Ο Γράμμας σο Μπουτσσάντιλο κο Εβραίοι

11 Ο τζενό σο τθερέλα πίστη ισί ντιπ σίγουρος ότι κα νικιόν μπαγιά οντουλά σο μπεσέλα* τι αβέν-πες. Ντα ισί σίγουρος ότι οντουλά σο πακιάλα ισί μπαγιά, ατζέ-ντα άμα να ντικχέλα-λεν. 2 Ο τζενέ κο πουρανέ μπρεσά* τθερένας ανταγιά πίστη, οτθάρ-ντα ο Ντεβέλ σικαντάς λένγκε ότι κερντέ λέσκο γκι.

3 Αμέν τθεράσα πίστη, οτθάρ-ντα αγαβάσα ότι ο πράγματα κο ουρανός ντα κι πφουβ* τσσουβντιλέ εκχέ σειράτε αντράλ οντουλένταρ σο βακερντάς ο Ντεβέλ. Ντα αντικάς οντουλά σο ντικχάσα αβιλέ πραγματένταρ σο ναστί ντικχάσα.

4 Ο Άβελ τθερέλας πίστη, οτθάρ-ντα ντινάς κο Ντεβέλ εκ θυσία σο τθερέλας πο μπαρί αξία οντουλάταρ σο ντινάς ο Κάιν. Ντα επειδή τθερέλας ανταγιά πίστη, σικάντιλο λέσκε ότι ισινέ δίκαιος, σόσκε ο δώρα σο ντινάς κερντέ ι Ντεβλέσκο γκι, ντα παρόλο σο μουλό, λέσκι πίστη συνεχίνελα τι σικλιαρέλ-αμέν.

5 Ο Ενώχ τθερέλας πίστη, οτθάρ-ντα λιντιλό για μα τι ντικχέλ μεριπέ, ντα ναστί αρακχένας-λες καεκχέ τθανέστε σόσκε ο Ντεβέλ λιντάας-λες οτθάρ. Επειδή πριν τι λιντιόλ σικάντιλο λέσκε ότι κερντάς ι Ντεβλέσκο γκι. 6 Άμα εκ τζενό να τθερέλα πίστη, να αβέλα-πες τι κερέλ ι Ντεβλέσκο γκι, σόσκε κον τζάλα πασέ κο Ντεβέλ πρέπει τι πακιάλ ότι υπαρχίντιβελα ντα ότι ευλογίνελα οντουλέν σο ρόντενα λέσκε σαρέ πουμαρέ γκίσαρ.

7 Ο Νώε τθερέλας πίστη, οτθάρ-ντα σικαντάς ότι νταρέλας κατά Ντεβέλ κάνα βακέρντιλε λέσκε ο πράγματα σο κα αβένας-πες πριν ατζέ τι ντικχέλ-λεν. Ντα λατσσαρντάς εκ κιβωτός για τι σώντιβελ λέσκι φαμιλί. Ντα αντράλ κατά πίστη σο τθερέλας σικαντάς ότι οντουβά ντουνιάς αξίνελας τι καταστραφίντιβελ, ντα βοβ βακέρντιλο δίκαιος.

8 Ο Αβραάμ τθερέλας πίστη, οτθάρ-ντα ντινάς καν κάνα μανγκλάς λέσταρ ο Ντεβέλ τι τζαλ εκχέ τθανέστε σο κα λέλας σαρ κληρονομιά. Νασλό παρόλο σο να τζανέλας κάι τζάλας. 9 Αντράλ κατά πίστη σο τθερέλας τζουβντιλό σαρ ξένος κο τθεμ σο ντινάς πο λάφι ο Ντεβέλ τι ντελ-λες. Μπεσέλας τσαντιρίντε, ντα γιεκ λέσαρ ισινέ εμ ο Ισαάκ εμ ο Ιακώβ, σο λέντε-ντα ντινάς πο λάφι ο Ντεβέλ τι ντελ-λεν οντουβά τθεμ. 10 Μπεσέλας τι αβέλ η πόλη σο τθερέλα ζουρανέ θεμέλια ντα σο σχεδιαντάς-λα ντα λατσσαρντάς-λα ο Ντεβέλ.

11 Η Σάρρα-ντα τθερέλας πίστη, οτθάρ-ντα ατσσιλί κχαμνί, παρόλο σο νακχλέας λάκε μπρεσά, σόσκε πακιάλας ότι ισινέ πιστός Οντουβά* σο ντινάας πο λάφι. 12 Οτθάρ, εκχέ μουρσέσταρ σο λέσκο σώμας ισινέ σαρ μουλό, μπιάντιλε αζόμ μπουτ τσσαβέ σο ναστί γκιντιόνα σαρ ναστί γκιντιόνα ο τσεργανιά* κο ουρανός ντα ο κούμι* κι ντεριάβ.

