Samokontrola – neophodno tani te šaj o Jehova te ovel zadovoljno amencar

„Ked mo rođak počmindža te svađini pe mancar, dolindžum le aso korlo hem počmindžum te tasavav le. Mangljum te mudarav le“, phenela o Paul.

„Čhere, hem najtikni sitnica šajindža but te holjančeri man. Tegani bi phagava o nameštaj, o igračke hem sa aver so bi arakhava,“ phenela o Marko.

But amendar nane asavke. Ama, sarinendže amendže podijekh puti šaj te ovel pharo te kontrolišina kokri amen. Odova tano sebepi so nasledindžam i nesavršenost ando prvo manuš, o Adam (Rimlj. 5:12). Disave, sar o Paul hem o Marko, isi len problemi te kontrolišinen pi narav. Averendže šaj tano pharo te kontrolišinen pe mislija. On razmislinena ando buča kola daravena len ja obeshrabrinena len. Disave avera borinena pe te na čeren blud, te na pijen ja te na drogirinen pe.

Okola so na kontrolišinena pe mislija, želje hem postupkija šaj te upropastinen po dživdipe. Ama, ako razvijinaja i samokontrola, odova ne mora te desini pe amendže. Akana ka razmotrina trin pučiba kola ka pomožinen amendže te razvijina i samokontrola. Sar prvo, soj tani i samokontrola? Sar dujto, sose tani neophodno? Sar trito, sar šaj te razvijina akija osobina, koja tani plod ando sveti duh? (Gal. 5:22, 23). Palo odova, ka dikha so šaj amen te čera ako podijekh puti našalaja amari samokontrola.

SOJ TANI I SAMOKONTROLA?

O manuš kova isi le samokontrola na postupini premalo svako poklo osećaj. Umesto odova, ov trudini pe te na vačeri hem te na ponašini pe ko način kova na sviđini pe e Devlese.

O Isus mothovdža so značini ked neko isi le samokontrola. I Biblija phenela: „Ked uvredindže le, na irindža lendže. Ked patindža, na pretindža, nego uzdajindža pe upro Okova kova pravedno sudini“ (1. Petr. 2:23). Asavki samokontrola o Isus mothovdža ked olese dušmanja mardže lese muj dži hine ko mučeničko stubo (Mat. 27:39-44). Angleder, ov mothovdža but bari samokontrola ked o religiozna vođe manglje te astaren le ko lafija (Mat. 22:15-22). O Isus ačhavdža amendže but šukar primer ked disave holjame Judejcija manglje te forden bara upro oleste. Umesto te irini lendže ko isto način, o Isus „garavdža pe hem ikljilo ando hram“ (Jov. 8:57-59).

Da li amen šaj te oponašina e Isuseso primer? Ja, šaj, dži jekh mera. O apostol Petar pisindža: „O Hrist patindža sebepi tumaro hem ačhavdža tumendže primer sar ko sa te džan palo olese korakija“ (1. Petr. 2:21). Iako hijam nesavršena, amen šaj te oponašina e Isuseso primer hem te mothova i samokontola. Sose tano odova važno?

SOSE TANI NEOPHODNO I SAMOKONTROLA?

Ako mangaja o Jehova te ovel zadovoljno amencar, valjani te ovel amen samokontrola. Čak, iako beršencar verno služinaja olese, amen šaj te rumina amaro amalipe oleja ako na kontrolišinaja amare postupkija hem amare lafija.

Razmislin ando Mojsije kova hine „najkrotko manuš ki phuv“ ko odova vreme (Br. 12:3). Ov beršencar šundža sar o Izraelcija žalindže pe. Ama, jekh dive, ov našaldža pi samokontrola. Ov holjandža sose on palem žalindže pe so nane len dovoljno pani. Tegani, ov grubo vačerdža e manušencar hem phendža lendže: „Šunen, akana, tumen kola hijen buntovnikija! Mora li te da tumendže pani kotar akija stena?“ (Br. 20:2-11).

Ki akija situacija, o Mojsije na hine le samokontrola. Ov na zahvalindža e Jehovase aso čudo kova čerdža te bi dela lendže pani (Ps. 106:32, 33). Sebepi odova, o Jehova na mukhlja le te khuvel ki Obećimi phuv (Br. 20:12). Sa dži hine dživdo, o Mojsije žalindža sose našaldža pi samokontrola (Pon. zak. 3:23-27).

