Τουμέν Φροντίνενα Τουμαρί Μπαρί Ασπίδα;

1, 2. (α) Σόσκε χρειαζίντιβασα «πίστη σαρ εκ μπαρί ασπίδα» σαρ βακερέλα ο εδάφιος Εφεσίους 6:​16; (β) Καλά ερωτήσεις κα ντικχάς;

ΤΘΕΡΕΝΑ τουμέν «πίστη σαρ εκ μπαρί ασπίδα»; (Διαβάνεν Εφεσίους 6:​16) Σίγουρα τθερένα. Σαρ εκ μπαρί ασπίδα σο αρακχαβέλα ο σώμας, αντικάς τουμαρί πίστη-ντα αρακχαβέλα-τουμέν κατά μπέτι πράγματα ανταλέ ντουνιάσκε σαρ ισί ο λουμνιπέ, η βία ή σαρέ ο γιαβερά πράγματα σο να μανγκέλα ο Ντεβέλ.

² Όμως, τζουβντιάσα «κο τελευταία ντιβεσά», ντα αμαρί πίστη κα συνεχίνελ τι δοκιμάντιβελ. (2 Τιμ. 3:1) Σαρ κα ντικχέν τουμαρί ασπίδα για τι αβέν σίγουροι ότι ισί ζουρανί; Ντα σαρ μπορίνενα τι ατσσικιαρέν τουμαρί πίστη ζουρανί; Για τι ντικχάς ο απαντήσεις ανταλέ ερωτησιέντε.

ΤΙ ΝΤΙΚΧΕΝ ΠΡΟΣΕΚΤΙΚΑ ΤΟΥΜΑΡΙ ΑΣΠΙΔΑ

3. Σο κερένας ο στρατιώτες κο ασπίδες, ντα σόσκε;

³ Κο πουρανέ μπρεσά, ο πιο μπουτ ασπίδες ι στρατιωτένγκε τθερένας οπράλ δέρμας. Μακχένας-λεν λάδι για μα τι χαλάντιβελ ο δέρμας ντα μα τι ασταρέν σκουριά ο μέταλλα. Άμα εκ στρατιώτης κα αγαβέλας ότι λέσκι ασπίδα χαλάντιλι, λατσσαρέλας-λα για τι αβέλ πάντα έτοιμος ι γιαβερέ τζενγκίσκε. Σο σικλιαρέλα-τουμέν ανταβά παράδειγμας;

4. Σόσκε πρέπει τι ντικχέν τουμαρί ασπίδα, ντα σαρ κα κερέν-λες ανταβά;

⁴ Σαρ ο στρατιώτες κο πουρανέ μπρεσά, αντικάς τουμέν-ντα πρέπει τι ντικχέν ντα τι φροντίνεν τουμαρί ασπίδα για τι αβέν πάντα έτοιμοι ι τζενγκίσκε. Σαρ Χριστιανοί κεράσα εκ τζένγκι, ντα αντρέ αμαρέ ντουσμανίντε ισί ο δαίμονες-ντα. (Εφεσ. 6:​10-12) Καέκ γιαβέρ ναστί φροντίνελα ι ασπίδα τουμένγκε. Σαρ μπορίνενα τι αβέν σίγουροι ότι ισινέν έτοιμοι τι νακχέν δοκιμασίες; Πρώτα, πρέπει τι προσευχίντιβεν τι βοηθίνελ-τουμέν ο Ντεβέλ. Σοράν, χρειαζίντιβελα τι λεν ο Λάφι ι Ντεβλέσκο για τι ντικχέν-τουμέν σαρ ντικχέλα-τουμέν ο Ντεβέλ. (Εβρ. 4:​12) Η Γραφή βακερέλα: «Τι τθερές εμπιστοσύνη κο Ιεχωβά σαρέ τι γκίσαρ ντα μα τι στηρίντιβες κο τρόπος σο αγαβέσα τούι ο πράγματα». (Παρ. 3:5, 6) Καζόμ τθερένα ανταβά τουμαρέ γκοντιάτε, σόσκε μα τι ντικχέν μερικές αποφάσεις σο λιντέν ακανά τελευταία; Για παράδειγμας, μήπως νακχλέν εκ μπαρό οικονομικός πρόβλημας; Κάνα αβιλό-πες ανταβά, αβιλί τουμαρέ γκοντιάτε η υπόσχεση ι Ιεχωβάσκι σο ισί κο εδάφιος Εβραίους 13:5: «Να κα μουκχάβ-τουτ ούτε κα παρατίναβ-τουτ»; Ντινάς-τουμέν ανταγιά υπόσχεση ι σιγουριά ότι ο Ιεχωβά κα βοηθίνελ-τουμέν; Άμα βα, ανταβά σικαβέλα ότι τουμαρί ασπίδα ισί ζουρανί.

