Ο Γράμμας σο Μπουτσσάντιλο κο Εβραίοι
10 Αφού ο Νόμος σικαβέλα καλά λατσσέ πράγματα* κα αβένας-πες, αλλά να σικαβέλα σαρ ισί μπαγιά ο πράγματα, να μπορίνελα* ποτές αντράλ κατά ίδιες θυσίες σο ντιντιόνα κάθε μπρες, τι κερέλ οντουλέν σο τζάνα πασέ κο Ντεβέλ τι αβέν τέλειοι. 2 Άμα ο θυσίες κα κερένας ι τζενέν τι αβέν τέλειοι, να κα χρειαζίντιβελας τι ντιντιόν γιαβερά-ντα θυσίες. Επειδή οντουλά σο ντένα άγια υπηρεσία κα αβένας πάκι ντα να κα συνεχίνενας τι τθερέν τύψεις πουμαρέ αμαρτιένγκε. 3 Οκιά μπάνταρ, ανταλά θυσίες ανένα κάθε μπρες κι τζενένγκι γκοντί ότι ισί αμαρτωλοί, 4 σόσκε ο ρατ γκουρουβένγκο ντα μπουσνιένγκο να αβέλα-πες τι νασκιαρέλ αμαρτίες.
5 Οτθάρ, κάνα βοβ αβέλα κο ντουνιάς, βακερέλα: «“Θυσίες ντα γιαβερά πράγματα να μανγκλάν τι ντιντιόν, αλλά ετοιμαντάν μάνγκε εκ σώμας. 6 Να κερντέ το γκι ο θυσίες σο πφαμπόνα σαστέ κι γιακ* ντα ο πράγματα σο ντιντιόνα ι αμαρτιένγκε”. 7 Ντα βακερντόμ: “Άκ’! Αβιλόμ. Κο βιβλίος* ισί γραμμέ μάνγκε. Ντέβλα, αβιλόμ τι κεράβ οντουβά σο μανγκέσα”». 8 Πρώτα βακερέλα: «Να μανγκλάν ντα να κερντέ το γκι ο θυσίες, ο γιαβερά πράγματα σο ντιντιόνα, ο θυσίες σο πφαμπόνα σαστέ κι γιακ ντα ο πράγματα σο ντιντιόνα ι αμαρτιένγκε». Ανταλά θυσίες ντιντιόνα αντικάς σαρ βακερέλα ο Νόμος. 9 Σοράν βακερέλα: «Άκ’! Αβιλόμ τι κεράβ οντουβά σο μανγκέσα». Βοβ νασκιαρέλα οντουλά σο βακερντάς πρώτα για τι τσσουβέλ οντουλά σο βακερντάς σοράν. 10 Αντικάς σαρ “μανγκέλα” ο Ντεβέλ αβιλάμ άγιοι αντράλ κατά Ιησούς Χριστός σο ντινάς πο σώμας εκ φαρ για πάντα.
11 Ντα κάθε ιερέας ντέλα άγια υπηρεσία κάθε ντιβές ντα ντέλα ο ίδιες θυσίες μπουτ φαρ. Ανταλά θυσίες να μπορίνενα ποτές τι νασκιαρέν ντιπ ο αμαρτίες. 12 Βοβ όμως ντινάς εκ θυσία ι αμαρτιένγκε σο ατσσόλα για πάντα ντα μπεσλό δεξιά κατά Ντεβέλ 13 ντα από αζομάν μπεκλεντίνελα μέχρι τι κερέλ-λες ο Ντεβέλ τι ισταβέλ πι ντουσμανίν* πι πιντρέντζαρ. 14 Βοβ ντινάς εκ θυσία ντα αντράλ λάταρ κερντάς οντουλέν σο αγιάντιβενα τι αβέν τέλειοι για πάντα. 15 Ο άγιος πνεύμας-ντα κερέλα-αμέν τι αβάς σίγουροι ανταλέσκε, σόσκε βακερντάς: 16 «“Ανταγιά ισί η συμφωνία σο κα κεράβ λέντζαρ σοράν οντουλέ ντιβεσένταρ”, βακερέλα ο Ιεχωβά.* “Κα τσσουβάβ μο νόμους λένγκε γκίστε, ντα λένγκε γκοντιάτε κα γραφίναβ-λεν”». 17 Σοράν βακερέλα: «Να κα νταβ-μαν γκοντί λένγκε αμαρτίες ντα ο γκεραλέ* πράγματα σο κερντέ». 18 Οτθέ σο υπαρχίντιβελα συγχώρηση, να χρειαζίντιβελα τι ντιντιόν πράγματα ι αμαρτιένγκε.
