Kobor ando e Jehovase svedokija pendžareja? Nesave amendar šaj tane te komšije, kolege ja školska amala. Šaj vačerdžam tuva andi Biblija. Ko hijam amen hem sose vačeraja averendže odoljestar ko so verujinaja?

Amen hijam obična manuša. Amen isi amen različito poreklo hem živinaja ko različita uslovija. Nesave amendar angljeder hine ki aver religija, a avera na verujindže ko Devel. Angljeder te ova e Jehovase svedokija, odvojindžam vreme šukar te sikljova so sikavi i Biblija (Čeriba e apostolengo 17:11). Haljiljam so odova so sikljiljam tano čačipe hem kokri odlučindžam te služina e Jehovase.

Amendže pomožini odova so sikljovaja andi Biblija. Sar avera manuša hem amen isi amen problemija hem disave amare mane. Ama, odoljese so daja sa amendar te ičera amen ko e biblijake načelija, amaro dživdipe ulo pošukar (Psalam 128:1, 2). Odova tano jekh razlog sose vačeraja averencar ando odova so sikljiljam andi Biblija.

Amen živinaja sar so rodela o Devel. O buča so sikavi i Biblija šukar utičinena upro amende hem podstakninena amen te poštujina averen, te ova poštena hem te mothova šukaripe. E biblijake načelija pomožinena amendže te ova šukar premalo avera hem pomožinena amare porodice te oven paše jekh jekheja. Odoljese so hijam sigurna „so o Devel na čerela razlika maškaro manuša“, amen hijam sar jekh porodica čerdi kotar manuša so avena ando različita nacije, kola verujinena ko ista buča hem koljen i politika na ulavi. Iako hijam obična manuša, amen hijam jekh posebno narodo (Čeriba e apostolengo 4:13; 10:34, 35).

• Ko so tane e Jehovase svedokija slična sar avera manuša?

• Save korisna buča sikljilje e Jehovase svedokija andi Biblija?

But manuša mislinena so e Jehovase svedokija tane nesavi nevi vera. Ama, angljeder 2 700 berš, e manušendže kola služindže e Devljese hine vačerdo soj tane oljese „svedokija“ (Isaija 43:10-12). Sa dži o 1931. berš, hijam lje pendžarde sar e Biblijake Istraživačija. Sose akana amen vičinaja amen e Jehovase svedokija?

Amaro nav mothovi koj tano amaro Devel. Sar so mothovena o purane prepisime biblijake ljila, e Devljeso nav, Jehova, arakhi pe ki Biblija ko pobuter ando 7 000 putija. Ko but prevodija akava nav tano menimo titulencar sar soj tane „Gospod“ ja „Devel“. Ama, o čačutno Devel mothovdža po nav e Mojsijese hem phendža: „Akava tano mo nav zauvek“ (2. Mojsieso 3:15). Adžahar ov čerdža razlika maškaro peste hem o hovavne devela. Isi amen bari čast te akhara e Devljeso sveto nav.

Amaro nav mothovi kova tano amaro zadatko. But pravedna manuša ko purano vreme, počmindoj ando Avelj, dindže baro svedočanstvo andi piklji vera ko Jehova. Ko akava „baro oblako ando svedokija“ tane o Noje, o Mojsije, o David hem avera (Jevrejendže 11:4 – 12:1). Sar so jekh manuš ikljola ko sudo te svedočini ki korist jekhe manušese kova tano nepravedno optužimo, adžahar hem amen spremno vačeraja o čačipe ando amaro Devel.

Amen džaja palo e Isuseso primer. I Biblija ando Isus phenela soj tano ov „o verno hem o čačutno svedoko“ (Pučaribe 3:14). Kokri o Isus ’vačerdža e Devljeso nav e manušendže‘ hem ’svedočindža ando čačipe‘ ando Devel (Jovan 17:26; 18:37). Odola so čače mangena te džan palo Isus valjani te akharen e Jehovaso nav hem te vačeren oljestar averendže. E Jehovase svedokija trudinena pe te čeren odova.

• Sose e Biblijake Istraživačija ljelje o nav e Jehovase svedokija?

• Ando ked o Jehova isi lje svedokija ki Phuv?

• Koj tano o najbaro e Jehovaso svedoko?

