Κοβλιαράσα ι Ντουκχ Οντουλένγκι σο Κερντέ Λένγκε Λουμνικανέ Πράγματα (Μέρος 4 κατά 4)

1, 2. (α) Καβά παράδειγμας σικαβέλα ότι ο τζενέ χρειαζίντιβενα τι κοβλιαρέν λένγκι ντουκχ ντα ότι μπορίνενα τι κοβλιαρέν βον-ντα ι γιαβερένγκι ντουκχ; (β) Σο ανέλα μπουτ μπαρί ντουκχ μερικέ τσσαβένγκε;

ΣΑΡΕ ο τζενέ χρειαζίντιβενα τι κοβλιαρέν λένγκι ντουκχ ντα μπορίνενα τι κοβλιαρέν βον-ντα ι γιαβερένγκι ντουκχ. Για παράδειγμας, άμα εκ τσσαβό σο κχελέλα πέσκε κα περέλ ντα κα ντελ-πες κι κοτς, μπορεί τι τθάβντελ ροϊμάσαρ πι νταγιάτε ή πι νταντέστε. Ο ντατ ντα η ντάι ναστί κερένα λατσσές ο ντιπέ, αλλά μπορίνενα τι κοβλιαρέν ι ντουκχ ι τσσαβέσκι. Κα πουτσέν-λες σο αβιλό-πες, κα κοσέν λέσκε δάκρυα, κα κερέν λέσαρ λάφι γκουλντές, κα γαλίνεν-λες ντα μπορεί ατζέ-ντα τι τσσουβέν λέσκε χάνικ αλοιφή ή τι πφάντεν λέσκι κοτς. Χάνικ πιο σοράν, ο τσσαβό κα τσσιναβέλ ο ροϊπέ ντα μπορεί τι κχελέλ πέσκε πάλι. Καζόμ κα νακχέλ ο καιρός, ο ντιπέ κα αβέλ λατσσές.

² Γιαβερά πράγματα όμως ανένα μπουτ πιο μπαρί ντουκχ ι τσσαβένγκε. Μερικέ τσσαβένγκε κερένα λένγκε λουμνικανέ πράγματα. Ανταβά μπορεί τι αβέλ-πες σάντε εκ φαρ ή τι ατσσικιαρέλ μπουτ μπρεσά. Σο-ντα τι αβέλ, η κακοποίηση μουκχέλα μπαρί ντουκχ λένγκε γκίστε. Ισί φαρ σο ασταρένα ντα τιμωρίνενα οντουλέν σο κερντέ ανταβά μπέτι πράγμας. Γιαβερά φαρ όμως ντικχίντιβελα ότι να τιμωρίντιβενα. Αλλά τι τιμωρίντιβεν-ντα, ο τσσαβό μπορεί τι τθερέλ ντουκχ αντρέ πι γκίστε ατζέ-ντα κο μπάριπε.

3. Σο μανγκέλα ο Ιεχωβά σαρ βακερένα ο εδάφια 2 Κορινθίους 1:3, 4, ντα καλά ερωτήσεις κα ντικχάς;

³ Άμα εκ Χριστιανός σο κερντέ λέσκε λουμνικανέ πράγματα κάνα ισινέ χουρντό τθερέλα ατζέ ντουκχ αντρέ πι γκίστε, σο κα βοηθίνελ-λες; (Διαβάνεν 2 Κορινθίους 1:3, 4) Σίγουρα, ο Ιεχωβά ισί σαρ εκ Ντατ σο μανγκέλα κατά γιαβερά τι μανγκέν λέσκε τσσαβέν ντα τι παρηγορίνεν-λεν, ή γιαβέρτουλους τι κοβλιαρέν λένγκι ντουκχ. Οτθάρ, κα ντικχάς τριν ερωτήσεις: (1) Σόσκε χρειαζίντιβελα τι κοβλιαράς ι ντουκχ οντουλένγκι σο κερντέ λένγκε λουμνικανέ πράγματα κάνα ισινέ χουρντέ; (2) Κον μπορίνελα τι κοβλιαρέλ λένγκι ντουκχ; (3) Σαρ κα κεράς-λες λατσσές ανταβά;

