Τι Βοηθίνεν Οντουλέν σο Τθερένα Πφανγκό Γκι τι Νταϊντίνεν

1. Σαρ κα μοιάζας αμαρέ λατσσέ Νταντέστε, κο Ιεχωβά;

Ο ΙΕΧΩΒΑ μανγκέλα-αμέν μπουτ. (Ιωάν. 3:​16) Αμέν μανγκάσα τι μοιάζας αμαρέ λατσσέ Νταντέστε. Οτθάρ, προσπαθίνασα τι “αγαβάς [σαριλέν], τι μανγκάς-λεν σαρ πφραλά [ντα] τι νιωθίνας λένγκι ντουκχ”, ντα κεράσα-λες ανταβά ατζέ πιο μπουτ «οντουλένγκε σο ισινάμ λέντζαρ τζενέ κι πίστη». (1 Πέτρ. 3:8· Γαλ. 6:​10) Κάνα αμαρέ πφραλά ντα πφενιά τθερένα πφανγκό γκι, μανγκάσα τι βοηθίνας-λεν.

2. Σο κα ντικχάς ανταλέ μαθημάστε;

² Σαρέ οντουλά σο μανγκένα τι αβέν κι Ιεχωβάσκι φαμιλί κα νακχέν προβλήματα σο κα ζορισκιαρέν-λεν. (Μάρκ. 10:​29, 30) Ντα καζόμ ερεσέλα ο τέλος ανταλέ ντουνιάσκο, μπεκλεντίνασα ότι κα τθεράς ατζέ πιο μπουτ δυσκολίες. Σαρ κα βοηθίνας ο εκ ι γιαβερές; Κα ντικχάς σο σικλιάσα κατά Λωτ, κατά Ιώβ ντα κατά Ναομί. Ντα κα κεράς λάφι μερικέ δυσκολιένγκε σο τθερένα αντιβές αμαρέ πφραλά ντα πφενιά για τι τζανάς σαρ τι βοηθίνας-λεν τι νταϊντίνεν κο προβλήματα.

ΤΙ ΤΘΕΡΕΝ ΥΠΟΜΟΝΗ

3. Καγιά λάθος απόφαση λιντάς ο Λωτ σαρ σικαβένα ο εδάφια 2 Πέτρου 2:7, 8, ντα σο προβλήματα αρακχλάς ανγκλά-πέστε;

³ Ο Λωτ λιντάς εκ λάθος απόφαση κάνα γκιλό τι τζουβντιόλ κο Σόδομα, γιεκ ι τζενέντζαρ σο κερένας λουμνικανέ πράγματα σο ισινέ μπουτ τζουνγκαλέ. (Διαβάνεν 2 Πέτρου 2:7, 8) Ο τθανά οντουλέ τθεμέστε ισινέ λατσσέ, αλλά ο Λωτ αρακχλάς ανγκλά-πέστε μπουτ προβλήματα σο γκιλό τι μπεσέλ οτθέ. (Γέν. 13:​8-13· 14:​12) Ντικχίντιβελα ότι λέσκι ρομνί μανγκλάς αζόμ μπουτ είτε ι πόλη είτε μερικέ τζενέν οτθάρ, σο να ντινάς καν ι Ιεχωβάς. Μουλί κάνα ο Ντεβέλ κερντάς τι περέλ κατά ουρανός γιακ ντα θειάφι οντουλέ τθεμέστε. Ντα ανέν τουμαρέ γκοντιάτε ι ντουέ τσσαΐν σο τθερέλας ο Λωτ. Λένγκε νισανλίδες μουλέ κο Σόδομα. Ο Λωτ χασαρντάς πο κχερ, πο πράγματα, ντα ο χειρότερος ισί ότι χασαρντάς πι ρομνιά. (Γέν. 19:​12-14, 17, 26) Τσσιναντάς ο Ιεχωβά τι κερέλ υπομονή λέσαρ σαρέ οντουλά δύσκολα ντιβεσά σο τθερέλας πφανγκό γκι; Όχι.

