Ο Ευαγγέλιος σο Γραφιντάς ο Ματθαίος
20 »Η Βασιλεία ι ουρανόσκι ισί σαρ εκ τζενό σο τθερέλας εκ χωράφι ρεζέντζαρ ντα νικίστιλο ντιπ πρωί τι ρόντελ τζενένγκε τι κερέν μπουτί λέσκε χωραφίστε. 2 Κάνα κερντάς λάφι ι τζενέντζαρ ντα βακερντέ τι λεν εκ δηνάριος κο ντιβές, μπουτσσαντάς-λεν τι κερέν μπουτί κο ρεζά. 3 Νικίστιλο πάλι πασέ 9:00 κο πρωί* ντα ντικχλάς μερικέ γιαβερέν τι μπεσέν μπι-μπουτιάκε κι αγορά. 4 Βακερντάς λένγκε: “Τζαν τουμέν-ντα τι κερέν μπουτί κο ρεζά ντα κα νταβ-τουμέν σο-ντα ισί σωστός”. 5 Οτθάρ, γκιλέ βον-ντα. Κάνα νικίστιλο πάλι πασέ 12:00 κο μεσημέρι ντα σοράν πασέ 3:00 κο μεσημέρι,* λιντάς γιαβερέ-ντα τζενέν κι μπουτί. 6 Ντα πασέ 5:00 κο απόγευμας,* νικίστιλο ντα αρακχλάς μερικέ γιαβερέν τι μπεσέν, ντα βακερντάς λένγκε: “Σόσκε μπεσένα ατθέ μπι-μπουτιάκε σαρό ο ντιβές;” 7 Βον βακερντέ: “Καέκ να λιντάς-αμέν μπουτιάκε”. Οτθάρ βακερντάς λένγκε: “Τζαν τουμέν-ντα τι κερέν μπουτί κο ρεζά”.
8 »Κάνα αράτιλο, ο τζενό σο τθερέλας ο χωράφι ι ρεζέντζαρ βακερντάς πι υπηρετίσκε: “Ντε βίκος ι τζενέν σο κερντέ μπουτί ντα πόκινε πρώτα οντουλέν σο αβιλέ τελευταίοι, ντα σοράν οντουλέν σο αβιλέ πο τζανγκλέ λένταρ”. 9 Κάνα αβιλέ ο μουρσά σο ασταρντέ μπουτί πασέ 5:00 κο απόγευμας, ο κάθε εκ λιντάς εκ δηνάριος. 10 Ντα κάνα αβιλέ ο τζενέ σο κερντέ μπουτί σαρό ο ντιβές, αμντισάλε ότι κα λένας πο μπουτ, αλλά λιντέ βον-ντα εκ δηνάριος. 11 Οτθάρ, αρχισάλε τι γκρινιάνεν ι τζενέσκε σο τθερέλας ο χωράφι 12 ντα τι βακερέν: “Ακαλά τελευταίοι κερντέ μπουτί εκ σαάτι, ντα τούι ποκιντάν-λεν καζόμ ποκιντάν αμέν-ντα σο μαρντάμ-αμέν σαρό ο ντιβές αντρέ κο κχαμ!” 13 Αλλά βοβ βακερντάς εκχέσκε ανταλένταρ: “Να αδικιντόμ-τουτ. Να βακερντάμ τι νταβ-τουτ εκ δηνάριος; 14 Λε το λοβέ ντα νας. Με μανγκάβα τι νταβ κο τζενέ σο κερντέ μπουτί εκ σαάτι οντουβά σο ντινόμ τούτε-ντα. 15 Να τθεράβα ο δικαίωμας τι κεράβ σο μανγκάβα μι πραγματέντζαρ; Ή ισί τι γιακχ μπίτσαλι* επειδή με ισινόμ λατσσό;”* 16 Αντικάς, οντουλά σο ισί ντιπ παλάλ κα τζαν ανγκλάλ ντα οντουλά σο ισί ανγκλάλ κα ατσσόν ντιπ παλάλ».
