Ο Πρώτος Γράμμας σο Μπουτσσάντιλο κο Κορίνθιοι
9 Με να μπορίναβα τι κεράβ σο μανγκάβα; Να ισινόμ απόστολος; Να ντικχλόμ ι Ιησούς, αμαρέ Κυριός; Τουμέν να ισινέν ο αποτέλεσμας μι εργόσκο σο τθερέλα τι κερέλ ι Κυριόσαρ; 2 Ατζέ-ντα άμα να ισινόμ απόστολος γιαβερέντε, ισινόμ σίγουρα τουμέντε! Τουμέν ισινέν η σφραγίδα σο σικαβέλα ότι μπαγιά ισινόμ απόστολος ι Κυριόσκο.
3 Για τι αρακχαβάβ μο νεαυτός, βακεράβα ακαβά οντουλένγκε σο κρίνενα-μαν: 4 Να τθεράσα αμέν ο δικαίωμας τι χας ντα τι πιας; 5 Να τθεράσα ο δικαίωμας τι παντρίνας εκχέ τζουβλιάσαρ σο πακιάλα βόι-ντα κο Χριστός* ντα τι λας-λα παλ’ αμέντε, σαρ κερένα ο γιαβερά απόστολοι, ο πφραλά ι Κυριόσκε ντα ο Κηφάς;* 6 Σάντε με ντα ο Βαρνάβας πρέπει τι κεράς μπουτί για τι τθεράς ο αναγκαία; 7 Καβά στρατιώτης ποκινέλα βοβ οντουλά σο χρειαζίντιβελα καζόμ ισί κο στρατός; Κον τσσουβέλα ρεζά ντα να χάλα λένγκε ντρακχένταρ; Ή καβά τσομπάνης σο τθερέλα μπρακέν να πίλα λένγκε τθουντέσταρ;
8 Ανταλά σο βακεράβα ισί τζενένγκε λάφια; Να βακερέλα-λεν ο Νόμος-ντα; 9 Ισί γραμμέ κο Νόμος κι Μωυσίσκο: «Μα πφάντε ο μούι εκχέ γκουρουβέσκο κάνα τσσουβέσα-λες τι ισταβέλ ο γκιβά». Ι γκουρουβένγκε πφαμπόλα ο Ντεβέλ; 10 Να βακερέλα-λες αμαρέ λατσσιμάσκε; Μπαγιά, αμαρέ λατσσιμάσκε γραφισάλο ανταβά, επειδή οντουβά σο οργώνελα ντα οντουβά σο ξεχωρίνελα ο γκιβά πρέπει τι μπεκλεντίνεν ότι κα λεν βον-ντα κατά γκιβά.
11 Άμα αμέν σπειριντάμ πνευματικά πράγματα τουμέντε, κα αβέλας λάθος τι βοηθίνεν-αμέν μερικέ πραγματέντζαρ σο τθεράσα-λεν ανάγκη; 12 Άμα γιαβερά τθερένα ο δικαίωμας τι μανγκέν τουμαρί βοήθεια, να τθεράσα-λες αμέν ατζέ πο μπουτ; Αλλά αμέν να χρησιμοποιηντάμ ανταβά δικαίωμας. Όμως, νταϊντίνασα σαρέ ο δυσκολίες για μα τι κεράς τι τσσινάντιβεν ο λατσσέ αμπέρια σο τθερένα τι κερέν ι Χριστόσαρ. 13 Τουμέν τζανένα ότι οντουλά σο κερένα μπουτί κο ναός χάνα ο πράγματα σο ανένα ο τζενέ κο ναός. Ντα οντουλά σο υπηρετίνενα κο θυσιαστήριος λένα κατά πράγματα σο ντιντιόνα κο θυσιαστήριος. 14 Αντικάς-ντα ο Κύριος ντινάς εντολή τι τζουβντιόν αντράλ κατά λατσσέ αμπέρια οντουλά σο βακερένα ο λατσσέ αμπέρια.
