Ο Ευαγγέλιος σο Γραφιντάς ο Ματθαίος
15 Αζομάν αβιλέ κο Ιησούς κατά Ιερουσαλήμ Φαρισαίοι ντα γραμματείς ντα βακερντέ λέσκε: 2 «Σόσκε το μαθητές να κερένα οντουλά σο σικλιαρντέ-αμέν ο πουρανέ τζενέ; Για παράδειγμας, να τθοβένα* πουμαρέ βαστά πριν τι χαν».
3 Βοβ βακερντάς λένγκε: «Τουμέν σόσκε να ντένα καν κι εντολή κι Ντεβλέσκι ιτιρί οντουλένταρ σο σικλιαρντέ-τουμέν τι κερέν; 4 Για παράδειγμας, ο Ντεβέλ βακερντάς: “Σέβανε τι νταντές ντα τι νταγιά” ντα “Κον βακερέλα μπέτι λάφια πι νταντέσκε ή πι νταγιάκε πρέπει τι μερέλ”. 5 Αλλά τουμέν σικλιαρένα ακαβά: “Κον κα βακερέλ πι νταντέσκε ή πι νταγιάκε: «Σο-ντα τθεράβα σο κα μπορίνελας τι κερέλ τούκε λατσσιπέ ντινόμ μο λάφι τι νταβ-λες κο Ντεβέλ», 6 νανέ υποχρεωμέ τι σεβάνελ πι νταντές”. Ντα αντικάς κερντέν πέρα ο λάφι ι Ντεβλέσκο ιτιρί οντουλένταρ σο σικλιαρντέ-τουμέν τι κερέν. 7 Ντουέ μουένγκε ισινέν! Δίκιος τθερέλας τουμένγκε ο προφήτης Ησαΐας κάνα βακερντάς: 8 “Ανταβά λαός σεβάνελα-μαν πι βουστέντζαρ, αλλά λέσκο γκι ισί μπουτ ντουρ μάνταρ. 9 Σινανέ ντένα-μαν λατρεία, σόσκε σικλιαρένα τζενένγκε λάφια σαρ τι αβένας μιρέ”». 10 Αζομάν ντινάς βίκος ι μπουτέ τζενέν σο ισινέ οτθέ ντα βακερντάς λένγκε: «Ασουνέν ντα αγαβέν: 11 Να μαγαρίντιβελα ο τζενό οντουλέσταρ σο τσσουβέλα πι μόστε, αλλά οντουλέσταρ σο νικαβέλα πι μόσταρ».
12 Αζομάν αβιλέ ο μαθητές ντα βακερντέ λέσκε: «Τζανέσα ότι ο Φαρισαίοι χολιασάλε κάνα ασουντέ το λάφια;» 13 Βοβ βακερντάς: «Σαρέ ο φυτά σο να φυτίντιλε μι Νταντέσταρ σο ισί κο ουρανός, κα νικιόν ριζάσαρ. 14 Μουκχέν-λεν. Ισί κορορέ, αλλά σικαβένα ι γιαβερένγκε κάι τι τζαν. Άμα εκ κορορό σικαβέλα εκχέ γιαβερέ κορορέσκε κάι τι τζαλ, ο ντούι-ντα κα περέν κι γούρνα». 15 Ο Πέτρος βακερντάς: «Ντε-αμέν τι αγαβάς ο παράδειγμας». 16 Ο Ιησούς βακερντάς: «Τουμέν-ντα ατζέ ναστί αγαβένα; 17 Να τζανένα ότι σο-ντα τσσουβέλα πι μόστε εκ τζενό, νακχέλα κατά περ ντα νικαβέλα-λες κο κινέφι; 18 Όμως, οντουλά σο νικιόνα κατά μούι αβένα κατά γκι, ντα ανταλά ισί σο μαγαρίνενα ι τζενές. 19 Για παράδειγμας, κατά γκι νικιόνα πφιρνικανέ* σκέψεις: μουνταρίματα, λουμνίματα,* τσορίματα, χουχαΐματα,* λάφια σο τζάνα κόντρα κο Ντεβέλ. 20 Ανταλένταρ μαγαρίντιβελα ο τζενό. Να μαγαρίντιβελα άμα κα χαλ μπίτθοντε βαστένγκο».*
