Ο Ευαγγέλιος σο Γραφιντάς ο Λουκάς
21 Κάνα βαντιντάς πο γιακχά, ντικχλάς ι χουλανέν τι τσσουβέν λοβέ κο κουτιά κι λοβένγκε. 2 Σοράν ντικχλάς εκχέ τσορορέ χηρά τι τσσουβέλ ντούι χουρντέ κέρματα σο τθερένας μπουτ χάνικ αξία,* 3 ντα βακερντάς: «Μπαγιά βακεράβα τουμένγκε ότι ακαγιά τσορορί χήρα τσσουντάς πο μπουτ σαριλένταρ. 4 Σόσκε σαρέ ακαλά τσσουντέ κατά λοβέ σο ατσσόνας-λεν, αλλά βόι τσσουντάς σαρέ πο λοβέ, σο-ντα τθερέλας για τι τζουβντιόλ».
5 Πο σοράν, κάνα μερικοί κερένας λάφι ι ναόσκε ντα βακερένας ότι ισινέ ζουζιμέ* σουκάρ μπαρέντζαρ ντα πραγματέντζαρ σο ντιντιλέας κο Ντεβέλ, 6 βοβ βακερντάς: «Κα αβέν ντιβεσά σο σαρέ ανταλά σο ντικχένα κα περέν. Καέκ μπαρ να κα ατσσόλ οπράλ γιαβερέστε». 7 Αζομάν πουτσλέ-λες: «Δάσκαλε, κάνα κα αβέν-πες ανταλά, ντα καβά κα αβέλ ο σημάδι σο κα σικαβέλ ότι κα αβέν ανταλά;» 8 Βοβ βακερντάς: «Τθερέν τουμαρί γκοντί μα τι χουχάντιβεν, σόσκε μπουτ τζενέ κα αβέν, κα λεν μο ναβ ντα κα βακερέν: “Με ισινόμ ανταβά” ντα “Ο βακίτι σο τραμπίντιλο ισί πασέ”. Μα τζαν παλά-λέντε. 9 Ατζέ, κάνα τουμέν κα ασουνέν τι αβέν-πες τζένγκια* ντα προβλήματα,* μα ιζράν κατά νταρ. Σόσκε πρώτα πρέπει τι αβέν-πες ανταλά, αλλά ο τέλος να κα αβέλ οντιά στιγμή».
10 Αζομάν βακερντάς λένγκε: «Κα χαλ-πες τθεμ γιαβερέ τθεμέσαρ ντα βασίλειος γιαβερέ βασιλειόσαρ. 11 Κα αβέν μπαρέ σεισμοί, ντα τθαν τθανέστε κα αβέλ μποκχ ντα νασφαλίματα.* Ντα κα αβέν-πες νταρανικανέ πράγματα, ντα κατά ουρανός μπαρέ σημάδια.
12 »Αλλά πριν τι αβέν-πες σαρέ ανταλά, κα ασταρέν-τουμέν ντα κα τζαν τουμέντζαρ κόντρα, κα γκερέν-τουμέν κο συναγωγές ντα κο φυλακές. Ιτιρί μι ναβέσταρ κα ανέν-τουμέν ανγκλάλ κο βασιλιάδες ντα οντουλέντε σο κερένα κουμάντος. 13 Αντικάς κα ντιντιόλ-τουμέν η ευκαιρία τι βακερέν λένγκε μάνγκε. 14 Οτθάρ, τσσουβέν-λες λατσσές τουμαρέ γκίστε ότι νανέ ανάγκη τι ετοιμάνεν τουμαρέ λάφια, 15 σόσκε ατζέ-ντα άμα κα γκιντίντιβεν σαρέ γιεκ τουμαρέ ντουσμάνια,* με κα νταβ-τουμέν γκοντιαβέρ λάφια σο βον ναστί κα τζαν λέντζαρ κόντρα ντα να κα τθερέν σο τι βακερέν τουμένγκε. 16 Ατζέ-ντα τουμαρό ντατ ντα τουμαρί ντάι, τουμαρέ πφραλά, τουμαρέ τζενέ ντα τουμαρέ αμαλά* κα ντεν-τουμέν κι ντουσμανίνγκε βαστά. Ντα κα μουνταρέν μερικέν τουμένταρ, 17 ντα σαρέ κα μισίνεν-τουμέν ιτιρί μι ναβέσταρ. 18 Αλλά ούτε εκ μπαλ τουμαρέ σορέσταρ να κα χασάρντιβελ. 19 Άμα κα νταϊντίνεν, κα ατσσικιαρέν τουμαρί ζωή.*
20 »Όμως, κάνα κα ντικχέν ι Ιερουσαλήμ τι πφαντιόλ ντονταλάι στρατόντζαρ, αζομάν τι τζανέν ότι ισί πασέ λάκι καταστροφή. 21 Αζομάν οντουλά σο ισί κι Ιουδαία τι νασέν κο βεσά ντα οντουλά σο ισί αντρέ κι Ιερουσαλήμ τι νασέν ντα οντουλά σο ισί κο γκαβά ντονταλάι μα τι τσσουβέν-πες λάτε, 22 σόσκε ανταλά ισί ντιβεσά σο κα ντιντιόλ δικαιοσύνη,* για τι νικιόν μπαγιά σαρέ οντουλά σο ισί γραμμέ. 23 Τιμωρία κα τσσίντεν ο κχαμνιά ντα ο τζουβλιά σο ντένα τσουτσί οντουλά ντιβεσά! Σόσκε κα αβέν μπαρέ βάσανα κο τθεμ ντα μπαρί χολί ανταλέ λαόσκε. 24 Ντα βον κα μερέν κατά τσσινιπέ ι σπαθίσκο, κα λιντιόν πουμαρέ τθεμέσταρ ντα κα τρουγίντιβεν σαρέ κο τθεμά. Ντα η Ιερουσαλήμ κα ιστάντιβελ κατά τθεμά, μέχρι τι μπιτίνεν ο βακίτια ι τθεμένγκε.