So sikljovaja? Čak iako beršencar služinaja e Jehovase, niked na valjani te mothova nepoštovanje dži vačeraja okolencar kola nervirinena amen ja ked vačeraja nekasa kase valjani te da savet (Ef. 4:32; Kol. 3:12). Čače tano so sar phurjovaja, nane amen više odobor baro strpljenje. Ama, setin tut ko Mojsije. Niked na bi mangaja te meljačera amari verno služba odolese so na mothovdžam i samokontrola. Ama, sar šaj te razvijina akija neophodno osobina?

SAR ŠAJ TE RAZVIJINA I SAMOKONTROLA?

Molin tut aso sveti duh. Sose? I samokontrola tani plod ando sveti duh, hem o Jehova dela poklo duh okolendže so rodena le (Luka 11:13). Prekalo poklo sveti duh, o Jehova šaj te del amendže i snaga koja valjani amendže te šaj te mothova i samokontrola (Fil. 4:13). Isto adžahar, ov šaj te pomožini amendže te razvijina hem avera osobine, kola tane plod ando sveti duh, sar soj tano o mangipe, kova ka pomožini amendže te mothova i samokontrola (1. Kor. 13:5).

Cide tut kotar sa so šaj te oslabini ti samokontrola. Na primer, cide tut kotar o sajtija ko internet ja kotar i zabava ki koja mothovena pe o neprikladna buča (Ef. 5:3, 4). U stvari, amen mora te cida amen kotar sa so šaj te čhivel amen te čera odova soj tano neispravno (Posl. 22:3; 1. Kor. 6:12). Na primer, i osoba koja borini pe te na čerel nemoral, šaj ka odlučini hič te na čitini romantična knjige hem hič te na dikhel romantična filmija.

Šaj amendže tano pharo te primenina akava savet. Ama, ako trudinaja amen, o Jehova ka del amendže snaga koja valjani amendže te šaj te kontrolišina amen (2. Petr. 1:5-8). Ov ka pomožini amendže te kontrolišina amare mislija, lafija hem postupkija. So odova tano čače, mothovi e Pauleso hem e Markoso primer, koljendar vačerdžam ko početko. On sikljilje te kontrolišinen pi nasilno narav. Jekh aver phral, dži vozindža, but putija nervirindža pe sebepi avera vozačija hem čak svađindža pe olencar. Sar ov promenindža po ponašanje? Ov phenela: „Molindžum man svako dive. Proučindžum o člankija kola vačerena andi samokontrola hem sikljiljum e biblijake stihija kola šaj te pomožinen man. Iako beršencar trudinava man te razvijinav akija osobina, hem avdije, svako sabalje kokri man podsetinava so mangava te ačhovav smireno. Akana ranije pođinava ki buti hem odolese nane man stres hem ne mora te sidžarav.“

SO AKO NAŠALDŽAN I SAMOKONTROLA?

Podijekh puti, sare amen ka našala i samokontrola. Ked odova desini pe, šaj tano amendže ladžavo te molina amen e Jehovase. Ama, baš tegani najviše valjani te molina amen. Odolese, odmah molin tut e Jehovase. Molin le te oprostini tuče, te pomožini tuče hem ov odlučno te na ponovine odija greška (Ps. 51:9-11). Ma mislin so o Jehova na ka šunel te iskrena molitve aso oproštaj (Ps. 102:17). O apostol Jovan podsetini amen so olese Čhaveso rat „čistini amen ando svako greho“ (1. Jov. 1:7; 2:1; Ps. 86:5). Setin tut so o Jehova podstaknini pe slugen te oprostinen jekh jekhese. Odolese, ov sigurno so hem ov ka oprostini tuče (Mat. 18:21, 22; Kol. 3:13).

O Jehova hine razočarimo ked ki pustinja o Mojsije našaldža pi samokontrola. Ipak, ov oprostindža lese. Ko oleso Lafi, ando Mojsije vačeri pe so ov hine jekh verno manuš kas amen valjani te oponašina (Pon. zak. 34:10; Jevr. 11:24-28). O Jehova na dozvolindža e Mojsijese te khuvel ki Obećimi phuv, ama ov ka dozvolini e Mojsijese večno te živini ko raj ki phuv. Hem amen šaj te nadina amen so ka živina večno, ako trudinaja amen te razvijina i samokontrola (1. Kor. 9:25).