ΣΟΣΚΕ ΧΡΕΙΑΖΙΝΤΙΒΕΛΑ ΤΙ ΚΟΒΛΙΑΡΑΣ ΛΕΝΓΚΙ ΝΤΟΥΚΧ;

4, 5. (α) Σόσκε ισί σημαντικός τι τθεράς αμαρέ γκοντιάτε ότι ο τσσαβέ νανέ σαρ ο μπαρέ; (β) Σαρ μπορεί η κακοποίηση τι κερέλ εκχέ τσσαβές μα τι ντελ μπέσα ι γιαβερένγκε;

⁴ Μπορεί τι χρειαζίντιβελα τι κοβλιαράς ι ντουκχ οντουλένγκι σο κερντέ λένγκε λουμνικανέ πράγματα κάνα ισινέ χουρντέ, ατζέ-ντα μπουτ μπρεσά πιο σοράν. Σόσκε; Για τι αγαβάς-λες ανταβά, πρέπει τι τθεράς αμαρέ γκοντιάτε ότι ο τσσαβέ νανέ σαρ ο μπαρέ. Ο πιο μπουτ φαρ, εκ τσσαβό επηρεάντιβελα κατά κακοποίηση μπουτ διαφορετικά εκχέ μπαρέσταρ. Ντικχέν χάνικ παραδείγματα.

⁵ Ο τσσαβέ τθερένα ανάγκη τι ντεν μπέσα ντα τι αβέν πασέ οντουλέντζαρ σο μπαριαρένα-λεν ντα φροντίνενα-λεν. Αντικάς, ο τσσαβέ νιωθίνενα αρακχαντέ ντα σικλιόνα τι ντεν μπέσα οντουλένγκε σο μανγκένα-λεν. (Ψαλμ. 22:9) Δυστυχώς, μπουτ φαρ η κακοποίηση αβέλα-πες αντρέ κο κχερ κι τσσαβέσκο εκχέσταρ σο ισί αντράλ κατά φαμιλί ή λατσσό αμάλ ι φαμιλιάκο. Κάνα η κακοποίηση αβέλα-πες εκχέ τζενέσταρ σο ντέλα λέσκε μπέσα ο τσσαβό, μπορεί τι αβέλ δύσκολος λέσκε τι ντελ μπέσα γιαβερένγκε, ατζέ-ντα μπουτ μπρεσά πιο σοράν.

6. Σόσκε η σεξουαλική κακοποίηση ισί μπουτ μπέτι πράγμας ντα κερέλα ζιάνι;

⁶ Ο τσσαβέ ναστί αρακχαβένα-πες, ντα η σεξουαλική κακοποίηση ισί μπουτ μπέτι πράγμας ντα κερέλα λένγκε ζιάνι. Κάνα τσσουβένα ι τσσαβέν τι κερέν σεξουαλικές πράξεις μπουτ μπρεσά πριν τι αβέν έτοιμα τι παντρίνεν ντα τι κερέν σεξ, μπορεί τι κερέλ λένγκε μπουτ μπαρό ζιάνι. Η κακοποίηση μπορεί τι κερέλ ι τσσαβές τι πακιάλ ότι ισί άχρηστος, τι τθερέλ λάθος άποψη για το σεξ ντα μα τι ντελ μπέσα κο γιαβερά.

7. (α) Σόσκε μπορεί τι αβέλ εύκολος εκχέ πφιρνέ τζενέσκε τι χουχαβέλ εκχέ τσσαβές, ντα σαρ μπορεί τι κερέλ-λες ανταβά; (β) Καβά αποτέλεσμας μπορεί τι τθερέν ανταλά ψέματα;

