But manuša čhinavdže te džan ko crkve ja ko džamije sose odothe na arakhlje uteha hem odgovorija ko važna pučiba. Tegani, sose valjani te ave ko sastankija kola ičerena e Jehovase svedokija? Sar on ka koristinen tuče?

Ka arakhe radost odoljese so ka ove maškaro manuša kola brininena pe averendže. Ko prvo veko, o hrišćanja čedindže pe ko skupštine, ičerdže sastankija ko kola slavindže e Devlje, proučindže i Biblija hem ohrabrindže jekh jekhe (Jevrejendže 10:24, 25). Maškaro oljende hine mangipe hem hine but paše amala – sar duhovna phralja hem phenja (2. Solunskonendže 1:3; 3. Jovaneso 14). Amen džaja palo oljengo primer hem hijam radosna sar on.

Ka sikljove sar te ičere tut ko e biblijake načelija. Isto sar so hine ko purano vreme, hem avdije murša, džuvlja hem čhave, sare čedaja amen zajedno. O iskusna phralja koristinena i Biblija te pomožinen amen te haljova sar te ičera amen ko e biblijake načelija ko amaro dživdipe (5. Mojsieso 31:12; Nehemija 8:8). Ko amare sastankija sare šaj te da komentarija hem te džilaba, sose adžahar mothovaja amari nada (Jevrejendže 10:23).

Ka zorjačere ti vera ko Devel. Ko prvo veko, o apostol Pavle e phraljendže ki jekh skupština phendža: „Jedva adžičerava te dikhav tumen [...] zajedno te ohrabrina amen, me tumare veraja, a tumen meklje veraja“ (Rimskonendže 1:11, 12). Odova so zajedno čedaja amen amare phraljencar ko sastankija, čerela amari vera te ovel pana pozoralji hem ponodri spremno te živina premalo odova so pisini ki Biblija.

Šaj li te ave ko amare sastankija hem tu te osetine akija radost? Ka ovel amendže drago te ave. Svako šaj te avel ko amare sastankija hem na čedena pe pare.

• Premalo kaso primer amen avdije čedaja amen ko amare sastankija?

• Savi korist ka ovel amen ako džaja ko sastankija?

Amen redovno džaja ko amare sastankija, bilo te ovel lošno ja šukar vreme. Sose e Jehovase svedokija trudinena pe te aven ko sastankija, iako isi ljen peklje problemija ja šaj tane umorna kotar buti?

Odova tano amare šukaripase. Ked o Pavle pisindža „te razmislina jekh jekhestar“, ov mislindža upro odola soj tane ki amari skupština (Jevrejendže 10:24). Ov manglja te phenel so amen valjani šukar te pendžara amen jekh jekheja. Oljese lafija ohrabrinena amen te mothova so brininaja amen averendže. Ked ka pendžara pošukar averen ki skupština, tegani ka dikha so disave oljendar hine ljen slična problemija sar amare hem so šaj te pomožinen amen te rešina ljen.

Ka oven amen but paše amala. Amare duhovna phralja nane samo nesave manuša kola avena ko sastankija, nego on tane amare paše amala. Amen družinaja amen hem ko avera prilike. Sar koristini amendže odova so družinaja amen oljencar? Sikljovaja te cenina jekh jekhe hem amaro mangipe maškaro amende barjola. Ama, ked amare duhovna phralja isi ljen problemija, amen hijam spremna te pomožina ljen, sose hijam oljencar paše amala (Godžalje lafija 17:17). Odoljeja so družinaja amen sarinencar ki amari skupština, mothovaja so brininaja amen jekh jekhese (1. Korintskonendže 12:25, 26).

Ohrabrinaja tut te rode tuče amala maškaro okola so čerena e Devljesi volja. Tu šaj te arakhe asavke amaljen maškaro e Jehovase svedokija. Ma mukh ništa te čhinavi tut te družine tut amencar.

• Sose tano amendže korisno so družinaja amen ko sastankija?

• Ked šaj te ave hem te pendžare averen svedokon ki amari skupština?

Ko sastankija kola ičerdže o prva hrišćanja hine džilja, molitve, čitindže i Biblija hem vačerdže olatar. Na čerdže pe nisave ritualija (1. Korintskonendže 14:26). Amare sastankija tane slična sar oljenge.