25 »Ατζέ, κα αβέν σημάδια κο κχαμ, κο τσσιμούτ* ντα κο τσεργανιά, ντα οπράλ κι πφουβ ο τθεμά κα τθερέν πφανγκό γκι ντα να κα τζανέν σο τι κερέν ιτιρί κατά θόρυβος ντα κατά μπαρί φουρτούνα ι ντεριαβάκι. 26 Ο τζενέ κα μπαϊλντίνεν* πουμαρέ νταριάταρ ντα οντουλένταρ σο κα μπεσέν τι αβέν-πες κι πφουβ, σόσκε ο ζουρανέ πράγματα ι ουρανόσκε κα ιζράν κατά μπαρό κουνιαϊπέ. 27 Ντα αζομάν ο τζενέ κα ντικχέν ι τζενέσκε Τσσαβές τι αβέλ ζοριάσαρ ντα μπαρέ δοξάσαρ αντρέ κο σύννεφος. 28 Αλλά καζόμ ανταλά κα αρχίνεν τι αβέν-πες, ιστίν ντα βάντεν τουμαρό σορό, σόσκε ισί πασέ ο ντιβές σο κα ελευθερώντιβεν».
29 Αζομάν βακερντάς λένγκε εκ παράδειγμας:* «Τσσουβέν σημασία κι χχελινγκίν ντα σαρέ κο γιαβερά δέντρα. 30 Κάνα νικαβένα νεβέ φύλλα, ντικχένα-λες τουμαρέ γιακχίντζαρ ντα τζανένα ότι ο νιλάι ισί πασέ. 31 Αντικάς τουμέν-ντα, κάνα κα ντικχέν τι αβέν-πες ανταλά, τι τζανέν ότι ισί πασέ η Βασιλεία ι Ντεβλέσκι. 32 Μπαγιά βακεράβα τουμένγκε ότι ο τζενέ σο τζουβντιόνα ανταλέ βακιτίστε* να κα μερέν μέχρι τι αβέν-πες σαρέ ανταλά. 33 Ο ουρανός ντα η πφουβ κα χασάρντιβεν, αλλά μο λάφια να κα χασάρντιβεν.
34 »Αλλά τθερέν τουμαρί γκοντί, για μα τι αβέλ ποτές μπουτ πφαρό τουμαρό γκι κατά μπουτ χαμπέ ντα κατά μπουτ πιπέ ντα κατά άγχος ι ζωγιάκο, για μα τι κερέλ-τουμέν οντουβά ντιβές τι σαστίνεν ντα τι ασταρέλ-τουμέν 35 σαρ παγίδα. Σόσκε κα αβέλ οπράλ σαρέ οντουλέντε σο μπεσένα σαρί κι πφουβ. 36 Οτθάρ, τι αβέν τζανγκαντέ. Πάντα τι μολίνεν ι Ντεβλές* για τι μπορίνεν τι γλιτώνεν σαρέ οντουλένταρ σο πρέπει τι αβέν-πες ντα τουμέν τι ατσσόν ανγκλάλ κο Τσσαβό κι τζενέσκο».
37 Οτθάρ, ντισάρα σικλιαρέλας κο ναός, αλλά ιράτ νικιόλας ντα μπεσέλας κο βες σο βακέρντιβελας Βες ι Ζιτινίνγκο.* 38 Ντα σαρό ο λαός τζάλας λέστε ντιπ πρωί για τι ασουνέλ-λες κο ναός.