Ο τζενέ πρέπει τι ασουνέν ι προειδοποίηση καζόμ ι Ντεβλέσκι «καταιγίδα» ερεσέλα!
Ο Κρίσεις σο Ανέλα ο Ντεβέλ—Ντέλα Πάντα κο Τζενέ Μπερεκέτι Χρόνος;
ΕΚ ΤΖΕΝΟ σο βακερέλα ο καιρός ντικχέλα λατσσές σο σικαβέλα ο ραντάρ. Ντικχέλα ότι ατζεχάνικ κα αβέλ εκ επικίνδυνη καταιγίδα εκχέ τθεμέστε σο τζουβντιόνα μπουτ τζενέ. Επειδή μανγκέλα τι αβέν αρακχαντέ ο τζενέ, κερέλα ο πιο λατσσό σο μπορίνελα για τι προειδοποιήνελ-λεν.
Αντικάς ο Ιεχωβά-ντα, προειδοποιήνελα ακανά ι τζενέν ότι κα αβέλ εκ «καταιγίδα» σο ισί πιο επικίνδυνη σαρέ κατά πράγματα σο κα μπορίνενας τι ασουνέν ο τζενέ κο καιρός. Σαρ κερέλα-λες ανταβά; Σόσκε μπορίνασα τι αβάς σίγουροι ότι ντέλα κο τζενέ ο χρόνος σο χρειαζίντιβενα για τι ντεν καν; Για τι αρακχάς ο απαντήσεις, κα ντικχάς πρώτα μερικές προειδοποιήσεις σο ντινάς ο Ιεχωβά κο πουρανέ μπρεσά.
Ο ΝΤΕΒΕΛ ΠΡΟΕΙΔΟΠΟΙΗΝΤΑΣ-ΛΕΝ ΠΙΟ ΤΖΑΝΓΚΛΕ
Κο πουρανέ μπρεσά, ο Ιεχωβά βακερντάας μπερεκέτι φαρ ότι κα ανέλας “καταιγίδες”, ή γιαβέρτουλους κρίσεις, οπράλ οντουλέντε σο να μανγκένας τι ντεν-λες καν. (Παρ. 10:25· Ιερ. 30:23) Κάθε φαρ, προειδοποιήνελας-λεν πιο τζανγκλέ ντα βακερέλας λένγκε σο αλλαγές έπρεπε τι κερέν για τι ντεν-λες καν. (2 Βασ. 17:12-15· Νεεμ. 9:29, 30) Για τι βοηθίνελ ι τζενέν τι αλλάνεν, μπουτ φαρ τσσουβέλας πι πιστέ υπηρετόν τι κερέν λάφι για την κρίση σο κα αβέλας ντα τι βοηθίνεν-λεν τι αγαβέν ότι έπρεπε τι κερέν κάτι χωρίς τι χασαρέν χρόνος.—Αμώς 3:7.
Ο Νώε ισινέ εκ ασακό πιστός υπηρέτης. Μπουτ μπρεσά, βακερέλας μπίνταρανες κο τζενέ σο κερένας λουμνικανέ ντα βίαια πράγματα ότι κα αβέλας εκ Κατακλυσμός σαρί κι πφουβ. (Γέν. 6:9-13, 17) Επίσης, βακερέλας λένγκε σο έπρεπε τι κερέν για τι σώντιβεν. Κερντάς-λες ανταβά αζόμ μπουτ σο βακέρντιλο πιο σοράν τζενό «σο κερέλας λάφι για το δίκαια πράγματα ι Ντεβλέσκε».—2 Πέτρ. 2:5.
Παρόλο σο ο Νώε κερέλας αζόμ μπαρέ προσπάθειες, ο τζενέ σο τζουβντιλέ πριν κατά Κατακλυσμός να ντινέ-λες σημασία κάνα βακερέλας λένγκε ο λάφια ι Ντεβλέσκε. Σικαντέ ότι να τθερένας ιτς πίστη. Οτθάρ, μουλέ κάνα «αβιλό ο Κατακλυσμός ντα καταστραφιντάς-λεν σαριλέν». (Ματθ. 24:39· Εβρ. 11:7) Καζόμ ερεσέλας λένγκο τέλος, ναστί βακερένας ότι ο Ντεβέλ να προειδοποιηντάας-λεν.