4. Σαρ σικαντάς ο Ιεχωβά ότι κερντάς υπομονή με τον Λωτ; (Ντικχ ι φωτογραφία κι ανγκλαϊνί σελίδα)

⁴ Παρόλο σο ο Λωτ τραμπιντάς τι τζουβντιόλ κο Σόδομα, ο Ιεχωβά σικαντάς ότι τζιτζίνελας λέσκε κάνα μπουτσσαντάς αγγελόν τι σώνεν λες ντα λέσκι φαμιλί. Αλλά αντίς τι ντελ καν οντιά στιγμή κι σημαντική εντολή κι αγγελόνγκι ντα τι νασέλ σουγκό κατά Σόδομα, ο Λωτ «αργίνελας». Οτθάρ, ο άγγελοι λιντέ-λες κατά βας ντα βοηθιντέ λες ντα λέσκι φαμιλί τι νασέν κατά πόλη. (Γέν. 19:​15, 16) Σοράν, ο άγγελοι βακερντέ λέσκε τι τζαλ σουγκό κο βεσά. Αλλά αντίς τι ντελ καν ι Ιεχωβάς, ο Λωτ μανγκλάς τι τζαλ σε εκ πόλη οτθέ πασέ. (Γέν. 19:​17-20) Ο Ιεχωβά ασουντάς-λες με υπομονή ντα μουκχλάς-λες τι τζαλ οτθέ. Σοράν, ο Λωτ νταρέλας τι μπεσέλ οτθέ ντα γκιλό κο βεσά, οτθέ σο βακερντάας λέσκε ο Ιεχωβά κι αρχή. (Γέν. 19:​30) Σο μπαρί υπομονή κερντάς ο Ιεχωβά! Σαρ κα μοιάζας λέστε;

5, 6. Σαρ μπορίνασα τι κεράς αμαρέ ζωγιάτε ο εδάφιος 1 Θεσσαλονικείς 5:​14 καζόμ προσπαθίνασα τι μοιάζας κο Ντεβέλ;

⁵ Σαρ ο Λωτ, αντικάς εκ πφραλ ή εκ πφεν μπορεί τι λελ λάθος αποφάσεις ντα αντικάς τι ανέλ πέσκε μπαρέ προβλήματα. Άμα κα αβέλ-πες ανταβά, σο κα κεράς; Μπορεί τι νικιόλ αμένταρ τι βακεράς λέσκε ότι γκίντελα σο φυτιντάς, ντα ανταβά κα αβέλας μπαγιά. (Γαλ. 6:7) Αλλά ισί πιο λατσσό τι ντας-λες βοήθεια αντικάς σαρ ντινάς ο Ιεχωβά κο Λωτ. Σαρ;

⁶ Ο Ιεχωβά μπουτσσαντάς ι αγγελόν, όχι σάντε για τι βακερέν κο Λωτ τι νασέλ κατά καταστροφή σο κα αβέλας κο Σόδομα, αλλά εμ για τι βοηθίνεν-λες τι κερέλ-λες ανταβά. Αντικάς, άμα ντικχάσα ότι εκ πφραλ πφιρέλα εκχέ ντρομέστε σο κα γκερέλ-λες κο προβλήματα, κα αβέλας λατσσό τι κεράς λέσαρ λάφι. Αλλά μπορεί τι κεράς κάτι γιαβέρ-ντα για τι βοηθίνας-λες. Ατζέ-ντα άμα να ντέλα καν σουγκό κο συμβουλές σο λέλα κατά Γραφή, πρέπει τι κεράς υπομονή. Τι αβάς σαρ ο ντούι άγγελοι. Αντίς τι μουκχάς αμαρέ πφραλές ντα τι τσσίντας-αμέν ντουρ λέσταρ, πρέπει τι βοηθίνας-λες όχι σάντε λαφίντζαρ αλλά οντουλέντζαρ σο κεράσα-ντα. (1 Ιωάν. 3:​18) Μπορεί τι χρειαζίντιβελ τι λας-λες κατά βας, σαρ τι βακεράας, ντα τι βοηθίνας-λες τι ντελ καν κο λατσσέ συμβουλές σο ντιντιόνα-λες.​—Διαβάνεν 1 Θεσσαλονικείς 5:14.