15 Με όμως να μανγκλόμ τίποτα τουμένταρ. Ντα να γραφιντόμ-λεν ανταλά για τι μανγκάβ κάτι τουμένταρ ακανά. Πο λατσσές τι μεράβ παρά τι κεράβ κάτι ασακό. Καέκ να κα λελ μάνταρ ο δικαίωμας σο τθεράβα τι ισαράβ-μαν! 16 Άμα μουτθαβάβα ο λατσσέ αμπέρια, ανταβά νανέ λόγος για τι ισαράβ-μαν. Ισινόμ υποχρεωμέ τι κεράβ-λες ανταβά. Σο μπέτι κα αβέν ο πράγματα μάνγκε άμα να μουτθαντόμ ο λατσσέ αμπέρια! 17 Άμα κεράβα-λες ανταβά σαρέ μι γκίσαρ, κα τθεράβ ευλογία. Αλλά ατζέ-ντα άμα να κεράβα-λες σαρέ μι γκίσαρ, ντιντιλί μάντε μπαρί ευθύνη. 18 Άρα, καγιά ισί μι ευλογία; Ισί τι μουτθαβάβ ο λατσσέ αμπέρια σαρέ μι γκίσαρ ντα χωρίς τι ποκίντιβαβ. Αντικάς, να μανγκάβα τουμένταρ πράγματα σο τθεράβα ο δικαίωμας τι μανγκάβ-λεν για τι μουτθαβάβ ο λατσσέ αμπέρια.
19 Παρόλο σο ισινόμ ελεύθερος σαριλένταρ, κερντόμ μο νεαυτός δούλος σαριλένγκο για τι κερδίναβ αζόμ πο μπουτέ τζενέν αβέλα-πες. 20 Κο Ιουδαίοι αβιλόμ σαρ Ιουδαίος για τι κερδίναβ Ιουδαιόν. Οντουλέντε σο ισί τελάλ κατά νόμος αβιλόμ σαρ τι ισινόμ με-ντα τελάλ κατά νόμος, παρόλο σο να ισινόμ τελάλ κατά νόμος, για τι κερδίναβ οντουλέν σο ισί τελάλ κατά νόμος. 21 Οντουλέντε σο να τθερένα νόμος αβιλόμ σαρ μα τι τθεράβα με-ντα νόμος, παρόλο σο ντάβα καν κο νόμος κι Ντεβλέσκο ντα ισινόμ τελάλ κατά νόμος ι Χριστόσκο, για τι κερδίναβ οντουλέν σο να τθερένα νόμος. 22 Κο μπίζουρανε αβιλόμ μπίζουρανο για τι κερδίναβ ι μπίζουρανεν. Κερντόμ σο νακχέλα μι βαστέσταρ για τι βοηθίναβ σαβέ τι μανγκές τζενέν, ντα αντικάς τι σώναβ κάθε τροπόσαρ μερικέ τζενέν. 23 Κεράβα σο νακχέλα μι βαστέσταρ ι λατσσέ αμπερίνγκε για τι βακεράβ-λεν γιαβερέντε.
24 Να τζανένα ότι κο αγώνας τθάβντενα σαρέ, αλλά σάντε εκ λέλα ο βραβείος; Οτθάρ, τθάβντεν για τι λεν-λες. 25 Κον τθάβντελα κο αγώνας* ατσσικιαρέλα-πες σαρέ κο πράγματα. Βον κερένα-λες ανταβά για τι λεν εκ στεφάνι σο χαλάντιβελα, αλλά αμέν για τι λας εκ στεφάνι σο να χαλάντιβελα. 26 Οτθάρ με να τθάβνταβα σινανέ. Ντα σαρ οντουλά σο ντένα μπουνιές ο εκ ι γιαβερές,* να ντάβα* κι μπαρμπάλ. 27 Νταπάβα* μο σώμας ντα κεράβα-λες κουμάντος σαρ δούλος, για μα τι πφανγκάβ ι Ντεβλέσκο γκι* με, σο μουτθαβάβα ο λατσσέ αμπέρια κο γιαβερά.