Σαρ τι Ερεσέν κο Γκι Οντουλένγκο σο να Τθερένα Θρησκεία

1. Καγιά αλλαγή αβιλί-πες ο τελευταία μπρεσά μερικέ τθεμέντε;

ΓΙΑ χιλιάδες μπρεσά, ο πιο μπουτ τζενέ κο ντουνιάς τθερένας κάποια θρησκεία. Αλλά ο τελευταία μπρεσά αβιλί-πες εκ μπαρί αλλαγή. Καζόμ τζάλα, ο τζενέ σο να τθερένα θρησκεία αβένα πιο μπουτ. Ντα μερικέ τθεμέντε οντουλά σο βακερένα ότι να τθερένα θρησκεία ισί πιο μπουτ οντουλένταρ σο τθερένα.b​—Ματθ. 24:12.

2. Σόσκε αζόμ μπουτ τζενέ να τθερένα θρησκεία;

² Σόσκε ο τζενέ σο να τθερένα θρησκεία αβένα πιο μπουτ;c Μερικοί μπορεί τι ντένα προσοχή είτε κο απολαύσεις είτε πουμαρέ προβληματέντε. (Λουκ. 8:​14) Μερικοί σο πακιάνας κο Ντεβέλ, ακανά να πακιάνα. Γιαβερά πακιάνα κο Ντεβέλ αλλά αμντίνενα ότι η θρησκεία νανέ αμαρέ ντιβεσένγκε, να κερέλα αμένγκε λατσσιπέ ντα ότι τζάλα κόντρα οντουλέντζαρ σο βακερέλα η επιστήμη ντα ο γκοντιαβέρ τζενέ. Μπορεί τι ασουνένα πουμαρέ αμαλένταρ, πουμαρέ δασκαλόνταρ ή οντουλένταρ σο τθερένα μπαρό ναβ ότι η ζωή αβιλί κατά εξέλιξη, αλλά μπουτ χάνικ φαρ ασουνένα ότι ισί λατσσό τι πακιάν κο Ντεβέλ. Γιαβερά να μανγκένα ιτς ι παπαζίν σο να τσαλιόνα τι τθερέν λοβέ ντα εξουσία. Μερικέ τθεμέντε, ο κυβερνήσεις νικαβένα νόμους σο να μουκχένα ι τζενέν τι κερέν πράγματα ι θρησκειάκε.

3. Σο μανγκέλα τι βοηθίνελ-αμέν τι κεράς ανταβά μάθημας;

³ Ο Ιησούς μπεκλεντίνελα αμένταρ τι “κεράς μαθητέν σαρέ κατά τθεμά”. (Ματθ. 28:​19) Σαρ κα βοηθίνας ι τζενέν σο να τθερένα θρησκεία τι σικλιόν τι μανγκέν ι Ντεβλές ντα τι αβέν μαθητές ι Χριστόσκε; Πρέπει τι τθεράς αμαρέ γκοντιάτε κάι μπαριλέ ο τζενέ. Για παράδειγμας, ο τζενέ κατά Ευρώπη μπορεί μα τι ασουνένα ο λατσσέ αμπέρια καζόμ ασουνένα-λεν ο τζενέ κατά Ασία. Σόσκε; Κι Ευρώπη, μπουτ τζενέ τζανένα κάποια πράγματα ι Γραφιάκε ντα ασουντέ ότι ο Ντεβέλ κερντάς σαρέ ο πράγματα. Αλλά κι Ασία ο πιο μπουτ τζενέ τζανένα μπουτ χάνικ πράγματα ή τίποτα ι Γραφιάκε ντα μπορεί μα τι πακιάνα εκχέ Δημιουργόστε. Ανταβά μάθημας μανγκέλα τι βοηθίνελ-αμέν τι ερεσάς κο γκι σαρέ οντουλένγκο σο αρακχάσα κο έργος, κατάρ-ντα τι αβέν ή σο-ντα τι πακιάνα.