7. Σαρ μπορίνασα τι ντικχάς ι γιαβερέν αντικάς σαρ ντικχέλας ο Ιεχωβά τον Λωτ;

⁷ Ο Ιεχωβά να ντικχλάς σάντε ο λάθη σο κερέλας ο Λωτ. Πιο σοράν, ντινάς πο πνεύμας κο απόστολος Πέτρος για τι γραφίνελ ότι ο Λωτ ισινέ “δίκαιος”. Σο μπαρί χαρά τθεράσα σο ο Ιεχωβά συγχωρίνελα αμαρέ λάθη! (Ψαλμ. 130:3) Μπορίνασα τι ντικχάς ι γιαβερέν σαρ ντικχέλας ο Ιεχωβά τον Λωτ; Άμα ντικχάσα ο λατσσέ ιδιότητες αμαρέ πφραλένγκε, κα κεράς πιο μπουτ υπομονή λέντζαρ. Αντικάς βον κα μανγκέν πιο εύκολα τι λεν αμαρί βοήθεια.

ΤΙ ΤΖΙΤΖΙΝΕΝ Ι ΓΙΑΒΕΡΕΝΓΚΕ

8. Σο κα κεράς άμα τζιτζίνασα ι γιαβερένγκε;

⁸ Παρόλο σο ο Ιώβ να λιντάς εκ λάθος απόφαση σαρ ο Λωτ, τσσιντιντάς μπουτ. Χασαρντάς οντουλά σο τθερέλας, πι θέση κι κοινωνία ντα πι λατσσί υγεία. Ντα να ερεσέλας σάντε ανταβά, βοβ ντα λέσκι ρομνί χασαρντέ σαρέ πουμαρέ τσσαβέν. Ντα κατηγοριντέ-λες τριν ψεύτικα αμαλά. Καβά ισί εκ λόγος σο οντουλά αμαλά να τζιτζισάλε λέσκε; Να αγαντέ σο νακχέλας μπαγιά. Οντουλέσκε, νικαντέ λάθος συμπεράσματα ντα κριντέ-λες μπέτι λαφίντζαρ. Σο κα κεράς για μα τι κεράς αμέν-ντα εκ ασακό λάθος; Τι ντεν-τουμέν γκοντί ότι σάντε ο Ιεχωβά τζανέλα σαρέ οντουλά σο νακχέλα εκ τζενό. Τι ντεν προσοχή κο λάφια σο βακερέλα ο τζενό σο νακχέλα προβλήματα. Μα ασουνέν σάντε λέσκε λάφια. Προσπαθίνεν τι αγαβέν λέσκι ντουκχ-ντα. Σάντε αντικάς κα σικαβέν ότι τζιτζίνενα μπαγιά ι πφραλέσκε ή ι πφενιάκε.

9. Σο να κα κεράς άμα τζιτζίνασα ι γιαβερένγκε, ντα σόσκε;

⁹ Άμα τζιτζίνασα ι γιαβερένγκε, να κα κεράς κουτσομπολιός λένγκε προβληματένγκε. Οντουβά σο κερέλα κουτσομπολιός αντίς τι ντελ ζορ κο πφραλά κερέλα-λεν τι περέν. (Παρ. 20:​19· Ρωμ. 14:​19) Να σικαβέλα λατσσιπέ ντα να σκεφτίνελα ι γιαβερές, οτθάρ λέσκε λάφια μπορεί τι ντουκχαβέν ατζέ πιο μπουτ εκχέ τζενές σο τθερέλα προβλήματα. (Παρ. 12:​18· Εφεσ. 4:​31, 32) Καζόμ πιο λατσσό ισί τι ρόντας για το λατσσέ ιδιότητες εκχέ τζενέσκε ντα τι σκεφτίνας σαρ τι βοηθίνας-λες τι νταϊντίνελ κο δοκιμασίες!

10. Σο σικλιαρένα-αμέν ο εδάφια Ιώβ 6:2, 3;

