ISKUSTVO
Arakhljam „jekh but vredno biseri“
O VINSTON hem i Pamela (Pem) Pejn služinena ki podružnica ki Australija. Ko oljengo dživdipe hine but buča kola čerdže ljen bahtalje, ama isto adžahar hine ljen hem pharipa. Disave ando odola pharipa hine te prilagodinen pe ko različita kulture, ama jekh ando najbaro pharipe hine, ked mulji ljengi beba koja pana na bijandilji. Iako sa odova nakhlje, on i dalje hine ljen mangipe premalo Jehova hem premalo oljeso narodo, ama hem radost ki služba. Dži vačerdžam oljencar zamolindžam ljen te vačeren amendže po iskustvo.
Vinston, vačer amendže sar tu počmindžan te rode e Devlje?
Bariljum ki farma ko Kvinslend, ki Australija, ki porodica kola na interesindža i religija. Sebepi so odova than kaj bešljum hine but dur, na hine man but kontakt e manušencar. Ked hine man 12 berš počmindžum te rodav e Devlje. Molindžum man oljese hem rodindžum o čačipe oljestar. Palo odova, dželjum kotar farma hem khudžum ki buti ko Adelejd, ki Južno Australija. Ked hine man 21 berš, dži hijum lje ko odmor ko Sidnej, upoznajindžum e Pema. Oj vačerdža maje ando britansko-izraelsko versko grupa koja sikadža so o Britancija avena ando izraelska plemenija kola na postojindže više. Premalo odova so sikadže, on hine o deš plemenija kotar severno izraelsko kraljevstvo kola hine ljegarde ko zarobljeništvo ko oftoto veko angljeder amari era. Ked irindžum man ko Adelejd, počmindžum te vačerav odoljestar jekhe amaljeja ki buti kova proučindža i Biblija e Jehovase svedokonencar. Palo odova so vačerdžum oljeja samo nekobor satija, ando odova ko so verujinena e Jehovase svedokija, haljiljum so odova so molindžum man ked hijum lje tikno o Jehova šundža. Haljiljum o čačipe ando moklo Stvoritelj hem ando oljeso Kraljevstvo! Arakhljum o „vredno biseri“ (Mat. 13:45, 46).
Pem, hem tu ked hijan lje but terni počmindžan te rode o „vredno biseri“. Sar tu arakhljan lje?
Bariljum ki diz Kofs Harbur, ko Novo Južno Vels. Miklji porodica verujindža ko Devel. Me roditeljija, mo dedo hem mi baba, verujindže ko odova so sikavi i britansko-izraelsko versko grupa. Mo tikneder phral, mi phureder phen hem me, sar hem avera ki familija, kotar tiknipe hijam sikavde so o Devel mangela e manušen kola tane Britancija. Ama, me na mislindžum adžahar hem na osetindžum so hijum paše e Devljeja. Ked hine man 14 berš, hijum lje ko crkve kola hine ki mi diz, sar soj tane i anglikansko, baptističko hem adventističko crkva. Ama, odola crkve na pomožindže man te pendžarav e Devlje.
Palo disavo vreme, me hem mi porodica selindžam amen ko Sidnej, kuri upoznajindžum e Vinstone, ked hine ko odmor. Sar so vačerdža o Vinston, palo odova so vačerdžam ando religiozna teme ov počmindža te proučini i Biblija e Svedokonencar. Ko ljila kola bičhaldža maje hine but biblijake stihija. Mora te priznajinav so ki početka sikirindžum man, pa čak hem holjandžum. Ama, hari po hari dikhljum so odova tano čačipe ando Devel.
Palo odova, ko 1962. berš selindžum man ko Adelejd te šaj te ovav popaše uzo Vinston. Arakhlja maje than te bešav ko jekh bračno par, kola hine Svedokija, ko Tomas hem i Dženis Slouman, kola služindže sar misionarija ki Papua Nova Gvineja. On hine but šukar premalo mande. Hine man samo 18 berš hem on but pomožindže man te sikljovav ando Jehova. Adžahar hem me počmindžum te proučinav e Devljeso Lafi hem sigate palo odova hijum lje uverimi so arakhljum o čačipe. Palo odova so o Vinston hem me venčisaljam, amaro dživdipe dindžam te služina e Jehovase hem odova andža amendže but blagoslovija. Sebepi so hine amen asavko dživdipe, uzo odova so hine amen pharipa, amen sikljiljam pana pobuter te cenina odova vredno biseri kova arakhljam.
