Ακανά Νιωθίναβα ότι Μπορίναβα τι Βοηθίναβ Γιαβερέν

ΣΟ ΤΖΕΝΟ ΙΣΙΝΟΜΑΣ ΑΝΓΚΛΕ:

Μπιάντιλομ κι Άκουλ, εκ χουρντί πόλη πασέ κι ντεριάβ δυτικά κι Γουατεμάλα. Μι φαμιλί ισί Ιξίλ, εκ φάρα σο αστάρντιβελα κατά Μάγιας. Κεράβας λάφι εμ ι τσσιπ μι φαράκι εμ ισπανικά. Τζουβντιάβας άγριε μπρεσέντε σόσκε για 36 μπρεσά αβέλας-πες εμφύλιος τζένγκι κι Γουατεμάλα. Οντουβά βακίτι μουλέ μπουτ τζενέ κατά φάρα Ιξίλ.

Κάνα ισινόμας σταρέ μπρεσένγκο, μο πφραλ σο ισινέ εφτά μπρεσένγκο, κχελέλας πέσκε εκχέ χειροβομβιδάσαρ σο κατά λάθος πφαράντιλι λέσκε βαστέντε. Με ατσσιλόμ κορορό ντα μο πφραλ μουλό. Αζομάν τσσουντέ-μαν εκχέ ιδρυμάστε κι Πόλη Γουατεμάλα κορορέ τσσαβένγκε, οτθέ μπαριλόμ ντα σικλιλόμ ι Μπράιγ, ι τσσιπ ι κορορένγκε. Να τζανάβα σόσκε, αλλά ο τζενέ σο κερένας μπουτί οτθέ τσσιναβένας-μαν τι κεράβ λάφι ι γιαβερέ τσσαβέντζαρ, ντα μο συμμαθητές να μανγκένας τι κερέν μάντζαρ παρέα. Ισινόμας συνέχεια κορκορό ντα μπεσάβας σαρ σαρ ο ντούι μασεκά κο μπρες σο μπορίναβας τι τζαβ κχερέ ντα τι αβάβ μι νταγιάσαρ, σο βόι πφαμπόλας μάνγκε μπουτ ντα σικαβέλας μάνγκε λατσσιπέ. Δυστυχώς, μι ντάι μουλί κάνα ισινόμας ντεσέ μπρεσένγκο. Χασαρντόμας ι μοναδικέ τζενές ανταλέ ντουνιάστε σο μανγκέλας-μαν, ισινόμας μπουτ στεναχωριμέ ντα καέκ ναστί κερέλας-μαν λατσσές.

Κάνα ισινόμας 11 μπρεσένγκο, βουρτισάλομ μι τθεμέστε ντα τζουβντιάβας μι μιλαδελφόσαρ ντα λέσκε φαμιλιάσαρ. Βον ντένας-μαν ο αναγκαία για τι τζουβντιάβ, όμως καέκ να μπορίνελας τι λοκχιαρέλ μο γκι. Μπουτ φαρ ντάβας βίκος ντουκχάσαρ κο Ντεβέλ: «Σόσκε μουλί μι ντάι; Σόσκε ατσσιλόμ κορορό;» Μερικά τζενέ βακερένας μάνγκε ότι ανταβά αβιλό-πες επειδή ο Ντεβέλ μανγκλάς-λες. Αντικάς, πακιάβας ότι ο Ντεβέλ ισί γκεραλό ντα άδικος. Μανγκάβας τι μεράβ, αλλά επειδή να αρακχάβας τρόπος τι μουνταράβ-μαν, να κερντόμ-λες.

Επειδή ισινόμας κορορό ανταβά τθερέλας-μαν κερντό τι αβάβ μπίζουρανο εμ μι σωμάστε εμ ψυχολογικά. Κανά ισινόμας χουρντό, κερντέ μάνγκε μπουτ φαρ λουμνικανέ πράγματα. Να βακερντόμ-λες ανταβά κο ασκέρια σόσκε πακιάβας ότι να κα χάλας καεκχές ανάγκη ανταλέσκε. Ο τζενέ να κερένας μάντζαρ λάφι ντα οτθάρ να κεράβας λάφι καεκχέσαρ. Ισινόμας κορκορό, πφερντό κατάθλιψη ντα να ντάβας μπέσα καεκχές.

