Ο Ευαγγέλιος σο Γραφιντάς ο Λουκάς

1 Μπουτ τζενέ προσπαθιντέ τι γραφίνεν εκ ιστορία ι πραγματένγκε σο αβιλέ-πες ντα πακιάσα-λεν αμέν σαρέ αμαρέ γκίσαρ, 2 αντικάς σαρ βακερντέ-λεν αμένγκε οντουλά σο ντικχλέ-λεν πουμαρέ γιακχίντζαρ κατά αρχή ντα οντουλά σο μουτθαβένα ο λάφι ι Ντεβλέσκο. 3 Οτθάρ, λιντόμ ι απόφαση με-ντα, σόσκε ροντιντόμ ντιπ λατσσές σαρέ ο πράγματα κατά αρχή, τι γραφίναβ-λεν τούκε εκχέ γκοντιαβέρ σειράσαρ, μπαρέα Θεόφιλε, 4 για τι τζανές ντιπ λατσσές ότι μπορίνεσα τι ντες σαρί τι μπέσα κο λάφια σο σικλιλάν.

5 Κο ντιβεσά κι Ηρωδίσκε,* σο ισινέ βασιλιάς κι Ιουδαία, ισινέ εκ ιερέας,* ο Ζαχαρίας, κατά ιερεόνγκι ομάδα σο βακέρντιβελας Αβιά. Λέσκι ρομνί αστάρντιβελας κατά Ααρών ντα λάκο ναβ ισινέ Ελισάβετ. 6 Ισινέ ο ντούι-ντα δίκαιοι ανγκλάλ κο Ντεβέλ ντα ντένας καν ντιπ σαρέ κο εντολές ντα κο νόμοι κι Ιεχωβάσκε.* 7 Αλλά να τθερένας τσσαβέν, σόσκε η Ελισάβετ ναστί κερέλας, ντα ο μπρεσά ι ντουένγκε-ντα νακχλέας.

8 Κάνα αβιλί η σειράς λέσκε ομαδάκι, ντα βοβ υπηρετίνελας σαρ ιερέας ανγκλάλ κο Ντεβέλ, 9 τραμπίντιλο αντικάς σαρ ισινέ ο έθιμος ι ιερεόνγκο τι τζαλ αντρέ κο ναός κι Ιεχωβάσκο* ντα τι πφαμπαρέλ θυμίαμας. 10 Ντα σαρό ο λαός προσευχίντιβελας αβρί οντουβά σαάτι σο πφαμπόλας ο θυμίαμας. 11 Αζομάν σικαντάς-πες λέσκε άγγελος ι Ιεχωβάσκο* ντα ατσσιλό κο δεξιά κατά θυσιαστήριος σο πφαμπόλας ο θυμίαμας. 12 Ο Ζαχαρίας ταραξάλο ανταλέσταρ σο ντικχλάς ντα πφερντιλό νταρ. 13 Αλλά ο άγγελος βακερντάς λέσκε: «Μα ντάρα, Ζαχαρία, σόσκε ο Ντεβέλ ασουντάς σο μολιντάν-λες,* ντα τι ρομνί, η Ελισάβετ, κα μπιανέλ τούκε μουρσές, ντα κα νικαβές λέσκε Ιωάννη. 14 Κα λες χαρά ντα κα χουτέλ* το γκι, ντα μπουτ τζενέ κα χαιρίνεν κάνα κα μπιάντιβελ, 15 σόσκε βοβ κα αβέλ μπαρό ανγκλάλ κο Ιεχωβά.* Αλλά δεν πρέπει τι πιλ ιτς μολ ή σο-ντα γιαβέρ ματικιαρέλα, ντα κα πφερντιόλ άγιος πνεύμας πριν ατζέ τι μπιάντιβελ,* 16 ντα κα ανέλ μπουτέ Ισραηλιτέν παλάλ κο Ιεχωβά* λένγκε Ντεβλέστε. 17 Ατζέ, κα τζαλ πο ανγκλάλ Λέσταρ ι πνευμάσαρ ντα ι ζοριάσαρ σο τθερέλας ο Ηλίας για τι ανέλ ο γκι ι νταντένγκο παλάλ κο τσσαβέ ντα τι βοηθίνελ ι τζενέν σο να ντένα καν τι κερέν γκοντιαβέρ πράγματα σαρ ο δίκαιοι, ντα αντικάς τι ετοιμάνελ εκχέ λαός ι Ιεχωβάσκε».*

