Ύμνοι Κατά Ντεβέλ σο Σικλιαρένα ντα Ντένα Παρηγοριά

ΚΟ ΠΙΟ μπαρό βιβλίος κι Γραφιάκο υπαρχίντιβενα ύμνοι ι Ντεβλέσκε. Νακχλέ περίπου 1.000 μπρεσά για τι γραφίντιβελ ανταβά βιβλίος. Ο βιβλίος Ψαλμοί τθερέλα αντρέ μερικά κατά πιο σουκάρ ντα συγκινητικά λάφια πίστης σο γραφισάλεας ποτές. Σικαβέλα σαρ αισθάντιβενα μπουτ φαρ ο τζενέ, σαρ για παράδειγμας όταν τθερένα χαρά, όταν δοξάνενα ντα ευχαριστίνενα ι Ντεβλές, όταν τθερένα στεναχώρια ντα όταν μετανιώνενα. Ανταλέσταρ αγαβάσα ότι οντουλά σο νικαβένας ο ύμνοι τθερένας εκ μπουτ λατσσί φιλία ι Ντεβλέσαρ ντα τθερένας εμπιστοσύνη λέστε. Ντικχέν πιο τελέ μερικά θέματα σο τθερένα ανταλά ύμνοι.

Ο Ιεχωβά ισί Οντουβά σο τθερέλα ο δικαίωμας τι κερέλ κουμάντος, ντα αξίνελα τι ντας-λες λατρεία ντα δόξα. Κο εδάφιος Ψαλμός 83:​18 διαβάνασα: «Τούι, σο βακερένα τούκε Ιεχωβά, ισινάν ο πιο Μπαρό σαρί κι πφουβ». Μπουτ ύμνοι σο αρακχάσα κο βιβλίος Ψαλμοί δοξάνενα ι Ιεχωβάς ι πραγματένγκε σο κερντάς, σαρ ισί για παράδειγμας ο σουκάρ πράγματα κι πφουβ σο τθερένα ζωή, ο ουρανός σο ισί πφερντό αστέρια, ντα ο σουκάρ τρόπος σο λατσσαρντάς αμαρό σώμας. (Ψαλμοί 8, 19, 139, 148) Γιαβερά ύμνοι δοξάνενα ι Ιεχωβάς επειδή σώνελα ντα αρακχαβέλα πι πιστέ υπηρετόν. (Ψαλμοί 18, 97, 138) Επίσης, γιαβερά ύμνοι βακερένα ότι ο Ιεχωβά ισί δίκαιος Ντεβέλ, σο κοβλιαρέλα ι ντουκχ ι ταλαιπωριμέ τζενένγκι ντα τιμωρίνελα ι πφιρνέν.​—Ψαλμοί 11, 68, 146.

Ο Ιεχωβά βοηθίνελα ντα παρηγορίνελα οντουλέ τζενέν σο μανγκένα-λες. Ο πιο γνωστός ψαλμός μπορεί τι ισί ο 23, σο οτθέ ο Δαβίδ βακερέλα ότι ο Ιεχωβά ισί σαρ εκ λατσσό Τσομπάνης σο οδηγίνελα, αρακχαβέλα ντα περιποιήνελα πι μπρακέν. Ο εδάφιος Ψαλμός 65:2 βακερέλα κο υπηρέτες κι Ντεβλέσκε ότι ο Ιεχωβά ισί “Οντουβά σο ασουνέλα προσευχή”. Μπουτ τζενέ σο κερντέ μπαρέ αμαρτίες λιντέ μπουτ κουράγιος κατά λάφια σο ισί κο Ψαλμοί 39 ντα 51. Οτθέ ο Δαβίδ βακερέλα αντράλ πι γκίσταρ ότι μετανιωσάλο για κάποια μπαρέ λάθη σο κερντάς ντα ότι ισινέ σίγουρος ότι ο Ιεχωβά κα συγχωρίνελας-λες. Ο εδάφιος Ψαλμός 55:​22 βακερέλα ότι ισί λατσσό τι τθεράς εμπιστοσύνη κο Ιεχωβά ντα τι μουκχάς οπρά-λέστε σο-ντα βάρος τθεράσα.

Ο Ιεχωβά κα αλλάνελ ι ντουνιάς όταν κα ανέλ ι Βασιλεία ι Χριστόσκι. Μπουτ εδάφια σο ισί κο Ψαλμοί τθερένα τι κερέν οντουλέσαρ σο βακερντάας ο Ιεχωβά ότι κα αβέλας Βασιλιάς, δηλαδή με τον Χριστό. Ο Ψαλμός 2 βακερέλα ότι οντουβά Άρχοντας κα καταστραφίνελ ο πφιρνέ τθεμά σο τζάνα λέσαρ κόντρα. Ο Ψαλμός 72 σικαβέλα ότι οντουβά Βασιλιάς κα εξαφανίνελ ι μποκχ, ι αδικία ντα οντουλέ τζενέν σο ταλαιπωρίνενα ι γιαβερέν. Σαρ βακερέλα ο εδάφιος Ψαλμός 46:9, όταν κα κυβερνίνελ η Βασιλεία ι Χριστόσκι, ο Ντεβέλ κα τσσουβέλ τέλος κο τζένγκια ντα κα καταστραφίνελ σαρέ ο όπλα. Κο Ψαλμός 37 διαβάνασα ότι ο πφιρνέ κα εξαφανίντιβεν, αλλά ο δίκαιοι κα τζουβντιόν για πάντα ντα σαρέ γιεκ κα απολαμβάνεν ι ειρήνη σο κα αβέλ κι πφουβ.

​—Στηρίντιβελα κο βιβλίος Ψαλμοί.