On dikhlje o mangipe ko delo

I JOMARA hem olake phralja, o Marselo hem o Iver, živinena ko jekh tikno gav ki Gvatemala. I Jomara počminđa te proučini i Biblija hem sigate palo late počminđe hem olake phralja. Ama, hine len jekh problemi. O sotrin hine korore hem na đanđe te čitinen o Brajevo pismo. Odolese, o phral kova proučinđa olencar čitinđa lenđe o materijali kova proučinđe hem o stihija.

Isto ađahar, olenđe hine but pharo te aven ko sastankija. Kokri našti hine te putujinen 40 minutija đi i dvorana. O phralja andi skupština pomožinđe len te aven ko sastankija. Ked on počminđe te ovel len zadatkija ko sastanko ko radno dive, o phralja pomožinđe len te sikljon napamet pe zadatkija.

Ko maj ko 2019. berš, o sastankija počminđe te ićeren pe ko olengo gav. Sigate palo odova, jekh bračno par kola hine stalna pionirija alje ko odova gav. On ćhivđe pese cilj te sikaven e Jomara hem olake phralen te čitinen hem te pisinen ko Brajevo pismo, iako on kokri na đanđe odova. On lelje andi biblioteka knjige kola vaćerena odolestar sar te sikave averen te čitinen hem te pisinen ko Brajevo pismo.

Aso nekobor masek, on trin šukar sikljilje te čitinen hem sebepi odova ulje pana popaše e Jehovaja.a Akana, on služinena sar stalna pionirija. O Marselo tano sluga pomoćnik. Olengo kurko tano pherdo ando duhovna aktivnostija. On tane but revna hem odova pozitivno utičini upro avera.

On tane but zahvalna so o phralja ki skupština pomožinena lenđe. I Jomara phenela: „Pana ando prvo puti ked upoznajinđam e Jehovase svedokonen, on mothovđe amenđe baro mangipe.“ O Marselo phenela: „Isi amen but amala ki skupština hem hijam deo andi jekh međunarodno porodica.“ I Jomara hem olake phralja jedva ađićerena o vreme ked o Jehova ka ćerel i phuv te ovel raj (Ps. 37:10, 11; Is. 35:5).