ΜΑ ΑΜΝΤΙΝΕΝ ΟΤΙ ΝΑΣΤΙ ΕΡΕΣΕΝΑ ΛΕΝΓΚΕ ΓΚΙΣΤΕ

4. Σόσκε δεν πρέπει τι αμντίνας ότι ναστί ερεσάσα κι τζενένγκο γκι;

⁴ Μα Αμντίνεν ότι Ναστί Ερεσένα Λένγκε Γκίστε. Κάθε μπρες, τζενέ σο να τθερένας θρησκεία αβένα Μάρτυρες ι Ιεχωβάσκε. Μπουτ λένταρ να κερένας μπέτι πράγματα ντα να μανγκένας ιτς ο θρησκείες σο χουχαβένα ι τζενέν. Γιαβερά κερένας μπέτι πράγματα ντα τθερένας γκεραλέ συνήθειες σο έπρεπε τι τσσιναβέν-λεν. Ισινάμ σίγουροι ότι ο Ιεχωβά κα βοηθίνελ-αμέν τι αρακχάς οντουλέν σο “λένγκο γκι μανγκέλα τι σικλιόλ ι αλήθεια σο ντέλα ζωή για πάντα”.​—Πράξ. 13:​48· 1 Τιμ. 2:3, 4.

5. Σο κερέλα ι τζενέν μπουτ φαρ τι ασουνέν οντουλά σο βακεράσα λένγκε;

⁵ Τι Αβέν Ευγενικοί ντα μα τι Ανέν-λεν σε Δύσκολη Θέση. Μπουτ φαρ νανέ αμαρέ λάφια σο κερένα ι τζενέν τι ασουνέν ο λατσσέ αμπέρια αλλά ο τρόπος σο βακεράσα-λεν. Εκτιμίνενα σο κεράσα λέντζαρ λάφι ευγενικά, σο να ανάσα-λεν σε δύσκολη θέση ντα σο ενδιαφερίντιβασα λένγκε μπαγιά. Να πιένασα-λεν τι ασουνέν οντουλά σο βακεράσα λένγκε. Αλλά προσπαθίνασα τι αγαβάς σόσκε να τθερένα θρησκεία. Για παράδειγμας, σικλιάσα ότι μερικοί να μπεϊντίνενα τι κερέν λάφι ι θρησκειάκε τζενέντζαρ σο να τζανένα-λεν. Γιαβερά βακερένα ότι νανέ σουκάρ τι πουτσάς εκχέ τζενές σο πακιάλα. Γιαβερά πάλι λατζάνα κάνα ντικχένα-λεν ο γιαβερά τι διαβάνεν ι Γραφή, ειδικά ι Μαρτυρέντζαρ. Σαρ-ντα τι αβέν ο πράγματα, προσπαθίνασα τι αγαβάς σαρ νιωθίνενα.​—2 Τιμ. 2:​24, υποσ.

6. Σαρ κερέλας λάφι ο απόστολος Παύλος κο τζενέ, ντα σαρ κα κεράς αμέν-ντα οντουβά σο κερντάς;

⁶ Σο μπορίνασα τι κεράς άμα εκ τζενό να μπεϊντίνελα τι χρησιμοποιήνας λάφια σαρ «Αγία Γραφή», «δημιουργία», «Ντεβέλ» ή «θρησκεία»; Ισί λατσσό τι κεράς λέντζαρ λάφι γιαβέρτουλους, σαρ ο απόστολος Παύλος. Κάνα ο Παύλος κερέλας λάφι ι Ιουδαιόντζαρ, κερέλας λέντζαρ λάφι λογικά κατά Γραφή. Αλλά κάνα κερντάς λάφι ι μπαλαμέντζαρ κο Άρειος Πάγος, να βακερντάς ότι λέσκε λάφια ισινέ κατά Γραφή. (Πράξ. 17:2, 3, 22-31) Σαρ κα κεράς οντουβά σο κερέλας ο Παύλος; Άμα κα αρακχέν εκχέ τζενές σο να πακιάλα κι Γραφή, μπορεί τι αβέλας λατσσό μα τι βακερέν λέσκε ότι τουμαρέ λάφια ισί κατά Γραφή. Άμα αγαβένα ότι εκ τζενό να μανγκέλα τι ντικχέν-λες ο γιαβερά τι διαβάνελ ι Γραφή τουμέντζαρ, σικαβέν λέσκε εδάφια χωρίς τι αγαβέν ο γιαβερά, για παράδειγμας τουμαρέ κινητόσταρ.

