Ked i mržnja više na ka ovel!
Iako šaj te ikala i mržnja kotar amaro vilo, amen našti te menjina averen. Hem ponodri ka oven manuša kola ka doživinen avera te mrzinen len. Odolese, sar šaj zauvek te rešini pe odova problemi?
Samo o Jehova, o Devel, šaj zauvek te ćhinavi i mržnja. Ki Biblija pisini so ov odova ka ćerel (Poslovice 20:22).
O DEVEL KA CIDEL O UZROK ANDI MRŽNJA
1. E BENGE. Sebepi o Beng, o anđeo kova pobuninđa pe, avdije isi but bari mržnja. O Devel ka uništini e Benge hem sa okolen kola mrzinena e manušen sar oleste (Psalam 37:38; Rimljanima 16:20).
2. E BENGESO SVETO KOVA TANO PHERDO MRŽNJA. O Devel ka uništini sarinen kola ćhivena e manušen te mrzinen averen, sar soj tane o politička hem o religiozna vođe. Isto ađahar, o Devel ka uništini hem okolen so isi len bokhali jakh, so lena talo vas hem so iskoristinena e manušen (2. Petrova 3:13).
3. I NESAVRŠENOST. I Biblija mothovi so o manuša tane nesavršena hem sebepi odova mislinena, osetinena hem ćerena odova soj tano pogrešno (Rimljanima 5:12). I mržnja tani samo jekh ando lošna buća kola tane ano amende. O Devel ka pomožini amen te ikala sa odova soj tano lošno ano amende hem ađahar i mržnja više na ka ovel (Isaija 54:13).
JEKH DIVE VIŠE NA KA OVEL MRŽNJA
1. NA KA OVEL VIŠE NEPRAVDA. Kotar nebo e Devleso Kraljevstvo ka vladini upri celo phuv hem ka anel pravda sarinenđe (Danilo 2:44). Na ka ćerel pe razlika maškaro manuša. O Devel ka ispravini sa i nepravda koja akana doživinaja (Luka 18:7).
2. SARINE KA OVEL LEN MIR. O nasilje hem o maribe više na ka oven hem sebepi odova niko više na ka patini (Psalam 46:9). Na ka dara nikastar sose ki phuv ka bešen samo o manuša kola mangena mir (Psalam 72:7).
3. SARINE KA OVEL LEN ŠUŽO ŽIVOTI. Sare ka mangen jekh jekhe (Matej 22:39). Niko na ka patini hem čak na ka setini pe ko lošna buća kola hine angleder (Isaija 65:17). Tegani, više na ka ovel mržnja hem o manuša „ka uživinen ko baro mir“ (Psalam 37:11).
Da li mangeja te živine ko asavko sveto? Već avdije but manuša sikljona sar te ikalen i mržnja ando po vilo ađahar so ićerena pe ko savetija andi Biblija (Psalam 37:8). Ko celo sveto, milionija ando Jehovase svedokija ćerena odova. Iako avena ando razna phuvja hem narodija, on tane ko jekhipe hem mangena jekh jekhe (Isaija 2:2-4).
E Jehovase svedokija ka oven bahtale te mothoven tuće sar šaj te istrajine ked doživineja nepravda hem diskriminacija. Odova so ka sikljove ka pomožini tuće te cide i mržnja hem te počmine te mange e manušen. Ka dikhe sar šaj te mothove mangipe premalo sa o manuša, čak hem premalo okola soj tane nezahvalna ja so mothovena mržnja. Sebepi odova, već akana ka ove pobahtalo hem ka ove pana pošukar averencar. Soj tano najvažno, ka sikljove so valjani te ćere te šaj te živine ko Devleso Kraljevstvo kuri i mržnja više na ka ovel (Psalam 37:29).
a Akala lekcije isi ko disave ćhibja.