Ο Γράμμας σο Μπουτσσάντιλο κο Εβραίοι
3 Οντουλέσκε, πφραλάλεν σο ισινέν άγιοι ντα καλεσμέ για τι τζαν κο ουρανός, σκεφτίνεν ι Ιησούς σο ισί απόστολος ντα αρχιερέας. Λέστε πακιάσα ντα λέσκε μουτθαβάσα κο τζενέ. 2 Βοβ ισινέ αφοσιωμέ Οντουλέστε σο ντινάς-λες ανταγιά ευθύνη, σαρ ισινέ ο Μωυσής-ντα κάνα υπηρετίνελας σαρό κο κχερ κι Ντεβλέσκο. 3 Επειδή ο Ιησούς αξίνελα πο μπαρί δόξα κατά Μωυσής, σόσκε οντουβά σο λατσσαρέλα εκ κχερ ισί πο σημαντικός κατά κχερ. 4 Σαρ τζανάσα, κάθε κχερ λατσσαρέλα-λες κάποιος, αλλά οντουβά σο λατσσαρντάς σαρέ ο πράγματα ισί ο Ντεβέλ. 5 Ντα ο Μωυσής σαρ υπηρέτης ισινέ αφοσιωμέ σαρό κο κχερ κι Ντεβλέσκο ντα λέσκι υπηρεσία σικαβέλας ο πράγματα σο κα βακέρντιβενας πο σοράν. 6 Αλλά ο Χριστός σαρ Τσσαβό ι Ντεβλέσκο ισί αφοσιωμέ κι ευθύνη σο τθερέλα κο κχερ κι Ντεβλέσκο. Αμέν ισινάμ Λέσκο κχερ, άμα συνεχίνασα τι κεράς λάφι χωρίς τι νταράς ντα άμα ασταράσα ζουρανές ι ελπίδα σο ισαράσα-αμέν λάκε.
7 Οτθάρ, σαρ βακερέλα ο άγιος πνεύμας: «Ανταβά ντιβές,* άμα κα ασουνέν λέσκι φωνή, 8 μα τι αβέλ σουκό τουμαρό γκι σαρ ισινέ τουμαρέ παππουδένγκο, σο κερντέ-μαν τι χολιάναβ μπουτ κάνα δοκιμαντέ-μαν κι έρημος. 9 Βον δοκιμαντέ-μαν μπέτι τροπόσαρ, παρόλο σο ντικχένας 40 μπρεσά οντουλά σο κεράβας λένγκε. 10 Άκ’ σόσκε τζουνγκασάλομ ανταλέ τζενένταρ ντα βακερντόμ: “Πάντα κερένα σο-ντα μανγκέλα λένγκο γκι ντα να σικλιλέ μο ντρομ”. 11 Οτθάρ, αντρέ μι χολιάτε λιντόμ ι απόφαση μα τι τσσουβέν-πες ποτές κο τθαν σο ξεκουράντιβαβα».
12 Πφραλάλεν, τι προσοχίνεν μα τι τθερέλ ποτές καέκ τουμένταρ γκι σο ισί πφιρνικανό* ντα σο να τθερέλα πίστη επειδή τσσιντιντάς-πες ντουρ κατά τζουβντό Ντεβέλ. 13 Αλλά τι ντεν ζορ ο εκ ι γιαβερές κάθε ντιβές, καζόμ ατσσικιαρέλα «ανταβά ντιβές»,* ντα αντικάς καεκχέσκο γκι μα τι αβέλ σουκό κατά ζορ σο τθερέλα η αμαρτία τι χουχαβέλ. 14 Κα λας οντουβά σο λιντάς ο Χριστός σάντε άμα κα ασταράς ζουρανές μέχρι κο τέλος ι σιγουριά σο τθεράας κι αρχή. 15 Σαρ βακέρντιβελα: «Ανταβά ντιβές,* άμα κα ασουνέν λέσκι φωνή, μα τι αβέλ σουκό τουμαρό γκι σαρ ισινέ τουμαρέ παππουδένγκο, σο κερντέ-μαν τι χολιάναβ μπουτ».
16 Καλά τζενέ ασουντέ ντα όμως κερντέ-λες τι χολιάνελ μπουτ; Νανέ σαρέ οντουλά σο νικίστιλε κατά Αίγυπτος κάνα οδηγίνελας-λεν ο Μωυσής; 17 Ντα καλέ τζενένταρ τζουνγκάλας ο Ντεβέλ 40 μπρεσά; Να τζουνγκάλας οντουλένταρ σο αμαρτιντέ ντα μουλέ κι έρημος; 18 Ντα καλέ τζενένγκε λιντάς ι απόφαση μα τι τσσουβέν-πες ποτές κο τθαν σο ξεκουράντιβελα; Να λιντάς-λα οντουλένγκε σο να ντινέ καν; 19 Άρα, ντικχάσα ότι να μπορισάλε τι τσσουβέν-πες ανταλέ τθανέστε επειδή να τθερένας πίστη.