7. Για τι αβάς σαρ ο Παύλος, σαρ βακερένα ο εδάφια 1 Κορινθίους 9:​20-23, σο μπορεί τι χρειαζίντιβελ τι κεράς;

⁷ Τι Αγαβέν-λεν ντα τι Ασουνέν-λεν. Πρέπει τι προσπαθίνας τι αγαβάς σόσκε ο τζενέ σο αρακχάσα σκεφτίνενα αντικάς σαρ σκεφτίνενα. (Παρ. 20:5) Σκεφτίνεν πάλι ι Παυλός. Μπαριλό ι Ιουδαιόντζαρ. Αλλά έπρεπε τι κερέλ λάφι γιαβέρτουλους οντουλέντζαρ σο ισινέ γιαβερέ τθεμένταρ, σο τζανένας χάνικ πράγματα ή τίποτα ι Ιεχωβάσκε ντα ι Γραφιάκε. Για τι αγαβάς πιο λατσσές σο τθερένα ο τζενέ πουμαρέ γκοντιάτε ντα πουμαρέ γκίστε, μπορεί τι χρειαζίντιβελ τι ρόντας ή τι πουτσάς πφραλέν σο κερένα μπουτ μπρεσά ο έργος.​—Διαβάνεν 1 Κορινθίους 9:​20-23.

8. Καβά ισί εκ τρόπος για τι αρχίνας τι κεράς λάφι ι Γραφιάκε;

⁸ Μανγκάσα τι αρακχάς οντουλέν σο “αξίνενα”. (Ματθ. 10:​11) Για τι κεράς-λες ανταβά, πρέπει τι πουτσάς ι τζενέν σο πακιάνα ντα σοράν τι ασουνάς-λεν λατσσές. Εκ πφραλ κι Αγγλία πουτσέλα ι τζενές σο πακιάλα ότι κα βοηθίνελ-λες τι τθερέλ ευτυχισμέ μπιαβ, τι μπαριαρέλ πι τσσαβέν ή τι νταϊντίνελ κο αδικίες. Αφού ασουνέλα-λες, βακερέλα: «Σαρ ντικχέσα ακαγιά συμβουλή σο γραφίντιλι πριν από 2.000 μπρεσά περίπου;» Σοράν, χωρίς τι βακερέλ ο λάφι «Αγία Γραφή», σικαβέλα λέσκε πι κινητόσταρ εδάφια σο τραμπιντάς.

ΤΙ ΕΡΕΣΕΝ ΚΙ ΤΖΕΝΕΝΓΚΟ ΓΚΙ

9. Σαρ κα βοηθίνας ι τζενέν σο μπουτ φαρ να μανγκένα τι κερέν λάφι ι Ντεβλέσκε;

⁹ Για τι ερεσάς κι τζενένγκο γκι, σο μπουτ φαρ να μανγκένα τι κερέν λάφι ι Ντεβλέσκε, ισί λατσσό τι πουτράς λένγκε εκχέ γιαβερέ πραγμάσκε σο μανγκένα τι ασουνέν. Για παράδειγμας, μπουτ τζενέ μπεϊντίνενα τι ντικχέν ο πράγματα σο ισί κι πφουβ ντα κο ουρανός. Κα μπορίναας τι βακεράς κάτι ασακό: «Μπορεί τι τζανέσα ότι για τι λατσσαρέν ο τζενέ μπουτ πράγματα, ντικχλέ γιαβερά πράγματα σο ισινέ κι πφουβ. Για παράδειγμας, οντουλά σο κερένα ο μικρόφωνα ντικχένα σαρ ισί κερντέ ο κανά ντα οντουλά σο κερένα ο φωτογραφικές μηχανές ντικχένα σαρ ισί κερντέ ο γιακχά. Σο αβέλα τι γκοντιάτε κάνα ντικχέσα ο πράγματα σο ισί κι πφουβ; Πακιάσα ότι κερντιλέ εκχέ μπαρέ ζοριάταρ, εκχέσταρ σο ισί γκοντιαβέρ ή γιαβερτθάρ;» Αφού κα ασουνάς λατσσές, μπορίνασα τι βακεράς: «Ο μηχανικοί σικλιόνα κατά τρόπος σο κερντιλέ ο κανά ντα ο γιακχά, αλλά κι πραγματικότητα κάσταρ σικλιόνα; Μπεϊντιντόμ ο λάφια εκχέ πουρανέ τζενέσκε σο γραφιντάς ποιήματα: “Οντουβά σο κερντάς ο καν ναστί ασουνέλα; Οντουβά σο κερντάς ι γιακχ ναστί ντικχέλα; . . . Βοβ σικλιαρέλα ι τζενέν!” Μερικοί επιστήμονες συμφωνίνενα ανταλέ λαφίντζαρ ντα πακιάνα κι δημιουργία». (Ψαλμ. 94:9, 10) Κα μπορίναας σοράν τι σικαβάς εκ βίντεος κατά σειρά «Απόψεις για την Προέλευση της Ζωής» σο ισί κο τμήμας «Συνεντεύξεις και Εμπειρίες» κο ιστότοπος jw.org^®. (Τραμπίνεν ΕΚΔΟΣΕΙΣ > ΒΙΝΤΕΟ) Ή κα μπορίναας τι ντας-λες ο βιβλιάριος Δημιουργήθηκε η Ζωή; ή ο βιβλιάριος Η Προέλευση της Ζωής​—Πέντε Ερωτήματα που Αξίζει να Τεθούν.