Sikljovaja andi Biblija, a odova tano korisno amendže. Svako subota ja nedelja, ki svako skupština ičeri pe e Biblijako govor ando 30 minutija. Adžahar sikljovaja sar i Biblija pomožiini amen hem so vačeri kotar vreme ko kova živinaja. Sare hijam ohrabrime te pratina ko amare Biblije o stihija kola čitinena pe. Palo govor, jekh sati isi amen Proučibe andi „Stražarsko kula“, kuri šaj sare te den komentarija dži proučinaja disavo članko andi Stražarsko kula – izdanje proučibase. Akava pomožini amen te ičera amen ko e biblijake savetija. Isto članko proučini pe ko pobuter ando 110 000 skupštine ki celo Phuv.

Sikljovaja sar pošukar te pomožina averendže. Ko radno dive isi amen pana jekh sastanko kova vičini pe Amaro hrišćansko dživdipe hem služba. Akava sastanko tano čerdo ko trin delija hem temeljini pe ko materijali kova svako masek ikljola ki Radno sveska. O prvo deo ando akava sastanko kova vičini pe Barvaljipe ando Devljeso Lafi, pomožini amen pošukar te pendžara nesavo deo andi Biblija kova valjani te čitina odova kurko. O dujto deo vičini pe De tutar sa ki služba hem odothe isi prikazija kola sikavena amen sar šaj te vačera averencar andi Biblija. Odothe isi jekh phral kova dela savetija hem pomožini amen pošukar te čitina hem te sikava averen (1. Timotejese 4:13). Ko trito deo ando akava sastanko kova vičini pe Hrišćansko dživdipe, vačeri pe odoljestar sar te primenina e biblijake načelija ko amaro dživdipe. Isto adžahar, ko akava deo isi materijali ko kova isi pučiba hem sare šaj te den odgovor kova pomožini amen pošukar te haljova e Devljeso Lafi.

Ked ka ave ko amare sastankija, sigurno ka ovel tuče but šukar te šune hem te dikhe sar sikljovaja andi Biblija (Isaija 54:13).

• So šaj te šune ko sastankija kola ičerena e Jehovase svedokija?

• Ko kova sastanko bi mangeja te ave?

Da li dikhljan ko slike ki akija brošura kobor šukar tane uravde e Jehovase svedokija ked džana ko e skupštinake sastankija? Sose odobor but pazinaja ko amaro urajbe hem sar izgledinaja?

Adžahar mothovaja so poštujinaja amare Devlje. Čače tano odova so e Devljese tano považno save hijam andral (1. Samueleso 16:7). Ama, ked čedaja amen te slavina lje, mangaja te mothova so viljestar poštujinaja e Devlje hem amare duhovno phraljen hem phenjen. Ako valjani te ikljova anglo nesavo sudo, tegani amen ka pazina sar ka urava amen. Isto adžahar, odoljeja sar hijam uravde ko sastanko mothovaja kobor ceninaja e Jehova, kova tano „Sudija andi celo Phuv“ hem o than kuri čedaja amen te služina oljese (1. Mojsieso 18:25).

Adžahar mothovaja so ičeraja amen ko e biblijake načelija. I Biblija podstaknini e hrišćanen te uraven pe skromno hem razborito (1. Timotejese 2:9, 10). Te urava amen skromno značini te na urava šeja kola tane phravde, tesna ja izazovna. Isto adžahar, i razboritost ka pomožini amen te birina šeja kola nane neuredna ja kola nane čudna. Akala načelija dena amen baro izbor sar te urava amen. Odova so ka ova uredna hem šukar uravde, bizo lafi šaj ’te ukrasini o sikljoviba ando amaro Spasitelj‘ hem ’te slavini amare Devlje‘ (Titase 2:10; 1. Petareso 2:12). Ked hijam šukar uravde ko amare sastankija, odoljeja utičinaja sar avera ka dikhen ko Jehova hem ko oljeso narodo.

Viljestar vičinaja tut te ave ko amare sastankija, bizo obzir sar akana uraveja tut. Amare šeja na valjani te oven skupa ja moderna, nego uredna, čista hem pristojna.

• Kobor tano važno odova sar hijam uravde ked džaja ko sastankija?

• Kola načelija ka pomožinen amen te džana sar te urava amen hem sar te izgledina?

Ako proučineja i Biblija e Jehovase svedokoncar, šaj trudineja tut angljeder te pripremine o materijali kova ka proučinen. Ka ovel tuče korisno ako isto odova čereja angljeder te dža ko e skupštinake sastankija. Najbari korist ka ovel amen, ako isi amen navika redovno te pripremina amen.