¹⁰ Διαβάνεν Ιώβ 6:2, 3. Ισινέ φαρ σο ο Ιώβ βακερντάς λάφια “χωρίς τι σκεφτίνελ-λεν”. Πιο σοράν λιντάς παλάλ μερικέ οντουλέ λαφίνταρ. (Ιώβ 42:6) Σαρ ο Ιώβ, αντικάς εκ τζενό-ντα αμαρέ ντιβεσέντε σο τθερέλα εκ μπαρό πρόβλημας μπορεί τι βακερέλα λάφια σο να σκεφτίνελα-λεν ντα σοράν τι μετανιώνελ. Σο πρέπει τι κεράς; Αντίς τι κρίνας-λες, πρέπει τι τζιτζίνας λέσκε. Τι ντεν-τουμέν γκοντί ότι ο Ιεχωβά να μανγκέλας τι τθεράς προβλήματα ντα πφανγκό γκι σαρ τθεράσα αντιβές. Οντουλέσκε, κάνα εκ πιστός υπηρέτης ι Ιεχωβάσκο τθερέλα πφανγκό γκι, μπορεί τι κερέλ λάφι χωρίς τι σκεφτίνελ. Ατζέ-ντα άμα κα βακερέλ πράγματα σο νανέ μπαγιά κάνα κα κερέλ λάφι ι Ιεχωβάσκε ή αμένγκε, δεν πρέπει τι σιγκιαράς τι χολιάνας ή τι κρίνας-λες λέσκε λαφίνγκε.​—Παρ. 19:11.

11. Σαρ κα μοιάζεν ο πρεσβύτεροι κο Ελιού κάνα ντένα συμβουλή;

¹¹ Ισί φαρ σο χρειαζίντιβελα τι ντιντιόλ συμβουλή κο τζενό σο τθερέλα εκ μπαρό πρόβλημας. (Γαλ. 6:1) Σαρ κα κερέν-λες ανταβά ο πρεσβύτεροι; Ισί λατσσό τι μοιάζεν κο Ελιού, σο ασουντάς οντουλά σο βακερντάς ο Ιώβ ντα τζιτζισάλο λέσκε. (Ιώβ 33:6, 7) Ο Ελιού αγαντάς πρώτα σο τθερέλας ο Ιώβ πι γκοντιάτε ντα σοράν ντινάς-λες συμβουλή. Ο πρεσβύτεροι σο μοιάζενα λέστε ασουνένα λατσσές ι τζενές ντα προσπαθίνενα τι αγαβέν σο νακχέλα. Σοράν, κάνα ντένα συμβουλή ισί πιο εύκολος τι ερεσέν λέσκε γκίστε.

ΤΙ ΛΟΚΧΙΑΡΕΝ Ι ΓΙΑΒΕΡΕΝ ΤΟΥΜΑΡΕ ΛΑΦΙΝΤΖΑΡ

12. Σαρ επηρεασάλι η Ναομί κάνα μουλό λάκο ρομ ντα λάκε ντούι τσσαβέ;

¹² Η Ναομί ισινέ εκ πιστή τζουβέλ σο μανγκέλας ι Ιεχωβάς. Αλλά κάνα μουλό λάκο ρομ ντα λάκε ντούι τσσαβέ, μανγκέλας τι ντεν-λα βίκος ο τζενέ «Μαρά» σο μανγκέλα τι βακερέλ «κερκιπέ». (Ρουθ 1:3, 5, 20, υποσ., 21) Λάκι μπορί η Ρουθ ατσσιλί πασέ λάτε σαρέ κο δοκιμασίες. Να ντέλας-λα σάντε οντουλά σο χρειαζίντιβελας αλλά βακερέλας λάφια-ντα σο λοκχιαρένας λάκο γκι. Σικαβέλας κι Ναομί, απλέ λαφίντζαρ ντα αντράλ πι γκίσταρ, ότι μανγκέλας-λα ντα ότι κα αβέλας πασέ λάτε.​—Ρουθ 1:​16, 17.

13. Σόσκε χρειαζίντιβενα-αμέν πασέ πουμέντε οντουλά σο χασαρένα πουμαρέ ρομές ή ρομνιά;