13 Σαρέ ανταλά τζενέ μουλέ πιστοί, παρόλο σο κα αβένας-πες μπουτ πο σοράν οντουλά σο ντινάας πο λάφι ο Ντεβέλ. Αλλά λένγκε ισινέ σαρ τι ντικχλέας-λεν, δεχτιντέ-λεν χαράσαρ ντα βακερντέ κο τζενέ ότι ισινέ ξένοι ντα ότι κα ατσσόνας χάνικ βακίτι κο τθεμ σο μπεσένας. 14 Οντουλά σο βακερένα ασακέ πράγματα σικαβένα ότι μανγκένα αντράλ πουμαρέ γκίσταρ εκ τθαν σο ισί λένγκο. 15 Ντα άμα κα συνεχίνενας τι ντεν-πες γκοντί ο τθαν σο μουκχλέας παλάλ, κα αρακχένας εκ ευκαιρία τι βουρτίνεν. 16 Αλλά ακανά μανγκένα τι τθερέν εκ πο λατσσό τθαν, δηλαδή εκ τθαν κατά ουρανός. Οτθάρ, ο Ντεβέλ να λατζάλα λένγκε, σο μολίνενα-λες τι βοηθίνελ-λεν σαρ Ντεβέλ λένγκο,* σόσκε ετοιμαντάς λένγκε εκ πόλη.

17 Ο Αβραάμ τθερέλας πίστη, οτθάρ-ντα κάνα δοκιμασάλο, ισινέ σαρ τι θυσιαντάς τον Ισαάκ. Βα, ο τζενό σο δεχτιντάς χαράσαρ οντουβά σο ντινάας πο λάφι ο Ντεβέλ γκιλό τι θυσιάνελ πι μοναδικέ τσσαβές 18 παρόλο σο βακέρντιλοας λέσκε: «Οντουλά σο κα βακέρντιβεν το προσάγγονα κα αβέν αντράλ κατά Ισαάκ». 19 Αλλά βοβ σκεφτιντάς ότι ο Ντεβέλ μπορίνελας ατζέ-ντα τι τζουβντιαρέλ-λες κατά μουλέ, ντα μπαγιά ισινέ σαρ τι λιντάς πι τσσαβές κατά μεριπέ. Ανταβά σικαντάς σο κα αβέλ-πες πο σοράν.

20 Ο Ισαάκ-ντα τθερέλας πίστη, οτθάρ-ντα ντινάς πι ζαμ κο Ιακώβ ντα κο Ησάφ ι πραγματένγκε σο κα αβένας-πες πο σοράν.

21 Ο Ιακώβ τθερέλας πίστη, οτθάρ-ντα, κάνα ισινέ τι μερέλ, ντινάς πι ζαμ κο ντούι τσσαβέ σο τθερέλας ο Ιωσήφ ντα σαρ ασταρέλας-πες πι μανγκουράταρ προσκυνιντάς ι Ντεβλές.

22 Ο Ιωσήφ τθερέλας πίστη, οτθάρ-ντα, καζόμ λέσκι ζωή ερεσέλας κο τέλος, βακερντάς ότι ο Ισραηλίτες κα νικιόνας* κατά Αίγυπτος ντα ντινάς οδηγίες* τι λεν λέσκε κόκαλα οτθάρ.

23 Ο ντατ ντα η ντάι ι Μωυσίσκε τθερένας πίστη, οτθάρ-ντα γκεραντέ-λες τριν μασεκά κάνα μπιάντιλο, σόσκε ντικχλέ ότι ο χουρντό ισινέ σουκάρ ντα να νταρασάλε κατά διαταγή σο ντινάς ο βασιλιάς. 24 Ο Μωυσής τθερέλας πίστη, οτθάρ-ντα να μανγκλάς τι βακέρντιβελ τσσαβό ι Φαραώσκε τσσαγιάκο κάνα μπαριλό. 25 Τραμπιντάς τι τσσίντελ μπουτ ι Ντεβλέσκε λαόσαρ αντίς τι απολαμβάνελ για χάνικ ι αμαρτία, 26 επειδή πακιάλας ότι η λατζ ι τζενέσκι σο τραμπίντιλο κατά Ντεβέλ ισινέ πο μπαρό χουλανιπέ κατά θησαυροί σο ισινέ κι Αίγυπτος, σόσκε τθερέλας πο γιακχά κο ευλογίες σο κα λέλας. 27 Τθερέλας πίστη, οτθάρ-ντα νασλό κατά Αίγυπτος ντα να νταρασάλο κατά χολί ι βασιλιάσκι, σόσκε ατσσιλό σταθερός σαρ τι ντικχέλας ι Ντεβλές σο καέκ ναστί ντικχέλα-λες. 28 Τθερέλας πίστη, οτθάρ-ντα κερντάς ο Πάσχας ντα τινιαντάς ο ρατ κο πόρτες για μα τι μουνταρέλ ο άγγελος ι Ντεβλέσκο λένγκε πρώτε τσσαβέν.