18 Ο Ζαχαρίας βακερντάς κο άγγελος: «Σαρ κα τζανάβ ότι κα αβέλ-πες μπαγιά ανταβά; Σόσκε με πφουρίλιλομ, ντα μι ρομνιάκε μπρεσά νακχλέ». 19 Ο άγγελος βακερντάς λέσκε: «Με ο Γαβριήλ, σο ισινόμ πασέ κο Ντεβέλ ντα ατσσάβα ανγκλά-λέστε, μπουτσσάντιλομ για τι κεράβ τούκε λάφι ντα τι βακεράβ τούκε ανταλά λατσσέ αμπέρια. 20 Αλλά επειδή να πακιαντάν μο λάφια, σο κα νικιόν μπαγιά πουμαρέ βακιτίστε, κα ατσσός λαλορό ντα ναστί κα κερές λάφι μέχρι κο ντιβές σο κα αβέν-πες ανταλά». 21 Ο λαός μπεσέλας ι Ζαχαριάσκε, ντα να αγαβένας σόσκε αργίνελας αζόμ μπουτ κο ναός. 22 Κάνα νικίστιλο αβρί, ναστί κερέλας λέντζαρ λάφι, ντα αγαντέ ότι ντικχλάας εκ μπαρί φαντασία κο ναός. Βοβ κερέλας λένγκε νοήματα, σόσκε ισινέ ατζέ λαλορό. 23 Κάνα μπιτισάλε ο ντιβεσά σο ντέλας άγια υπηρεσία,* γκιλό πέσκε κχερέ.

24 Χάνικ ντιβεσά πο σοράν, η Ελισάβετ λέσκι ρομνί ατσσιλί κχαμνί, να νικιόλας κατά κχερ παντς μασεκά ντα βακερέλας: 25 «Ακαβά κερντάς ο Ιεχωβά* μάνγκε ανταλά ντιβεσά. Ντινάς σημασία μάντε για τι νασκιαρέλ ι λατζ σο τθεράβα κι τζενένγκε γιακχά».

26 Κάνα ισινέ σιοβέ μασεκένγκι, ο άγγελος Γαβριήλ μπουτσσάντιλο κατά Ντεβέλ κι πόλη Ναζαρέτ σο ισί κι Γαλιλαία, 27 εκχέ τσσαγιάτε* σο λάκο ναβ ισινέ Μαρία ντα ισινέ νισανλίς ι Ιωσηφίσαρ σο αστάρντιβελας κατά Δαβίδ. 28 Ντα κάνα ο άγγελος γκιλό αντρέ, βακερντάς λάκε: «Λατσσό ντιβές τι τθερές, Μαρία, σο αβέλα μπουτ ο γκι ι Ιεχωβάσκο* τούσαρ, ντα βοβ ισί τούσαρ». 29 Αλλά βόι σουκιλί λέσκε λαφίντζαρ ντα προσπαθίνελας τι αγαβέλ σο μανγκέλας τι βακερέλ. 30 Οτθάρ, ο άγγελος βακερντάς λάκε: «Μα ντάρα, Μαρία, σόσκε κερέσα ο γκι ι Ντεβλέσκο. 31 Άκ’! Κα ατσσός κχαμνί ντα κα μπιανές μουρσές ντα κα νικαβές λέσκε Ιησού. 32 Βοβ κα αβέλ μπαρό ντα κα βακέρντιβελ Τσσαβό Οντουλέσκο σο Ισί Πο Οπρέ Σαριλένταρ, ντα ο Ιεχωβά* Ντεβέλ κα ντελ-λες ο θρόνος ι Δαβιδίσκο λέσκε νταντέσκο, 33 ντα κα αβέλ για πάντα Βασιλιάς οντουλένγκο σο αστάρντιβενα κατά Ιακώβ, ντα λέσκι Βασιλεία να κα τθερέλ τέλος».

34 Αλλά η Μαρία βακερντάς κο άγγελος: «Σαρ κα αβέλ-πες ανταβά, αφού να τθεράβα σοτό μουρσέσαρ;» 35 Ο άγγελος βακερντάς λάκε: «Άγιος πνεύμας* κα αβέλ οπρά-τούτε, ντα η ζορ σο ντέλα Οντουβά σο Ισί Πο Οπρέ Σαριλένταρ κα ιτσσαρέλ-τουτ. Άκ’ σόσκε ο τσσαβό σο κα μπιάντιβελ κα βακέρντιβελ άγιος, Τσσαβό ι Ντεβλέσκο. 36 Η Ελισάβετ-ντα, σο ισινάν τζενέ λάσαρ, ατσσιλί κχαμνί ντα ισί σιοβέ μασεκένγκι, παρόλο σο ισί πφουρί ντα ο τζενέ βακερένας ότι ναστί κερέλας τσσαβέν, 37 σόσκε τίποτα οντουλένταρ σο βακερέλα ο Ντεβέλ να αβέλα-πες μα τι κερέλ-λες». 38 Σοράν η Μαρία βακερντάς: «Άκ’ η τσσάι σο υπηρετίνελα ι Ιεχωβάς!* Τι αβέλ-πες μάνγκε ανταβά σο βακερντάν». Αζομάν ο άγγελος νασλό οτθάρ.

