Ο Γράμμας σο Μπουτσσάντιλο κο Εβραίοι
7 Κάνα ο Αβραάμ μουνταρντάας ι βασιλιαδέν κο τζένγκι* ντα βουρτίνελας οτθάρ, ο Μελχισεδέκ, σο ισινέ βασιλιάς κι Σαλήμ ντα ιερέας ι Ντεβλέσκο σο Ισί Πο Οπρέ Σαριλένταρ, ντικχλάς-λες ντα ντινάς-λες ζαμ. 2 Ντα ο Αβραάμ ντινάς-λες χάνικ* σαρέ κατά πράγματα. Λέσκο ναβ, σο ισί Μελχισεδέκ, μανγκέλα τι βακερέλ «δίκαιος βασιλιάς», ντα ισινέ εμ βασιλιάς κι Σαλήμ, δηλαδή «βασιλιάς σο ανέλα ειρήνη». 3 Να τζανάσα κον ισινέ λέσκο ντατ ντα λέσκι ντάι, κατάρ αστάρντιβελα, κάνα μπιάντιλο ντα κάνα μουλό. Οτθάρ, ισί σαρ ο Τσσαβό ι Ντεβλέσκο ντα ατσσόλα ιερέας για πάντα.
4 Ντικχέν καζόμ σημαντικός ισινέ ανταβά τζενό σο λέστε ο Αβραάμ, αμαρό πάππους, ντινάς χάνικ* κατά πο λατσσέ πράγματα σο λιντάς κατά τζένγκι. 5 Ισί μπαγιά ότι, σαρ βακερέλα ο Νόμος, ο Λευίτες σο ισί ιερείς πρέπει τι λεν χάνικ πράγματα* κατά λαός, δηλαδή πουμαρέ πφραλένταρ, παρόλο σο βον-ντα ισί προσάγγονα ι Αβρααμίσκε. 6 Αλλά ανταβά τζενό σο να αστάρντιβελας κατά Λευίτες λιντάς χάνικ πράγματα* κατά Αβραάμ ντα ντινάς ζαμ οντουλέστε σο ντινάς πο λάφι ο Ντεβέλ τι ευλογίνελ-λες. 7 Σαρέ τζανένα ότι οντουβά σο ντέλα ζαμ εκχέ τζενέστε ισί πο μπαρό λέσταρ. 8 Ο Λευίτες σο λένα οντουλά χάνικ πράγματα* ισί τζενέ σο μερένα, αλλά η Γραφή βακερέλα ότι ο γιαβέρ τζενό σο λιντάς χάνικ πράγματα* τζουβντιόλα. 9 Ντα μπορίνασα τι βακεράς ότι ατζέ-ντα ο Λευί, σο λέλα οντουλά χάνικ πράγματα,* ντινάς-λεν βοβ-ντα αντράλ κατά Αβραάμ, 10 σόσκε κα μπιάντιβελας σαρ προσάγγονος πι παππούσκο πο σοράν κατά ντιβές σο ντικχλάς ο Μελχισεδέκ λέσκε παππούς.
11 Ο Νόμος σο ντιντιλό κο Ισραηλίτες βακερέλας ότι ο ιερείς έπρεπε τι αστάρντιβεν κατά Λευί. Άμα ο Λευίτες ιερείς κα μπορίνενας τι κερέν ι τζενέν τι αβέν τέλειοι, σόσκε τι χρειαζίντιβας εκχέ γιαβερέ ιερεάς σο ισί σαρ ο Μελχισεδέκ; Να ερεσέλα τι τθεράς εκχέ ιερεάς σο ισί σαρ ο Ααρών; 12 Άμα αλλάνελα η θέση ι ιερεάσκι, πρέπει τι αλλάνελ ο Νόμος-ντα. 13 Επειδή ο τζενό σο βακέρντιβενα λέσκε ανταλά πράγματα αβιλό γιαβερέ φαράταρ, ντα καέκ τζενό ανταλέ φαράταρ να υπηρετιντάς κο θυσιαστήριος. 14 Τζανάσα ότι αμαρό Κύριος αστάρντιβελας κατά Ιούδας, αλλά ο Μωυσής να βακερντάς ότι κα υπαρχίντιβενας ιερείς οντουλέ φαράταρ.