5. Σο μπορεί τι αγαβέν κάνα κα ντικχέν προσεκτικά τουμαρί πίστη;

⁵ Κάνα κα ντικχέν προσεκτικά τουμαρί πίστη, μπορεί τι ατσσόν πουταρντέ μόσαρ οντουλέντζαρ σο κα αρακχέν. Μπορεί τι αγαβέν ότι ισινέν μπίζουρανε πραγματέντε σο να τζανένας. Για παράδειγμας, μπορεί τι αγαβέν ότι η μπαρί ανησυχία, ο ψέματα ντα ο πράγματα σο λένα τουμαρί ζορ κερντέ ζιάνι κι πίστη σο τθερένα. Άμα αβιλό-πες ανταβά, σαρ κα αρακχαβέν τουμαρί πίστη για μα τι αβέλ λάκε πιο μπαρό ζιάνι;

ΑΡΑΚΧΑΒΕΝ-ΤΟΥΜΕΝ ΚΑΤΑ ΠΡΑΓΜΑΤΑ ΣΟ ΚΕΡΕΝΑ ΖΙΑΝΙ ΚΙ ΠΙΣΤΗ

6. Καλά ισί μερικές λατσσέ ανησυχίες;

⁶ Μερικές ανησυχίες ισί λατσσέ. Για παράδειγμας, μανγκάσα τι κεράς ι Ιεχωβάσκο γκι ντα ι Ιησούσκο ντα ισί λατσσό τι ανησυχίνας ανταλέσκε. (1 Κορ. 7:​32) Άμα κερντάμ εκ μπαρί αμαρτία, ανησυχίνασα μπουτ μέχρι τι αβάς πάλι αμαλά ι Ντεβλέσαρ. (Ψαλμ. 38:​18) Επίσης, μανγκάσα τι κεράς αμαρέ ρομέσκο ή ρομνιάκο γκι ντα μανγκάσα ο λατσσιπέ αμαρέ φαμιλιάκο ντα ι πφραλένγκο κι κχανγκιρί, ντα ανησυχίνασα ανταλέσκε.​—1 Κορ. 7:​33· 2 Κορ. 11:28.

7. Σόσκε να χρειαζίντιβελα τι νταράς κατά τζενέ, σαρ βακερέλα ο εδάφιος Παροιμίες 29:25;

