Τζανένας-λες;
Σαρ αγαβάσα ότι η Γραφή ισί σωστή κατά τούβλα σο αρακχλέ ο αρχαιολόγοι κι πουρανί Βαβυλώνα ντα κατά τρόπος σο ισινέ κερντέ;
Ο ΑΡΧΑΙΟΛΟΓΟΙ κι πουρανί Βαβυλώνα αρακχλέ μπερεκέτι τούβλα σο χρησιμοποιησάλε για τι κερντιόλ η πόλη. Σαρ βακερντάς ο αρχαιολόγος Ρόμπερτ Κολντεβέι, ασακέ τούβλα πεκιόνας κο καμίνια σο ισινέ «αβριάλ κατά πόλη, σο οτθέ ο πηλός ισινέ λατσσό ντα υπαρχίντιβενας μπερεκέτι θάμνοι σο χρησιμοποιήντιβενας για τι λεν-πες ο καμίνια».
Μερικά πουρανέ κείμενα σικαβένα ότι κάποιοι αξιωματικοί κι Βαβυλώνα χρησιμοποιήνενας πουμαρέ καμίνια για τι κερέν κάτι μπουτ μπέτι. Ο Πολ-Αλέν Μπολιέ, εκ καθηγητής κο Πανεπιστήμιος κο Τορόντος, βακερέλα: «Μπερεκέτι πουρανέ κείμενα κατά Βαβυλώνα . . . βακερένα ότι ο βασιλιάς ντινάς εντολή τι φουρτίντιβεν κο καμίνι για τι πφαμπόν οντουλά τζενέ σο να ντένας-λες καν ή να σικαβένας σεβασμός ι ντεβλένγκε σο τθερένας ο Βαβυλώνιοι». Για παράδειγμας, εκ κείμενος σο γραφίντιλο κάνα τζουβντιόλας ο βασιλιάς Ναβουχοδονόσορας βακερέλα: «Μουνταρέν-λεν, πφαμπαρέν-λεν, πεκέν-λεν, . . . κο φούρνος . . . κερέν-λεν τι νικαβέν μπουτ κάντος, φουρτίνεν-λεν κι γιακ».
Ανταβά ανέλα κι γκοντί κι τζενένγκι σο διαβάνενα ι Γραφή ο λάφια σο ισί κο Δανιήλ κεφάλαιος 3. Οτθέ διαβάνασα ότι ο βασιλιάς Ναβουχοδονόσορας κερντάς εκ μπουτ μπαρό χρυσός άγαλμας κι πεδιάδα Δουρά, αβριάλ κατά πόλη της Βαβυλώνας. Κάνα ο τριν τερνέ Εβραίοι, ο Σεδράχ, ο Μισάχ ντα ο Αβδενεγώ, να μανγκλέ τι προσκυνίνεν ο άγαλμας, ο Ναβουχοδονόσορας χολιασάλο μπουτ ντα ντινάς εντολή τι ταταρέν εκ καμίνι «εφτά φαρ πο μπουτ κατά γιαβερά φαρ» ντα «τι φουρτίνεν-λεν κι μπαρί γιακ». Εκ ζουρανό άγγελος σωντάς-λεν κατά μεριπέ.—Δαν. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Πεκό τούβλος σο τθερέλα οπράλ ο ναβ Ναβουχοδονόσορας
Ο τούβλα-ντα σο αρακχλέ κι Βαβυλώνα σικαβένα ότι η Γραφή ισί σωστή. Μπουτ κατά τούβλα ανταλά τθερένα οπράλ λάφια σο δοξάνενα ι βασιλιάς. Εκ ασακό λάφι βακερέλα: «Ναβουχοδονόσορας, βασιλιάς ι Βαβυλωνάκο . . . Ο παλάτι σο με, ο Μπαρό Βασιλιάς, χτιντόμ . . . Μακάρι μο προσάγγονα τι κυβερνίνεν λέστε για πάντα». Ανταβά λάφι μοιάζελα μπουτ ι λαφίσαρ σο ισί κο εδάφιος Δανιήλ 4:30, σο οτθέ ο Ναβουχοδονόσορας ισαρντάς-πες: «Νανέ ανταγιά η Βαβυλώνα η Μπαρί, σο λατσσαρντόμ με ι βασιλικέ κχερέσκε μι ζοριάσαρ ντα για τι δοξάντιβελ μο μπαρό ναβ;»