10. Σαρ κα πουτράς συζήτηση εκχέ τζενέσαρ σο να μανγκέλα τι κερέλ λάφι ι Ντεβλέσκε;

¹⁰ Ο πιο μπουτ τζενέ μανγκένα τι τζαν πιο λατσσές ο πράγματα. Όμως, νταρένα ότι η πφουβ κα καταστραφίντιβελ ή ότι να κα ατσσόλ καέκ τζενό οπρά-λάτε. Εκ επίσκοπος κι Νορβηγία βακερέλα ότι ο τζενέ σο να μανγκένα τι κερέν λάφι ι Ντεβλέσκε, μπουτ φαρ μανγκένα τι κερέν λάφι οντουλένγκε σο αβένα-πες κο ντουνιάς. Αφού χαιρετίνελα ι τζενές, βακερέλα: «Πακιάσα ότι κα αβέν πιο λατσσέ ντιβεσά; Κον κα ανέλ-λεν; Ο πολιτικοί, ο επιστήμονες ή εκ γιαβέρ;» Ασουνέλα ι απάντηση ντα σοράν διαβάνελα ή βακερέλα αβριάλ εκ εδάφιος σο κερέλα λάφι πιο λατσσέ ντιβεσένγκε. Μερικά τζενέ μπεϊντίνενα ι υπόσχεση ι Γραφιάκι ότι η πφουβ κα ατσσόλ για πάντα ντα ότι ο λατσσέ τζενέ κα τζουβντιόν για πάντα λάτε.​—Ψαλμ. 37:​29· Εκκλ. 1:4.

11. Σόσκε δεν πρέπει τι κεράς λάφι σαρέ ι τζενέντζαρ εκχέ τροπόσαρ, ντα σαρ μπορίνασα τι μοιάζας κο Παύλος σαρ βακερένα ο εδάφια Ρωμαίους 1:​14-16;

¹¹ Ισί λατσσό μα τι κεράς λάφι σαρέ ι τζενέντζαρ εκχέ τροπόσαρ. Σόσκε; Επειδή κάθε τζενό ισί διαφορετικός. Εκ λάφι σο μπεϊντίνελα τι ασουνέλ εκ τζενό μπορεί μα τι μπεϊντίνελα-λες εκ γιαβέρ. Ισί τζενέ σο μανγκένα τι κερέν λάφι ι Ντεβλέσκε ή ι Γραφιάκε, αλλά γιαβερά μανγκένα πρώτα τι κερέν λάφι γιαβερέ πραγματένγκε. Σαρ-ντα τι αβέν ο πράγματα, δεν πρέπει τι χασαράς ο ευκαιρίες σο ντιντιόνα-αμέν τι κεράς λάφι σαβέ τι μανγκές τζενένγκε. (Διαβάνεν Ρωμαίους 1:​14-16) Πρέπει τι ντας-αμέν γκοντί ότι ο Ιεχωβά ισί οντουβά σο κερέλα τι μπαριόλ η αλήθεια κο γκι οντουλένγκο σο μανγκένα ο σωστός.​—1 Κορ. 3:6, 7.

ΣΑΡ ΤΙ ΣΙΚΛΙΑΡΕΝ Ι ΑΛΗΘΕΙΑ ΚΟ ΤΖΕΝΕ ΣΟ ΙΣΙ ΚΑΤΑ ΑΣΙΑ

12. Σαρ κα βοηθίνας ι τζενέν κατά Ασία σο να σκεφτιντέ άμα υπαρχίντιβελα Δημιουργός;

