Ο Πρώτος Γράμμας σο Μπουτσσάντιλο κο Κορίνθιοι
14 Κερέν σο νακχέλα τουμαρέ βαστέσταρ για τι σικαβέν αγάπη, αλλά εμ-ντα για τι ντελ-τουμέν ο Ντεβέλ ικανότητες,* πο μπουτ όμως ι ικανότητα τι βακερέν προφητείες. 2 Ο τζενό σο κερέλα λάφι εκχέ τσσιμπάτε να κερέλα λάφι κο τζενέ αλλά κο Ντεβέλ, σόσκε να αγαβέλα-λες καέκ, αλλά βακερέλα γκεραντέ πράγματα* αντράλ κατά πνεύμας ι Ντεβλέσκο. 3 Όμως, οντουβά σο βακερέλα προφητείες ντέλα ζορ, βοηθίνελα ντα κοβλιαρέλα ι γιαβερένγκι ντουκχ* πι λαφίντζαρ. 4 Ο τζενό σο κερέλα λάφι εκχέ τσσιμπάτε ντέλα ζορ πι νεαυτόστε, αλλά οντουβά σο βακερέλα προφητείες ντέλα ζορ κι κχανγκιρί. 5 Κα μανγκάβας σαρέ τουμέν τι κερέν λάφι τσσιμπέντε, αλλά πο λατσσές τι βακερέν προφητείες. Ισί μπαγιά ότι οντουβά σο βακερέλα προφητείες ισί πο μπαρό οντουλέσταρ σο κερέλα λάφι τσσιμπέντε, εκτός άμα μεταφράνελα σο βακερένα ανταλά τσσιμπά για τι ντελ ζορ κι κχανγκιρί. 6 Πφραλάλεν, κα κεράβας τουμένγκε λατσσιπέ άμα κα αβάβας ντα κα κεράβας τουμένγκε λάφι τσσιμπέντε; Λατσσιπέ κα κεράβας τουμένγκε σάντε άμα κα βακεράβας λάφια σο σικαντάς μάνγκε ο Ντεβέλ ή κα βακεράβας πράγματα σο ναστί τζανένα ο γιαβερά ή κα βακεράβας προφητείες ή κα σικλιαράβας.
7 Ανταβά αβέλα-πες κάνα πφούντασα κι ντουρουλί ή κχελάσα άρπα.* Άμα ο νότες να τθερένα διαφορά, σαρ κα αγαβέλ εκ τζενό σο γκιλί ισί; 8 Άμα να κα ασούντιβελ σωστά η σάλπιγγα, κον κα ετοιμάνελ-πες τι τζαλ κο τζένγκι;* 9 Αντικάς τουμέν-ντα, άμα τουμαρέ λάφια ισί δύσκολος τι αγαβέλ-λεν εκ τζενό, σαρ κα τζανέλ σο βακέρντιβελα; Κα αβέλ σαρ τι κερένα λάφι κι μπαρμπάλ. 10 Ισί σαβέ τι μανγκές τσσιμπά κο ντουνιάς, όμως νανέ καέκ τσσιπ σο ναστί αγαβένα-λα ο τζενέ. 11 Άμα να αγαβάβα ι τσσιπ σο κερέλα λάφι εκ τζενό, κα αβάβ ξένος λέσκε, ντα οντουβά σο κερέλα λάφι κα αβέλ ξένος μάνγκε. 12 Αντικάς τουμέν-ντα, αφού μανγκένα μπουτ τι τθερέν ο ικανότητες σο αβένα κατά άγιος πνεύμας, μανγκέν τι ντιντιόν-τουμέν ικανότητες σο κα ντεν ζορ κι κχανγκιρί.