⁷ Ο τσσαβέ να σικλιλέ λατσσές τι σκεφτίνεν, τι λεν αποφάσεις ή τι αγαβέν ο κίνδυνος ντα τι νασέν λέσταρ. (1 Κορ. 13:​11) Οτθάρ, ισί μπουτ εύκολος τι χουχαβέν-λεν ο πφιρνέ τζενέ. Ασακέ τζενέ βακερένα κο τσσαβέ γκεραλέ ψέματα, σαρ για παράδειγμας ότι φταίνενα βον, ότι η κακοποίηση πρέπει τι ατσσόλ γκεραντί, ότι άμα κα μουτθαβέν-λες καέκ να κα πακιάλ-λεν ούτε κα βοηθίνελ-λεν ντα ότι ο μπαρέ τζενέ κερένα σεξουαλικές πράξεις τσσαβέντζαρ για τι σικαβέν ότι μανγκένα μπαγιά ο εκ ι γιαβερές. Ανταλά ψέματα μπορίνενα τι αλλάνεν ο τρόπος σο σκεφτίνελα εκ τσσαβό ντα μπορεί τι νακχέν μπουτ μπρεσά για τι αγαβέλ ότι σαρέ ανταλά ισινέ ψέματα. Καζόμ μπαριόλα, μπορεί τι αμντίνελα ότι τθερέλα πρόβλημας, ότι ισί μαγαριμέ ντα ότι να αξίνελα τι μανγκέν-λες ή τι κοβλιαρέν λέσκι ντουκχ.

8. Σόσκε ισινάμ σίγουροι ότι ο Ιεχωβά κα κοβλιαρέλ ι ντουκχ οντουλένγκι σο κερντέ λένγκε ζιάνι;

⁸ Οντουλένταρ σο σικλιλάμ, αγαβάσα ότι η σεξουαλική κακοποίηση κερέλα ζιάνι σο μπορεί τι ατσσόλ μπουτ μπρεσά. Καζόμ μπαρό ισί ανταβά έγκλημας! Ανταβά μπουτ μπαρό πρόβλημας σο αβέλα-πες σαρό κο ντουνιάς σικαβέλα ότι τζουβντιάσα κο τελευταία ντιβεσά σο μπουτ τζενέ “να τθερένα ιτς αγάπη”, ντα «πφιρνέ τζενέ ντα απατεώνες, καζόμ τζάλα κα αβέν χειρότεροι». (2 Τιμ. 3:​1-5, 13) Οντουλά σο κερέλα ο Μπενγκ ισί γκεραλέ, ντα ισί μπουτ μπέτι κάνα ο τζενέ κερένα λέσκο γκι. Όμως, ο Ιεχωβά ισί μπουτ πιο ζουρανό κατά Μπενγκ ντα λέσκε υπηρετόνταρ. Τζανέλα σο-ντα κερέλα ο Μπενγκ. Ισινάμ σίγουροι ότι ο Ιεχωβά τζανέλα λατσσές καζόμ ντουκχ τθεράσα ντα κα κοβλιαρέλ ανταγιά ντουκχ. Καζόμ σουκάρ ισί τι υπηρετίνας “ι Ντεβλές κάθε παρηγοριάς, σο ντέλα-αμέν παρηγοριά σαρέ κο δοκιμασίες σο νακχάσα για τι μπορίνας τι παρηγορίνας οντουλέν σο νακχένα σαβέ τι μανγκές δοκιμασίες αντράλ κατά παρηγοριά σο λάσα κατά Ντεβέλ”. (2 Κορ. 1:3, 4) Κας χρησιμοποιήνελα όμως ο Ιεχωβά για τι κοβλιαρέλ ι ντουκχ πι υπηρετόνγκι;

ΚΟΝ ΚΑ ΚΟΒΛΙΑΡΕΛ ΛΕΝΓΚΙ ΝΤΟΥΚΧ;

9. Σο κα κερέλ ο Ιεχωβά οντουλένγκε σο μουκχλάς-λεν λένγκι φαμιλί σαρ βακερέλα ο βασιλιάς Δαβίδ κο εδάφιος Ψαλμός 27:10;

⁹ Οντουλά σο μουκχλάς-λεν λένγκο ντατ ντα λένγκι ντάι ή κερντέ λένγκε λουμνικανέ πράγματα τζενέ σο τζανένας μπορεί τι τθερένα μπαρί ανάγκη τι κοβλιαράς λένγκι ντουκχ. Ο Δαβίδ τζανέλας ότι μπορίνασα τι αβάς σίγουροι ότι ο Ιεχωβά πάντα κα κοβλιαρέλ αμαρί ντουκχ. (Διαβάνεν Ψαλμός 27:​10) Πακιάλας ότι ο Ιεχωβά κα αβέλ Ντατ οντουλένγκε σο μουκχλάς-λεν λένγκι φαμιλί. Σαρ κερέλα-λες ανταβά ο Ιεχωβά; Αντράλ πι πιστέ υπηρετόνταρ. Αμαρέ πφραλά ντα πφενιά κι κχανγκιρί ισί σαρ φαμιλί αμένγκε. Για παράδειγμας, ο Ιησούς βακερντάς ότι οντουλά σο υπηρετίνενας λέσαρ ι Ιεχωβάς ισινέ λέσκε σαρ πφραλά, πφενιά ντα ντάι.​—Ματθ. 12:​48-50.

