Ο Γράμμας σο Μπουτσσάντιλο κο Εβραίοι
9 Η πρώτη συμφωνία τθερέλας νόμους για τι ντιντιόλ άγια υπηρεσία, ντα λάκο άγιος τθαν ισινέ κι πφουβ. 2 Κερντιλό ο πρώτος μέρος ι τσαντιρίσκο, σο οτθέ ισινέ ο λυχνοστάτης, ο τραπέζι ντα ο μαντρέ σο ισινέ ανγκλάλ κο Ντεβέλ, ντα ανταβά βακέρντιβελας Άγια Μεριά ι Τσαντιρίσκι. 3 Αλλά παλάλ κατά δεύτερη κουρτίνα ισινέ ο μέρος ι τσαντιρίσκο σο βακέρντιβελας η Πο Άγια Μεριά ι Τσαντιρίσκι. 4 Οτθέ αντρέ ισινέ εκ χρυσός θυμιατήρι ντα η κιβωτός ι συμφωνιάκι σο τθερέλας χρυσάφι παντού. Αντρέ κι κιβωτός ισινέ ο χρυσός βάζος* σο τθερέλας αντρέ ο μάννα, ο ραβδίς σο τθερέλας ο Ααρών ντα σο νικαντάας λουλούδια ντα ο μπαρά σο οπράλ ισινέ γραμμέ ο νόμοι ι Ντεβλέσκε. 5 Οπράλ κι κιβωτός ισινέ ο μπουτ σουκάρ* χερουβείμ σο λένγκι βουτσσάλ περέλας οπράλ κο καπάκι* σο τθερέλας η κιβωτός. Ακανά όμως νανέ ο σαάτι για τι βακεράς μπουτ πράγματα ανταλένγκε.
6 Αφού ανταλά λατσσάρντιλε ανταλέ τροπόσαρ, ο ιερείς τζάνα αντρέ κάθε ντιβές κο πρώτος μέρος κι τσαντιρίσκο για τι κερέν ο άγιες υπηρεσίες. 7 Αλλά ο αρχιερέας τζάλα κορκορό κο δεύτερος μέρος κι τσαντιρίσκο εκ φαρ κο μπρες, ντα να τζάλα αντρέ χωρίς ρατ. Ανταβά ρατ ντέλα-λες εμ πιρέ αμαρτιένγκε εμ ι αμαρτιένγκε σο κερντέ ο τζενέ κατά λαός χωρίς τι μανγκέν. 8 Αντικάς, ο άγιος πνεύμας σικαβέλα ντιπ λατσσές ότι ο ντρομ σο γκερέλας κο άγιος τθαν να πουτάρντιλοας ατζέ καζόμ υπαρχίντιβελας ο πρώτος τσαντίρι. 9 Ανταβά τσαντίρι μανγκέλα τι σικαβέλ ο πράγματα σο αβένα-πες ακανά, ντα μέχρι ακανά ντιντιόνα εμ δώρα εμ θυσίες. Όμως, ανταλά να μπορίνενα τι κερέν ντιπ πάκι ι συνείδηση* οντουλέσκι σο ντέλα άγια υπηρεσία. 10 Ανταλά δώρα ντα θυσίες τθερένα τι κερέν πραγματέντζαρ σο χαλιόνα ντα πιλιόνα. Τθερένα τι κερέν εμ τζενέντζαρ εμ πραγματέντζαρ σο τθοβντιόνα* αντικάς σαρ βακερέλας ο Νόμος. Ανταλά πράγματα σο βακερέλας ο Νόμος τθερένας τι κερέν ι σωμάσαρ ντα έπρεπε τι κερέλ-λεν ο λαός μέχρι κο βακίτι σο ο Ντεβέλ κα τσσουβέλας ο πράγματα εκχέ σειράτε.
11 Όμως, κάνα αβιλό ο Χριστός, ισινέ αρχιερέας ι λατσσέ πραγματένγκο σο τθεράσα ακανά. Ντα ντινάς αντρέ κο τσαντίρι σο ισί πο μπαρό ντα μπουτ πο λατσσό. Ανταβά τσαντίρι νανέ κερντό τζενένγκε βαστένταρ ντα νανέ κι πφουβ. 12 Να ντινάς αντρέ κο άγιος τθαν ρατέσαρ σο ισινέ μπουσνιένγκο ντα τερνέ γκουρουβένγκο, αλλά ρατέσαρ σο ισινέ λέσκο, εκ φαρ για πάντα, ντα ελευθερωντάς-αμέν για πάντα. 13 Ο ιερείς χρησιμοποιήνενα ο ρατ ι μπουσνιένγκο ντα ι γκουρουβένγκο ντα φουρτίνενα ι στάχτη ι τερνέ γκουρουμνιάκι οπράλ κο τζενέ σο μαγαρισάλε, ντα ανταβά κερέλα-λεν τι αβέν πάκι κι Ντεβλέσκε γιακχά. 14 Αλλά ο ρατ ι Χριστόσκο κερέλα ατζέ πο μπουτ πράγματα, σόσκε ντινάς πο νεαυτός κο Ντεβέλ χωρίς καέκ ελάττωμας αντράλ κατά άγιος πνεύμας.* Λέσκο ρατ κα καθαρίνελ αμαρί συνείδηση πραγματένταρ σο να τθερένα αξία για τι ντας άγια υπηρεσία κο τζουβντό Ντεβέλ.