17 Καζόμ ο Ιησούς τζάλας κι Ιερουσαλήμ, λιντάς ι 12 μαθητέν χάνικ πο οκόρινγκ ντα σαρ πφιρένας βακερντάς λένγκε: 18 «Σαρ ντικχένα, τζάσα κι Ιερουσαλήμ, ντα ο Τσσαβό ι τζενέσκο κα ντιντιόλ κο βαστά κι μπαρέ ιερεόνγκε ντα κι γραμματεόνγκε. Βον κα νικαβέν απόφαση τι μερέλ 19 ντα κα ντεν-λες κο βαστά κι τζενένγκε σο ισί γιαβερέ τθεμένταρ για τι πρασάν-λες ντα τι νταπέν-λες βουρδαλόσαρ* ντα τι ιμπλαβέν-λες κο κας, ντα κο τρίτος ντιβές κα ιστίλ».
20 Αζομάν γκιλί πασέ κο Ιησούς η ντάι ι Ζεβεδαιόσκε τσσαβένγκι γιεκ πι τσσαβέντζαρ ντα πελί κοτσίντζαρ ανγκλά-λέστε για τι μανγκέλ λέσταρ κάτι. 21 Βοβ πουτσλάς-λα: «Σο μανγκέσα;» Βόι βακερντάς: «Βάκερ τι μπεσέν ακαλά ντούι τσσαβέ μιρέ ο εκ δεξιά τούταρ ντα ο γιαβέρ αριστερά τούταρ τι Βασιλειάτε». 22 Ο Ιησούς βακερντάς: «Να τζανένα σο μανγκένα μάνταρ. Μπορίνενα τι πιν κατά ποτήρι σο κα πιαβ με;» Βον βακερντέ: «Μπορίνασα». 23 Βοβ βακερντάς λένγκε: «Σίγουρα κα πιν μι ποτηρίσταρ, αλλά να τθεράβα με ο δικαίωμας τι βακεράβ κον κα μπεσέλ δεξιά ντα αριστερά μάνταρ. Οτθέ κα μπεσέν οντουλά σο τραμπιντάς μο Ντατ».
24 Κάνα ασουντέ-λες ανταβά ο γιαβερά 10, πφαριλέ πουμαρέ χολιάταρ ιτιρί κατά ντούι πφραλά. 25 Αλλά ο Ιησούς ντινάς-λεν βίκος ντα βακερντάς: «Τζανένα ότι ο βασιλιάδες ι τθεμένγκε κερένα κουμάντος ι τζενέν σαρ μανγκένα ντα ο μπαρέ σορέ τσσιντικιαρένα-λεν μπουτ. 26 Δεν πρέπει τι αβέλ-πες ανταβά τουμέντζαρ. Αλλά κον τουμένταρ μανγκέλα τι αβέλ μπαρό πρέπει τι υπηρετίνελ-τουμέν, 27 ντα κον τουμένταρ μανγκέλα τι τθερέλ ι πρώτη θέση πρέπει τι αβέλ τουμαρό δούλος. 28 Αντικάς σαρ ο Τσσαβό ι τζενέσκο να αβιλό για τι υπηρετίνεν-λες ο τζενέ, αλλά για τι υπηρετίνελ-λεν βοβ ντα για τι ντελ πι ζωή* σαρ λύτρος μπουτέ τζενένγκε».
29 Καζόμ νασένας κατά Ιεριχώ, αβιλέ παλά-λέστε μπουτ τζενέ. 30 Αζομάν ντούι κορορέ σο μπεσένας ντιπ πασέ κο ντρομ ασουντέ ότι νακχέλας ο Ιησούς ντα ντινέ βίκος: «Τζίτζινε* αμένγκε, Κύριε, σο ισινάν Τσσαβό ι Δαβιδίσκο!» 31 Αλλά ο τζενέ ντινέ βίκος οπρά-λέντε ντα βακερντέ λένγκε μα τι κερέν λάφι. Ο κορορέ όμως ντένας βίκος ατζέ πο ζουρανές: «Τζίτζινε* αμένγκε, Κύριε, σο ισινάν Τσσαβό ι Δαβιδίσκο!» 32 Οτθάρ ο Ιησούς σαρ πφιρέλας ατσσιλό, ντινάς-λεν βίκος ντα βακερντάς: «Σο μανγκένα τι κεράβ τουμένγκε;» 33 Βον βακερντέ λέσκε: «Κύριε, τι πουτάρντιβεν αμαρέ γιακχά». 34 Ο Ιησούς τζιτζισάλο λένγκε ντα τσσουντάς πο βας οπράλ λένγκε γιακχίντε. Μπουτ σουγκό βον ντικχλέ πάλι ντα γκιλέ παλά-λέστε.