⁷ Οκιά μπάνταρ, η μπαρί ανησυχία κα μπορίνελας τι κερέλ αμένγκε ζιάνι κι πίστη. Για παράδειγμας, μπορεί τι ανησυχίνασα συνέχεια άμα κα τθεράς χαμπέ ντα σέα. (Ματθ. 6:​31, 32) Για τι νασκιαράς ανταγιά ανησυχία, μπορεί τι προσπαθίνας τι τθεράς μπουτ υλικά πράγματα. Κα μπορίναας ατζέ-ντα τι αβάς τζενέ σο μανγκένα μπουτ ο λοβέ. Άμα κα μουκχάς τι αβέλ-πες ανταβά, αμαρί πίστη κα αβέλ μπίζουρανι ντα κα αβέλ-πες αμένγκε μπαρό πνευματικός ζιάνι. (Μάρκ. 4:​19· 1 Τιμ. 6:​10) Ή κα μπορίναας τι ανησυχίνας μπουτ σαρ ντικχένα-αμέν ο γιαβερά. Αζομάν η νταρ μα τι πρασάν-αμέν ή μα τι τζαν αμέντζαρ κόντρα ο τζενέ μπορεί τι αβέλ πιο μπαρί κατά νταρ μα τι πφανγκάς ι Ιεχωβάσκο γκι. Για τι αρακχαβάς-αμέν, πρέπει τι μολίνας ι Ιεχωβάς τι ντελ-αμέν πίστη για μα τι νταράς κατά τζενέ.​—Διαβάνεν Παροιμίες 29:​25· Λουκ. 17:5.

8. Σο πρέπει τι κεράς άμα κα βακέρντιβεν ψέματα;

⁸ Ο Μπενγκ, «ο ντατ ι ψεμάσκο», τσσουβέλα οντουλέν σο ισί λέσκε βαστέντε για τι σικλιαρέλ ψέματα ι Ιεχωβάσκε, αμαρέ πφραλένγκε ντα αμαρέ πφενίνγκε. (Ιωάν. 8:​44) Για παράδειγμας, αποστάτες αντράλ κατά Ίντερνετ, κατά τηλεόραση ντα γιαβερτθάρ βακερένα ψέματα ντα κερένα ι τζενέν τι τθερέν λάθος άποψη για την οργάνωση ι Ιεχωβάσκι. Ανταλά ψέματα ισί αντρέ κο «βέλη [κι Μπενγκέσκε] σο τθερένα γιακ». (Εφεσ. 6:​16) Σο πρέπει τι κεράς άμα εκ τζενό κα βακερέλ ασακέ ψέματα; Να ασουνάσα! Σόσκε; Επειδή τθεράσα πίστη κο Ιεχωβά ντα ντάσα μπέσα αμαρέ πφραλένγκε. Να τθεράσα καέκ σχέση οντουλέντζαρ σο ισί αποστάτες. Ποτές να χάσα-αμέν λέντζαρ καέκ πραγμάσκε ατζέ-ντα άμα απλά μανγκάσα τι σικλιάς σο βακερένα.

9. Σαρ μπορεί τι επηρεάνεν-αμέν ο πράγματα σο λένα αμαρί ζορ;

⁹ O πράγματα σο λένα αμαρί ζορ μπορεί τι κερέν αμαρί πίστη μπίζουρανι. Να αβέλα-πες μα τι ντας ιτς σημασία αμαρέ προβληματέντε. Κάτι ασακό κα σικαβέλας ότι να ισινάμ υπεύθυνα τζενέ. Ντα ισί μπαγιά ότι μπάζιμα νιωθίνασα ότι νανέ-αμέν ζορ. Δεν πρέπει όμως τι τθεράς συνέχεια αμαρέ γκοντιάτε ο προβλήματα. Άμα κα κεράς-λες ανταβά μπορεί τι μπιστράς ο σουκάρ πράγματα σο κα ανέλ ο Ιεχωβά. (Αποκ. 21:3, 4) Ο προβλήματα μπορεί τι κερέν-αμέν τι χασαράς αμαρί ζορ ντα τι μουκχάς-αμέν. (Παρ. 24:​10) Αλλά δεν πρέπει τι μουκχάς τι αβέλ-πες ανταβά.