15 Ντα ανταβά αγαβάσα-λες ατζέ πο λατσσές σόσκε αβέλα εκ γιαβέρ ιερέας σο ισί σαρ ο Μελχισεδέκ. 16 Βοβ να αβιλό ιερέας επειδή αστάρντιβελα κατά φάρα σο βακερέλα ο Νόμος, αλλά επειδή τθερέλα ζορ σο ντέλα-λες εκ ζωή σο ναστί καταστραφίντιβελα. 17 Εκχέ εδαφιόστε βακερέλα: «Τούι ισινάν ιερέας σαρ ο Μελχισεδέκ ντα κα ατσσός για πάντα ιερέας».
18 Οτθάρ, η πουρανί εντολή κερντιόλα πέρα σόσκε ισί μπίζουρανι ντα να κερέλα καέκ λατσσιπέ. 19 Επειδή ο Νόμος να ισινέ για τι νασκιαρέλ ντιπ ι αμαρτία, αλλά ο Ντεβέλ ντινάς-αμέν εκ πο λατσσί ελπίδα, ντα αντράλ λάταρ αμέν τζάσα πασέ λέστε. 20 Ο Ντεβέλ ντινάς πο λάφι κο Ιησούς ότι κα κερέλας-λες ιερέας. 21 (Υπαρχίντιβενα μουρσά σο αβιλέ ιερείς χωρίς τι ντελ-λεν πο λάφι ο Ντεβέλ ότι κα αβέν ιερείς. Αλλά βοβ αβιλό ιερέας ντα ο Ντεβέλ ντινάς-λες πο λάφι κάνα βακερντάς: «Ο Ιεχωβά* ντινάς πο λάφι, ντα να κα λελ-λες παλάλ:* “Τούι ισινάν ιερέας ντα κα ατσσός για πάντα ιερέας”»). 22 Οτθάρ, ο Ντεβέλ ντινάς ι Ιησούς για τι σικαβέλ ότι σίγουρα κα νικιόλ μπαγιά εκ πο λατσσί συμφωνία. 23 Ντα ισινέ μπουτ οντουλά τζενέ σο αβιλέ ιερείς ο εκ σοράν κατά γιαβέρ, αλλά ναστί ατσσόνας ιερείς επειδή μερένας. 24 Όμως ο Ιησούς ατσσόλα τζουβντό για πάντα, οτθάρ να χρειαζίντιβελα τι αβέν γιαβερά ιερείς σοράν λέσταρ. 25 Οντουλέσκε-ντα, μπορίνελα μπαγιά τι σώνελ οντουλέν σο τζάνα πασέ κο Ντεβέλ αντράλ λέσταρ, σόσκε ισί πάντα τζουβντό για τι μολίνελ ι Ντεβλές τι βοηθίνελ-λεν.
26 Τθεράσα ανάγκη εκχέ ασακέ αρχιερεάς σο ισί αφοσιωμέ, νανέ γκεραλό,* να κερντάς καέκ μαγαριμέ πράγμας, νανέ σαρ ο αμαρτωλοί ντα ισί πο οπρέ κατά ουρανός. 27 Βοβ να χρειαζίντιβελα τι κερέλ θυσίες κάθε ντιβές, σαρ οντουλά αρχιερείς, πρώτα πιρέ αμαρτιένγκε ντα σοράν ι αμαρτιένγκε σο κερέλα ο λαός. Επειδή ανταβά κερντάς-λες εκ φαρ για πάντα κάνα ντινάς πο νεαυτός. 28 Οντουλά σο αβένα αρχιερείς σαρ βακερέλα ο Νόμος ισί τζενέ σο αμαρτίνενα. Αλλά σοράν κατά Νόμος, ο Ντεβέλ ντινάς πο λάφι ότι κα τσσουβέλας σαρ αρχιερέας πι Τσσαβές, σο αβιλό για πάντα ντιπ οντουβά σο μανγκέλα λέσταρ ο Ντεβέλ τι αβέλ.*