Ο Πρώτος Γράμμας σο Μπουτσσάντιλο κο Κορίνθιοι

16 Κάνα γκίντενα λοβέ για τι βοηθίνεν ι αγιόν, μπορίνενα τι κερέν ο οδηγίες σο ντινόμ κο κχανγκιριά κι Γαλατία. 2 Κο πρώτος ντιβές κι κάθε εβδομαδάκο, ο κάθε εκ τουμένταρ τι τσσουβέλ σο μπορίνελα κι νάκρη για μα τι γκιντίντιβεν ο λοβέ κάνα κα αβάβ. 3 Αλλά κάνα κα ερεσάβ οτθέ, κα μπουτσσαβάβ οντουλέν σο κα γραφίνεν μάνγκε τουμέν τουμαρέ γραμματέντε τι γκερέν κι Ιερουσαλήμ ο λοβέ σο ντένα σαρέ τουμαρέ γκίσαρ. 4 Όμως, άμα κα ντικχίντιβελ λατσσό τι τζαβ με-ντα οτθέ, κα τζαβ γιεκ λέντζαρ.

5 Αλλά κα αβάβ τουμέντε σοράν κατά Μακεδονία, σόσκε μανγκάβα τι νακχάβ κατά Μακεδονία. 6 Ντα μπορεί τι μπεσάβ χάνικ ή ατζέ-ντα σαρό ο βεν* τουμέντζαρ. Αντικάς, κάνα κα τζαβ οτθέ σο μανγκάβα, κα αβέν τουμέν-ντα παλά-μάντε μέχρι εκχέ τθανέστε. 7 Να μανγκάβα τι ντικχάβ-τουμέν σάντε για χάνικ, σόσκε μανγκάβα τι μπεσάβ-ντα χάνικ βακίτι τουμέντζαρ, άμα μανγκέλα ο Ιεχωβά.* 8 Αλλά κα μπεσάβ κι Έφεσος μέχρι κο Μπαρό Ντιβές, κι Πεντηκοστή, 9 σόσκε πουτάρντιλι μάνγκε μπαρί πόρτα για τι κεράβ πο μπουτ πράγματα κο έργος κι Κυριόσκο, αλλά μπουτ τζενέ τζάνα αμέντζαρ κόντρα.

10 Άμα όμως κα αβέλ ο Τιμόθεος, κερέν ο πο λατσσό για μα τι νταρέλ καεκχέ πραγμάσταρ καζόμ κα αβέλ τουμέντζαρ, σόσκε κερέλα ο έργος ι Ιεχωβάσκο,* σαρ με-ντα. 11 Οτθάρ, σαρέ τι σικαβέν λέσκε σεβασμός. Γκερέν-λες λατσσιμάσαρ μέχρι εκχέ τθανέστε για τι αβέλ ακατέ μάντε, σόσκε μπεσάβα λέσκε γιεκ ι πφραλέντζαρ.

12 Μολιντόμ αμαρέ πφραλές ι Απολλώς τι αβέλ τουμέντε γιεκ ι πφραλέντζαρ. Να τθερέλας πι γκοντιάτε τι αβέλ ακανά, αλλά κα αβέλ κάνα κα ντιντιόλ-λες η ευκαιρία.

13 Τι ατσσόν τζανγκαντέ, τι ατσσόν σταθεροί κι πίστη, τι αβέν μπίνταρανε, τι αβέν ζουρανέ. 14 Κερέν σαρέ ο πράγματα μανγκιμάσαρ.

15 Πφραλάλεν, τζανένα ότι οντουλά σο ισί κο κχερ σο τθερέλα ο Στεφανάς ισί ο πρώτοι* κι Αχαΐα σο πακιαντέ ντα ότι ντινέ πουμαρό νεαυτός για τι υπηρετίνεν ι αγιόν. 16 Βακεράβα τουμένγκε τι ντεν καν τουμέν-ντα ασακέ τζενέντε ντα σαρέ οντουλέντε σο μαρένα-πες τι υπηρετίνεν γιεκ λέντζαρ. 17 Αλλά χαιρίναβα σο ισί ακατέ μάντζαρ ο Στεφανάς, ο Φορτουνάτος ντα ο Αχαϊκός. Βον βοηθιντέ-μαν μπουτ, σόσκε τουμέν να ισινέν ακατέ. 18 Λοκχιαρντέ εμ μιρό εμ τουμαρό γκι.* Οτθάρ, τι σεβάνεν ασακέ μουρσέν.

19 Κερένα τουμένγκε σελιάμι* ο κχανγκιριά κι Ασία.* Ο Ακύλας ντα η Πρίσκα γιεκ ι κχανγκιριάσαρ σο ισί λένγκε κχερέστε κερένα τουμένγκε σελιάμι αντράλ πουμαρέ γκίσταρ σαρ μαθητές ι Κυριόσκε. 20 Κερένα τουμένγκε σελιάμι σαρέ ο πφραλά. Χαιρετίνεν ο εκ ι γιαβερές αντράλ τουμαρέ γκίσταρ.*

21 Με ο Παύλος γραφίναβα-λες τουμένγκε ανταβά μι βαστέσαρ για τι μπουτσσαβάβ τουμένγκε σελιάμι.

22 Άμα εκ τζενό να μανγκέλα ι Κυριός, τι τθερέλ αρμάν οπρά-πέστε. Κύριε, έλα! 23 Ο μπαρό λατσσιπέ ι Κυριόσκο, ι Ιησούσκο, τι αβέλ τουμέντζαρ. 24 Μπουτσσαβάβα μι αγάπη σαρέ τουμένγκε σο ισινέν ενωμέ ι Χριστόσαρ, ι Ιησούσαρ.