29 Ο Ισραηλίτες τθερένας πίστη, οτθάρ-ντα νακχλέ αντράλ κατά Ερυθρά Θάλασσα σαρ τι αβέλας σουκί τσικ. Αλλά κάνα ο Αιγύπτιοι προσπαθιντέ τι κερέν-λες βον-ντα ανταβά, τασάντιλε.

30 Ο λαός τθερέλας πίστη, οτθάρ-ντα πφιρντάς ντονταλάι κατά βουτσσέ ντουβάρια κι Ιεριχώ εφτά ντιβεσά, ντα σοράν ο ντουβάρια πελέ τελέ. 31 Η Ραάβ η λουμνί τθερέλας πίστη, οτθάρ-ντα να καταστραφισάλι γιεκ οντουλέντζαρ σο να ντινέ καν ι Ντεβλές, σόσκε δεχτιντάς λατσσιμάσαρ οντουλέν σο μπουτσσάντιλεας τι ντικχέν ο τθεμ αποτσοράλ.

32 Σο γιαβέρ τι βακεράβ; Σίγουρα να κα ερεσέλ-μαν ο σαάτι άμα κα βακεράβ οντουλένγκε σο κερντάς ο Γεδεών, ο Βαράκ, ο Σαμψών, ο Ιεφθάε, ο Δαβίδ, αλλά εμ ο Σαμουήλ ντα ο γιαβερά προφήτες. 33 Τθερένας πίστη, οτθάρ-ντα βον νικιντέ βασιλιαδέν, αντέ δικαιοσύνη, λέντε ντινάς πο λάφι ο Ντεβέλ, πφαντέ ο μούι ι λιονταρίνγκο, 34 να πφαμπιλέ κατά γιακ,* να μουλέ κατά τσσινιπέ ι σπαθίσκο, ισινέ μπίζουρανε αλλά λιντέ ζορ, ισινέ μπίνταρανε κο τζένγκι,* νασκιαρντέ στρατόν σο τσσουντέ-πες λένγκε τθεμέστε. 35 Ο αγαπημέ τζενέ μερικέ τζουβλίνγκε ιστίντιλε κατά μεριπέ. Όμως, γιαβερά τζενέ τσσιντιντέ μπουτ σόσκε μανγκένας τι ατσσόν πιστοί κο Ντεβέλ παρά τι ελευθερώντιβεν. Κερντέ-λες ανταβά για τι ιστίν κατά μεριπέ εκχέ πο λατσσέ τροπόσαρ. 36 Βα, γιαβερέν πρασαντέ-λεν ντα νταπλέ-λεν βουρδαλόσαρ,* πφαντέ-λεν ατζέ-ντα τζαντζιρίντζαρ* ντα τσσουντέ-λεν κι φυλακή. 37 Φουρτιντέ λένγκε μπαρά, νακχλέ δοκιμασίες, κερντέ-λεν κομμάτια πριονίσαρ, μουνταρντέ-λεν σπαθίσαρ, ιρίνας δέρματα μπρακένγκε ντα μπουσνίνγκε, να τθερένας οντουλά σο χρειαζίντιβενας, νακχένας στεναχώρια, τσσίντενας μπουτ. 38 Ο ντουνιάς να αξίνελας τι τθερέλ αζόμ λατσσέ τζενέν. Γκεραβένας-πες κο ερημιές, κο βεσά, κο σπηλιές ντα κο γούρνες σο ισί αντρέ κι πφουβ.

39 Ντα σαρέ ανταλά τζενέ, παρόλο σο σικάντιλο λένγκε ότι κερντέ ι Ντεβλέσκο γκι αντράλ κατά πίστη σο τθερένας, να ντικχλέ τι νικιόν μπαγιά οντουλά σο ντινάς πο λάφι ο Ντεβέλ. 40 Ανταβά αβιλό-πες σόσκε ο Ντεβέλ ντικχλάας κάτι πο λατσσό αμένγκε, ντα αντικάς βον μα τι αβέν τέλειοι πο τζανγκλέ αμένταρ.