13 Οτθάρ, οντουβά σο κερέλα λάφι εκχέ τσσιμπάτε τι κερέλ προσευχή για τι μεταφράνελ σο βακερέλα οντιά τσσιπ. 14 Άμα κεράβα προσευχή εκχέ γιαβερέ τσσιμπάτε, η ικανότητα σο ντινάς-μαν ο άγιος πνεύμας ισί οντιά σο προσευχίντιβελα, αλλά μι γκοντί να κερέλα τίποτα. 15 Άρα, σο πρέπει τι αβέλ-πες; Κα κεράβ προσευχή αντράλ κατά ικανότητα σο ντινάς-μαν ο άγιος πνεύμας, αλλά κα κεράβ-λες ανταβά μι γκοντιάσαρ-ντα. Κα ισαράβ ι Ντεβλές γκιλίντζαρ αντράλ κατά ικανότητα σο ντινάς-μαν ο άγιος πνεύμας, αλλά κα κεράβ-λες ανταβά μι γκοντιάσαρ-ντα. 16 Άμα αντράλ κατά ικανότητα σο ντινάς-τουτ ο άγιος πνεύμας κερέσα προσευχή για τι βακερές ευχαριστώ κο Ντεβέλ ντα για τι ισαρές-λες, σαρ κα βακερέλ «Αμήν» ο τζενό σο ισί τουμέντζαρ, αφού να αγαβέλα σο βακερέσα; 17 Τούι κερέσα προσευχή για τι βακερές ευχαριστώ κο Ντεβέλ λατσσέ τροπόσαρ, ι γιαβερέσκε όμως να κερέλα λατσσιπέ. 18 Βακεράβα ευχαριστώ κο Ντεβέλ σο με κεράβα λάφι πο μπουτ τσσιμπέντε σαρέ τουμένταρ. 19 Αλλά εκχέ κχανγκιριάτε πο λατσσές τι βακεράβ παντς λάφια μι γκοντιάσαρ* για τι σικλιαράβ γιαβερέν, παρά ντες χιλιάδες λάφια εκχέ τσσιμπάτε.
20 Πφραλάλεν, μα τι αβέν σαρ χουρντέ τσσαβέ κο τρόπος σο σκεφτίνενα. Αλλά τι αβέν σαρ χουρντέ μαξίμια κο πράγματα σο τθερένα τι κερέν ι γκεραλιμάσαρ.* Τι αβέν σαρ μπαρέ τζενέ κο τρόπος σο σκεφτίνενα. 21 Κο Νόμος ισί γραμμέ: «“Κα κεράβ λάφι ανταλέ λαόστε τσσιμπέντε σο κερντιόνα λάφι κο γιαβερά τθεμά ντα λαφίντζαρ σο βακερένα ο ξένοι, αλλά ατζέ-ντα αζομάν να κα μανγκέλ τι ασουνέλ-μαν”, βακερέλα ο Ιεχωβά».* 22 Άρα, ο τσσιμπά νανέ σημάδι οντουλένγκε σο πακιάνα κο Ιησούς, αλλά οντουλένγκε σο να πακιάνα. Οκιά μπάνταρ, η προφητεία νανέ οντουλένγκε σο να πακιάνα κο Ιησούς, αλλά οντουλένγκε σο πακιάνα. 23 Άμα κα γκιντίντιβελ σαρί η κχανγκιρί ντα σαρέ κα κερέν λάφι τσσιμπέντε, αλλά κα αβέν αντρέ τζενέ σο ισί συνηθισμέ ή σο να πακιάνα κο Ιησούς, να κα βακερέν ότι χασαρντέν τουμαρί γκοντί; 24 Άμα όμως σαρέ τουμέν βακερένα προφητείες ντα κα αβέλ αντρέ εκ τζενό σο να πακιάλα κο Ιησούς ή σο ισί συνηθισμέ, τουμαρέ λάφια κα διορθώνεν-λες ντα κα κερέν-λες τι εξετάνελ λατσσές πο γκι. 25 Αζομάν οντουλά σο ισί γκεραντέ λέσκε γκίστε κα σικάντιβεν, ντα αντικάς κα περέλ τελέ μόσαρ, κα ντελ λατρεία κο Ντεβέλ ντα κα βακερέλ: «Ο Ντεβέλ ισί μπαγιά τουμέντζαρ».