¹³ Κάνα εκ πφραλ ή εκ πφεν χασαρέλα πι ρομές ή πι ρομνιά, χρειαζίντιβελα-αμέν πασέ πέστε. Εκ αντρόγυνος ισί σαρ ντούι δέντρα σο μπαριόνα πας πασέ. Καζόμ νακχένα ο μπρεσά, λένγκε ρίζες πακιάρντιβενα η εκ ι γιαβεράσαρ. Άμα κα νικαβέν ο εκ δέντρος ριζάσαρ ντα κα «μερέλ», μπορεί τι αβέλ μπαρί ζημιά κο γιαβέρ-ντα δέντρος. Αντικάς αβέλα-πες κάνα ο ντουσμάνι σο βακέρντιβελα μεριπέ λέλα εκχέ τζενέσταρ λέσκε ρομνιά ή λάκε ρομές. Οντουβά τζενό μπορεί τι τθερέλ μπαρί ντουκχ πι γκίστε μπουτ καιρός. Η Πόλα,b σο χασαρντάς πι ρομές οτθέ σο να μπεκλεντίνελας, βακερέλα: «Μι ζωή αλλαξάλι ντιπ, ντα νιωθίναβας μπίζουρανι. Χασαρντόμ μι πιο λατσσέ αμαλές. Βακεράβας-λεν σαρέ μι ρομέσκε. Κεράβας λέσαρ λάφι κάνα τθεράβας χαρά ντα ισινέ πασέ μάντε κο δυσκολίες. Τθεράβας εκχέ τζενές τι βακεράβ μι ντουκχ. Μπαγιά, ισινέ σαρ τι τσσιντέ-μαν κο μασκάρ».

14, 15. Σαρ κα λοκχιαράς εκχέ τζενές σο χασαρντάς πι ρομές ή πι ρομνιά;

¹⁴ Σαρ κα λοκχιαράς εκχέ τζενές σο χασαρντάς πι ρομές ή πι ρομνιά; Ο πρώτος σημαντικός πράγμας ισί τι κεράς λέσαρ λάφι, ατζέ-ντα άμα σακιντίνασα ή να τζανάσα σο τι βακεράς. Η Πόλα βακερέλα: «Αγαβάβα ότι κάνα μερέλα εκ τζενό, ο γιαβερά να τζανένα σο τι κερέν ή τι βακερέν. Νταρένα μα τι βακερέν κάτι λάθος. Αλλά ισί πιο μπέτι κάνα να ασουνέσα τίποτα λένταρ». Ο τζενό σο χασαρντάς πι ρομές ή πι ρομνιά να μπεκλεντίνελα αμένταρ τι βακεράς εκ μπουτ σημαντικός λάφι. Η Πόλα βακερέλα: «Λάβας ζορ κάνα μο αμαλά βακερένας μάνγκε: “Στεναχωρισάλομ μπουτ”».

¹⁵ Ο Γουίλιαμ, σο χασαρντάς πι ρομνιά πριν χάνικ μπρεσά, βακερέλα: «Λάβα ζορ κάνα ο γιαβερά βακερένα μάνγκε ο λατσσέ πράγματα σο ντένα-πες γκοντί μι ρομνιάταρ. Αντικάς σικαβένα μάνγκε ότι μανγκένας-λα ντα σεβάνενας-λα. Ανταβά βοηθίνελα-μαν μπουτ. Λοκχιόλα μο γκι, σόσκε μι ρομνί ισινέ μπουτ σημαντική μάνγκε». Η Μπιάνκα σο χασαρντάς πι ρομές, βακερέλα: «Κοβλιόλα μι ντουκχ κάνα ο γιαβερά κερένα προσευχή μάντζαρ ντα διαβάνενα μάνγκε εκ ντούι εδάφια. Κερέλα μάνγκε λατσσιπέ κάνα πουτρένα μι ρομέσκε ντα ασουνένα-μαν τι κεράβ λάφι λέσκε».

16. (α) Σο πρέπει τι κεράς οντουλένγκε σο χασαρντέ εκχέ αγαπημέ τζενές; (β) Σο βακερέλα αμένγκε ο Ιεχωβά τι κεράς σαρ ντικχάσα κο εδάφιος Ιακώβου 1:27;

