Ο Δεύτερος Γράμμας σο Μπουτσσάντιλο κο Κορίνθιοι

9 Να χρειαζίντιβελα τι γραφίναβ τουμένγκε για τι τζανέν ότι πρέπει τι βοηθίνεν* ι αγιόν, 2 σόσκε τζανάβα ότι μανγκένα αντράλ τουμαρέ γκίσταρ τι βοηθίνεν. Οτθάρ-ντα, ισαράβα-τουμέν κο Χριστιανοί κι Μακεδονία. Βακερντόμ λένγκε ότι εκ σαστό μπρες ακανά τουμέν κι Αχαΐα ισινέν έτοιμοι τι βοηθίνεν. Ανταβά κερντάς μπουτέν λένταρ τι μανγκέν βον-ντα τι βοηθίνεν. 3 Αλλά μπουτσσαβάβα ανταλέ πφραλέν ακανά, για τι σικάντιβελ ότι να ισαρντόμ-τουμέν σινανέ, ντα τι αβέν μπαγιά έτοιμοι αντικάς σαρ βακεράβας ότι κα αβένας. 4 Άμα ο πφραλά κατά Μακεδονία κα αβέν μάντζαρ ντα κα ντικχέν ότι να ισινέν έτοιμοι, κα λατζάντιβας αμέν σο ντινάμ τουμένγκε μπέσα. Αλλά κα λατζάντιβεν τουμέν-ντα. 5 Οτθάρ, σκεφτιντόμ ότι έπρεπε τι βακεράβ ι πφραλένγκε τι αβέν τουμέντε, πριν τι αβάς αμέν, ντα τι ετοιμάνεν πο τζανγκλέ ο πράγματα σο ντινέν τουμαρό λάφι τι μπουτσσαβέν αντράλ τουμαρέ γκίσταρ. Αντικάς, κα αβέν έτοιμα ντα κα σικαβέν ότι να ντένα-λεν επειδή αναγκαντάμ-τουμέν, αλλά ότι ντένα-λεν αντράλ τουμαρέ γκίσταρ.

6 Οντουβά σο μανγκάβα τι βακεράβ ισί ότι κον σπειρίνελα χάνικ γκίντελα χάνικ, αλλά κον σπειρίνελα μπουτ γκίντελα μπουτ. 7 Ο κάθε εκ τι κερέλ ντιπ οντουβά σο αποφασιντάς αντρέ πι γκίστε, όχι πφανγκέ γκίσαρ ή ζορίσαρ, σόσκε ο Ντεβέλ μανγκέλα οντουλές σο ντέλα χαράσαρ.

8 Ντα ο Ντεβέλ μπορίνελα τι σικαβέλ τουμένγκε σαρό πο μπαρό λατσσιπέ, για μα τι λειπίνελ τουμένταρ ποτές τίποτα, αλλά τι τθερέν μπουτ πράγματα σο χρειαζίντιβενα για τι κερέν σο-ντα ισί λατσσό. 9 (Σαρ ισί γραμμέ: «Βοβ ντινάς μπουτ,* ντινάς κο τσορορέ. Λέσκι δικαιοσύνη ατσσόλα για πάντα». 10 Ντα ο Ντεβέλ σο ντέλα μπουτ σπόρος οντουλέστε σο σπειρίνελα ντα μαντρό κο τζενέ για τι χαν, κα ντελ-τουμέν μπουτ σπόρος για τι σπειρίνεν ντα κα βοηθίνελ-τουμέν τι τθερέν μπερεκέτι λατσσέ αποτελέσματα κατά δίκαια πράγματα σο κερένα.) 11 Ο Ντεβέλ ευλογίνελα-τουμέν μπουτ για τι μπορίνεν τι ντεν αντράλ τουμαρέ γκίσταρ μπουτέ τροπόντζαρ. Ντα αντικάς, οντουλέντζαρ σο κερένα τι βακερέν ο τζενέ ευχαριστώ κο Ντεβέλ. 12 Ανταγιά βοήθεια σο ντιντιόλα κο γιαβερά λένγκε λατσσιμάσκε νανέ σάντε για τι βοηθίντιβεν ο άγιοι κο ανάγκες σο τθερένα, αλλά για τι βακερέν-ντα μπουτ τζενέ ευχαριστώ κο Ντεβέλ επειδή λιντέ ανταγιά βοήθεια. 13 Ανταβά σο κερντέν σικαβέλα σο τζενέ ισινέν, ντα ανταλέσταρ βον δοξάνενα ι Ντεβλές. Δοξάνενα-λες επειδή οντουλά σο κερένα τουμέν συμφωνίνενα ι λατσσέ αμπερίντζαρ σο τθερένα τι κερέν ι Χριστόσαρ, αντικάς σαρ μουτθαβένα κο γιαβερά, ντα επειδή ντινέν αντράλ τουμαρέ γκίσταρ λέντε ντα σαριλέντε. 14 Ντα βον κα μανγκέν-τουμέν ντα κα μολίνεν* ι Ντεβλές τουμένγκε, σόσκε ο μπαρό λατσσιπέ ι Ντεβλέσκο ισί οπρά-τουμέντε.

15 Τι βακεράς ευχαριστώ κο Ντεβέλ σο ντινάς-αμέν αζόμ μπαρό δώρος σο να βακέρντιβελα λαφίντζαρ.