¹² Σαρό κο ντουνιάς, μπουτ πφραλά αρακχένα τζενέν κατά Ασία, σο μπάζιμα αβένα τθεμένταρ σο ο κυβερνήσεις να μουκχένα-λεν τι κερέν πράγματα ι θρησκειάκε. Μπερεκέτι τθεμέντε κι Ασία, μπουτ τζενέ ποτές να σκεφτιντέ άμα υπαρχίντιβελα Δημιουργός. Ισί τζενέ σο μανγκένα τι σικλιόν ντα τι κερέν μελέτη, γιαβερά όμως σακιντίνενα τι σικλιόν κάτι νεβό. Σαρ κα βοηθίνας-λεν; Πφραλά σο κερένα μπουτ μπρεσά ο έργος σικλιλέ ότι ισί λατσσό κι αρχή τι κερέν λέντζαρ λάφι σαρ τι αβένας λένγκε αμαλά ντα τι σικαβέν λένγκε ενδιαφέρον. Σοράν, κάνα αρακχένα ευκαιρία, βακερένα λένγκε σαρ βοηθιντάς-λεν η Γραφή τι κερέν πιο λατσσί πουμαρί ζωή.

13. Σο μπορεί τι ταρτίνελ ι προσοχή μερικέ τζενένγκι κι Γραφή; (Ντικχ ι φωτογραφία κι ανγκλαϊνί σελίδα)

¹³ Μπουτ τζενέ μπεϊντίνενα σο η Γραφή τθερέλα συμβουλές λένγκε ζωγιάκε. (Εκκλ. 7:​12) Κι Νέα Υόρκη, εκ πφεν σο τζάλα τζενέντε σο κερένα λάφι ι μανδαρινική τσσιπ βακερέλα: «Προσπαθίναβα τι σικαβάβ ενδιαφέρον κο τζενέ ντα τι ασουνάβ-λεν. Άμα κα σικλιάβ ότι εκ τζενό αβιλό ακανά εκχέ γιαβερέ τθεμέσταρ, μπορεί τι πουτσάβ-λες: “Σαρ νακχέσα ακατέ; Αρακχλάν μπουτί; Συμπεριφερίντιβενα τούκε λατσσές ο τζενέ;”» Μπάζιμα, ανταβά βοηθίνελα-λα τι βακερέλ κάτι κατά Γραφή. Κάνα αρακχέλα ι ευκαιρία, μπορεί τι βακερέλ: «Καβά πακιάσα ότι ισί ο πιο σημαντικός πράγμας σο πρέπει τι κεράς για τι τζας-λεν λατσσές ι γιαβερέντζαρ; Τι σικαβάβ τούκε εκ παροιμία κατά Αγία Γραφή; Βακερέλα: “Κάνα εκ τζενό χάλα-πες εκχέ γιαβερέσαρ ισί σαρ τι περαβέλα ο ντουβάρι σο ατσσικιαρέλα ο πανιά εκχέ λενιάκε· πριν τι αρχίνελ ο καβγκάς, λε-τουτ ντα νας”. Πακιάσα ότι ανταγιά συμβουλή κα βοηθίνελ-αμέν τι τζας-λεν λατσσές ι γιαβερέντζαρ;» (Παρ. 17:​14) Ασακέ συζητήσεις βοηθίνενα-αμέν τι αγαβάς καλά τζενέ κα μανγκένας τι τζας λένγκε πάλι.

14. Σαρ βοηθίνελα εκ πφραλ κι Ασία ι τζενέν σο βακερένα ότι να πακιάνα κο Ντεβέλ;

¹⁴ Σο αβέλα-πες οντουλέντζαρ σο βακερένα αμένγκε ότι να πακιάνα κο Ντεβέλ; Εκ πφραλ κι Ασία, σο κερέλα μπουτ μπρεσά έργος τζενέντε σο να τθερένα θρησκεία, βακερέλα: «Ο πιο μπουτ φαρ, κάνα εκ τζενό ατθέ βακερέλα: “Να πακιάβα κο Ντεβέλ”, μανγκέλα τι βακερέλ ότι να πακιάλα ι ντεβλέν σο πακιάνα ο πιο μπουτ τζενέ λέσκε τθεμέστε. Οτθάρ, βακεράβα ότι ισί μπαγιά ανταβά επειδή ο τζενέ κερένα ι πιο μπουτέ ντεβλέν, οντουλέσκε νανέ αληθινοί. Μπουτ φαρ διαβάναβα ο εδάφιος Ιερεμίας 16:​20: “Μπορίνελα εκ τζενό τι κερέλ πέσκε εκχέ ντεβλές σο νανέ μπαγιά ντεβέλ;” Σοράν πουτσάβα: “Σαρ κα αγαβάς καβά ντεβέλ ισί αληθινός ντα καβά κερντιλό τζενένταρ;” Ασουνάβα προσεκτικά ντα σοράν διαβάναβα ο εδάφιος Ησαΐας 41:​23: “Βακερέν αμένγκε σο κα αβέλ-πες ανγκλά-αμέντε για τι τζανάς άμα ισινέν ντεβέλ”. Σοράν, βακεράβα λένγκε εκ παράδειγμας σο σικαβέλα σαρ βακερντάς ο Ιεχωβά κάτι σο νικίστιλο μπαγιά πιο σοράν».