15 Οντουλέσκε-ντα ισί οντουβά σο βοηθίνελα εκχέ νεβέ συμφωνιάτε. Αντράλ λέσταρ, ο Ντεβέλ ντέλα πο λάφι οντουλέντε σο τραμπιντάς ότι κα ντελ-λεν εκ κληρονομιά σο ατσσόλα για πάντα. Σαρέ ανταλά μπορισάλε τι αβέν-πες σόσκε βοβ μουλό ντα αντικάς ντιντιλό ο λύτρος για τι ελευθερώντιβεν κατά αμαρτίες σο κερντέ κάνα υπαρχίντιβελας η πουρανί συμφωνία. 16 Κάνα αβέλα-πες εκ συμφωνία ι Ντεβλέσαρ, χρειαζίντιβελα τι μερέλ εκ τζενό, 17 σόσκε η συμφωνία τθερέλα αξία ι μεριμάσαρ. Να τθερέλα αξία καζόμ τζουβντιόλα οντουβά τζενό. 18 Άρα, ούτε η πουρανί συμφωνία αρχισάλι χωρίς τι τσσορντιόλ ρατ. 19 Κάνα ο Μωυσής βακερντάς σαρέ ο εντολές σο τθερέλας ο Νόμος σαρό κο λαός, λιντάς ο ρατ ι τερνέ γκουρουβένγκο ντα ι μπουσνιένγκο ντα ναμιντάς-λες πανίσαρ. Ντα ι ντιπ λολέ μπαλέντζαρ σο ισινέ πφαντέ οπράλ εκχέ φυτόστε,* τσσουντάς χάνικ κατά ρατ οπράλ κο βιβλίος* ντα οπράλ σαρό κο λαός, 20 ντα βακερντάς: «Ανταβά ισί ο ρατ ι συμφωνιάκο σο βακερντάς τουμένγκε ο Ντεβέλ τι ατσσικιαρέν-λα». 21 Αντικάς-ντα, τσσουντάς χάνικ κατά ρατ κο τσαντίρι ντα σαρέ κο πράγματα σο χρησιμοποιήντιβενας κι άγια υπηρεσία. 22 Βα, αντικάς σαρ βακερέλα ο Νόμος, ο πο μπουτ πράγματα αβένα πάκι ι ρατέσαρ, ντα άμα να τσσορντιλό ρατ, να αβέλα-πες τι συγχωρίντιβεν ο αμαρτίες.
23 Οτθάρ, ο πράγματα σο μανγκένα τι σικαβέν σο ισί κο ουρανός χρειαζίντιβελας τι αβέν πάκι ανταλέ τροπόσαρ, αλλά ι πραγματένγκε σο ισί κο ουρανός πρέπει τι αβέν-πες μπουτ πο λατσσέ θυσίες. 24 Ο Χριστός να ντινάς αντρέ εκχέ άγιε τθανέστε κερντό τζενένγκε βαστένταρ, σο ισί σαρ ο άγιος τθαν κο ουρανός. Αλλά ντινάς αντρέ κο ίδιος κο ουρανός, ντα αντικάς ακανά ισί ανγκλάλ κο Ντεβέλ αμένγκε. 25 Ο αρχιερέας ντέλα αντρέ κο άγιος τθαν κάθε μπρες ρατέσαρ σο νανέ λέσκο. Αλλά ο Χριστός να χρειαζίντιβελα τι ντελ πο νεαυτός σαρ θυσία μπουτ φαρ. 26 Άμα έπρεπε τι κερέλ-λες ανταβά, κα χρειαζίντιβελας μπερεκέτι φαρ τι τσσίντελ μπουτ οτθάρ μπερί σο μπιάντιλε τζενέ κι πφουβ. Ακανά όμως σο τελειώνελα ανταβά βακίτι, σικάντιλο εκ φαρ για πάντα για τι νασκιαρέλ ι αμαρτία αντράλ κατά θυσία πι νεαυτόσκι. 27 Κάθε τζενό μερέλα σάντε εκ φαρ, αλλά σοράν ανταλέσταρ κα κρίντιβελ. 28 Ο Χριστός-ντα ντινάς πο νεαυτός σάντε εκ φαρ για τι λελ οπρά-πέστε μπουτέ τζενένγκε αμαρτίες. Ντα ι δεύτερη φαρ σο κα σικάντιβελ να κα αβέλ ιτιρί κατά αμαρτία,* ντα κα ντικχέν-λες οντουλά σο μπεσένα λέσκε σαρ σαρ για τι σώνελ-λεν.