10. Σο βακερντάς ο απόστολος Παύλος ι μπουτιάκε σο κερέλας σαρ πρεσβύτερος;

¹⁰ Σκεφτίνεν εκ παράδειγμας σο σικαβέλα σαρ η Χριστιανική κχανγκιρί ισί σαρ φαμιλί αμένγκε. Ο απόστολος Παύλος ισινέ εκ μπουτιαρνό ντα πιστός πρεσβύτερος. Μουκχλάς μπουτ λατσσό παράδειγμας, ντα ι Ντεβλέσκε πνευμάσαρ βακερντάς κο γιαβερά τι μοιάζεν λέστε σαρ μοιάζελας βοβ-ντα κο Χριστός. (1 Κορ. 11:1) Ντικχέν σο βακερντάς ι μπουτιάκε σο κερέλας σαρ πρεσβύτερος: «Σικαντάμ τουμένγκε αγάπη ντα λατσσιπέ, σαρ εκ ντάι σο παρβαρέλα ντα φροντίνελα πι μαξιμίν». (1 Θεσ. 2:7) Αντικάς ο πιστοί πρεσβύτεροι-ντα αντιβές βακερένα λατσσέ ντα γκουλντέ λάφια για τι κοβλιαρέν αντράλ κατά Αγία Γραφή ι ντουκχ οντουλένγκι σο τθερένα ανάγκη.

11. Σαρ τζανάσα ότι να μπορίνενα σάντε ο πρεσβύτεροι τι κοβλιαρέν ι ντουκχ ι γιαβερένγκι;

¹¹ Μήπως σάντε ο πρεσβύτεροι μπορίνενα τι κοβλιαρέν ι ντουκχ οντουλένγκι σο κερντέ λένγκε λουμνικανέ πράγματα; Όχι. Σαρέ πρέπει τι “κοβλιαράς ι ντουκχ ο εκ ι γιαβερέσκι”. (1 Θεσ. 4:​18) Ο πφενιά σο τθερένα ζουρανί πίστη μπορίνενα τι ενθαρρύνεν μπουτ ι πφενίν σο χρειαζίντιβενα βοήθεια. Άκ’ σόσκε βακερντάς ο Ιεχωβά Ντεβέλ ότι ισί σαρ εκ ντάι σο παρηγορίνελα πι τσσαβές. (Ησ. 66:​13) Η Γραφή κερέλα λάφι τζουβλίνγκε σο κοβλιαρντέ ι ντουκχ οντουλένγκι σο τθερένας πφανγκό γκι. (Ιώβ 42:​11) Καζόμ χαιρίνελα ο Ιεχωβά κάνα ντικχέλα ότι ο πφενιά αντιβές κοβλιαρένα ι ντουκχ σο τθερένα γιαβερά πφενιά πουμαρέ γκίστε! Μπάζιμα, εκ ή ντούι πρεσβύτεροι μπορεί τι μανγκέν εκχέ πφενιάταρ τι βοηθίνελ εκχέ γιαβερέ πφενιά.b

ΣΑΡ ΚΑ ΚΟΒΛΙΑΡΑΣ ΛΕΝΓΚΙ ΝΤΟΥΚΧ;

12. Σο να μανγκάσα τι κεράς;

¹² Να μανγκάσα τι πουτσάς πραγματένγκε σο εκ πφραλ ή εκ πφεν να μανγκέλα τι βακερέλ. (1 Θεσ. 4:​11) Σο κα κεράς όμως οντουλένγκε σο χρειαζίντιβενα ντα μανγκένα τι βοηθίνας-λεν ντα τι κοβλιαράς λένγκι ντουκχ; Κα ντικχάς παντς τρόπους κατά Γραφή για τι κεράς-λες ανταβά.

