Πράξεις ι Αποστολόνγκε
6 Οντουλά ντιβεσά, καζόμ ο μαθητές αβένας πο μπουτ, ο Ιουδαίοι σο κερένας λάφι μπαλαμανές αρχισάλε τι γκρινιάνεν οντουλένγκε σο κερένας λάφι εβραϊκά, σόσκε λένγκε χήρες να λένας οντουβά σο έπρεπε τι λεν κατά χαμπέ σο ιλιάντιβελας κάθε ντιβές. 2 Οτθάρ, ο Δώδεκα ντινέ βίκος σαρέ ι μαθητέν ντα βακερντέ: «Νανέ σωστός τι μουκχάς αμέν ο λάφι ι Ντεβλέσκο για τι ιλιαβάς χαμπέ κο τραπέζια. 3 Οτθάρ, πφραλάλεν, τραμπίνεν τουμέν εφτά μουρσέν σο τθερένα λατσσό ναβ, ισί πφερντέ άγιος πνεύμας ντα ισί γκοντιαβέρ, για τι μουκχάς ανταγιά σημαντική μπουτί οπρά-λέντε. 4 Ντα αμέν κα ντας σαρό αμαρό σαάτι ντα αμαρί ζορ για τι προσευχίντιβας ντα τι σικλιαράς ο λάφια ι Ντεβλέσκε». 5 Ανταβά σο βακερντέ μπεϊντιντέ-λες σαρέ,* ντα τραμπιντέ ι Στεφανός, σο ισινέ πφερντό πίστη ντα άγιος πνεύμας. Τραμπίντιλο εμ ο Φίλιππος, ο Πρόχορος, ο Νικάνορας, ο Τίμωνας, ο Παρμενάς ντα ο Νικόλαος, σο ισινέ κατά Αντιόχεια ντα λιντάας ι Ιουδαιόνγκι θρησκεία. 6 Αντέ-λεν κο απόστολοι, ντα βον προσευχισάλε ντα τσσουντέ πουμαρέ βαστά οπρά-λέντε.
7 Οτθάρ, ο λάφι ι Ντεβλέσκο πφιρντιόλας ατζέ πο μπουτ, ντα ο μαθητές αβγατίντιβενας μπουτ κι Ιερουσαλήμ. Ντα μπουτ ιερείς αρχισάλε τι πακιάν.
8 Ο Στέφανος, σο ισινέ πφερντό λατσσιπέ κατά Ντεβέλ ντα ζορ, κερέλας μπαρέ θαύματα ντα σικαβέλας σημάδια αντρέ κο λαός. 9 Αλλά αβιλέ τζενέ κατά Συναγωγή Οντουλένγκι σο Ελευθερωσάλεας, ντα λέντζαρ ισινέ μερικοί Κυρηναίοι ντα Αλεξανδρινοί ντα γιαβερά κατά Κιλικία ντα κατά Ασία, για τι χαν-πες λαφίντζαρ ι Στεφανόσαρ. 10 Όμως, ναστί τζάνας λέσαρ κόντρα, σόσκε βακερέλας γκοντιαβέρ λάφια αντράλ κατά άγιος πνεύμας. 11 Αζομάν τσσουντέ αποτσοράλ μερικέ τζενέν τι βακερέν: «Ασουντάμ-λες τι βακερέλ λάφια σο τζάνα κόντρα κο Μωυσής ντα κο Ντεβέλ». 12 Ντα κερντέ ι λαός, ι πρεσβυτερόν ντα ι γραμματεόν τι τζαν κόντρα κο Στέφανος. Γκιλέ ούρια οπρά-λέστε, καπτιντέ-λες χολιάσαρ ντα γκερντέ-λες κο Σάνχεδριν.* 13 Ντα αντέ τζενέν σο χουχαβένας,* ντα βον βακερντέ: «Ανταβά τζενό να τσσιναβέλα τι βακερέλ λάφια σο τζάνα κόντρα ανταλέ άγιε τθανέστε ντα κο Νόμος. 14 Για παράδειγμας, ασουντάμ-λες τι βακερέλ ότι ο Ιησούς ο Ναζωραίος κα περαβέλ ανταβά τθαν ντα κα αλλάνελ οντουλά σο σικλιαρντάς-αμέν ο Μωυσής».
15 Σαρέ οντουλά σο μπεσένας κο Σάνχεδριν* τθερένας πουμαρέ γιακχά οπρά-λέστε ντα ντικχλέ ότι λέσκο μούι ισινέ σαρ μούι αγγελόσκο.