Πράξεις ι Αποστολόνγκε
10 Κι Καισάρεια ισινέ εκ τζενό ι ναβέσαρ Κορνήλιος. Βοβ κερέλας κουμάντος 100 τζενέν κατά ομάδα ι στρατόσκι σο βακέρντιβελας ιταλική.* 2 Βοβ πακιάλας κο Ντεβέλ ντα νταρέλας λέσταρ γιεκ σαρέ ι τζενέντζαρ σο ισινέ λέσκε κχερέστε ντα κερέλας μπουτ φαρ λατσσιπέ ι τσορορένγκε κο λαός ντα να τσσιναβέλας τι μολίνελ* ι Ντεβλές. 3 Πασέ 3:00 κο μεσημέρι,* ντικχλάς μπουτ λατσσές εκχέ φαντασιάτε εκχέ αγγελός ι Ντεβλέσκο τι αβέλ οτθέ σο ισινέ ντα τι βακερέλ: «Κορνήλιε!» 4 Ο Κορνήλιος ντικχλάς-λες νταριάσαρ ντα πουτσλάς: «Σο ισί, Κύριε;» Βοβ βακερντάς λέσκε: «Ο Ντεβέλ ασουντάς το προσευχές ντα ντικχλάς ο λατσσιπέ σο κερέσα ι τσορορένγκε, ντα να μπιστρέλα-λεν ανταλά. 5 Οτθάρ, μπούτσσαβ ακανά μουρσέν κι Ιόππη ντα ντε βίκος ι Σιμωνάς σο βακέρντιβελα Πέτρος. 6 Βοβ ισί μισαφίρι κο Σίμωνας σο λατσσαρέλα δέρματα ντα τθερέλα κχερ πασέ κι ντεριάβ». 7 Κάνα νασλό ο άγγελος σο κερντάς λέσαρ λάφι, βοβ ντινάς βίκος μπουτ σουγκό ντουέν πι υπηρετόνταρ ντα εκχέ στρατιωτής σο πακιάλας κο Ντεβέλ. 8 Βακερντάς λένγκε σαρέ οντουλά σο αβιλέας-πες ντα μπουτσσαντάς-λεν κι Ιόππη.
9 Ο γιαβέρ ντιβές, καζόμ βον ερεσένας πασέ κι πόλη, ο Πέτρος νικλιντάς κι νταράτσα, πασέ 12:00 κο μεσημέρι,* για τι προσευχίντιβελ. 10 Αλλά μποκχάλιλο μπουτ ντα μανγκέλας τι χαλ. Καζόμ κερένας ο χαμπέ, ντικχλάς εκχέ φαντασιάτε 11 ο ουρανός πουταρντό ντα κάτι σαρ μπαρό λινός σεντόνι τι αβέλ τελέ ντα τι γουλίλ οπράλ κι πφουβ, ασταρντό κατά σταρ γωνίες. 12 Αντρέ ανταλέστε ισινέ σαβέ τι μανγκές ζώα: εμ οντουλά σο τθερένα σταρ πιντρέ, εμ σαπά ντα σαπουρνιά εμ τσιρικλέ. 13 Αζομάν ασουντάς ακαλά λάφια: «Ίστι, Πέτρο, τσσιν ντα χα!» 14 Αλλά ο Πέτρος βακερντάς: «Να αβέλα-πες, Κύριε, σόσκε ποτές να χαλόμ κάτι μαγαριμέ ντα μελαλό». 15 Ντα ασουντάς πάλι τι βακέρντιβελ λέσκε, δεύτερη φαρ: «Μα βάκερ ότι ισί μαγαριμέ οντουλά σο κερντάς πάκι ο Ντεβέλ». 16 Ανταβά αβιλό-πες τρίτη-ντα φαρ, ντα αζομάν οντουβά σο ντικχλάς ο Πέτρος λιντιλό κο ουρανός.