ΣΑΡ ΑΛΛΑΝΤΑΣ ΜΙ ΖΩΗ Η ΑΓΙΑ ΓΡΑΦΗ:

Κάνα ισινόμας κι εφηβεία, ντούι Μάρτυρες ι Ιεχωβάσκε (εκ αντρόγυνος) αβιλέ πασέ μάντε κάνα τθεράβας διάλειμμας κο σχολείος. Εκ δασκάλα, σο πφαμπόλας μάνγκε επειδή ισινόμας κορορό, βακερντάς λένγκε τι αβέν μάντε. Βακερντέ μάνγκε για την ελπίδα σο ντέλα η Γραφή ότι ο μουλέ κα τζουβντιόν πάλι ντα ότι εκ ντιβές ο κορορέ κα ντικχέν. (Ησαΐας 35:5· Ιωάννης 5:​28, 29) Μπεϊντίναβας σαρέ οντουλά σο σικλιαρένας-μαν, αλλά επειδή να ισινόμας σικλό τι κεράβ λάφι ισινέ μάνγκε πφαρό τι συζητίναβ λέντζαρ. Παρόλο σο ισινόμας πφαντό μι νεαυτόστε, βον κερένας υπομονή ντα να τσσιναντέ τι αβέν μάντε ντα τι σικαβέν μάνγκε λατσσιπέ για τι σικλιαρέν-μαν κατά Γραφή. Ανταβά αντρόγυνος νακχέλας εκχέ βεσέσταρ ντα πφιρέλας ντες ντα πο μπουτ χιλιόμετρα για τι ερεσέλ μι κχερέστε.

Μο μιλάδελφος βακερντάς μάνγκε ότι ισινέ μπουτ σουκάρ ιριαντέ αλλά ντικχίντιβενας τσορορέ. Ανταβά να τσσιναβέλας-λεν τι σικαβέν μάνγκε μανγκιπέ ντα τι ανέν μάνγκε χουρντέ δώρα. Πακιάβας ότι σάντε ο αληθινοί Χριστιανοί κα μπορίνενας τι σικαβέν ασακό μανγκιπέ.

Κεράβας μελέτη κατά έντυπα Μπράιγ. Μι γκοντιάσαρ αγαβάβας σαρέ οντουλά σο σικλιάβας, αλλά αντρέ μι γκίστε ναστί πακιάβας μερικά πράγματα. Για παράδειγμας, να πακιάβας ότι ο Ντεβέλ πφαμπόλα μάνγκε προσωπικά ντα ότι ισί γιαβερά-ντα τζενέ σο κα πφαμπόν μάνγκε σαρ βοβ. Αγαβάβας σόσκε ο Ιεχωβά μουκχέλα ο γκεραλιπέ ανταλέ ντουνιάστε, αλλά ισινέ μάνγκε δύσκολος τι ντικχάβ ι Ντεβλές σαρ εκ λατσσό Ντατ.a

Χάνικ χάνικ, οντουλά σο σικλιάβας κατά Γραφή, βοηθιντέ-μαν τι αλλάναβ ανταβά σο πακιάβας. Για παράδειγμας, σικλιλόμ ότι ο Ντεβέλ πφαμπόλα μπουτ ι τζενένγκε σο τσσίντενα βάσανα. Ντα ατζέ πο μπουτ πι υπηρετόνγκε, οτθάρ βακερντάς πι λαόσκε σο τσσιντικιαρένας-λες ο γιαβερά: «Ντικχλόμ σο τσσίντελα μο λαός . . . Τζανάβα λατσσές σο τσσίντενα». (Έξοδος 3:7) Κάνα εκτιμιντόμ ο λατσσέ ιδιότητες ι Ιεχωβάσκε, ανταβά τσσιντιντάς-μαν τι αφιερώναβ μι ζωή λέστε. Κο 1998, μπολντιλόμ σαρ Μάρτυρας ι Ιεχωβάσκο.

