Ο Δεύτερος Γράμμας σο Μπουτσσάντιλο κο Θεσσαλονικείς

1 Με ο Παύλος, ο Σιλουανός* ντα ο Τιμόθεος μπουτσσαβάσα ανταβά γράμμας ι κχανγκιριάκε κι Θεσσαλονίκη σο ισί ι Ντεβλέσκι, αμαρέ Νταντέσκι, ντα ι Κυριόσκι, ι Ιησού Χριστόσκι:

2 Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.

3 Πφραλάλεν, πρέπει πάντα τι βακεράς ευχαριστώ κο Ντεβέλ τουμένγκε. Αντικάς πρέπει τι κεράς, σόσκε τουμαρί πίστη αβέλα μπουτ ζουρανί ντα η αγάπη σο τθερένα σαρέ ο εκ ι γιαβερέσκε μπαριόλα. 4 Οτθάρ, ισαράσα-τουμέν κο κχανγκιριά κι Ντεβλέσκε. Βακεράσα λένγκε ότι κερένα υπομονή ντα ντένα μπέσα κο Ντεβέλ παρόλο σο τζάνα τουμέντζαρ κόντρα ο γιαβερά ντα νακχένα δυσκολίες.* 5 Σαρέ ανταλά σικαβένα ότι ο Ντεβέλ κρίνελα δίκαια, ντα ανταβά κα κερέλ τι ντικχέλ-τουμέν ο Ντεβέλ σαρ τζενέ σο αξίνενα τι νακχέν λέσκε Βασιλειάτε. Ανταλέ Βασιλειάκε τσσίντενα μπουτ.

6 Αφού ο Ντεβέλ ισί δίκαιος, κα τιμωρίνελ οντουλέν σο κερένα-τουμέν τι τσσίντεν μπουτ. 7 Αλλά τουμέν σο τσσίντενα μπουτ κα ελευθερώντιβεν γιεκ αμέντζαρ κάνα κα σικάντιβελ ο Κύριος Ιησούς κατά ουρανός γιεκ πι ζουρανέ αγγελόντζαρ 8 αντρέ εκχέ μπαρέ γιακάτε.* Αζομάν κα τιμωρίνελ οντουλέν σο να τζανένα ι Ντεβλές ντα οντουλέν σο να ντένα καν κο λατσσέ αμπέρια σο τθερένα τι κερέν αμαρέ Κυριόσαρ, ι Ιησούσαρ. 9 Αμαρό Κύριος κα κρίνελ ανταλέ τζενέν. Λένγκι τιμωρία κα αβέλ τι καταστραφίντιβεν για πάντα. Αντικάς, να κα ντικχέλ-λεν πάλι ντα να κα βοηθίνελ-λεν πι μπαρέ* ζοριάσαρ. 10 Κάνα αμαρό Κύριος κα αβέλ για τι δοξάντιβελ πι αγιόντζαρ, σαρέ οντουλά σο πακιάνα λέστε κα ατσσόν πουταρντέ μόσαρ. Ντα κα αβέν τουμέν-ντα γιεκ λέντζαρ, σόσκε πακιαντέν σαρέ οντουλά σο βακερντάμ τουμένγκε.

11 Οτθάρ-ντα προσευχίντιβασα πάντα τουμένγκε, για τι ντικχέλ-τουμέν αμαρό Ντεβέλ σαρ τζενέ σο ισί άξιοι ι ζωγιάκε σο ντινάς-τουμέν βίκος τι τθερέν, για τι κερέλ τουμένγκε πι ζοριάσαρ σαρό ο λατσσιπέ σο μανγκέλα ντα για τι τθερέν επιτυχία σαρέ οντουλέντε σο κερένα αντράλ κατά πίστη. 12 Προσευχίντιβασα για τι δοξάντιβελ ο ναβ αμαρέ Κυριόσκο, ι Ιησούσκο, ανταλένταρ σο κερένα, ντα τουμέν τι δοξάντιβεν σόσκε ισινέν ενωμέ λέσαρ. Ανταγιά δόξα αβέλα κατά μπαρό λατσσιπέ αμαρέ Ντεβλέσκο ντα ι Κυριόσκο, ι Ιησού Χριστόσκο.