39 Οντουλά ντιβεσά η Μαρία λιντάς-πες ντα γκιλί σουγκό κάρινγκ κο βεσά, εκχέ πολιάτε κο Ιούδας, 40 οτθέ σο ισινέ ο κχερ ι Ζαχαριάσκο. Κάνα γκιλί αντρέ, χαιρετιντάς την Ελισάβετ. 41 Κάνα η Ελισάβετ ασουντάς ι Μαριά τι χαιρετίνελ-λα, ο μαξίμι αντρέ λάκε περέστε κουνιαντάς-πες, ντα η Ελισάβετ πφερντιλί άγιος πνεύμας 42 ντα ντινάς βίκος ζουρανές: «Ισινάν η πο ευλογημέ σαρέ κατά τζουβλιά, ντα ευλογημέ ισί ο τσσαβό σο κα μπιανές! 43 Κον ισινόμ με για τι αβέλ η ντάι μι Κυριόσκι τι ντικχέλ-μαν; 44 Σόσκε ντικχ! Κάνα ασουντόμ-τουτ τι χαιρετίνες-μαν, ο μαξίμι αντρέ μι περέστε κουνιαντάς-πες κατά χαρά. 45 Ντα ευτυχισμέ ισί οντιά σο πακιαντάς, σόσκε κα νικιόν ντιπ οντουλά σο βακερντάς λάκε ο Ιεχωβά».*

46 Ντα η Μαρία βακερντάς: «Μι ψυχή* δοξάνελα ι Ιεχωβάς,* 47 ντα μο γκι χουτέλα σο σώνελα-μαν ο Ντεβέλ. 48 Βοβ ντινάς σημασία εκχέ ταπεινέ τσσαγιά σο υπηρετίνελα-λες. Ντα ανταλέ ντιβεσέσταρ σαρέ ο γενιές κα βακερέν ότι ισινόμ ευτυχισμέ, 49 σόσκε ο Ζουρανό κερντάς μπουτ σουκάρ πράγματα μάνγκε, ντα άγιος ισί λέσκο ναβ, 50 ντα πάντα τζιτζίνελα* οντουλένγκε σο νταρένα λέσταρ. 51 Βοβ σικαντάς πι ζορ πι μουσιάσαρ. Ντα παλντιντάς οντουλέν σο αβιλέ μπαρικανέ αντρέ πουμαρέ γκίστε. 52 Νικαντάς κατά θρόνους οντουλέν σο τθερένα ζορ ντα βαντιντάς οπρέ οντουλέν σο ισί ταπεινοί. 53 Τσαλιαρντάς μποκχαλέν λατσσέ πραγματέντζαρ ντα παλντιντάς ι χουλανέν τσουτσέ βαστέντζαρ. 54 Τθαβντισάλο τι ντελ βοήθεια κο Ισραήλ πι υπηρετίστε, σόσκε ντέλα-πες γκοντί πο λάφι ότι κα τζιτζίνελ* 55 για πάντα ι Αβρααμίσκε ντα λέσκε προσαγγονίνγκε, αντικάς σαρ βακερντάς αμαρέ παππουδένγκε». 56 Η Μαρία μπεσλί λάσαρ πασέ τριν μασεκά ντα σοράν βουρτισάλι πι κχερέστε.