10. Σο σικλιόνα κατά γράμμας εκχέ πφενιάκο;

¹⁰ Ντικχέν σαρ ατσσικιαρντάς πι πίστη ζουρανί εκ πφεν κατά Ηνωμένες Πολιτείες καζόμ αρακχαβέλας πι ρομές σο ισινέ μπουτ νασφαλό. Σε εκ γράμμας σο μπουτσσαντάς κο κεντρικά γραφεία, γραφιντάς: «Επειδή νακχάσα ανταβά πρόβλημας, μπάζιμα τθεράσα άγχος ντα χασαράσα αμαρί ζορ, αλλά μπεκλεντίνασα τι αβέν πιο λατσσέ ντιβεσά. Εκτιμίναβα μπουτ σαρέ οντουλά σο ντέλα-αμέν ο Ιεχωβά για τι μπαριαράς αμαρί πίστη ντα τι λας οπρ’ αμέντε. Τθεράσα μπαγιά ανάγκη ανταλά συμβουλές ντα ο πράγματα σο ντένα-αμέν ζορ. Βοηθίνενα-αμέν τι τσσίντας ανγκλάλ ντα τι νταϊντίνας ο δοκιμασίες σο τσσουβέλα αμένγκε ο Μπενγκ». Κατά λάφια ανταλέ πφενιάκε σικλιάσα ότι μπορίνασα τι νταϊντίνας ο πράγματα σο λένα αμαρί ζορ! Σαρ; Τι ντικχέν ο προβλήματα σαρ δοκιμασίες κατά Μπενγκ. Τι αβέν σίγουροι ότι ο Ιεχωβά κα κοβλιαρέλ τουμαρί ντουκχ. Ντα τι εκτιμίνεν ο πνευματικός χαμπέ σο ντέλα-τουμέν.

11. Καλά ερωτήσεις πρέπει τι κεράς αμαρέ νεαυτόσκε για τι ντικχάς άμα αμαρί πίστη ισί ζουρανί;

¹¹ Ντικχένα ότι τουμαρί πίστη πρέπει τι αβέλ πιο ζουρανί; Ο τελευταία χάνικ μασεκά, μπορισάλεν τι νασκιαρέν ι μπουτ ανησυχία; Ατσσικιαρντέν-τουμέν για μα τι ασουνέν οντουλέν σο ισί αποστάτες ντα για μα τι χαν-τουμέν λέντζαρ ι ψεματένγκε σο βακερένα; Μπορισάλεν τι ντεν-λεν πέρα ι πραγματέντζαρ σο λένα τουμαρί ζορ; Άμα βα, τουμαρί πίστη ισί ζουρανί. Πρέπει όμως τι ατσσάς τζανγκαντέ σόσκε ο Μπενγκ προσπαθίνελα γιαβερέ-ντα τροπόντζαρ τι κερέλ αμένγκε ζιάνι. Για τι ντικχάς ακανά εκ ανταλένταρ.

ΑΡΑΚΧΑΒΕΝ-ΤΟΥΜΕΝ ΓΙΑ ΜΑ ΤΙ ΑΒΕΝ ΜΠΙΤΣΑΛΕ ΓΙΑΚΧΑΚΕ

12. Σο μπορεί τι αβέλ-πες άμα ισινάμ μπίτσαλε γιακχάκε;

¹² Άμα ισινάμ μπίτσαλε γιακχάκε, αμαρί πίστη, σο ισί σαρ ασπίδα, να κα αβέλ ζουρανί ντα κα κεράς πιο χάνικ πράγματα ι Ιεχωβάσκε. Ο απόστολος Παύλος βακερντάς: «Καέκ τζενό σο υπηρετίνελα σαρ στρατιώτης να ανακατούντιβελα κο εμπορικά πράγματα κι ζωγιάκε, για τι δεχτίνελ-λες οντουβά σο κερντάς-λες στρατιώτης». (2 Τιμ. 2:4) Κι πραγματικότητα, ο Ρωμαίοι στρατιώτες δεν έπρεπε τι κερέν καέκ γιαβέρ μπουτί. Σο μπορεί τι αβέλας-πες άμα κάποιος να κα ακολουθίνελας ανταγιά οδηγία;

13. Σόσκε δεν έπρεπε τι ασχολίντιβελ εκ στρατιώτης γιαβερέ πραγματέντζαρ;