Γιαβερά φορές, ο Ιεχωβά προειδοποιηντάς μερικέ τζενέν χάνικ πριν τι ανέλ πι κρίση σο ισί σαρ «καταιγίδα». Αζομάν-ντα όμως, ντινάς οντουλέ τζενέντε μπερεκέτι χρόνος για τι ντεν καν. Για παράδειγμας, κάνα αντάς ο Ντες Πληγές κο τζενέ σο τζουβντιόνας κι πουρανί Αίγυπτος, προειδοποιήνελας-λεν πριν τι ανέλ ι κάθε πληγή. Για παράδειγμας, μπουτσσαντάς ι Μωυσής ντα τον Ααρών τι προειδοποιήνεν ι Φαραώς ντα λέσκε υπηρετόν ότι κα αβέλας η έβδομη πληγή, ο μπαρό χαλάζι σο κερντάς μπαρό ζιάνι. Αφού ο χαλάζι κα αβέλας ο γιαβέρ ντιβές, ντινάς-λεν ο Ντεβέλ μπερεκέτι χρόνος για τι αρακχέν εκ λατσσό τθαν τι αρακχαβέν-πες; Η Γραφή βακερέλα: «Ο υπηρέτες ι Φαραώσκε σο νταρασάλε κατά λάφια ι Ιεχωβάσκε αντέ σουγκό πουμαρέ υπηρετόν ντα πουμαρέ ζώα αντρέ κο κχερ, αλλά οντουλά σο να ντινέ σημασία κο λάφια κι Ιεχωβάσκε μουκχλέ πουμαρέ υπηρετόν ντα πουμαρέ ζώα αβρί». (Έξοδ. 9:18-21) Σαρ αγαβάσα, κάνα προειδοποιηντάς-λεν ο Ιεχωβά, ντινάς-λεν ο χρόνος σο χρειαζίντιβενας ντα αντικάς οντουλά σο ντινέ καν αμέσως μπορισάλε τι αρακχαβέν-πες καζόμ πιο λατσσές αβέλας-πες κατά πληγή.
Ο Φαραώ ντα λέσκε υπηρέτες πάλι προειδοποιησάλε ότι κα αβέλας η τελευταία πληγή. Όμως, επειδή να τθερένας γκοντί, να ντινέ σημασία κι προειδοποίηση. (Έξοδ. 4:22, 23) Οντουλέσκε-ντα, ο πρώτα τσσαβέ λένγκε μουλέ. Σο μπέτι αποτέλεσμας! (Έξοδ. 11:4-10· 12:29) Τθερένας χρόνος για τι ντεν καν κι προειδοποίηση; Βα! Ο Μωυσής προειδοποιηντάς αμέσως ι Ισραηλιτέν ότι κα αβέλας η τελευταία πληγή ντα βακερντάς λένγκε σο έπρεπε τι κερέν για τι σώνεν πουμαρέ φαμιλίν. (Έξοδ. 12:21-28) Καζόμ τζενέ ντινέ καν κι προειδοποίηση; Περίπου τριν εκατομμύρια τζενέ—Ισραηλίτες ντα μπουτ γιαβερά κατά Αίγυπτος ντα γιαβερτθάρ—σωσάλε κατά κρίση σο αντάς ο Ντεβέλ ντα νασλέ κατά Αίγυπτος.—Έξοδ. 12:38· υποσ.