57 Αβιλό ο βακίτι τι μπιανέλ η Ελισάβετ, ντα μπιαντάς μουρσές. 58 Ο γείτονες ντα λάκε τζενέ ασουντέ ότι ο Ιεχωβά* τζιτζισάλοας* λάκε μπουτ ντα χαιρίνενας λάσαρ. 59 Οχτώ ντιβεσά σοράν αβιλέ τι κερέν περιτομή κο χουρντό ντα μανγκένας τι τσσουβέν λέσκε ο ναβ λέσκε νταντέσκο, Ζαχαρίας. 60 Αλλά λέσκι ντάι βακερντάς: «Νάα! Κα νικαβάς λέσκε Ιωάννης». 61 Αζομάν βακερντέ λάκε: «Καέκ τι τζενένταρ να τθερέλα ανταβά ναβ». 62 Σοράν, κερντέ νοήματα λέσκε νταντέσκε για τι πουτσέν-λες σαρ μανγκέλας τι νικαβέν λέσκε. 63 Βοβ μανγκλάς εκ κομμάτι κας ντα γραφιντάς οπράλ: «Ιωάννης ισί λέσκο ναβ». Ντα σαρέ ατσσιλέ πουταρντέ μόσαρ. 64 Οντιά στιγμή λέσκο μούι ντα λέσκι τσσιπ πουτάρντιλε, ντα αρχισάλο τι κερέλ λάφι ντα τι ισαρέλ ι Ντεβλές. 65 Ντα πελί νταρ οπράλ σαρί κι γειτονιά λένγκι, ντα ο τζενέ σο τζουβντιόνας κο βεσά κι Ιουδαία κερένας λάφι σαρέ ανταλένγκε σο αβιλέ-πες. 66 Σαρέ οντουλά σο ασουντέ-λεν ανταλά τσσουντέ-λεν αντρέ πουμαρέ γκίστε ντα βακερένας: «Σο κα αβέλ ανταβά χουρντό;» Σόσκε ο Ιεχωβά* ισινέ μπαγιά λέσαρ.*

67 Αζομάν λέσκο ντατ ο Ζαχαρίας πφερντιλό άγιος πνεύμας ντα βακερντάς ακαγιά προφητεία: 68 «Δοξασμέ τι αβέλ ο Ιεχωβά,* ο Ντεβέλ ι Ισραηλίσκο, σόσκε ντινάς σημασία πι λαός ντα ελευθερωντάς-λες. 69 Ντα ντινάς-αμέν εκχέ μπουτ ζουρανές σο κα σώνελ-αμέν. Βοβ αστάρντιβελα κατά Δαβίδ λέσκε υπηρετίσταρ, 70 αντικάς σαρ βακερντάς βοβ αντράλ πι άγιε προφητένταρ κο πουρανέ μπρεσά. 71 Βακερντάς ότι κα σώνελ-αμέν αμαρέ ντουσμανίνταρ* ντα κατά βας σαρέ οντουλένγκο σο μισίνενα-αμέν. 72 Κα κερέλ οντουβά σο βακερντάς αμαρέ παππουδένγκε ντα κα τζιτζίνελ* αμένγκε. Κα ντελ-πες γκοντί πι άγια συμφωνία, 73 ο λάφι σο ντινάς αμαρέ παππούστε, κο Αβραάμ. 74 Ο Ντεβέλ κα σώνελ-αμέν κατά βαστά αμαρέ ντουσμανίνγκε ντα σοράν κα μουκχέλ-αμέν τι ντας-λες άγια υπηρεσία χωρίς νταρ, 75 ντα αντικάς κα αβάς αφοσιωμέ ντα δίκαιοι ανγκλά-λέστε σαρί αμαρί ζωή. 76 Αλλά τούι, χουρντέα, κα βακέρντιβες προφήτης Οντουλέσκο σο Ισί Πο Οπρέ Σαριλένταρ, σόσκε ο Ιεχωβά* κα μπουτσσαβέλ-τουτ πο ανγκλάλ πέσταρ για τι ετοιμάνες λέσκο ντρομ 77 ντα για τι βακερές ότι κα σώνελ πι λαός κάνα κα συγχωρίνελ λένγκε αμαρτίες, 78 σόσκε αμαρό Ντεβέλ αγαβέλα ι ντουκχ ι τζενένγκι. Ανταλέσταρ-ντα, φως κατά ουρανός κα αβέλ οπρ’ αμέντε σαρ ο κχαμ κάνα ντισιόλα 79 για τι λελ-πες οπράλ οντουλέντε σο μπεσένα κο καρανίκι ντα κι βουτσσάλ κι μεριμάσκι, ντα για τι γκερέλ αμαρέ πιντρέ κο ντρομ σο ισί ειρήνη».

80 Ντα ο χουρντό μπαριόλας ντα ι Ντεβλέσκε πνευμάσαρ τζάλας μπουτ λατσσές,* ντα μπεσέλας κι έρημος μέχρι σο αβιλό ο ντιβές τι σικάντιβελ ανγκλάλ κο λαός Ισραήλ.