¹³ Ανέν τουμαρέ γκοντιάτε ακαβά. Ο στρατιώτες κερένα εξάσκηση πρωί πουμαρέ σπαθίντζαρ, αλλά εκ τανό νανέ οτθέ. Γκιλό κι πόλη για τι πουτρέλ εκ μπακάλι. Κο απόγευμας, ο στρατιώτες ντένα πουμαρέ σαατίσταρ για τι ντικχέν σαρ ισί λένγκε πανοπλίες ντα τι μορέν πουμαρέ σπαθιά. Αλλά ο στρατιώτης σο τθερέλα ο μπακάλι ντέλα πι σαατίσταρ για τι ετοιμάνελ ο πράγματα σο κα μπικινέλ ο γιαβέρ ντιβές. Όμως, ο γιαβέρ πρωί οτθέ σο να μπεκλεντίνενας αβένα ο ντουσμάνια. Καβά στρατιώτης κα αβέλ έτοιμος ι τζενγκίσκε ντα κα κερέλ ο γκι πι διοικητίσκο; Τουμέν καλές κα μανγκένας πασέ τουμέντε​—εκχέ στρατιωτής σο ετοιμασάλο ι τζενγκίσκε ή εκχές σο ασχολισάλο γιαβερέ πραγματέντζαρ;

14. Καβά πράγμας ισί σημαντικός αμένγκε σαρ στρατιώτες ι Χριστόσκε;

¹⁴ Αμέν ισινάμ σαρ οντουλά λατσσέ στρατιώτες. Ο πιο σημαντικός πράγμας αμένγκε ισί τι κεράς ο γκι αμαρέ Διοικητένγκο, ι Ιεχωβάσκο ντα ι Χριστόσκο. Ανταβά ισί αμένγκε πιο σημαντικός σαρέ οντουλένταρ σο τθερέλα τι ντελ-αμέν ι Μπενγκέσκο ντουνιάς. Κανονίνασα τι τθεράς ο σαάτι ντα ι ζορ σο χρειαζίντιβασα για τι υπηρετίνας ι Ιεχωβάς ντα τι ατσσικιαράς ζουρανί αμαρί ασπίδα ντα σαρί ι γιαβέρ πνευματική πανοπλία.

15. Σο βακερντάς ο Παύλος, ντα σόσκε;

¹⁵ Πρέπει τι αβάς συνέχεια τζανγκαντέ! Σόσκε; Ο απόστολος Παύλος βακερντάς ότι «οντουλά σο μανγκένα τι χουλάνιβεν» κα “νασέν κατά πίστη”. (1 Τιμ. 6:9, 10) Ο λάφι «νασάβα» σικαβέλα ότι μπορεί τι λας αμαρέ γιακχά κατά πράγματα σο μανγκέλα ο Ιεχωβά άμα μαράσα-αμέν τι τθεράς πράγματα σο να χρειαζίντιβασα. Αζομάν κα μπορίναας τι μουκχάς τι τζαν αμαρέ γκίστε «πράγματα σο νανέ λογικά ντα ανένα προβλήματα». Αντίς τι μουκχάς-λεν αντρέ αμαρέ γκίστε, πρέπει τι αγαβάς ότι ο Μπενγκ χρησιμοποιήνελα ανταλά πράγματα για τι κερέλ αμένγκε ζιάνι.