¹⁶ Σαρ η Ρουθ ατσσιλί πασέ κι Ναομί, σο χασαρντάς πι ρομές, αμέν-ντα δεν πρέπει τι τσσιναβάς τι αβάς πασέ οντουλέντε σο χασαρένα εκχέ αγαπημέ τζενές. Η Πόλα βακερέλα: «Κάνα μουλό μο ρομ ντα ατσσιλόμ κορκορί, ισινέ πασέ μάντε μπουτ τζενέ. Καζόμ νακχένας ο ντιβεσά όμως, οντουλά τζενέ βουρτισάλε κο πράγματα σο κερένας. Αλλά μιρί ζωή αλλαξάλι ντιπ. Ισί μπαρί βοήθεια κάνα ο γιαβερά αγαβένα ότι εκ τζενό σο χασαρέλα πι ρομές ή πι ρομνιά χρειαζίντιβελα-λεν πασέ πέστε ατζέ-ντα άμα κα νακχέν μασεκά ή μπρεσά-ντα». Βέβαια, ο κάθε τζενό ισί διαφορετικός. Μερικοί σικλιόνα σουγκό τι τζουβντιόν μπι πουμαρέ τζενέσκο. Αλλά γιαβερά, κάθε φαρ σο κερένα κάτι σο ανγκλέ κερένας-λες γιεκ οντουλέ αγαπημέ τζενέσαρ, ντένα-πες γκοντί ότι χασαρντέ-λες ντα ανταβά ανέλα ντουκχ λένγκε γκίστε. Μα τι μπιστράς ότι ο Ιεχωβά ντέλα-αμέν αξία ντα σικαβέλα αμένγκε εμπιστοσύνη κάνα βακερέλα τι βοηθίνας οντουλέν σο χασαρντέ πουμαρέ ρομές ή ρομνιά.​—Διαβάνεν Ιακώβου 1:27.

17. Σόσκε χρειαζίντιβενα-αμέν πασέ πουμέντε οντουλά σο μουκχλάς-λεν λένγκο ρομ ή λένγκι ρομνί;

¹⁷ Γιαβερά τζενέ νακχένα μπαρέ προβλήματα ντα τθερένα πφανγκό γκι κάνα μουκχέλα-λεν λένγκο ρομ ή λένγκι ρομνί. Η Τζόις, σο λάκο ρομ μουκχλάς-λα γιαβεράκε, βακερέλα: «Η ντουκχ σο αντάς ο διαζύγιος ντικχίντιβελας πιο μπαρί κατά μεριμάσκι ντουκχ. Άμα μο ρομ μουλόας σε ατύχημας ή εκχέ νασφαλιμάσταρ, να κα τραμπίνελας-λες βοβ. Αλλά μο ρομ τραμπιντάς τι μουκχέλ-μαν. Ανταβά αντάς μάνγκε μπαρί λατζ».

18. Σαρ κα βοηθίνας οντουλέν σο ατσσιλέ μπι-ρομέσκε ή μπι-ρομνιάκε;

¹⁸ Κάνα κεράσα χουρντέ πράγματα για τι κεράς λατσσιπέ οντουλένγκε σο ατσσιλέ μπι-ρομέσκε ή μπι-ρομνιάκε, σικαβάσα λένγκε ότι μανγκάσα-λεν. Ακανά χρειαζίντιβενα ατζέ πιο μπουτ τι τθερέν λατσσέ αμαλέν. (Παρ. 17:​17) Σαρ κα σικαβέν ότι ισινέν λένγκε αμαλά; Κα αβέλας λατσσό τι βακερέν λένγκε τι αβέν κχερέ για τι χαν γιεκ, τι κερέν παρέα ή τι τζαν κο έργος λέντζαρ. Κάτι γιαβέρ ισί τι βακερέν λένγκε τι κερέν γιεκ τουμέντζαρ ι φαμιλιάκι λατρεία. Αντικάς, κα κερέν ι Ιεχωβάσκο γκι, επειδή βοβ ισί «πασέ οντουλέντε σο τθερένα πφανγκό γκι» ντα «αρακχαβέλα ι χηρέν».​—Ψαλμ. 34:​18· 68:5.

19. Σο μανγκένα τι κερέν σαρ βακερέλα ο εδάφιος 1 Πέτρου 3:8;

¹⁹ Ατζεχάνικ, κάνα η Βασιλεία ι Ντεβλέσκι κα κυβερνίνελ ι πφουβ, σαρέ ο «στεναχώριες κα μπιστάρντιβεν». Μπεσάσα σαρ σαρ τι αβέλ ο βακίτι σο «ο πουρανέ να κα αβέν κι γκοντί ούτε κο γκι»! (Ησ. 65:​16, 17) Μέχρι τι αβέλ οντουβά ντιβές, τι αβάς πασέ ο εκ κο γιαβέρ ντα τι σικαβάς λαφίντζαρ ντα οντουλέντζαρ σο κεράσα ότι μανγκάσα σαρέ ι πφραλέν ντα ι πφενίν.​—Διαβάνεν 1 Πέτρου 3:8.