Odlučin ked hem kaj ka proučine. Ked tano tuče najšukar te pripremine tut? Da li sabalje, angljeder te dža ki buti ja račate ked o čhave sovena? Ako našti but vreme te proučine, odlučin kobor šaj hem ma mukh nisose te čhinavi tut te čere odova. Rode jekh mirno than kuri šaj te proučine hem isključin sa o buča kola šaj te smetinen tut, sar soj tane o radio, i televizija ja o telefoni. Ked molineja tut angljeder te počmine, ka ovel tuče polokho te misline ko odova so čitineja andi Biblija, a na ko teklje problemija (Filipskonendže 4:6, 7).

Podvucin o materijali hem pripremin tut te de komentarija. Počmin adžahar so ka haljove sostar vačeri i tema. Razmislin kotar o naslov ko članko ja kotar šero. Dikh sar o podnaslovija tane povezime e glavno temaja. Isto adžahar, dikh o slike hem o pučiba e ponovibase kola mothovena kola tane o glavna mislija. Palo odova, čitin svako odlomko hem rode o odgovor ko pučibe kova tano dindo. Phrav hem čitin o stihija andi Biblija hem razmislin sar tane povezime odoljeja so čitineja ko odlomko (Čeriba e apostolengo 17:11). Ked ka arakhe o odgovor, podvucin nekobor lafija ja mislija ko odlomko kola ka pomožinen tut te na bistre o odgovor. Tegani, ko sastanak, ako mangeja šaj te vazde to vas hem te de kratko komentari teklje lafencar.

Ka ovel tut pobaro barvaljipe kotar e Devljeso Lafi, ako ka proučine različita teme kola ka oven ko sastankija (Matej 13:51, 52).

• Sar šaj redovno te pripremine tut amare sastankondže?

• Sar šaj te pripremine tut te de komentarija ko sastanko?

Pana ko purano vreme, o Jehova manglja svako porodica te ovel la vreme ked tane zajedno, te šaj te oven popaše e Jehovaja hem jekh jekheja (5. Mojsieso 6:6, 7). Odoljese e Jehovase svedokija svako kurko arakhena vreme sar porodica te vačeren kotar duhovna buča kola valjanena oljendže. Čak iako disave oljendar nane ljen čhave ja živinena kokri, on šaj te odlučinen te proučinen diso andi Biblija so on birindže.

Odova tano vreme te oven popaše e Jehovaja. I Biblija phenela: „Oven paše e Devljeja, hem ov ka ovel paše tumencar“ (Jakoveso 4:8). E Jehova pošukar ka pendžara ked kotar Biblija sikljovaja pobuter ando odova savo tano ov hem sar ov postupindža. Jekh lokho način sar te počminen tumaro porodično proučibe tano adžahar so zajedno ka čitinen ko glaso i Biblija. Šaj te čitinen odova deo andi Biblija kova tano dindo ko raspored e sastankose Amaro hrišćansko dživdipe hem služba. Sare šaj te čitinen po jekh deo hem palo odova te vačeren so sikljiljen andi Biblija.

Odova tano vreme i porodica te ovel popaše jekh jekheja. O rom hem i romni, isto adžahar o roditeljija hem o čhave, ovena popaše jekh jekheja ked proučinena i Biblija zajedno. O porodično proučibe valjani te ovel radosno vreme kova sare jedva ka adžičeren. Premalo e čhavenge berša, o roditeljija šaj te birinen o teme koljendar ka vačeren pe čhavencar, a kola tane ki Stražarsko kula ja Probudite se! ja ki amari internet stranica jw.org. Šaj te vačeren ando disavo problemi kova isi ljen o čhave ki škola hem te pomožinen ljen sar te ikljon ko krajo oljeja. Isto adžahar, šaj te dikhen o program andi amari televizija (tv.jw.org) hem palo odova te vačeren odoljestar. Ja šaj te vežbinen o džilja kola ka džilaben pe ko sastankija hem palo odova šaj zajedno te han ja te pijen diso.

Akava posebno vreme, kova svako kurko zajedno dena e Jehovase, ka pomožini sarinendže ki porodica te uživinen dži proučinena i Biblija, a o Jehova but ka blagoslovini odova so čerena (Psalam 1:1-3).

• Sose arakhaja vreme te ovel amen porodično proučibe?

• So šaj o roditeljija te čeren te šaj sare te uživinen ko porodično proučibe?

Sose o manuša ko akala slike tane odobor radosna? On tane ko jekh ando amare kongresija. Sar so e Devljese slugendže ko purano vreme hine vačerdo te čeden pe trin putija ko berš hem amen jedva adžičeraja te čeda amen ko amare kongresija (5. Mojsieso 16:16). Svako berš, isi amen duj pokrajinska sastankija kola tane pojekh dive hem regionalno kongres kova tano trin dive. Savi korist isi amen oljendar?