21 Ο Ιησούς νασλό οτθάρ ντα γκιλό κο τθεμά Τύρος ντα Σιδώνα. 22 Ντα εκ Φοίνισσα* οντουλέ τθεμένταρ αβιλί ντα ντέλας βίκος ζουρανές: «Τζίτζινε* μάνγκε, Κύριε, σο ισινάν Τσσαβό ι Δαβιδίσκο! Μι τσσάι τσσίντελα μπουτ σόσκε ισί δαιμονισμέ». 23 Αλλά βοβ να βακερέλας λάκε καέκ λάφι. Οτθάρ, λέσκε μαθητές αβιλέ ντα μολίνενας-λες: «Βάκερ λάκε τι νασέλ, σόσκε αβέλα παλ’ αμέντε ντα ντέλα βίκος». 24 Βοβ βακερντάς: «Με μπουτσσάντιλομ σάντε ι χασαρντέ μπρακένγκε σο ισί κο λαός Ισραήλ». 25 Αλλά η τζουβέλ αβιλί, πελί κοτσίντζαρ ανγκλά-λέστε ντα βακερντάς: «Κύριε, βοήθινε-μαν!» 26 Ο Ιησούς βακερντάς λάκε: «Νανέ σωστός τι λελ εκ τζενό ο μαντρό ι χουρντένγκο ντα τι τσσουβέλ-λες κι τζουκλένγκε χουρντέ». 27 Βόι βακερντάς: «Βα, Κύριε, αλλά ι τζουκλένγκε χουρντέ χάνα ο κιρίκια* σο περένα κατά τραπέζι λένγκε κυριόνγκο». 28 Αζομάν ο Ιησούς βακερντάς λάκε: «Τζουβλίε, τθερέσα μπαρί πίστη. Τι αβέλ-πες οντουβά σο μανγκέσα». Ντα οντουλέ σαατίσταρ λάκι τσσάι αβιλί λατσσές.
29 Ο Ιησούς νασλό οτθάρ ντα γκιλό πασέ κι Ντεριάβ κι Γαλιλαία. Σοράν, νικλιντάς κο βες ντα μπεσλό οτθέ. 30 Αζομάν γκιλέ πασέ λέστε μπουτ τζενέ σο αντέ πουμέντζαρ τζενέν μπανγκέ πιντρένγκε ντα βαστένγκε, κορορέν, λαλορέν ντα μπουτέ γιαβερέν. Τσσουντέ-λεν ανγκλάλ λέσκε πιντρέντε ντα βοβ κερντάς-λεν λατσσές. 31 Ντα ο τζενέ ατσσιλέ πουταρντέ μόσαρ κάνα ντικχλέ ι λαλορέν τι κερέν λάφι, ι μπανγκέν τι αβέν λατσσές ντα τι πφιρέν ντα ι κορορέν τι ντικχέν. Οτθάρ, ντινέ δόξα κο Ντεβέλ κι Ισραηλίσκο.
32 Ο Ιησούς ντινάς βίκος πι μαθητέν ντα βακερντάς: «Τζιτζίναβα ι τζενένγκε, σόσκε ισί τριν ντιβεσά ακανά μάντζαρ ντα να τθερένα τίποτα τι χαν. Να μανγκάβα τι βακεράβ λένγκε τι νασέν μποκχαλέ, σόσκε μπορεί μα τι νταϊντίνεν κο ντρομ». 33 Όμως, ο μαθητές βακερντέ λέσκε: «Κάι κα αρακχάς ανταλέ ερημιάτε μαντρό για τι τσαλιαράς αζόμ μπουτέ τζενέν;» 34 Αζομάν ο Ιησούς βακερντάς λένγκε: «Καζόμ μαντρέ τθερένα;» Βον βακερντέ: «Εφτά, ντα χάνικ χουρντέ ματσσέ». 35 Ντα βακερντάς κο τζενέ τι μπεσέν τελέ. 36 Λιντάς ο εφτά μαντρέ ντα ο ματσσέ, κερντάς εκ προσευχή για τι βακερέλ ευχαριστώ κο Ντεβέλ ντα πφανγκλάς-λεν. Σοράν ντινάς-λεν κο μαθητές ντα ο μαθητές ντινέ-λεν κο τζενέ. 37 Χαλέ σαρέ ντα τσαλιλέ, γκιντιντέ οντουλά σο ατσσιλέ ντα πφερντέ εφτά μπαρέ σεβλιά.* 38 Ντα ο τζενέ σο χαλέ ισινέ σταρ χιλιάδες μουρσά, εκτός κατά τζουβλιά ντα κατά χουρντέ τσσαβέ. 39 Ντα αφού νασλέ ο τζενέ, τσσουντάς-πες κι βάρκα ντα αβιλό κι Μαγαδάν.