Ο Δεύτερος Γράμμας σο Μπουτσσάντιλο κο Κορίνθιοι

13 Ανταγιά ισί η τρίτη φαρ σο αβάβα τουμέντε. «Οντουλέντζαρ σο κα βακερέν ντούι ή τριν μάρτυρες πρέπει τι σικάντιβελ σο αβιλό-πες μπαγιά». 2 Παρόλο σο ακανά να ισινόμ τουμέντζαρ, ισί σαρ τι ισινόμ τουμέντζαρ δεύτερη φαρ, ντα βακεράβα οντουλένγκε σο αμαρτιντέας ντα σαρέ τουμένγκε ότι, άμα κα αβάβ πάλι, να κα γλιτώναβ οντουλέν σο κερένα μπέτι πράγματα. 3 Αντικάς κα σικαβάβ τουμένγκε ότι αντράλ μάνταρ κερέλα λάφι ο Χριστός. Ντα ο Χριστός νανέ μπίζουρανο κο πράγματα σο τθερένα τι κερέν τουμέντζαρ, αλλά ισί ζουρανό. 4 Βοβ ιμπλάντιλο κο κας σαρ μπίζουρανο τζενό, αλλά ι Ντεβλέσκε ζοριάσαρ ισί τζουβντό. Ισί μπαγιά ότι αμέν-ντα ισινάμ μπίζουρανε τζενέ σαρ ισινέ βοβ, αλλά κα τζουβντιάς γιεκ λέσαρ ι Ντεβλέσκε ζοριάσαρ σο σικάντιβελα τουμένγκε.

5 Συνεχίνεν τι εξετάνεν τουμαρό νεαυτός για τι αγαβέν άμα τθερένα αληθινή πίστη αντικάς σαρ μανγκέλα ο Ντεβέλ. Συνεχίνεν τι σικαβέν τουμαρέ νεαυτόσκε σο ισινέν. Να τζανένα ότι ο Ιησούς Χριστός ισί ενωμέ τουμέντζαρ; Εκτός άμα τσσιναντέν τι κερέν ι Ντεβλέσκο γκι. 6 Κα μανγκάβας μπαγιά τι αγαβέν ότι αμέν να τσσιναντάμ τι κεράς ι Ντεβλέσκο γκι.

7 Προσευχίντιβασα τουμένγκε κο Ντεβέλ μα τι κερέν κάτι λάθος. Να κεράσα-λες ανταβά για τι βακερέν ο γιαβερά ότι αμέν κεράσα ο γκι ι Ντεβλέσκο, αλλά για τι κερέν τουμέν οντουβά σο ισί λατσσό, ατζέ-ντα άμα ο γιαβερά κα βακερέν ότι αμέν να κεράσα ο γκι ι Ντεβλέσκο. 8 Αμέν να μπορίνασα τι εμποδίνας ι αλήθεια σο αβέλα κατά Ντεβέλ, αλλά μπορίνασα σάντε τι σικαβάς ότι ο Ντεβέλ βακερέλα ι αλήθεια. 9 Σίγουρα χαιρίνασα κάνα αμέν ισινάμ μπίζουρανε αλλά τουμέν ισινέν ζουρανέ. Οτθάρ-ντα προσευχίντιβασα τουμένγκε, για τι διορθώντιβεν. 10 Ο Κύριος ντινάς-μαν ο δικαίωμας τι νταβ-τουμέν ζορ ντα όχι τι κεράβ-τουμέν τι χασαρέν τουμαρί ζορ. Άκ’ σόσκε γραφίναβα ανταλά πράγματα ακανά σο να ισινόμ τουμέντζαρ, για μα τι χρειαζίντιβελ τι χρησιμοποιήναβ αυστηρέ τροπόσαρ ανταβά δικαίωμας κάνα κα αβάβ.

11 Οντουλέσκε, πφραλάλεν, συνεχίνεν τι χαιρίνεν, τι διορθώντιβεν, τι μουκχέν ι γιαβερέν τι λοκχιαρέν τουμαρό γκι,* τι σκεφτίνεν ι ίδιε τροπόσαρ ντα τι τθερέν ειρήνη τουμαρέ ζωγιάτε. Ντα ο Ντεβέλ σο σικαβέλα αγάπη ντα μανγκέλα ι ειρήνη κα αβέλ τουμέντζαρ. 12 Χαιρετίνεν ο εκ ι γιαβερές αντράλ τουμαρέ γκίσταρ.* 13 Κερένα τουμένγκε σελιάμι* σαρέ ο άγιοι.

14 Ο μπαρό λατσσιπέ ι Κυριόσκο, ι Ιησού Χριστόσκο ντα η αγάπη ι Ντεβλέσκι ντα ο άγιος πνεύμας σο ντιντιλό σαρέ αμέντε τι αβέλ τουμέντζαρ.