ΜΑΘΗΜΑΣ 20
Μουνταρένα ι Ιησού Χριστός
Ο Ιησούς βακερέλα τι κερέν εκ νεβί γιορτή. Προδόνενα-λες ντα καρφώνενα-λες κο κας
ΑΦΟΥ νακχλέ τρισήμισι μπρεσά από αζομάν σο αρχισάλο τι σικλιαρέλ ι τζενέν ντα τι βακερέλ λένγκε ο λατσσέ αμπέρια, ο Ιησούς τζανέλας ότι κα τελειώνελας ο καιρός σο μπεσέλας κι πφουβ. Ο Ιουδαίοι παπάζια συνεννοήντιβενας για τι μουνταρέν-λες, αλλά νταρένας σόσκε ο λαός αμντίνελας ότι ο Ιησούς ισινέ προφήτης. Ενώ αβέλας-πες ανταβά, ο Σατανάς τσσουντάς τον Ιούδα τον Ισκαριώτη, σο ισινέ εκ κατά 12 απόστολοι ι Ιησούσκε, τι αβέλ προδότης. Ο παπάζια ντινέ-λες 30 ασημένια νομίσματα για τι προδόνελ ι Ιησούς.
Ι τελευταία ιράτ πριν τι μερέλ, ο Ιησούς ντα λέσκε απόστολοι γκιντισάλε για τι κερέν ο Πάσχας. Αφού παλντιντάς τον Ιούδα, βακερντάς πι μαθητένγκε τι κερέν εκ νεβί γιορτή, ο Δείπνος του Κυρίου. Λιντάς εκ μαντρό, κερντάς εκ προσευχή ντα ντινάς ο μαντρό κο 11 απόστολοι σο ατσσιλέας λέσαρ. Βακερντάς λένγκε: «Ανταβά ισί σαρ μο σώμας, σο κα ντιντιόλ τουμένγκε. Συνεχίνεν τι κερέν-λες ανταβά για τι ντεν-τουμέν γκοντί μαν». Κερντάς ο ίδιος πράγμας με εκ ποτήρι μολ ντα βακερντάς: «Ανταβά ποτήρι μανγκέλα τι σικαβέλ ι νεβί συμφωνία σο βασίντιβελα μι ρατέστε».—Λουκάς 22:19, 20.
Οντιά ιράτ ο Ιησούς τθερέλας τι βακερέλ μπουτ πράγματα πι αποστολένγκε. Ντινάς-λεν εκ νεβί εντολή—τι μανγκέν ο εκ ι γιαβερές χωρίς τι ντικχέν πουμαρό συμφέρον. Βακερντάς λένγκε: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε». (Ιωάννης 13:34, 35) Βακερντάς λένγκε μα τι νταρέλ λένγκο γκι οντουλέ πραγματένταρ σο κα αβένας-πες. Ο Ιησούς προσευχίντιλο λένγκε αντράλ πι γκίσταρ. Βακερντέ ύμνους γιεκ ντα νικίστιλε αβρί ιράτ.
Κο κήπος της Γεθσημανή, ο Ιησούς προσευχισάλο κοτσέντζαρ αντράλ πι γκίσταρ. Χάνικ πιο σοράν, μερικοί στρατιώτες, παπάζια ντα γιαβερά τζενέ αβιλέ τι ασταρέν-λες. Ο Ιούδας, για τι σικαβέλ κον ισί ο Ιησούς, γκιλό ντα τσσουμιντάς-λες. Ενώ ο στρατιώτες πφάντενας ι Ιησούς, ο απόστολοι τθαβντισάλε ντα νασλέ.
Ανγκλάλ κο πιο μπαρό δικαστήριος σο ισινέ κο τθεμ της Ιουδαίας, ο Ιησούς βακερντάς ότι βοβ ισινέ ο Τσσαβό ι Ντεβλέσκο. Ο δικαστές κατηγοριντέ-λες ότι πι λαφίντζαρ προσβαλιντάς ι Ντεβλές, ντα οτθάρ λιντέ ι απόφαση τι μερέλ. Σοράν, γκερντέ ι Ιησούς κο Ρωμαίος Κυβερνήτης Πόντιος Πιλάτος. Παρόλο σο ο Πιλάτος αγαντάς ότι ο Ιησούς να κερντάας τίποτα κακός, μουκχλάς τι λεν-λες ο τζενέ σο μανγκένας τι μουνταρέν-λες.
Ι Ιησούς γκερντέ-λες κο Γολγοθάς ντα οτθέ ο Ρωμαίοι στρατιώτες καρφωντέ-λες εκχέ καστέστε. Ενώ ισινέ μεσημέρι, αβιλό θαύμας ντα πελό καρανίκι. Χάνικ πιο σοράν κο απόγευμας, ο Ιησούς μουλό, ντα αβιλό μπαρό σεισμός. Λέσκο σώμας τσσουντέ-λες σε εκ μεζάρι σο ισινέ αντρέ σε εκ σπηλιά. Ο γιαβέρ ντιβές, ο παπάζια πφαντέ ο μεζάρι ντα τσσουντέ ανγκλάλ τζενέν για τι αρακχαβέν-λες. Κα ατσσόλας ο Ιησούς αντρέ οντουλέ μεζαρίστε; Όχι. Ατζεχάνικ κα αβέλας ο πιο μπαρό θαύμας σο αβιλόας-πες ποτές.
—Στηρίντιβελα κο βιβλία Ματθαίος, κεφάλαια 26 ντα 27, Μάρκος, κεφάλαια 14 ντα 15, Λουκάς, κεφάλαια 22 ντα 23, ντα Ιωάννης, κεφάλαια 12 μέχρι 19.
a Για τι ντικχές σαρ ο μεριπέ ι Ιησούσκο ισί εκ θυσία σο τθερέλα μπαρί αξία, ντικχ ο βιβλίος Σο Μπορίνελα τι Σικλιαρέλ-αμέν η Αγία Γραφή;, κεφάλαιος 5.