I Biblija vačerdža so palo e Isuseso meribe ka pojavinen pe o hovavne učiteljija maškaro prva hrišćanja hem ka sikaven hovavne buča (Čeriba e apostolengo 20:29, 30). Sar nakhlja o vreme, ulo baš adžahar. On mešindže odova so o Isus sikavdža e bučencar andi hovavni religija hem adžahar ulo o hovavno hrišćanstvo (2. Timotejese 4:3, 4). Sar šaj avdije te ova sigurna so tačno haljovaja so i Biblija čače sikavi?

Alo o vreme o Jehova te mothovi o čačipe. Ov angljeder vačerdža so ko poslednja dive „o čačipe ka širini pe“ (Danijel 12:4). Ko 1870. berš, jekh tikni grupa manuša kola rodindže o čačipe dikhlje so but buča kola sikavdža i crkva na hine andi Biblija. Odoljese, on trudindže pe te haljon so čače sikavi i Biblija hem o Jehova pomožindža ljen ko odova.

O iskrena manuša temeljno proučindže i Biblija. Akala iskrena e Biblijake Istraživačija, sar so angljeder vičindžam amen, koristindže jekh način te proučinen i Biblija, kova amen pana koristinaja. On čerdže lafi andi Biblija, tema palji tema. Ked reslje ko deo andi Biblija kova hine pharo te haljon, on rodindže avera stihija kola objasninena odova deo. Ked hine sigurna so odova so haljilje hine adžahar sar so vačeri pe ki celo Biblija, tegani pisindže odova. Odoljeja so mukhlje i Biblija kokri pes te tumačini, on arakhlje o čačipe ando Devljeso nav hem ando oljeso Kraljevstvo, andi oljesi namera e manušencar hem e Phuvjaja, ando odova so ovela e muljencar hem andi nada so ka ušten o mulje. Adžahar on oslobodindže pe ando hovavne sikljoviba hem adetija (Jovan 8:31, 32).

Dži ko 1879. berš, e Biblijake Istraživačija haljilje so alo o vreme te vačeren o čačipe ki celo Phuv. Odoljese odova berš, počmindže te čeren o časopis kova hem avdije čeraja lje, i Stražarsko kula. Akana vačeraja o čačipe andi Biblija e manušendže ko 240 Phuvja hem thana ko pobuter ando 900 čhibja. Niked dži akana o čačipe na hine odobor but širimo!

• So ulo e čačipaja andi Biblija palo e Isuseso meribe?

• So pomožindža amen paljem te arakha o čačipe andi Biblija?

E Jehovase svedokija beršencar koristindže, štampindže hem delindže razna prevodija andi Biblija. Ama, sar dželo o vreme, dikhljam so valjani te čera nevo prevod kova ka pomožini e manušendže „šukar te pendžaren o čačipe“ (1. Timotejese 2:4). Odoljese, ko 1950. berš počmindžam deo po deo te objavina o prevod andi Biblija, ki savremeno englesko čhib, kova vičindža pe prevod Novi svet. Avdije akava prevod kova tano tačno prevodimo isi ko pobuter ando 130 čhibja.

Valjandža amendže Biblija koja šaj lokho te haljol pe. Sar so nakhela o vreme o čhibja meninena pe, odoljese ko but prevodija isi purane lafija kola tane phare te haljon pe. Isto adžahar, arakhljam pana popurane prepisime biblijake ljila kola pomožindže pošukar te haljon pe i hebrejsko, i aramejsko hem i grčko čhib ko kola hine pisimi i Biblija.

Valjandža amendže tačno prevod. O prevodiocija andi Biblija valjani tačno te prevodinen odova so pisini, a na te prevodinen e Devljeso Lafi sar so on mangena. Ama, ko but prevodija andi Biblija na bešela e Devljeso nav, Jehova.

Valjandža amendže Biblija koja ka slavini e Devlje (2. Samueleso 23:2). Ko prevod Novi svet, e Jehovaso nav arakhi pe koro 7 000 thana. Odova nav hine pisimo ko najpurane prepisime biblijake ljila, sar so dikhaja telje ki slika (Psalam 83:18). Akija Biblija hine čerdi but berša hem ked ka čitine la ka uživine, sose koro late tane jasno pisime e Devljese mislija. Sa jekh da li isi tut prevod Novi svet ki tiklji čhib ja na, šukar tano te ovel tut navika te čitine e Jehovaso Lafi svako dive (Ješua 1:8; Psalam 1:2, 3).

• Sose valjandža te čera nevo biblijako prevod?

• So valjani svako dive te čera ako mangaja te džana koja tani e Devljesi volja?