Vinston, vačer amendže sar hine ki početka andi tiklji služba e Jehovase?
A. I mapa kotar amare putovanja ki pokrajinsko služba
B. O poštanska markice kotar disave ostrvija. O ostrvija Kiribati hem Tuvalu angljeder vičindže pe e Gilbertese hem e Elisese ostrvija
C. O but šužo koralno ostrvo Funafuti ki država Tuvalu. Jekh kotar najšužo ostrvo kova posetindžam angljeder so alje o misionarija
Harička palo odova so ljeljam amen, o Jehova počmindža te del amen posebna zadatkija ki amari služba (1. Kor. 16:9). O prvo zadatko hine ked o phral Džek Porter, sar pokrajinsko nadgledniko, alo te posetini amari tikni skupština. (Akana zajedno služinaja sar članija ko Odbor ki podružnica ki Australija.) O Džek hem oljesi romni i Rozlin podstaknindže amen te služina sar opšta pionirija hem amen uživindžam ki akija služba pandž berš. Ked hine man 29 berš, e Pema hem man pučlje te ova ki pokrajinsko služba ko ostrvija ko južno deo ando Tihi okean, koja nadgledindža i podružnica ko Fidži. Ki odija grupa tane o ostrvija Američka Samoa, Samoa, Kiribati, Nauru, Niue, Tokelau, Tonga, Tuvalu hem Vanuatu.
Ko odova vreme ko ostrvija kuri hine pharo te resel pe, o manuša na verujindže odoborkha e Jehovase svedokonendže hem odoljese morandiljam te ova pažljiva hem oprezna (Mat. 10:16). O skupštine hine tikne hem disavo puti na hine than ko phralja kuri te sova. Odoljese morandiljam te puča e manušen ko odova gav da li šaj te sova koro ljende hem on hine but šukar premalo amende.
Vinston, tu hijan lje posebno zainteresovano te prevodine. So čhidža tut te čere odova?
O Vinston ičeri i škola e starešinendže ko ostrvo Samoa
Ko odova vreme, o phralja kotar ostrvo Tonga, hine ljen samo nekobor traktatija hem tikne brošure ki tongansko čhib, koja tani ki grupa ando polinežansko čhibja. Ki služba koristindžam i knjiga Istina koja vodi do večnog života, ki englesko čhib. Odoljese, ked hine i škola e starešinendže koja trajindža štar kurče, trin starešine kola hari džandže engleski, dogovorindže pe te prevodinen odija knjiga ki tongansko čhib. I Pem kucindža o tekst, a amen bičhaldžam lje ki podružnica, ki Amerika te štampini pe. Celo projekat trajindža ofto kurče. Iako o prevod na hine odobor kvalitetno, ipak akija publikacija pomožindža butendže kola vačerena tongansko čhib te pendžaren o čačipe. I Pem hem me na hijam prevodiocija, ama sa akava so ulo podstaknindža amen te razmislina kotar prevodilačko buti.
Pem, kobor o dživdipe ko ostrvija hine averčhane kotar o dživdipe ki Australija?
Ki pokrajinsko služba disavo puti sučam ko kombi
Hine but averčhane! Zavisini ko kova than hijam lje. Ko disave thana hine but komarcija, baro tatipe, vlaga, bare čurmuse, razna nabormipa, a disavo puti na hine amen ni so te has. Ki aver strana, ko krajo ando svako dive, čače hine amendže but šukar te dikha ko okean kotar amaro čher fale – adžahar ki samoansko čhib vičinena pe o polinežanska čhera koljengo krovo tano andi slama hem nane ljen zidija. Disavo puti i mesečina hine odobor bari so šaj hine ko pani te dikhen pe o palme ando kokos. Ko odola but šukar momentija, hor razmislindžam, molindžam amen hem odova pomožindža amen te razmislina samo kotar šukar buča.
