Ο Δεύτερος Γράμμας σο Γραφιντάς ο Ιωάννης
1 Με ο πρεσβύτερος* γραφίναβα κι πφεν* σο τραμπίντιλι κατά Ντεβέλ ντα λάκε τσσαβέντε, σο μανγκάβα-λεν μπαγιά, ντα όχι σάντε με, αλλά σαρέ οντουλά-ντα σο σικλιλέ ι αλήθεια, 2 χάρη κι αλήθεια σο ισί αντρέ αμαρέ γκίστε ντα κα αβέλ οτθέ για πάντα. 3 Ο Ντεβέλ σο ισί αμαρό Ντατ ντα ο Ιησούς Χριστός σο ισί ο Τσσαβό ι Νταντέσκο κα σικλιαρέν-αμέν ανταλά αληθινά λάφια ντα κα σικαβέν αμένγκε αγάπη. Βον κα σικαβέν αμένγκε μπαρό λατσσιπέ, κα τζιτζίνεν* αμένγκε ντα κα ντεν-αμέν ειρήνη.
4 Λιντόμ μπαρί χαρά επειδή σικλιλόμ ότι μερικά κατά τσσαβέ τιρέ πφιρένα κι αλήθεια, σαρ λιντάμ εντολή κατά Ντατ. 5 Οτθάρ, πφεν, μανγκάβα τούταρ ακανά τι μανγκάς ο εκ ι γιαβερές. (Να γραφίναβα τούκε εκ νεβί εντολή, αλλά εκ εντολή σο τθεράας-λα κατά αρχή.) 6 Αγάπη μανγκέλα τι βακερέλ τι πφιράς σαρ βακερένα λέσκε εντολές. Σαρ ασουντέν κατά αρχή, λέσκι εντολή ισί ότι πρέπει τι πφιρέν κι αγάπη. 7 Αρακχαβέν-τουμέν σόσκε μπουτ τζενέ σο χουχαβένα νικίστιλε κο ντουνιάς. Βον βακερένα ότι να πακιάνα ότι ο Ιησούς Χριστός αβιλό κι πφουβ σαρ τζενό. Ανταλά τζενέ χουχαβένα ντα ισί ο αντίχριστος.*
8 Τι τθερέν τουμαρί γκοντί για μα τι χασαρέν ανταλά σο μαρντάμ-αμέν τι κεράς. Αντικάς κα λεν σαρέ ο ευλογίες σο ετοιμαντάς ο Ντεβέλ τουμένγκε. 9 Κον νασέλα κατά όρια ντα να ατσσόλα κο σικλιαριπέ κι Χριστόσκο να τθερέλα Ντεβλές. Οντουβά σο ατσσόλα ανταλέ σικλιαριμάστε τθερέλα εμ ι Νταντές εμ ι Τσσαβές. 10 Άμα εκ τζενό αβέλα τουμέντε ντα να ανέλα ανταβά σικλιαριπέ, μα τι τσσουβέν-λες τουμαρέ κχερέστε ντα μα τι χαιρετίνεν-λες. 11 Επειδή οντουβά σο χαιρετίνελα-λες ισί σαρ τι κερέλ βοβ-ντα ο πφιρνικανέ* πράγματα σο κερέλα οντουβά τζενό.
12 Τθεράβα μπουτ τι βακεράβ τουμένγκε αλλά να μανγκάβα τι γραφίναβ-λεν τουμένγκε εκχέ γραμμάστε. Πακιάβα όμως ότι κα αβάβ τουμέντε ντα κα κεράβ τουμέντζαρ λάφι μούι μουέσαρ για τι αβέν πφερντέ χαρά.
13 Κερένα τούκε σελιάμι* ο τσσαβέ τι πφενιάκε σο τραμπίντιλι κατά Ντεβέλ.