On čerena amaro duhovno phraljipe pana pozoralo. Isto sar so o Izraelcija radosno slavindže e Jehova „maškaro čedime manuša“ hem amen radosno slavinaja olje ko amare kongresija (Psalam 26:12; 111:1). Ko kongresija isi amen prilika te upoznajina hem te družina amen amare phraljencar hem phenjencar ando različita skupštine, pa čak ando avera Phuvja. Ked isi pauza, amen odothe zajedno haja maro hem uživinaja ki šukar atmosfera ko akava duhovno događaj (Čeriba e apostolengo 2:42). Odothe šaj te dikha o mangipe kova spojini sa e phraljen ko celo sveto (1. Petareso 2:17).

On pomožinena amendže duhovno te barjova. O Izraelcija hine but bahtalje so šaj hine „te haljoven o lafija“ andi Biblija so hine oljendže objasnime dži hine čedime zajedno (Nehemija 8:8, 12). Hem amen ceninaja odova so sikljovaja andi Biblija ko amare kongresija. Svako kongres isi lje jekh biblijaki tema. Prekalo interesantna govorija hem prikazija, amen sikljovaja sar te čera e Devljesi volja. Ohrabrime hijam ked šunaja sar avera ačhona verna ko akava pharo vreme. Ko regionalna kongresija ičerena pe drame koljendar o događaja andi Biblija ovena amendže porealna hem oljendar but sikljovaja. Ko svako kongres, okola so dindže po dživdipe e Jehovase šaj te krstinen pe.

• Sose hijam odobor radosna ko amare kongresija?

• Savi korist šaj te ovel tut ako aljan ko kongres?

Nekobor dive angljeder te merel, o Isus vačerdža: „Akava šukar haberi ando kraljevstvo ka vačeri pe ko celo sveto, te svedočini pe sa e narodondže, hem tegani ka avel o kraj“ (Matej 24:14). Sar valjani te čerel pe akava? Adžahar so ka čera odova so čerdža o Isus dži hine ki Phuv (Luka 8:1).

Džaja te propovedina e manušendže kotar čher ko čher. O Isus sikavdža pe učenikon te propovedinen o šukar haberi kotar čher ko čher (Matej 10:11-13; Čeriba e apostolengo 5:42; 20:20). O propovednikija ando prvo veko hine ljen područje kuri valjandže te propovedinen (Matej 10:5, 6; 2. Korintskonendže 10:13). Isto sar oljende hem amen avdije hijam šukar organizujime te propovedina hem svako skupština isi la područje kuri propovedini. Odova pomožini amendže te šuna e Isusesi zapovest te „propovedina e narodose hem temeljno te svedočina“ (Čeriba e apostolengo 10:42).

Džaja te propovedina kuri god isi manuša. O Isus dindža amendže primer odoljeja so propovedindža e manušendže ko thana kuri šaj hine te arakhi ljen, sar na primer uzo more ja uzo bunari (Marko 4:1; Jovan 4:5-15). Hem amen vačeraja e manušencar andi Biblija ko svako than – ko ulice, ko prodavnice, ko parkija ja prekalo telefoni. Isto adžahar, uvek ked šaj, propovedinaja amare komšijendže, kolegendže, školsko amaljendže ja e familijače. Odoljese so sare adžahar propovedinaja, milionja manuša ki celo Phuv šaj te šunen o „šukar haberi ando spasenje“ (Psalam 96:2).

Da li razmislindžan kase šaj te vačere o šukar haberi ando e Devljeso Kraljevstvo hem sar odova ka utičini ki oljesi budućnost? Odova so džaneja, ma ičer samo tuče. Vačer odoljestar averendže so posigate!

• Kova „šukar haberi“ mora te propovedini pe?

• Sar e Jehovase svedokija oponašinena e Isuse ked propovedinena?

O lafi „pioniri“ but putija odnosini pe upro nekaste kova istražini nevo područje hem phravela o drumo averendže te džan palo oljeso primer. O Isus hine sar pioniri odoljese so hine bičhaldo ki Phuv te sikavi e manušen hem te phravel oljendže o drumo te spasinen pe (Matej 20:28). Avdije, oljese sledbenikija tane sar oljeste adžahar so džana so pobuter ki služba te „čeren učenikon“ (Matej 28:19, 20). Nesave šaj te služinen ki posebno služba koja amen vičinaja pionirsko služba.