17 Ο Πέτρος ατζέ σαστίνελας ντα να αγαβέλας σο μανγκέλας τι βακερέλ η φαντασία σο ντικχλάας. Αζομάν ο τζενέ σο μπουτσσαντάας ο Κορνήλιος πουτσλέ κατέ ισινέ ο κχερ ι Σιμωνάσκο ντα ατσσιλέ οτθέ, κι πόρτα. 18 Ντα ντινέ βίκος ντα πουτσλέ άμα ισινέ μισαφίρι οτθέ ο Σίμωνας σο βακέρντιβελας Πέτρος. 19 Καζόμ ο Πέτρος ανέλας πι γκοντιάτε ι φαντασία, ο πνεύμας βακερντάς: «Μανγκένα-τουτ τριν μουρσά. 20 Οτθάρ, ίστι, γούλι τελέ ντα τζα παλά-λέντε ντα μα τι σακιντίνες ιτς, σόσκε με μπουτσσαντόμ-λεν». 21 Αζομάν ο Πέτρος γουλίστιλο τελέ κο μουρσά ντα βακερντάς: «Με ισινόμ οντουβά σο ρόντενα. Σο μανγκένα;» 22 Βον βακερντέ: «Ο Κορνήλιος, εκ αρχηγός ι στρατόσκο, ισί δίκαιος, νταρέλα κατά Ντεβέλ ντα τθερέλα λατσσό ναβ σαρό κο λαός κι Ιουδαιόνγκο. Ο Ντεβέλ αντράλ εκχέ άγιε αγγελόσταρ βακερντάς λέσκε τι ντελ-τουτ βίκος πι κχερέστε ντα τι ασουνέλ σο τθερέσα τι βακερές». 23 Οτθάρ, βακερντάς λένγκε τι αβέν αντρέ ντα τι μπεσέν γιεκ λέσαρ οτθέ.
Ο γιαβέρ ντιβές ιστίντιλο ντα νασλό λέντζαρ, ντα γκιλέ παλά-λέστε πφραλά-ντα κατά Ιόππη. 24 Εκ ντιβές πο σοράν γκιλό κι Καισάρεια. Ο Κορνήλιος μπεσέλας λένγκε ντα ντινάας βίκος πι τζενέν ντα πι λατσσέ αμαλέν.* 25 Κάνα ερεσλό ο Πέτρος κο κχερ, ο Κορνήλιος νικίστιλο τι ντικχέλ-λες ντα πελό κοτσίντζαρ λέσκε πιντρέντε. 26 Αλλά ο Πέτρος βαντιντάς-λες ντα βακερντάς: «Ίστι, με-ντα τζενό ισινόμ». 27 Καζόμ κερέλας λάφι λέσαρ, γκιλό αντρέ ντα ντικχλάς μπουτέ τζενέν. 28 Ντα βακερντάς λένγκε: «Τζανένα λατσσές ότι τζάλα κόντρα κο Νόμος εκ Ιουδαίος άμα κερέλα παρέα τζενέντζαρ σο ισί γιαβερέ τθεμέσταρ ή αβέλα πασέ λέντε. Όμως, ο Ντεβέλ σικαντάς μάνγκε μα τι βακεράβ καεκχέ τζενέσκε μαγαριμέ ή μελαλό. 29 Οντουλέσκε-ντα, κάνα ντινέν-μαν βίκος, αβιλόμ χωρίς τι βακεράβ τίποτα. Οτθάρ, βακερέν μάνγκε σόσκε ντινέν-μαν βίκος».
30 Αζομάν ο Κορνήλιος βακερντάς: «Ανταλέ σαατίσταρ νακχλέ σταρ ντιβεσά οτθάρ μπερί σο προσευχίντιβαβας μι κχερέστε πασέ 3:00 κο μεσημέρι.* Ντιπ οντιά στιγμή ατσσιλό ανγκλά-μάντε εκ μουρς σο λένας-πες λέσκε σέα 31 ντα βακερντάς: “Κορνήλιε, ο Ντεβέλ ασουντάς τι προσευχή ντα να μπιστρέλα ο λατσσιπέ σο κερέσα ι τσορορένγκε. 32 Οτθάρ, μπούτσσαβ τζενέν κι Ιόππη ντα ντε βίκος ι Σιμωνάς σο βακέρντιβελα Πέτρος. Βοβ ισί μισαφίρι κο κχερ κι Σιμωνάσκο, σο λατσσαρέλα δέρματα, πασέ κι ντεριάβ”. 33 Οτθάρ, μπουτσσαντόμ σουγκό τζενέν ντα ντινόμ-τουτ βίκος, ντα λατσσές κερντάν σο αβιλάν. Ακανά ισινάμ σαρέ γκιντιμέ ατθέ ανγκλάλ κο Ντεβέλ για τι ασουνάς σαρέ οντουλά σο ντινάς-τουτ εντολή ο Ιεχωβά* τι βακερές».