15. Σο σικλιάσα εκχέ πφραλέσταρ κατά Ανατολική Ασία;

¹⁵ Ντικχέν σο κερέλα κο επανεπισκέψεις εκ πφραλ κι Ανατολική Ασία. Βακερέλα: «Σικαβάβα λένγκε ι σοφία ι Γραφιάκι, προφητείες κατά Γραφή σο αβιλέ-πες μπαγιά ντα νόμοι σο ισί κο σύμπαν. Σοράν, βακεράβα λένγκε σαρ σικαβένα σαρέ ανταλά πράγματα ότι υπαρχίντιβελα Δημιουργός σο ισί τζουβντό ντα γκοντιαβέρ. Κάνα εκ τζενό αρχίνελα τι σκεφτίνελ ότι μπορεί τι υπαρχίντιβελα Ντεβέλ, σικαβάβα λέσκε σο βακερέλα η Γραφή ι Ιεχωβάσκε».

16. Σόσκε πρέπει οντουλά σο κερένα μελέτη τι πακιάν κο Ντεβέλ ντα κι Γραφή σαρ βακερέλα ο εδάφιος Εβραίους 11:6, ντα σαρ κα βοηθίνας-λεν τι κερέν-λες ανταβά;

¹⁶ Κάνα κεράσα μελέτη τζενέν σο να τθερένα θρησκεία, δεν πρέπει τι τσσιναβάς τι μπαριαράς αντρά-λέντε πίστη κο Ντεβέλ. (Διαβάνεν Εβραίους 11:6) Χρειαζίντιβελα επίσης τι βοηθίνας-λεν τι πακιάν κι Γραφή. Οντουλέσκε, μπορεί τι βακεράς κάποια πράγματα μπερεκέτι φαρ. Κάθε φαρ σο κεράσα λέντζαρ μελέτη, μπορεί τι χρειαζίντιβελα τι σικαβάς λένγκε σόσκε η Γραφή ισί ο Λάφι ι Ντεβλέσκο. Ανταβά μπορεί τι κεράς-λες άμα κα βακεράς λένγκε χάνικ λαφίντζαρ σαρ νικίστιλε μπαγιά ο προφητείες ι Γραφιάκε, σαρ η Γραφή ισί σωστή κάνα κερέλα λάφι ι πραγματένγκε σο τθερένα τι κερέν με την επιστήμη ντα με την ιστορία ντα σαρ βοηθίνελα-αμέν αμαρέ ζωγιάτε.

17. Σαρ κα βοηθίνελ ι τζενέν αμαρί αγάπη;

¹⁷ Βοηθίνασα ι τζενέν τι αβέν μαθητές ι Χριστόσκε κάνα σικαβάσα λένγκε αγάπη, είτε τθερένα θρησκεία είτε να τθερένα. (1 Κορ. 13:1) Καζόμ σικλιαράσα-λεν, οντουβά σο μανγκάσα ισί τι σικαβάς ότι ο Ντεβέλ μανγκέλα-αμέν ντα ότι μανγκέλα τι μανγκάς-λες αμέν-ντα. Κάθε μπρες, χιλιάδες τζενέ σο ενδιαφερίντιβενας χάνικ ή να ενδιαφερίντιβενας ιτς ι θρησκειάκε μπολντιόνα σόσκε σικλιλέ τι μανγκέν ι Ντεβλές. Οτθάρ, μα αμντίνεν ότι ναστί ερεσένα λένγκε γκίστε. Τι πφαμπόν σαβέ τι μανγκές τζενένγκε. Τι ασουνέν-λεν. Τι προσπαθίνεν τι αγαβέν-λεν. Τι σικλιαρέν-λεν τι αβέν μαθητές ι Χριστόσκε τουμαρέ παραδειγμάσαρ.