13. Σο κερντάς ι Ηλιάσκε ο άγγελος ι Ιεχωβάσκο σαρ βακερένα ο εδάφια 1 Βασιλέων 19:​5-8, ντα σαρ μπορίνασα τι μοιάζας λέστε;

¹³ Κερέν κάτι για τι βοηθίνεν. Κάνα ο προφήτης Ηλίας νασλό τθαβντιμάσαρ για τι σώνελ πι ζωή, λέσκο γκι πφανγκιλό αζόμ μπουτ σο μανγκέλας τι μερέλ. Ο Ιεχωβά μπουτσσαντάς λέσκε εκχέ ζουρανέ αγγελός. Ο άγγελος ντινάς κο Ηλίας οντουβά σο χρειαζίντιβελας οντιά στιγμή. Ντινάς-λες τατό μαντρό ντα βακερντάς λέσκε τι χαλ. (Διαβάνεν 1 Βασιλέων 19:​5-8) Ανταγιά ιστορία σικαβέλα εκ μπαρί αλήθεια: Κάνα κεράσα κάτι χουρντό εκχέ γιαβερέσκε μπορεί τι βοηθίνας-λες μπουτ. Εκ χαμπέ, εκ χουρντό δώρος ή εκ κάρτα σουκάρ λαφίντζαρ κα σικαβέλ ότι μανγκάσα αμαρέ πφραλές ή αμαρέ πφενιά σο τθερέλα πφανγκό γκι. Άμα νανέ αμένγκε εύκολος τι κεράς λάφι οντουλένγκε σο νιωθίνελα, μπορεί τι κεράς κάτι ανταλένταρ για τι σικαβάς ότι πφαμπάσα λέσκε ή λάκε.

14. Σο σικλιάσα κατά ιστορία ι Ηλιάσκι;

¹⁴ Βοηθίνεν οντουλέν σο τθερένα πφανγκό γκι τι νιωθίνεν αρακχαντέ ντα άνετα. Σικλιάσα κάτι ατζέ κατά ιστορία ι Ηλιάσκι. Ο Ιεχωβά με εκ θαύμας βοηθιντάς-λες τι ερεσέλ κο βες Χωρήβ. Μάλλον ο Ηλίας νιωθίνελας αρακχαντό οντουλέ τθανέστε σο ο Ιεχωβά κερντάας συμφωνία πι λαόσαρ μπουτ μπρεσά πιο τζανγκλέ. Μπορεί τι νιωθίνελας ότι νασλό οντουλένταρ σο μανγκένας τι μουνταρέν-λες. Σο σικλιάσα ανταλέσταρ; Άμα μανγκάσα τι κοβλιαράς ι ντουκχ οντουλένγκι σο κερντέ λένγκε λουμνικανέ πράγματα, κα αβέλας λατσσό πρώτα τι κεράς-λεν τι νιωθίνεν αρακχαντέ. Για παράδειγμας, ο πρεσβύτεροι πρέπει τι ντεν-πες γκοντί ότι εκχέ πφενιάκε σο τθερέλα πφανγκό γκι μπορεί τι αβέλ πιο εύκολος τι κερέλ λάφι καζόμ πίλα καφές πι κχερέστε ντα όχι κι Αίθουσα. Εκχέ γιαβερέ πφενιάκε μπορεί τι αβέλ πιο εύκολος τι κερέλ λάφι κι Αίθουσα.

15, 16. Σο πρέπει τι κεράς κάνα ασουνάσα ι γιαβερέν;

¹⁵ Τι ασουνέν ι γιαβερέν. Η Γραφή βακερέλα: «Κάθε τζενό πρέπει τι ασουνέλ με προσοχή ντα μα τι σιγκιαρέλ τι κερέλ λάφι». (Ιακ. 1:​19) Αμέν ασουνάσα ι γιαβερέν; Μπορεί τι αμντίνας ότι για τι κεράς-λες ανταβά πρέπει σάντε τι ντικχάς ι γιαβερές ντα μα τι κεράς λάφι. Όμως, χρειαζίντιβελα τι κεράς πιο μπουτ πράγματα. Για παράδειγμας, ο Ηλίας βακερντάς καζόμ μπέτι νιωσάλο, ντα ο Ιεχωβά ασουντάς-λες. Αγαντάς ότι ο Ηλίας νταρέλας, νιωθίνελας κορκορό ντα αμντίνελας ότι σινανέ υπηρετίνελας-λες. Ο Ιεχωβά βοηθιντάς-λες με αγάπη τι αντιμετωπίνελ ανταλά αισθήματα. Σικαντάς ότι ασουντάς-λες μπαγιά.​—1 Βασ. 19:​9-11, 15-18.

