Pućiba ando čitaocija
Da li e Jehovase svedokija valjani te koristinen o aplikacije hem o sajtija aso upoznavanje te arakhen pese rom ja romni?
O Jehova mangela o rom hem i romni te oven bahtale hem zauvek te aćhon ko brak (Mat. 19:4-6). Ako mangeja te ove ko brak, sar šaj te arakhe nekas? Amaro Stvoritelj, o Jehova, đanela so valjani te ćere te šaj te ovel tut šukar veza hem palo odova bahtalo brak. Ako šuneja olese savetija, ka ove ćaće bahtalo. Hajde te dikha disave ando odola savetija.
Najangleder, amen valjani te haljova jekh baro ćaćipe amendar: „O vilo tano pohovavno ando bilo so aver hem ko sa tano spremno“ (Jer. 17:9). Ked duj manuša, kola mangena te khuven ko brak, khuvena ki veza, koro lende sigate šaj te pojavinen pe o osećanja. Sebepi odova, olenđe tano pharo te anen šukar odluke. Ked o manuša anena odluka te khuven ko brak samo sebepi pe osećanja, palo odova šaj but te razočarinen pe (Posl. 28:26). Odolese, na bi ovela mudro duj đene kola tane ki veza sigate te phenen jekh jekhese so osetinena hem te den lafi jekh jekhese, angleder te upoznajinen šukar jekh jekhe.
Ko Poslovice 22:3 pisini: „O gođalo manuš dikhela i opasnost hem cidela pe, a o neiskusna đana hem ponodri hem trpinena o posledice.“ Sose šaj te ovel opasno prekalo aplikacije ja sajtija aso upoznavanje te roda amenđe rom ja romni? Nažalost, disave manuša upoznajinđe pe nekasa prekalo internet, khuvđe ki veza hem palo odova haljilje so odija osoba hovavđa len. Isto ađahar, disave manuša garavena koj tane ćaće te šaj te prevarinen e manušen hem te ćoren lendar pare. Disavo puti, okola kola ćerena asavke buća phenena soj tane e Jehovase svedokija.
Ama, isi pana jekh opasnost. Disave sajtija aso upoznavanje koristinena kompjuterska programija kola mothovena ko kasa šaj te ovel ki veza. Ama, ništa na mothovi so odola programija tane pouzdana. Nane mudro te verujina so jekh kompjutersko program, kova ćerđa o manuš, šaj te mothovi ko šaj te ovel amenđe šukar rom ja romni. O kompjuterska programija niked našti te pomožinen amen sar o načelija andi Biblija (Posl. 1:7; 3:5-7).
O načelo ando Poslovice 14:15 phenela: „O neiskusno manuš verujini ko sa, ama o gođalo manuš šukar razmislini ando sa so ćerela.“ Angleder te odlučine da li neko ka ovel tuće šukar rom ja romni, valjani šukar te upoznajine odola osoba. Ka ovel pharo šukar te upoznajine nekas, ako odova ćereja prekalo internet. Čak iako šaj te dikhe so odija osoba ćhivela ko društvena mreže hem često vaćereja olaja prekalo internet, da li ćaće šaj te phene so šukar penđareja la? Disave kola mislinđe so konačno arakhlje nekas ko ka mangel len, hine šokirime ked upoznajinđe pe lično odola osobaja.
O psalmista phenđa: „Na družinava man e manušencar kola vaćerena hovajbe, hem cidava man okolendar kola garavena save tane“ (Ps. 26:4). But manuša mislinena soj tano normalno ko po profil te ćhiven diso pestar so nane ćaće, samo te privucinen averen. On šaj te garaven save tane ćaće hem ked dopisinaja amen olencar, šaj te ovel pharo te dikha kola tane olenge lošna osobine. Iako disave šaj te phenen soj tane e Jehovase svedokija, pućibe tano da li tane on ćaće krstime? Da li tane duhovno zrela manuša? Da li tane paše e Jehovaja? So o phralja hem o phenja andi skupština mislinena olendar? Da li tane šukar primer averenđe ja tane „lošno društvo“ aso avera? (1. Kor. 15:33; 2. Tim. 2:20, 21). Da li premali Biblija tane slobodna aso brak? Sa akala buća valjani te đane. Ama, šaj te ovel but pharo te đane sa akava ako na vaćereja nekasa ko šukar penđari odola osoba (Posl. 15:22). Naravno, jekh e Jehovaso sluga ni na ka razmislini ando odova te khuvel ko brak nekasa ko na služini e Jehovase (2. Kor. 6:14; 1. Kor. 7:39).
Sar so dikhljam, opasno tano prekalo sajtija te upoznajine tut nekasa. Odolese, isi pošukar načinija te upoznajine nekas. Kuri šaj te upoznajine nekas ko šaj te ovel tuće šukar rom ja romni? Šaj te upoznajina amen nekasa ko amare sastankija, ko kongresija ja ko avera skupija.
Ked provodinena vreme zajedno, tegani šaj te dikhen da li isi tumen ista ciljija
Akana ked našti te ćeda amen sebepi i pandemija kotar koronavirus, amen prekalo elektronska uređaja pratinaja o sastankija. Ađahar šaj te penđara nekas ko nane ko brako. Tegani šaj te dikhe sar neko ićeri govorija ja sar neko dela komentarija (1. Tim. 6:11, 12). Isto ađahar, šaj palo sastanko te vaćeren jekh jekheja ko sobe. Ked prekalo internet družinena tumen, šaj te dikhe savi tani odija osoba premalo avera hem save osobine isi la (1. Petr. 3:4). Sar đala o vreme, ked ka upoznajinen tumen pošukar, šaj te dikhen da li isi tumen ista ciljija hem da li hijen jekh jekhese.
Ked okola kola nane ko brak šunena o savetija andi Biblija đi rodena pese rom ja romni, on verovatno ka ovel len bahtalo brako. Ki Biblija pisini: „Ko arakhlja šukar romni [ja rom], arakhlja bahtalipe hem o Jehova mothovi lese [ja laće] mangipe“ (Posl. 18:22).