Ο Γράμμας σο Μπουτσσάντιλο κο Εβραίοι
8 Ο πο σημαντικός πράγμας σαρέ οντουλένταρ σο βακεράσα ισί ακαβά: Ασακέ αρχιερεάς τθεράσα, ντα βοβ μπεσλό δεξιά κατά θρόνος ι μπαρέ Ντεβλέσκο κο ουρανός, 2 σαρ υπηρέτης κο άγιος τθαν ντα κο αληθινός τσαντίρι. Ανταβά τσαντίρι τσσουντάς-λες ο Ιεχωβά,* ντα όχι ο τζενέ. 3 Κάθε αρχιερέας τθερέλα ι ευθύνη τι ντελ εμ δώρα εμ θυσίες. Οτθάρ, χρειαζίντιβελας τι τθερέλ βοβ-ντα κάτι τι ντελ. 4 Άμα ισινέ κι πφουβ, να κα αβέλας ιερέας, σόσκε ατθέ υπαρχίντιβενα μουρσά σο ντένα δώρα αντικάς σαρ βακερέλα ο Νόμος. 5 Βον ντένα άγια υπηρεσία σο σικαβέλα ο πράγματα σο ισί κο ουρανός. Ανταβά σικαβέλας η εντολή-ντα σο ντινάς ο Ντεβέλ κο Μωυσής κάνα ισινέ τι λατσσαρέλ ο τσαντίρι: «Προσόχινε τι κερές σαρέ ο πράγματα αντικάς σαρ σικαντόμ τούκε κο βες». 6 Αλλά ακανά κο Ιησούς ντιντιλί πο μπαρί υπηρεσία επειδή ισί οντουβά-ντα σο βοηθίνελα εκχέ πο λατσσέ συμφωνιάτε.* Ανταγιά συμφωνία βασίντιβελα πο λατσσέ πραγματέντε σο ντινάς πο λάφι ο Ντεβέλ τι κερέλ.
7 Άμα η πρώτη συμφωνία ισινέ χωρίς λάθος, να κα τθεράας ανάγκη τι αβέλ-πες γιαβέρ συμφωνία. 8 Βοβ ντικχέλα ότι ο λαός κερέλα λάθος, οτθάρ βακερέλα: «“Ντικχέν! Αβένα ντιβεσά”, βακερέλα ο Ιεχωβά,* “σο κα κεράβ νεβί συμφωνία οντουλέντζαρ σο ισί κατά Ισραήλ ντα οντουλέντζαρ σο ισί κατά Ιούδας. 9 Ανταγιά να κα αβέλ σαρ η συμφωνία σο κερντόμ λένγκε παππουδέντζαρ κο ντιβές σο ασταρντόμ-λεν κατά βας για τι νικαβάβ-λεν κατά Αίγυπτος. Βον να ατσσικιαρντέ μι συμφωνία, οτθάρ τσσιναντόμ τι φροντίναβ-λεν”, βακερέλα ο Ιεχωβά.*
10 »“Ανταγιά ισί η συμφωνία σο κα κεράβ οντουλέντζαρ σο ισί κατά Ισραήλ σοράν οντουλέ ντιβεσένταρ”, βακερέλα ο Ιεχωβά.* “Κα τσσουβάβ μο νόμους λένγκε γκοντιάτε, ντα λένγκε γκίστε κα γραφίναβ-λεν. Ντα κα αβάβ λένγκο Ντεβέλ ντα βον κα αβέν μο λαός.
11 »”Ντα ακανά να κα σικλιαρέλ ο κάθε εκ οντουλές σο μπεσέλα κο ίδιος τθεμ λέσαρ ντα ο κάθε εκ πι πφραλές ακαλέ λαφίντζαρ: «Σίκλιουβ ι Ιεχωβάς!»,* σόσκε σαρέ κα τζανέν-μαν, χουρντέ μπαρέ. 12 Κα συγχωρίναβ ο άδικα πράγματα σο κερντέ, ντα να κα νταβ-μαν γκοντί λένγκε αμαρτίες”».
13 Κάνα βακερντάς «νεβί συμφωνία», κερντάς τι αβέλ πουρανί η πρώτη συμφωνία. Ανταβά σο πουράνιβελα ντα χαλάντιβελα ατζεχάνικ κα καταστραφίντιβελ.