26 Άρα, σο πρέπει τι αβέλ-πες, πφραλάλεν; Κάνα γκιντίντιβενα, εκ τζενό γκιλιαβέλα ι Ντεβλέσκε, εκ γιαβέρ σικλιαρέλα, εκ γιαβέρ βακερέλα λάφια σο σικαντάς λέσκε ο Ντεβέλ, εκ γιαβέρ κερέλα λάφι εκχέ τσσιμπάτε ντα εκ γιαβέρ μεταφράνελα σο βακερέλα οντιά τσσιπ. Σαρέ τι αβέν-πες για τι ντεν ζορ ο εκ ι γιαβερές. 27 Άμα μερικοί κερένα λάφι τσσιμπέντε, τι κερέν λάφι σάντε ντούι ή τριν τζενέ, ο εκ σοράν κατά γιαβέρ, ντα εκ τζενό πρέπει τι μεταφράνελ σο βακερένα. 28 Άμα νανέ καέκ τι μεταφράνελ, δεν πρέπει τι κερέν λάφι αντρέ κι κχανγκιρί, αλλά τι κερέν λάφι πουμαρέ νεαυτόστε ντα κο Ντεβέλ. 29 Τι κερέν λάφι ντούι ή τριν προφήτες, ντα ο γιαβερά τι προσπαθίνεν τι αγαβέν σο μανγκένα τι βακερέν. 30 Αλλά άμα εκ γιαβέρ τζενό τθερέλα τι βακερέλ λάφια σο σικαντάς λέσκε ο Ντεβέλ καζόμ μπεσέλα οτθέ, ο πρώτος τι τσσιναβέλ τι κερέλ λάφι. 31 Σαρέ τουμέν μπορίνενα τι βακερέν προφητείες ο εκ σοράν κατά γιαβέρ, για τι σικλιόν σαρέ ντα τι λεν ζορ σαρέ. 32 Ο προφήτες πρέπει τι χρησιμοποιήνεν σωστά ι ικανότητα σο ντινάς-λεν ο άγιος πνεύμας. 33 Επειδή ο Ντεβέλ κερέλα σαρέ ο πράγματα σειράσαρ ντα μανγκέλα ι ειρήνη.
Σαρ αβέλα-πες σαρέ κο κχανγκιριά κι αγιόνγκε, 34 ο τζουβλιά μα τι κερέν λάφι αντρέ κο κχανγκιριά, σόσκε δεν πρέπει τι κερέν λάφι. Αλλά τι ντεν καν, σαρ βακερέλα ο Νόμος-ντα. 35 Άμα μανγκένα τι σικλιόν κάτι, τι πουτσέν πουμαρέ ρομές κο κχερ, σόσκε ισί λατζ μπαρί τι κερέλ λάφι εκ τζουβέλ αντρέ κι κχανγκιρί.
36 Τουμένταρ αβιλό ι Ντεβλέσκο λάφι ή σάντε τουμέντε ερεσλό;
37 Άμα εκ τζενό πακιάλα ότι ισί προφήτης ή ότι τθερέλα ικανότητα κατά άγιος πνεύμας, πρέπει τι αγαβέλ ότι ανταλά σο γραφίναβα τουμένγκε ισί εντολή ι Κυριόσκι. 38 Αλλά άμα εκ τζενό κα κερέλ πέρα ανταγιά εντολή, βοβ-ντα κα κερντιόλ πέρα. 39 Οτθάρ, πφραλάλεν, κερέν σο νακχέλα τουμαρέ βαστέσταρ για τι βακερέν προφητείες, ντα μα τσσιναβέν καεκχές τι κερέλ λάφι γιαβερέ τσσιμπέντε. 40 Σαρέ ο πράγματα τι αβέν-πες σωστέ τροπόσαρ ντα σειράσαρ.