19 Οτθάρ, πφραλάλεν, αντράλ κατά ρατ ι Ιησούσκο μπορίνασα τι τζας χωρίς τι νταράς* κο άγιος τθαν εκχέ ντρομέσταρ 20 σο βοβ πουταρντάς αμένγκε κάνα γκιλό αντράλ κατά κουρτίνα, σο ισί λέσκο σώμας. Ανταβά ντρομ ισί νεβό ντα οδηγίνελα-αμέν κι ζωή. 21 Ντα τθεράσα εκχέ μπαρέ ιερεάς σο ισί υπεύθυνος κο κχερ κι Ντεβλέσκο. 22 Οτθάρ, τι τζας πασέ κο Ντεβέλ σαρέ αμαρέ γκίσαρ ντα τι αβάς πφερντέ πίστη ότι μπορίνασα τι κεράς-λες ανταβά, αφού εμ αμαρό γκι εμ αμαρί γκεραλί συνείδηση* καθαρισάλε ντα αμαρό σώμας τθοβντιλό πάκι πανίσαρ. 23 Μα τι τσσιναβάς τι κεράς λάφι κο τζενέ αμαρέ ελπιδάκε ντα τι αβάς σίγουροι λάκε, σόσκε οντουβά σο ντινάς πο λάφι ισί πιστός. 24 Τι σκεφτίνας ο εκ ι γιαβερές,* ντα αντικάς τι βοηθίνας ο εκ ι γιαβερές τι σικαβέλ αγάπη ντα τι κερέλ λατσσέ πράγματα. 25 Μα τι τσσιναβάς τι τζας κο συναθροίσεις, σαρ ισί σικλέ τι κερέν μερικοί, αλλά τι ντας ζορ ο εκ ι γιαβερές. Ντα καζόμ ερεσέλα ι Ντεβλέσκο ντιβές, τι κεράς-λεν ατζέ πο μπουτ σαρέ ανταλά.
26 Άμα αμαρτίνασα επίτηδες παρόλο σο σικλιλάμ ντιπ λατσσές ι αλήθεια, ναστί ντιντιόλα καέκ θυσία αμαρέ αμαρτιένγκε. 27 Αλλά μπεσάσα νταριάσαρ τι αβέλ η τιμωρία ντα η μπαρί χολί σο πφαμπόλα σαρ γιακ ντα σο κα καταστραφίνελ οντουλέν σο τζάνα κόντρα κο Ντεβέλ. 28 Κον να ντινάς καν κο Νόμος κι Μωυσίσκο, ντα ισί ντούι ή τριν μάρτυρες σο βακερένα-λες ανταβά, κα μερέλ χωρίς τι τζιτζίνεν λέσκε. 29 Άρα, αξίνελα τι λελ πο μπαρί τιμωρία ο τζενό σο κερντάς πέρα* ι Ντεβλέσκε Τσσαβές ντα σο πακιάλα ότι να τθερέλα μπαρί αξία ο ρατ ι συμφωνιάκο, σο λέσαρ αγιασάλο, ντα σο να σεβαντάς ιτς ο άγιος πνεύμας, σο αντράλ λέσταρ ο Ντεβέλ σικαβέλα μπαρό λατσσιπέ. 30 Αμέν τζανάσα Οντουλές σο βακερντάς: «Η εκδίκηση ισί μιρί. Με κα νταβ παλάλ κο τζενέ οντουλά σο κερντέ». Ισί γραμμέ ακαβά-ντα: «Ο Ιεχωβά* κα κρίνελ πι λαός». 31 Ισί μπαρί νταρ τι περέλ εκ τζενό κο βαστά κι τζουβντέ Ντεβλέσκε.
32 Όμως, μα μπιστρέν ότι, σοράν κατά φως σο λιντέν, νταϊντιντέν κο μπαρό αγώνας παρόλο σο τσσίντενας μπουτ. 33 Ισινέ φαρ σο πρασάνας-τουμέν ο τζενέ ντα κερένας-τουμέν τι τσσίντεν μπουτ ανγκλάλ κο γιαβερά,* ντα γιαβερά φαρ βοηθιντέν οντουλέν σο νακχλέ κάτι ασακό. 34 Σικαντέν ότι αγαβένα ι ντουκχ ι φυλακισμέ πφραλένγκι ντα να χασαρντέν τουμαρί χαρά κάνα ο γιαβερά λιντέ τουμαρέ πράγματα, σόσκε τζανένα ότι τουμέν τθερένα εκ τθαν σο ισί πο λατσσό ντα ατσσόλα για πάντα.
35 Οτθάρ, μα τσσιναβέν τι κερέν λάφι μπίνταρανες, σόσκε αντικάς κα λεν μπουτ ευλογίες. 36 Χρειαζίντιβελα τι κερέν υπομονή για τι λεν οντουβά σο ντινάς πο λάφι ο Ντεβέλ. Αλλά πρώτα πρέπει τι κερέν οντουβά σο μανγκέλα ο Ντεβέλ. 37 Επειδή «χάνικ ατζέ», ντα «οντουβά σο αβέλα κα ερεσέλ ντα να κα αργίνελ». 38 «Αλλά μο δίκαιος υπηρέτης κα τζουβντιόλ σόσκε τθερέλα πίστη», ντα «άμα κα κερέλ παλάλ, να κα κερέλ μο γκι».* 39 Αμέν όμως να ισινάμ οντουλένταρ σο κερένα παλάλ ντα καταστραφίντιβενα. Αλλά ισινάμ οντουλένταρ σο τθερένα πίστη ντα σώνενα πουμαρί ζωή.*