Pućiba ando čitaocija

Đi ked ka propovedina i šukar vest?

O Isus phenđa: „Akija šukar vest ando Kraljevstvo ka propovedini pe ko celo sveto sar svedočanstvo sa e narodonđe, hem tegani ka avel o kraj“ (Mat. 24:14). O grčko lafi kova tano prevodimo sar „kraj“ ko akava stih, sar hem ko 6. hem ko 13. stih tano o lafi telos. Odova lafi odnosini pe ko konačno kraj, avere lafencar ko uništenje ando Satanaso sveto ko Armagedon (Otkr. 16:14, 16). Znači, amen ka propovedina i šukar vest ando Devleso Kraljevstvo sa đi na počmini o Armagedon. Akava tano nevo objašnjenje.

Angleder, amen haljiljam so ka ćhinava te propovedina i šukar vest ked ka počmini i bari nevolja avere lafencar ked o Baro Vavilon ka ovel uništimo (Otkr. 17:3, 5, 15, 16). Verujinđam so akava događaj ka označini o kraj kotar simbolično „berš andi Jehovasi milost“ (Is. 61:2). Isto ađahar, mislinđam so i bari nevolja ka preživinen okola so već mothovđe soj tane verna e Jehovase. Olen uporedinđam e Judejcencar kola preživinđe o uništenje ando Jerusalim ko 607. berš, angl. n. e. On ko simbolično smisao hine obeležime so ka preživinen odolese so služinđe e Jehovase hem mrzinđe odova soj tano lošno (Jezek. 5:11; 9:4). Ama, odova poređenje nane premalo Isusese lafija kotar Matej 24:14, kola mothovena so o manuša možda ka ovel len prilika te prihvatinen i šukar vest čak hem angleder o konačno kraj, avere lafencar hari angleder te počmini o Armagedon.

Odova so akana pošukar haljovaja o stiho ando Matej 24:14, isto utičini ko odova sar haljovaja o Otkrivenje 16:21 kova vaćeri andi poruka koja tani sar bari kukudi. Amen istražinđam hem haljiljam so akala duj stihija dopuninena jekh jekhe. Sose šaj te phena odova? O odgovor šaj te arakha ko odova so o apostol Pavle pisinđa. Ov phenđa so aso „okola kola ka oven spasime“ odija poruka tani šukar vest, avere lafencar „miris e životoso“. Ama, aso Devlese dušmanija odija tani lošno vest, avere lafencar „miris e meribaso“ (2. Kor. 2:15, 16). On mrzinena i poruka ando Devleso Kraljevstvo odolese so oj mothovi so olengo sveto, ko kova vladini o Satana, tano lošno hem so pana hari ka ovel uništimo (Jov. 7:7; 1. Jov. 2:17; 5:19).

Amen šaj te dikha so i simbolično kukudi, andi koja vaćeri pe ko Otkrivenje 16:21, ka ovel but bari. Odova šaj te značini so đi ka trajini i bari nevolja, amen ka propovedina podirektno, avere lafencar aso e Jehovaso anav ka šunel pe sar niked angleder (Jezek. 39:7). Da li ko odova vreme, palo odova so o Baro Vavilon ka ovel uništimo, disaven ka privucini i poruka koja tani sar prijatno miris? Odova tano sasvim moguće. On šaj ka setinen pe, ja tegani ka saznajinen, so e Jehovase svedokija beršencar angleder vaćerđe so o Baro Vavilon ka ovel uništimo.

Odova tano slično odoleja so desinđa pe e Egipćanenđe palo deš nevolje. Palo odova so o Jehova „[anđa] i presuda upro sa o egipatska devela“, but manuša kola na hine Izraelcija pođinđe e Devlese narodoja (Izl. 12:12, 37, 38). On šaj ćerđe odova odolese so dikhlje so ispuninđa pe sa odova so o Mojsije phenđa ando deš nevolje.

Svako ko ka počmini te služini e Jehovase palo odova so o Baro Vavilon ka ovel uništimo, ka ovel le čast te podržini e Hristese phralen kola pana ka oven ki phuv (Mat. 25:34-36, 40). Naravno, odija prilika te oven prosudime sar bakre ka završini pe hari angleder o Armagedon, ked o pomazanikija ka dobinen pi nebesko nagrada.

Akava nevo razumevanje mothovi amenđe kobor tano baro e Jehovaso mangipe hem oleso milosrđe. Ov na mangela „nijekh manuš te merel, nego sare te pokajinen pe“ (2. Petr. 3:9).