O Isus tano uskrsnimo

Palo odova so o Isus mulo, jekh barvalo manuš kova vićinđa pe Josif pućlja e Pilate te mukhel le te huljavi e Isuseso telo kotar stubo. Ked o Pilat mukhlja le, ov ćhivđa ko oleso telo o mirisna biljke, paćarđa le ko jekh čaršafi hem ćhivđa le ko jekh nevo grobo. Ko ulaz ando odova grobo ćhivđa jekh baro bar. Ama, o sveštenička poglavarija phenđe e Pilatese: „Daraja so neko ando Isusese učenikija ka lel oleso telo hem palo odova ka phenel so irinđa pe ko životi.“ Odolese o Pilat phenđa lenđe: „Ćhiven i straža hem arakhen o grobo sar đanena.“

Trin dive palo odova, rano sabale, disave romnja đelje ko grobo hem arakhlje le phravdo. Andre hine jekh anđeo kova phenđa lenđe: „Ma daran. O Isus uštilo. Đan hem phenen olese učenikonenđe so šaj te arakhen le ki Galileja.“

I Marija Magdalena siđarđa te arakhi e Petare hem e Jovane. Ked arakhlja len, phenđa lenđe: „Neko lelja e Isuseso telo!“ O Petar hem o Jovan prastandoj đelje đi o grobo. Ked dikhlje soj tano o grobo ćućo, on irinđe pe ćhere.

Ked i Marija irinđa pe ko grobo, andre dikhlja duje anđelen hem phenđa lenđe: „Na đanava kuri legarđe me Gospode.“ Tegani dikhlja jekhe manuše aso kova mislinđa so ćerela buti ki bašta hem phenđa lese: „Gospodine, molinava tut, phen maje kuri legarđan le.“ Ama, ked o manuš phenđa: „Marija!“, oj haljilji soj tano ov o Isus. Oj ko glaso phenđa: „Učitelju!“, hem zagrlinđa le. A o Isus phenđa laće: „Đa hem phen me phralenđe so dikhljan man.“ Oj odmah prastandoj đelji ko apostolija hem phenđa so dikhlja e Isuse.

Isto odova dive hari pokasno, duj učenikija đelje phirindoj kotar Jerusalim đi ko jekh gav kova vićinđa pe Emaus. Jekh manuš pođinđa olencar ko odova drumo hem pućlja len sostar vaćerena. On phenđe lese: „Na šunđan? Angleder trin dive, o sveštenička poglavarija mudarđe e Isuse. A akana disave romnja phenena soj tano đivdo!“ O manuš pućlja len: „Da li verujinena ko prorokija? On phenđe so o Isus ka merel hem palem ka uštel.“ Palo odova, ov nastavinđa te objasnini lenđe hem avera buća kotar Lila. Ked reslje ko Emaus, o učenikija pućlje odole manuše te aćhol olencar. Ked molinđe pe te han maro, on haljilje so odova manuš hine o Isus. Tegani ov našaldilo anglo lende.

Odola duj učenikija siđarđe te đan ko Jerusalim, ko ćher kuri hine o apostolija hem te phenen lenđe so ulo. Đi on hine othe o Isus pojavinđa pe anglo sarinende. Ki početka, o apostolija naštine te verujinen soj tano odova o Isus. Odolese, ov phenđa: „Dikhen me vasta, pipinen man. Pisimo hine so o Hrist ka uštel ando mule.“