16. Καλά ερωτήσεις πρέπει τι ανέλ αμαρέ γκοντιάτε η ιστορία σο ισί κο εδάφια Μάρκος 10:​17-22;

¹⁶ Βακερέν ότι τθεράσα μπερεκέτι λοβέ για τι κινάς μπουτ πράγματα. Ισί κακός τι κινάς πράγματα σο μανγκάσα αλλά να τθεράσα-λεν μπαγιά ανάγκη; Όχι πάντα. Σκεφτίνεν ακαλά ερωτήσεις: Ατζέ-ντα άμα τθεράσα λοβέ εκχέ πραγμάσκε, τθεράσα ο σαάτι ντα ι ζορ τι χρησιμοποιήνας-λες; Μήπως κα αρχίναας τι μανγκάς μπουτ αμαρέ υλικά πράγματα; Κα μπορίνελας η αγάπη για το υλικά πράγματα τι κερέλ-αμέν τι αβάς σαρ οντουβά τερνό σο να κερντάς πιο μπουτ πράγματα ι Ντεβλέσκε σαρ βακερντάς λέσκε ο Ιησούς; (Διαβάνεν Μάρκος 10:​17-22) Καζόμ πιο λατσσό ισί τι τθεράς εκ απλή ζωή ντα τι ντας αμαρέ σαατίσταρ ντα αμαρέ ζοριάταρ για τι κεράς οντουβά σο μανγκέλα ο Ντεβέλ!

ΤΙ ΑΣΤΑΡΕΝ ΣΙΚΙΣ ΤΟΥΜΑΡΙ ΑΣΠΙΔΑ

17. Σο δεν πρέπει τι μπιστράς ποτές;

¹⁷ Δεν πρέπει ποτές τι μπιστράς ότι ισινάμ εκχέ τζενγκίστε ντα ότι κάθε ντιβές πρέπει τι αβάς έτοιμοι τι πολεμίνας. (Αποκ. 12:​17) Ο πφραλά ντα ο πφενιά ναστί ασταρένα βον ι ασπίδα αμένγκε. Πρέπει αμέν τι ασταράς-λα σικίς.

18. Σόσκε ο στρατιώτες ασταρένας σικίς πουμαρέ ασπίδες κο πουρανέ μπρεσά;

¹⁸ Κο πουρανέ μπρεσά, ισαρένας ι στρατιωτέν σο ισινέ μπίνταρανε. Κα λατζάντιβενας όμως άμα κα βουρτίνενας ντα να κα τθερένας πουμαρί ασπίδα. Ο Ρωμαίος ιστορικός Τάκιτος γραφιντάς: «Τι μουκχέλ εκ στρατιώτης πι ασπίδα ισί η πιο μπαρί λατζ». Οντουλέσκε ο στρατιώτες ασταρένας σικίς πουμαρέ ασπίδες.

19. Σαρ κα ασταράς σικίς αμαρί ασπίδα;

¹⁹ Αμέν ασταράσα σικίς αμαρί ασπίδα άμα τζάσα σαρέ κο συναθροίσεις ντα άμα κεράσα λάφι κο γιαβερά ι Ιεχωβάσκε ναβέσκε ντα λέσκε Βασιλειάκε. (Εβρ. 10:​23-25) Επίσης, διαβάνασα ο Λάφι ι Ντεβλέσκο κάθε ντιβές ντα προσευχίντιβασα κο Ιεχωβά τι βοηθίνελ-αμέν τι κεράς αμαρέ ζωγιάτε σο-ντα βακερέλα αμένγκε. (2 Τιμ. 3:​16, 17) Άμα κα κεράς-λεν ανταλά, τίποτα οντουλένταρ σο χρησιμοποιήνελα ο Μπενγκ να κα κερέλ αμένγκε ζιάνι σο κα ατσσόλ. (Ησ. 54:​17) Αμαρί μπαρί ασπίδα κα αρακχαβέλ-αμέν. Κα ατσσάς σταθεροί, πας πασέ αμαρέ πφραλέντζαρ ντα πφενίντζαρ. Αντικάς κα κερδίνας ο τζένγκι σο κεράσα κάθε ντιβές, ντα ο πιο σημαντικός, κα τσσίντας κατά Ιησούς κάνα κα κερδίνελ ο τζένγκι σο κα κερέλ ι Μπενγκέσαρ ντα οντουλέντζαρ σο ισί λέσαρ.​—Αποκ. 17:​14· 20:10.