Σαρ σικαβένα ανταλά παραδείγματα, ο Ιεχωβά πάντα ντέλας κο τζενέ μπερεκέτι χρόνος για τι ντεν καν κο προειδοποιήσεις λέσκε. (Δευτ. 32:4) Σόσκε κερέλας-λες ανταβά; Ο απόστολος Πέτρος εξηγιντάς ότι ο Ιεχωβά «να μανγκέλα τι καταστραφίντιβελ καέκ τζενό αλλά σαρέ τι μετανιώνεν». (2 Πέτρ. 3:9) Ισί μπαγιά ότι ο Ντεβέλ ενδιαφερίντιβελας ι τζενένγκε. Μανγκέλας τι μετανιώνεν ντα τι αλλάνεν πριν τι ανέλας πι κρίση.—Ησ. 48:17, 18· Ρωμ. 2:4.
ΣΑΡ ΝΤΑΣΑ ΚΑΝ ΚΙ ΝΤΕΒΛΕΣΚΙ ΠΡΟΕΙΔΟΠΟΙΗΣΗ ΑΝΤΙΒΕΣ
Αντιβές-ντα, σαρέ ο τζενέ πρέπει τι ντεν καν σε εκ σημαντική προειδοποίηση σο βακέρντιβελα σαρί κι πφουβ. Κάνα ο Ιησούς ισινέ κι πφουβ, βακερντάας ότι ανταβά ντουνιάς κα καταστραφίντιβελ κι «μπαρί στεναχώρια». (Ματθ. 24:21) Αντράλ εκχέ προφητειάταρ εξηγιντάς με λεπτομέρειες πι μαθητένγκε σο κα ντικχένας ντα σο κα νακχένας κάνα κα ερεσέλας οντουβά βακίτι. Βακερντάς σημαντικά πράγματα σο ντικχάσα τι αβέν-πες σαρό κο ντουνιάς αντιβές.—Ματθ. 24:3-12· Λουκ. 21:10-13.
Οτθάρ, ο Ιεχωβά βακερέλα ακανά σαριλένγκε τι υπηρετίνεν-λες ντα τι ντεν-λες καν. Μανγκέλα τι τθερέν ο τζενέ σο ντένα-λες καν πιο λατσσί ζωή ακανά αλλά μπουτ ευλογίες-ντα κο νεβό ντουνιάς σο κα αβέλ πφερντό δικαιοσύνη. (2 Πέτρ. 3:13) Για τι βοηθίνελ ι τζενέν τι πακιάν λέσκε υποσχέσεις, ο Ιεχωβά ντινάς-λεν ο «λατσσέ αμπέρια ι Βασιλειάκε» σο μπορίνενα τι σώνεν λένγκι ζωή. Ο Ιησούς βακερντάας ότι ανταλά αμπέρια «κα βακέρντιβεν σαρί κι πφουβ για τι ασουνέν-λεν σαρέ ο τθεμά». (Ματθ. 24:14) Ο Ντεβέλ οργανωντάς οντουλέν σο υπηρετίνενα-λες πιστά για τι μουτθαβέν ανταλά αμπέρια ι Ντεβλέσκε 240 τθεμέντε. Ο Ιεχωβά μανγκέλα τι ασουνέν ανταλά αμπέρια καζόμ πιο μπουτ τζενέ αβέλα-πες ντα τι σώντιβεν κάνα κα ανέλ πι δίκαια κρίση σο ισί σαρ «καταιγίδα».—Σοφ. 1:14, 15· 2:2, 3.
Άρα, η σημαντική ερώτηση σο πρέπει τι κεράς νανέ άμα ο Ιεχωβά ντέλα κο τζενέ μπερεκέτι χρόνος για τι ντεν καν κο προειδοποιήσεις λέσκε. Τζανάσα μπουτ λατσσές ότι πάντα κερέλα-λες ανταβά. Η σημαντική ερώτηση ισί: Κα ντεν καν ο τζενέ κι Ντεβλέσκι προειδοποίηση καζόμ υπαρχίντιβελα ατζέ χρόνος; Μακάρι αμέν, σο τσσουντάς-αμέν ο Ντεβέλ τι βακεράς ανταλά προειδοποιήσεις, τι συνεχίνας τι βοηθίνας καζόμ αβέλα-πες πιο μπουτ τζενέν τι σώντιβεν κατά τέλος ανταλέ ντουνιάσκο.