O pioniri pobuter vreme džala te propovedini. Sa e Jehovase svedokija vačerena averendže o šukar haberi. Ama, disave planirindže poklo vreme te šaj te služinen sar opšta pionirija, adžahar so džana ki služba 70 satija svako masek. But oljendar čerena buti nekobor satija ko dive ja ko kurko, te šaj više vreme te džan ki služba. A avera tane birime te služinen sar specijalna pionirija ko thana kuri valjani pobuter te propovedini pe. On džana ki služba 130 ja pobuter satija svako masek. O pionirija mangena skromno te živinen hem isi ljen poverenje so o Jehova ka brinini pe oljendar (Matej 6:31-33; 1. Timotejese 6:6-8). Okola so našti te oven opšta ja specijalna pionirija, ako mangena, šaj te služinen sar pomoćna pionirija, adžahar so ka džan ki služba 30 ja 50 satija ko masek.

O pioniri služini odoljese so mangela e Jehova hem e manušen. Isto sar o Isus, amen dikhaja so bute manušendže tano potrebno te džanen ando Devel hem andi oljesi namera (Marko 6:34). Ama, amen džanaja o buča so šaj te pomožinen oljendže akana hem te den ljen nada so ka ovel ljen pošukar budućnost. Odoljese so mangela e manušen, o pioniri viljestar mangela te del pobuter po vreme hem snaga te šaj duhovno te pomožini ljen (Matej 22:39; 1. Solunskonendže 2:8). Odoljese so čerela odova, e pioniresi vera ovela pozoralji, ovela pana popaše e Devljeja hem ovela pana pobahtalo (Čeriba e apostolengo 20:35).

• Sar ka objasnine so značini neko te ovel pioniri?

• Sose disave služinena sar pionirija?

E Jehovase svedokija tane pendžarde ko odova so sikljona ando e Devljeso Lafi. Okoljendže so pobuter vreme džana te propovedinen ando Kraljevstvo isi posebna škole kola pomožinena oljendže pošukar te čeren pi služba (2. Timotejese 4:5).

Škola e pionirendže. Ko krajo kotar prvo berš andi pionirsko služba, jekh opšto pioniri tano vičimo te džal ki jekh škola so trajini šov dive. Oj ičeri pe ki dvorana koja tani najpaše. Akija škola pomožini e pionirendže te oven popaše e Jehovaja, pošukar te čeren pi služba hem ponodri te ačhon pionirija.

Škola e objaviteljendže ando Kraljevstvo. Akija škola trajini duj masek hem čerdi tani te školujini e iskusno pioniren, kola tane spremna te služinen ko thana kuri isi potreba. On tane sar o Isus, o najbaro propovedniko so hine ki Phuv hem vačerena: „Ače me, man bičhal“ (Isaija 6:8; Jovan 7:29). Ako džana te služinen ko aver than, tegani šaj ka valjani te pojednostavinen po dživdipe. I kultura, i klima hem o habe šaj te oven but averčhane ando odova ko so sikljilje. Čak šaj ka valjani te sikljon nevi čhib. Ki akija škola šaj te džan ženime hem biženime phralja hem phenja, kola isi ljen kotar 23 dži ko 65 berš. I škola pomožini ljen te barjačeren o hrišćanska osobine hem sikavi ljen sar pošukar te služinen e Jehovase hem oljese organizacijače ko thana kuri ka valjani te džan.

Škola Galad. Ki hebrejsko čhib, o lafi „Galad“ značini „gomila svedočanstva“. I škola Galad počmindža kotar 1943. berš. Ando tegani ki odija škola dželje pobuter ando 8 000 misionarija kola hine bičhalde te den baro svedočanstvo dži ko najdur thana ki Phuv hem hine but uspešna (Čeriba e apostolengo 13:47). Ked amare misionarija reslje prvo puti ko Peru, na hine nijekh skupština, a akana isi pobuter kotar 1 000 skupštine. Isto adžahar, ked o misionarija počmindže te služinen ko Japan, uduri hine pohari ando deš Svedokija, a akana isi pobuter kotar 200 000 Svedokija. Akija škola trajini pandž masek hem uduri hor proučini pe i Biblija. Odola so služinena sar specijalna pionirija, misionarija, ko podružnice ja tane pokrajinska nadglednikija, šaj te oven vičime ki škola Galad. Palji akija škola, on šaj but te pomožinen o propovedibe ko celo sveto te čerel pe pana pošukar.

• Sose tani čerdi i Škola e pionirendže?

• Ko šaj te džal ki Škola e objaviteljendže ando Kraljevstvo?