¹⁶ Καζόμ ασουνάσα, σαρ κα σικαβάς ότι μανγκάσα ι τζενές ντα ότι πφαμπάσα λέσκε; Μπάζιμα, χάνικ λατσσέ ντα σουκάρ λάφια μπορεί τι σικαβέν σαρ νιωθίνασα. Κα μπορίνενας τι βακερέν: «Στεναχωρισάλομ μπουτ ανταλέσκε σο αβιλό-πες τούκε! Καέκ τσσαβό δεν πρέπει τι νακχέλ κάτι ασακό!» Μπορεί τι κερέν χάνικ ερωτήσεις για τι αβέν σίγουροι ότι αγαντέν σο βακερέλα ο πφραλ ή η πφεν. Για παράδειγμας, πουτσέν: «Μπορίνεσα σε παρακαλώ τι εξηγίνες μάνγκε σο μανγκέσα τι βακερές;» ή «Κάνα βακερντάν-λες ανταβά, αγαντόμ ότι . . . Αγαντόμ λατσσές;» Ασακέ σουκάρ λάφια κα σικαβέν κο τζενό ότι ασουνένα μπαγιά ντα προσπαθίνενα τι αγαβέν.​—1 Κορ. 13:4, 7.

17. Σόσκε πρέπει τι κεράς υπομονή ντα “μα τι σιγκιαράς τι κεράς λάφι”;

¹⁷ Τι τθερέν τουμαρέ γκοντιάτε όμως “μα τι σιγκιαρέν τι κερέν λάφι”. Μα τσσιναβέν ι τζενές για τι ντεν-λες συμβουλή ή για τι διορθώνεν-λες. Ντα τι κερέν υπομονή! Κάνα ο Ηλίας πουταρντάς πο γκι κο Ιεχωβά, λέσκε λάφια σικαντέ καζόμ ντουκχ τθερέλας πι γκίστε. Σοράν, κάνα ο Ιεχωβά μπαριαρντάς λέσκι πίστη, ο Ηλίας πουταρντάς πάλι πο γκι ι ίδιε λαφίντζαρ. (1 Βασ. 19:9, 10, 13, 14) Σο σικλιάσα ανταλέσταρ; Μπάζιμα ο τζενέ σο τθερένα πφανγκό γκι χρειαζίντιβενα τι πουτρέν πουμαρό γκι μπουτ φαρ. Σαρ ο Ιεχωβά, μανγκάσα τι ασουνάς αμέν-ντα με υπομονή. Αντίς τι βακεράς λένγκε σαρ τι λύνεν πουμαρό πρόβλημας, σικαβάσα ότι αγαβάσα-λεν ντα πφαμπάσα λένγκε.​—1 Πέτρ. 3:8.

18. Σαρ μπορίνενα αμαρέ προσευχές τι κοβλιαρέν ι γιαβερένγκι ντουκχ;

¹⁸ Τι προσευχίντιβεν αντράλ τουμαρέ γκίσταρ γιεκ οντουλέσαρ σο τθερέλα ντουκχ αντρέ πέστε. Μπουτ φαρ οντουλά σο τθερένα πφανγκό γκι ναστί προσευχίντιβενα. Εκ τζενό μπορεί τι νιωθίνελα ότι νανέ άξιος τι κερέλ λάφι ι Ιεχωβάσαρ. Εκ τρόπος για τι κοβλιαράς λέσκι ντουκχ ισί τι προσευχίντιβας λέσαρ ντα τι βακεράς λέσκο ναβ. Μπορίνασα τι βακεράς κο Ιεχωβά καζόμ μπουτ μανγκάσα οντουλέ τζενές εμ αμέν εμ ι κχανγκιρί. Μπορίνασα τι μανγκάς λέσταρ τι λοκχιαρέλ πι πολύτιμε υπηρετής ντα τι κοβλιαρέλ λέσκι ντουκχ. Ασακέ προσευχές κοβλιαρένα μπουτ ι ντουκχ ι γιαβερένγκι.​—Ιακ. 5:16.