Εκ μπρες σοράν μι μπολντιμάσταρ, νακχλόμ μερικά μαθήματα σο σικλιαρένας ι Μπράιγ πασέ κο τθεμ Εσκουίντλα. Εκ πρεσβύτερος οντουλέ κχανγκιριάταρ αγαντάς ότι ισινέ μάνγκε δύσκολος τι αβάβ κο συναθροίσεις σο κερντιόνας κι Εσκουίντλα καζόμ τζουβντιάβας οτθέ σο μπιάντιλομ, επειδή ισινέας ντουρ. Η κχανγκιρί σο ισινέ πο πασέ, ισινέ κι γιαβέρ μπάντα ι βεσέσκε σο νακχέλας-λες ο αντρόγυνος σο κερέλας-μαν μελέτη. Ανταβά ντρομ ισινέ δύσκολος μάνγκε. Για τι βοηθίνελ-μαν, ανταβά πρεσβύτερος αρακχλάς εκ φαμιλί πφραλένγκι σο μπεσένας κι Εσκουίντλα ντα μανγκένας τι μπεσάβ γιεκ λέντζαρ για τι μπορίναβ τι τζαβ κο συναθροίσεις. Μέχρι αντιβές, ανταγιά φαμιλί ντικχέλα-μαν ντα αρακχαβέλα-μαν σαρ τι ισινόμας λένγκο τσσαβό.

Κα μπορίναβας τι βακεράβ μπουτ παραδείγματα σο σικαβένα καζόμ μπουτ μανγκένα-μαν ο πφραλά κι κχανγκιρί. Σαρέ ανταλά παραδείγματα κερένα-μαν τι αβάβ σίγουρος ότι ισινόμ κι αληθινή θρησκεία, ισινόμ γιεκ αληθινέ Χριστιανόντζαρ.​—Ιωάννης 13:34, 35.

ΣΟ ΛΑΤΣΣΙΠΕ ΝΤΙΚΧΛΟΜ ΜΙ ΖΩΓΙΑΤΕ:

Ακανά να νιωθίναβα άχρηστος ντα απελπισμέ. Ακανά τζανάβα σόσκε τζουβντιάβα. Σαρ σκαπανέας ακανά να ντάβα μπουτ σημασία μι προβλημάστε, αλλά ο πο σημαντικός πράγμας μάνγκε ισί τι κεράβ ο έργος σο κερένα ο Μάρτυρες ι Ιεχωβάσκε, τι βακεράβ ντα τι σικλιαράβ ο λατσσέ αμπέρια κο γιαβερά τζενέ. Επίσης, τθεράβα ο προνόμιος τι αβάβ πρεσβύτερος ντα τι κεράβ ομιλίες αντράλ κατά Γραφή κο κχανγκιριά σο ισί μι περιοχιάτε αλλά κο περιφερειακές συνελεύσεις-ντα ανγκλάλ μπουτέ τζενέντε.

Κο 2010, νακχλόμ ι Σχολή Διακονικής Εκπαίδευσης (σο ακανά βακέρντιβελα Σχολή για Ευαγγελιστές της Βασιλείας) σο αβιλί κο Ελ Σαλβαδόρ. Ανταγιά σχολή βοηθιντάς-μαν τι κεράβ πο λατσσές σαρέ ο μπουτιά σο τθεράβα κι κχανγκιρί. Αντράλ κατά σικλιαριπέ ανταβά αγαντόμ μπουτ λατσσές καζόμ μπουτ πφαμπόλα μάνγκε ντα μανγκέλα-μαν ο Ιεχωβά, Οντουβά σο μπορίνελα τι ντελ εκχέ τζενέστε ο ικανότητες σο χρειαζίντιβελα για τι κερέλ λέσκο έργος.

Ο Ιησούς βακερντάς: «Ισί πο ευτυχισμέ εκ τζενό κάνα ντέλα παρά κάνα λέλα». (Πράξεις 20:35) Αντιβές, μπορίναβα τι βακεράβ ότι ισινόμ ευτυχισμέ, ντα νιωθίναβα ότι μπορίναβα τι βοηθίναβ γιαβερέ τζενέν, κάτι σο να νακχλόας ποτές μι γκοντιάταρ.