SAR ŠAJ TE ĆHINAVA I MRŽNJA?
2 | Ma irin o lošnipe lošnipaja
I Biblija phenela:
„Nikase ma irinen lošnipe aso lošnipe. . . Ako šaj, kobor tano đi tumende, oven ko mir sa e manušencar. Ma irinen o lošnipe. . . sose pisimo tano: ’Me ka irinav o lošnipe, me ka dav len odova so zaslužinena‘, vaćeri o Jehova“ (RIMLJANIMA 12:17-19).
So značini akava?
Iako tano normalno te ova holjame ked neko povredini amen, o Devel na mangela te irina o lošnipe. Ov mangela te ova strpljiva, sose dela amen po lafi so pana hari ov ka cidel sa i nepravda (Psalam 37:7, 10).
So šaj tu te ćere?
Ked o manuša irinena o lošnipe, tegani ćerena i mržnja te ovel sa pobari. Odolese, ako neko povredinđa tut, ma irin lese. Ma našal ti kontrola hem de sa tutar te aćhove mirno. But putija, ka ovel najšukar te bistre odova so ulo (Poslovice 19:11). Ama, podijekh puti valjani te phene so ulo. Na primer, ako neko ćorđa tutar diso, marđa tut ja ćerđa tuće diso aver, šukar bi ovela te prijavine odova ki policija ja te phene nekase averese.
Okova so irini o lošnipe lošnipaja, pese ćerela lošnipe
Ama, so ako o problemi našti te rešini pe ko jekh mirno način? Ja so ako već dinđan sa tutar te rešine odova problemi, ama o problemi pana na rešinđa pe? Ma irin o lošnipe lošnipaja. Odova ka ćerel o problemi te ovel pana pobaro. Ama, ako na irineja o lošnipe lošnipaja, tu šaj te ćhinave i mržnja. Ov sigurno so o Devel najšukar đanela sar te rešini o problemija. Ko Devleso Lafi pisini: „Oslonin tut upro leste hem ov ka pomožini tut“ (Psalam 37:3-5).