19. Σο κα βοηθίνελ-αμέν τι προετοιμάνας-αμέν για τι κοβλιαράς ι ντουκχ εκχέ τζενέσκι;

¹⁹ Τι τραμπίνεν λάφια σο κερένα λατσσιπέ ντα κοβλιαρένα ι γιαβερένγκι ντουκχ. Τι σκεφτίνεν πριν τι κερέν λάφι. Ο λάφια σο βακεράσα χωρίς τι σκεφτίνας κερένα ζιάνι. Ο σουκάρ λάφια κερένα λατσσιπέ. (Παρ. 12:​18) Οτθάρ, τι προσευχίντιβεν κο Ιεχωβά τι βοηθίνελ-τουμέν τι αρακχέν λατσσέ λάφια σο κοβλιαρένα ι γιαβερένγκι ντουκχ ντα λοκχιαρένα-λεν. Ντεν-τουμέν γκοντί ότι ο πιο ζουρανέ λάφια ισί ο λάφια ι Ιεχωβάσκε σο αρακχάσα κι Γραφή.​—Εβρ. 4:12.

20. Σο μπορεί τι πακιάνα μερικοί πουμαρέ νεαυτόσκε, ντα σο πρέπει τι σικαβάς λένγκε;

²⁰ Μερικά τζενέ σο κερντέ λένγκε λουμνικανέ πράγματα πακιάνα ότι ισί μαγαριμέ, άχρηστοι ντα ότι καέκ να μανγκέλα-λεν ούτε κα μανγκέλ-λεν ποτές. Σο μπαρό ψέμας! Σικαβέν λένγκε κατά Γραφή ότι ο Ιεχωβά μανγκέλα-λεν μπουτ. (Ντικχ ο πλαίσιος «Κοβλιαράσα ι Γιαβερένγκι Ντουκχ Αντράλ Κατά Γραφή») Τι ντεν-τουμέν γκοντί σαρ ντινάς ζορ εκ άγγελος κο προφήτης Δανιήλ λατσσιμάσαρ κάνα νιωθίνελας μπίζουρανο ντα τθερέλας πφανγκό γκι. Ο Ιεχωβά μανγκέλας τι τζανέλ οντουβά τζενό ότι ισινέ πολύτιμος. (Δαν. 10:2, 11, 19) Αμαρέ πφραλά ντα πφενιά-ντα σο τθερένα πφανγκό γκι ισί πολύτιμοι ι Ιεχωβάσκε!

21. Σο κα αβέλ-πες κο τζενέ σο κερντέ ζιάνι κο γιαβερά ντα να μετανιωσάλε, αλλά σο πρέπει τι κεράς μέχρι αζομάν;

²¹ Κάνα κοβλιαράσα ι γιαβερένγκι ντουκχ, ανάσα λένγκε γκοντιάτε ότι ο Ιεχωβά μανγκέλα-λεν. Ντα δεν πρέπει ποτές τι μπιστράς ότι ο Ιεχωβά ισί δίκαιος Ντεβέλ. Καέκ κακοποίηση να κα ατσσόλ γκεραντί. Ο Ιεχωβά ντικχέλα-λεν σαρέ ντα σίγουρα κα τιμωρίνελ σαρέ οντουλέν σο κερντέ ανταβά πράγμας ντα να μετανιωσάλε. (Αριθ. 14:​18) Μέχρι αζομάν, τι κεράς ο πιο λατσσό για τι σικαβάς αγάπη οντουλένγκε σο κερντέ λένγκε λουμνικανέ πράγματα. Καζόμ μπουτ λοκχιόλα αμαρό γκι σο τζανάσα ότι ο Ιεχωβά κα κερέλ λατσσές για πάντα σαρέ οντουλέν σο κερντάς λένγκε ζιάνι ο Μπενγκ ντα λέσκο ντουνιάς! Ατζεχάνικ, ανταλά μπέτι πράγματα να κα αβέν αμαρέ γκοντιάτε ούτε αμαρέ γκίστε.​—Ησ. 65:17.