19. hem o 20. stih)
O Isus manglja olese učenikija te ićeren i Spomen-svečanost, jekh puti ko berš, ko dive ked ov mulo. Odolese, e Jehovase svedokija ćedena pe jekh puti ko berš te setinen pe ko dive ked o Isus mulo hem tegani ćerena odova so ov ćerđa. Dikhen o VIDEO, hem sikljoven so ćerela pe ko akava važno sastanko. Palo odova vaćeren ando akava pućibe:
So ćerela pe ki Spomen-svečanost?
O maro hem o vino tane simbolija. O maro predstavini e Isuseso savršeno telo kova ov dinđa sar žrtva amenđe. O vino predstavini oleso rat
AKO NEKO PHENELA: „Valjani samo te verujine ko Isus.“
Sar šaj te koristine Jovan 3:16 hem Jakovljeva 2:17 te mothove so valjani te ćera diso pobuter?
SO SIKLJILJAM
Amen mothovaja so hijam zahvalna aso odova so o Isus ćerđa amenđe ađahar so mothovaja vera ano leste hem so avaja ki Spomen-svečanost.
Te ponovina
So značini te mothova vera ko Isus?
Sar šaj te mothove so hijan zahvalno aso odova so o Jehova hem o Isus ćerđe tuće?
Sose tano važno te ave ki Spomen-svečanost?
RODE POBUTER
Ko so podstaknini amen odova so đanaja so o Isus mulo sebepi amaro?
Sikljov pobuter soj tani i vera hem sar šaj te mothova la.
„Mothov so verujineja ko Jehovase obećanja“ (Stražarska kula, oktobar 2016)
Čitin o iskustvo „Akana isi man čisto savest hem hijum bahtali“, hem dikh sar jekh romni menjinđa po životi ked haljilji so o Isus mulo sebepi amaro.
„I Biblija pomožini e manušenđe te menjinen po životi“ (Stražarska kula, 1. avgust 2011)
Sikljov sose samo disave manuša lena o simbolija ki Spomen-svečanost.