Amen but mangljam e čhaven. On hine but zabavna hem hine ljen but pučiba ked god bi dikhena amen, e parne manušen. Dži hijam lje ko ostrvo Niue, jekh tikno čhavo pipindža e Vinstonese vasta hem sebepi so hine lje bala ko vasta, ov phendža ljese: „But sviđini pe maje toklo krzno.“ Dičhola so niked angljeder na dikhlja asavke vasta hem na džandža te phenel tačno soj tano odova.
Amaro vilo dukhala hine dži dikhljam e manušen koljengo dživdipe tano but pharo. Odova than hine but šužo, ama na hine ko te brinini pe kotar oljengo sastipe hem na hine ljen dovoljno pani te pijen. O phralja na sikirindže pe but sebepi odova. Oljendže esavko dživdipe hine normalno. On hine bahtalje sose oljencar hine oljengi porodica, hine ljen than kuri šaj te čeden pe te slavinen e Devlje hem so isi ljen čast te služinen e Jehovase. Oljengo primer pomožindža amen te da sa amendar te čera odova soj tano najvažno hem te ovel amen jednostavno dživdipe.
Pem, disavo puti morandiljan kokri te akhare pani hem te čerave habe ko potpuno neve okolnostija. Sar čerdžan odova?
I Pem thovela šeja ko ostrvo Tonga
Zahvalno hijum me dadese so sikadža man but buča. Na primer, sar te tharav i jag hem te čerav habe ki jag. Isto hem so te čerav ked nane man but buča. Jekh puti dži hijam lje ko Kiribati, bešljam ko jekh tikno čher kuri o krovo hine kotar slama, o pod ando korali, a o zidija ando bambus. Te šaj te spreminav jekh jednostavno habe, morandiljum te hanav jekh rupa hem odothe te tharav i jag ando ljuske so ačhilje kotar akhora ando kokos. O pani valjandžum te anav kotar jekh bunari, kuri adžičerdžum ko redo avere romnjencar. Te šaj te ikala pani, koristindžam jekh kaš kova hine baro duj metrija, a ko krajo odolje kašteso hine phanlo jekh šelo. Hem ko odova šelo phanljam jekh kanta. Jekh palo jekh, fordaja hine i kanta hem palo odova ko pravo momenti bi irinaja amaro vas hem adžahar i kanta bi irini pe ki aver strana hem bi pherdžola panjeja. Me mislindžum so odova nane pharo, sa dži na aljum me ko redo. Fordindžum i kanta nekobor puča, ama i kanta bi samo khuvela o pani, ama na bi pherdžola panjeja. Ked o romnja više na asandilje mancar, jekh romni mothodža maje sar te pherav pani. O manuša ko odova than uvek hine ljubazna hem manglje te pomožinen amen.
Solduj mangljen i služba ko ostrvija. Da li bi mangena te vačeren amendže disave šukar buča kola hine tumen uduri?
Vinston: Valjandža amendže hari vreme te pendžara kola običaja isi ljen o manuša ko odova than. Na primer, ked o phralja vičindže amen te has maro, obično bi ikaljena anglo amende sa o habe so spremindže. Ki početka, na haljiljam so valjani hem oljendže te mukha diso. Odoljese haljam sa so hine anglo amende! Ama, ked haljiljam sar tani i buti, mukhaja hine habe hem oljendže. Ama, o phralja haljilje amen hem jedva adžičerdže te dikhen amen palo šov masek, ked avaja paljem ki poseta ki odija skupština. Ko odova than hine phralja hem phenja, ama me hem i Pem hijam lje jedina svedokija kola on dži tegani dikhlje.
Ko ostrvo Niue, o Vinston predvodini i grupa ki služba
Amare posete but šukar utičindže upro manuša kola na hine amare phralja. But oljendar mislindže so amare phraljengi religija tani diso so on kokri izmislindže. Odoljese, ked bi ki poseta avela o nadglednik hem oljesi romni kotar aver Phuv, na samo so uverindže pe so o phralja vačerena o čačipe, nego hem hine oduševime odoljeja.
