SAR ŠAJ TE ĆHINAVA I MRŽNJA?

3 | Ikal i mržnja ando to vilo

I Biblija phenela:

„Menjinen tumen ađahar so ka menjinen tumaro način sar razmislinena, te uverinen tumen soj tani e Devlesi volja – soj tano šukar, prihvatljivo olese hem savršeno“ (RIMLJANIMA 12:2).

So značini akava?

E Devlese tano važno sar razmislinaja (Jeremija 17:10). Nane dovoljno samo te na phena ja te na ćera diso andi mržnja. I mržnja počmini ki amari godi hem ko amaro vilo. Odolese, ako ko amaro vilo hem ki amari godi isi samo jekh trunka andi mržnja, valjani te ikala la. Samo ađahar šaj te menjina amen hem te ćhinava i mržnja.

So šaj tu te ćere?

Razmislin savo manuš tu hijan hem so mislineja ando avera, posebno okolendar kola nane ando to narodo. Puć tut: „So mislinava olendar? Da li me lično penđarava len ja mislinava olendar odova so avera mislinena?“ Ma dikh hem ma čitin o materijali ko internet kova podstaknini ki mržnja hem ko nasilje.

E Devleso Lafi šaj te pomožini amen averćhane te razmislina hem te ikala i mržnja ando amaro vilo.

Nane uvek lokho te đana soj tano ko amaro vilo hem ki amari godi. Ama, e Devleso Lafi „šaj te mothovi save tane o mislija hem o namere ando vilo“ (Jevrejima 4:12). Odolese, proučin i Biblija. Uporedin odova so sikljoveja andi Biblija odoleja sar razmislineja hem de sa tutar te menjine to način sar razmislineja. E Devleso Lafi šaj te pomožini amen te ikala i mržnja koja tani hor ko amaro vilo (2. Korinćanima 10:4, 5).

Ando životi – STIVEN

Akana averćhane razmislinava

O Stiven hem olesi porodica but patinđe sebepi so mrzinđe len o manuša kola hine parne. Odolese, khuvđa ki jekh političko organizacija koja borinđa pe aso manušenge prava. Sar đelo o vreme, hem ov ćerđa disave lošna buća sebepi i mržnja. O Stiven phenela: „Jekh puti, me amala hem me dikhljam jekh film ko kova hine mothovdo sar o afrička robija hine mučime ki Amerika. Hine amenđe but pharo sebepi odova hem odothe ko bioskop počminđam te vređina e ternen kola hine parne hem te mara amen olencar. Palo odova, đeljam odothe kuri živinđe o parne manuša hem mangljam pana nekas te mara.“

Ked počminđa te proučini i Biblija, o Stiven počminđa averćhane te razmislini. Ov phenela: „But putija dikhljum sar o manuša osudinena averen iako na penđarena len. Ked dikhljum sar o Svedokija mangena hem poštujinena jekh jekhe, but oduševinđum man. Na primer, ked jekh Svedoko kova hine parno đelo prekal, ov mukhlja pe ćhaven ki jekh porodica ando Svedokija kola hine kale. Isto ađahar, jekh porodica ando Svedokija kola hine parne mukhlja jekhe terne ćhave kova hine kalo te živini koro lende.“ O Isus phenđa so i pravo religija ka penđari pe premalo mangipe. Ked o Stiven dikhlja odova mangipe, ov uverinđa pe so e Jehovase svedokija tane pravo religija (Jovan 13:35).

So pomožinđa e Stivenese te na mrzini averen hem te na ovel više nasilno? O lafija ando Rimljanima 12:2 but pomožinđe lese. Ov phenela: „Haljiljum so valjani averćhane te razmislinav, so na valjani te ovav nasilno manuš hem soj tano najšukar ked isi tu sloga averencar.“ Već 40 berš o Stiven tano but bahtalo sose više na mrzini e manušen.