34 Αζομάν ο Πέτρος βακερντάς: «Ακανά αγαβάβα μπαγιά ότι ο Ντεβέλ να ξεχωρίνελα ι τζενέν, 35 αλλά δεχτίνελα σαρέ κατά τθεμά οντουλέν σο νταρένα λέσταρ ντα κερένα ο σωστός. 36 Βοβ μπουτσσαντάς ο λάφι κο τσσαβέ κι Ισραηλίσκε για τι μουτθαβέλ λένγκε ο λατσσέ αμπέρια ότι κα αβέλ ειρήνη αντράλ κατά Ιησούς Χριστός. Βοβ ισί Κύριος σαριλένγκο. 37 Τουμέν τζανένα καλέ πραγμάσκε κερντιόλας λάφι κατά Γαλιλαία μέχρι σαρί κι Ιουδαία, οτθάρ μπερί σο ο Ιωάννης βακερέλας κο τζενέ τι μπολντιόν. 38 Κερντιόλας λάφι ι Ιησούσκε κατά Ναζαρέτ, ότι ο Ντεβέλ τραμπιντάς-λες άγιε πνευμάσαρ ντα ντινάς-λες ζορ. Ντα καζόμ τζάλας τθαν τθανέστε, βοβ κερέλας ο λατσσιπέ ντα σαστιαρέλας* σαρέ οντουλέν σο τσσίντενας μπουτ κατά Μπενγκ, σόσκε ο Ντεβέλ ισινέ λέσαρ. 39 Ντα αμέν ντικχλάμ σαρέ οντουλά σο κερντάς κο τθεμ κι Ιουδαιόνγκο ντα κι Ιερουσαλήμ. Αλλά ιμπλαντέ-λες κο κας* ντα μουνταρντέ-λες. 40 Ο Ντεβέλ όμως ιστικιαρντάς-λες κο τρίτος ντιβές ντα μουκχλάς ι τζενέν τι ντικχέν-λες. 41 Να μουκχλάς σαριλέν τι ντικχέν-λες, αλλά σάντε αμέν, σο χαλάμ ντα πιλάμ λέσαρ κάνα ιστίντιλο κατά μουλέ. Ο Ντεβέλ τραμπιντάς-αμέν πο τζανγκλέ για τι ντικχάς-λες ντα τι βακεράς λέσκε κο τζενέ. 42 Ατζέ, ντινάς-αμέν εντολή τι βακεράς ο λατσσέ αμπέρια κο τζενέ ντα τι μουτθαβάς λένγκε ντιπ λατσσές ότι λες τσσουντάς ο Ντεβέλ τι κρίνελ ι τζουβντέν ντα ι μουλέν. 43 Λέσκε βακερένα σαρέ ο προφήτες, ότι κον πακιάλα κο Ιησούς, λέσκε αμαρτίες συγχωρίντιβενα αντράλ λέσκε ναβέσταρ».
44 Καζόμ ο Πέτρος κερέλας ατζέ λάφι ανταλέ πραγματένγκε, ο άγιος πνεύμας αβιλό οπράλ σαρέ οντουλέντε σο ασουνένας ο λάφι. 45 Ντα ο πφραλά σο κερντέας περιτομή ντα αβιλέας ι Πετρόσαρ ατσσιλέ πουταρντέ μόσαρ, σόσκε ο δώρος ι άγιε πνευμάσκο ντιντιόλας εμ οντουλέντε σο ισινέ γιαβερέ τθεμένταρ. 46 Ντα ασουνένας-λεν τι κερέν λάφι γιαβερέ τσσιμπέντε ντα τι δοξάνεν ι Ντεβλές. Σοράν ο Πέτρος βακερντάς: 47 «Μπορίνελα καέκ τζενό τι τσσιναβέλ-λεν τι μπολντιόν κο πανί, αφού βον-ντα λιντέ ο άγιος πνεύμας σαρ αμέν;» 48 Αζομάν ντινάς-λεν εντολή τι μπολντιόν κο ναβ κι Ιησού Χριστόσκο. Σοράν μανγκλέ λέσταρ τι μπεσέλ μερικά ντιβεσά.