Pem: Jekh kotar najšukar buti so desindža pe maje hine ko Kiribati. Ki odija skupština hine samo nekobor phralja hem phenja. Odothe hine jekh starešina kova vičindža pe Itinika Matera, ov but trudindža pe amendže te ovel šukar. Jekh dive alo hem ki korpa hine lje jekh jaro hem phendža: „Akava tano tumendže.“ Na hine amen uvek jare kotar khani. Odova tikno, ama viljestar dindo poklon čače pogodindža amaro vilo.
Pem, nekobor berš palo odova našaldžan te beba kola pana na bijandžan. So pomožindža tut te nakhave odija dukh?
Ačhiljum khamni ko 1973. berš. Tegani o Vinston hem me hijam lje ko ostrvija ko Tihi okean. Odlučindžam te irina amen ki Australija, ama štar masek palo odova našaldžum e beba. Sebepi odova hem e Vinstonese hine but pharo. Sar dželo o vreme pohari mukhlja amen i dukh. Ama, hor ano vilo i dukh niked potpuno na nakhlja, sa dži na alji i Stražarsko kula kotar 15. april 2009. berš. Odothe hine jekh pučiba: „Da li isi nada so ka uskrsnini i beba koja mulji ano vodži?“ Akava članko uverindža amen so o Jehova ka odlučini odoljestar, a ov uvek čerela odova soj tano ispravno. Ov ka sačari sa o rane kola anela amendže o dživdipe ko akava lošno sveto, adžahar so ka bičhalji pe Čhave te „uništini e Bengese buča“ (1. Jov. 3:8). Isto adžahar, odova članko pomožindža amen pobuter te cenina o „vredno biseri“ kova isi amen sar e Jehovase sluge. Kaj bi amen ovaja te na ovel amen i nada ko e Devljeso Kraljevstvo?
Palo odova so našaldžam amare beba, nastavindžam paljem te ova ki punovremeno služba. Nekobor masek služindžam ko Betel ki Australija, a palo odova nastavindžam e pokrajinsko službaja. Palo štar berš so služindžam ko Novi Južni Vels hem ko Sidnej, ko 1981. berš vičime hijam lje te služina ki australijsko podružnica, kuri hem akana služinaja.
Vinston, da li sa odova so nakhljan dži služindžan ko odola ostrvija, pomožini tut te čere ti buti sar član ando Odbor ki podružnica ki Australija?
Naravno, hem odova ko but buča. I Australija prvo brinindža pe kotar delo ki Američko Samoa hem Samoa. A palo odova, i podružnica kotar Novi Zeland spojindža pe e australijsko podružnicaja. Akana ki australijsko podružnica tane i Australija, i Američka Samoa hem i Samoa, o ostrvija Kuk, o Novi Zeland, o Niue, o Istočno Timor, o Tokelau hem i Tonga. Ko nekobor kotar akala ostrvija hijum lje sar predstavnik andi podružnica. Sa odova so nakhljum e verno phraljencar hem e phenjencar ko odola ostrvija, akana but pomožini man dži služinava ki akija podružnica.
Pem hem o Vinston ki podružnica ki Australija
Ko krajo te phenav so i Pem hem me, već but vreme hijam svesna so hem o terne rodena e Devlje, a na samo okola soj tane ko berša. Hem o terne mangena te arakhen o „vredno biseri“, čak ked avera ki oljengi porodica nane zainteresime, sar so ni amari porodica na hine (2. Kralj. 5:2, 3; 2. Let. 34:1-3). O Jehova kova tano pherdo mangipe čače mangela sarijen, hem o terne hem o phure, te ovel ljen večno dživdipe!
Ked angljeder 50 berš, i Pem hem me počmindžam te roda e Devlje, ni ki godi na alo amendže kuri sa odova ka ljegari amen. O čačipe andi Biblija tano čače jekh biseri kova but vredini! Amen hijam odlučna te da sa amendar te arakha lje zauvek!