Sose isi odobor bari mržnja?

Soj tani i mržnja?

I mržnja tani jekh zoralo osećanje. Oj dićhola ked nekas našti te podnosina ja ked nekas dikhaja sar amare dušmane. I mržnja nane samo ked hijan holjamo upro nekaste, oj tani diso pobuter.

SAR AVELA ĐI ODOVA O MANUŠA TE MRZINEN AVEREN?

Isi but buća sebepi kola o manuša šaj te mrzinen averen. But putija o manuša mrzinena avere manušen na sebepi odova so ćerena već sebepi odova koj tane. Okolendar kas mrzinena šaj te mislinen soj tane lošna, opasna, so našti te menjinen pe, so nane odobor vredna hem so ka ćeren problemija. O manuša kola mrzinena averen šaj hem kokri doživinđe neko premalo lende te ovel nasilno, nepravedno ja diso aver doživinđe hem odolese i mržnja astarđa koreno ko olengo vilo.

SAR ŠIRINI PE I MRŽNJA?

Jekh manuš šaj te mrzini avere manuše iako na penđari le. But putija o manuš mislini averendar odova so mislini oleso amal ja neko andi olesi porodica. Odolese, ako jekh andi porodica mrzini disave manušen, sigate šaj hem avera andi porodica te ćeren odova. Ađahar i mržnja but lokho širini pe.

Ked haljovaja kobor lokho i mržnja širini pe, tegani haljovaja sose odobor manuša mrzinena averen. Te šaj te haljova sose ko sveto isi odobor bari mržnja, valjani te đana kotar avela i mržnja. Odova šaj te dikha ko Devleso Lafi.

I BIBLIJA MOTHOVI KOTAR AVELA I MRŽNJA

I MRŽNJA NA AVELA ANDO MANUŠA. I mržnja počminđa ked ko nebo jekh anđeo, kova kasnije dobinđa anav Beng hem Satana, pobuninđa pe protiv o Devel. Sar pobuninđa pe, o Beng tano ubica. Sar „hovavno hem o dad ando hovajbe“, ov ćerela i mržnja hem o nasilje te oven sa pobare (Jovan 8:44; 1. Jovanova 3:11, 12). I Biblija olestar phenela soj tano lošno, holjamo hem nasilno (Jov 2:7; Otkrivenje 12:9, 12, 17).

E NESAVRŠENO MANUŠENĐE TANO LOKHO TE MRZINEN. O prvo manuš, o Adam, šunđa e Benge hem odolese sa o manuša ki phuv tane grešna hem nesavršena (Rimljanima 5:12). E Adameso prvo ćhavo, o Kain, mrzinđa pe phrale, e Avelje, hem odolese mudarđa le (1. Jovanova 3:12). Ćaće tano so avdije but manuša mangena averen hem saosećajna tane. Ama, odolese so nasledinđe o greh, but manuša tane sebična, ljubomorna hem ponosna. Odola osobine ćerena i mržnja te ovel pana pobari (2. Timoteju 3:1-5).

I MRŽNJA BARJOLA KED O MANUŠA NA POŠTUJINENA OKOLEN SOJ TANE AVERĆHANE OLENDAR. I mržnja barjola sebepi odova sar o manuša razmislinena hem sar ponašinena pe. Odolese so „celo sveto tano ko Lošnonese vasta“, isi sa pobuter manuša kola na poštujinena okolen soj tane averćhane olendar, osudinena averen iako na penđarena len, vređinena hem maltretirinena averen (1. Jovanova 5:19).

Ama, i Biblija na vaćeri samo kotar avela i mržnja, već hem sar šaj te rešini pe odova problemi.